Revenge Sevenfold {Unicode} [Myanmar Translation]

1.​ဟွေ့ရင် နင်ကအမှိုက်ပဲ

လက်သည်းက လက်ဖဝါးထဲကို ခပ်နက်နက်နစ်ဝင်သွားပြီး သွေးတချို့စီးကျလာတယ်။

"သူ့ကိုတွေ့ပါရစေ"

မျက်ဝန်းတွေနီရဲနေတဲ့ မိန်းကလေးက ကြီးမားတဲ့စံအိမ်ရှေ့မှာ တုန်လှုပ်စွာရပ်နေရင်း ပြောလိုက်တယ်။

သူမပါးပြင်ပေါ်မှာ မျက်ရည်တွေပေကျံနေပြီး သူမရဲ့အောက်နှုတ်ခမ်းကို အားနဲ့ဖိကိုက်ထားလေတယ်။ သူမကအရိုးပေါ်အရေတင်အောင် ပိန်လွန်းလှတယ်။ လေခပ်ပြင်းပြင်းတိုက်ခတ်ရင်တောင် လွင့်ထွက်သွားတော့မလိုပဲ။

သူမရဲ့မျက်နှာချင်းဆိုင်မှာတော့ နောက်ထပ်မိန်းကလေးတစ်ယောက်ရှိနေတယ်။ သူမတို့နှစ်ယောက်ရဲ့ အသွင်အပြင်တွေက ကောင်းကင်နဲ့မြေကြီးလိုကွာခြားလှတယ်။

ဟွေ့ရင်ရဲ့ဆံပင်တွေက မှိန်ဖျော့နေပြီး နျန်ကျန်းရဲ့ဆံနွယ်တွေက ထူထဲပြီး တောက်ပနေတယ်။ ဟွေ့ရင်ရဲ့ပါးပြင်က ခြောက်သွေ့ကြမ်းတမ်းနေပြီး နျန်ကျန်းရဲ့ပါးပြင်က နူးညံ့ပြီး နှင်းဆီသွေးထင်နေတယ်။ ဟွေ့ရင်ရဲ့ခန္ဓာကိုယ်က အားနည်းပြီး ဖျားနာနေပုံပေါ်တယ်။ နျန်ကျန်းရဲ့ကိုယ်ခန္ဓာကတော့ ကျန်းမာသန်စွမ်းပြီး ကျက်သရေရှိလှတယ်။

သူတို့ကိုမြင်တဲ့ဘယ်သူမဆို ဟွေ့ရင်ဟာ တစ်ချိန်တုန်းက အသက်ရှူမှားလောက်တဲ့အလှအပကို ပိုင်ဆိုင်ပြီး သူမကိုကြည့်မိတဲ့ ယောက်ကျားအားလုံးရဲ့အာရုံကို ဖမ်းစားနိုင်ခဲ့တယ်ဆိုတာ ယုံမှာမဟုတ်လေဘူး။

အဲ့ဒါ လုရှန်းကြောင့်ပဲ။ ဟွေ့ရင်က သူ့အချစ်ကိုရယူနိုင်ဖို့ အားလုံးကိုပေးဆပ်ခဲ့တယ်။

အိမ်ရှင်မကောင်းတစ်ယောက်ဖြစ်လာဖို့ သူမကိုယ်သူမနှိမ့်ချနေထိုင်ခဲ့တယ်။ ပြီးတော့ သူ့မိသားစုရဲ့အသိအမှတ်ပြုတာကို ခံရဖို့ သူမရဲ့အိပ်မက်တွေကို ချိုးနှိမ်ထားခဲ့တယ်။ နျန်ကျန်းပေးတဲ့ *ပျားရည်ဆမ်းတဲ့ရှာလကာရည်လိုအကြံတွေကြောင့် သူမအတွက် မရှိမဖြစ်လိုအပ်တဲ့အရာတွေကလွဲလို့ တစ်ခုခုဝယ်လိုက်မိရင်ကို လုရှန်းနဲ့သူ့မိသားစုက သူမကို ပေါ့ပေါ့နေပေါ့ပေါ့စားတဲ့မိန်းမလို့ထင်သွားလိမ့်မယ်၊ သူမကိုယ်သူမဂရုစိုက်တာက အပိုတွေလုပ်နေတာပဲလို့ ယုံကြည်ခဲ့တယ်။