يوميات شاب عراقي

طباع وعادات وأمنيات

ميخالف تتعرفون ع كم شغلة عني 😉

احب اشرب مي قبل الأكل شي ضروري ومهم جداً بحيث مااگدر استغني عنه.

ريوگي لازم يكون بيض لو باقلاء وبيض لو معلاگ .. عداهن مااكل أي شي ..

ماأحب أسولف هواي وما احب أسمع أي شي مابي فايدة ،،

مااحچي أصغر أسراري لأي شخص مهما كان قريب مني وبالذات الأسرار المشتركة ..

أحب الوحدة والعزلة والهدوء ،،

أحب الشتاء والربيع والبرد والأمطار ..

أفضل السكن بغرفة بالريف على السكن بقصر بالمدينة ،،

أتمنى يكون عندي بستان كبير أو حديقة كبيرة لأني أحب الزراعة والنباتات ..

مو متخلف بس مااحب هواي شغلات من (التطور) اللي وصلنا له وهواي مرات أتمنى لو باقين مامتطورين أفضل ،،

مو متدين بس أصلي وأصوم وأعرف هواي شغلات عن ديني الحمدلله

الأغاني أسمعها إذا چنت بالسيارة أو إذا سمعت أغنية بالصدفة وعجبتني انزلها واسمعها

أحب المسلسلات والأفلام الكوميدية والدرامية الواقعية سواء الاجنبية أو العربية وما احب أفلام الرعب والخيال العلمي.

بعدني أتابع أفلام كارتون ، عمري 27 سنة وراح أبقى أتابعها 🥰

أحب الألوان الأسود والرصاصي والأبيض ،،

أحب أسمع أغاني فيروز  الصبح خصوصاً بالشتاء  وأكثر أغنية تعجبني (أديش كان في ناس) من أسمعها انقهر عليها .. تگول من تمطر الدنيا هواي ناس تنطر ناس واني بأيام الصحو محد بحالي ،، 🤣😂

مااحكم على أي شخص من خلال الشي اللي يسويه أو يفكر بي .. لأن كل شخص عنده أسبابه ،، بس أحكم ع الشخص من خلال طريقة تعامله وياي ..

مااحب أصير مكان أحد .. اني راضي ومقتنع بمكاني ،، كل شخص مر بظروف صعبة وهواي ناس فاقدة أشياء مقابل الأشياء اللي نحسدهم عليها .. لذلك اني احمد ربي واشكره واحاول أكون أفضل من الحال اللي اني بي .. ومالي علاقة بالباقين واتمنى لهم كل خير.

يجوز #يتبع ويجوز لا 🙂