Jin Ki Jawaani, Yoongi Ka Budhapa

Ch - 1- Woh Rahesyamay Messages

Third Person's POV :

Mumbai jaise sheher mein jaha zindagi bilkul nahi thamti, ek 26 saal ka introvert ladka Min Yoongi rehta tha. Akal se sayana, shakal se sundar (ladka nahi handsome) aur shaanti (ladki nahi peace) ka pujaari,  jo apne age ke hisaab se kuch zyada hi serious tha. Humesha apne ghusse ka pradarshan dena ya kisi gham mein duba rehna iski personality ka ek ahem hissa tha. Girlfriend toh thi nahi aur banane ki khwahish bhi nahi rakhta tha. Dost zabardasti date pe bhej bhi dete toh khudko reject karwa ke swag ke saath waapis laut aata. Har koi iske savageness ka shikaar tha jo haste-khelte logon ko rulaane ke kaam aata tha. Bhale dur se dekhkar samjhne mein mushkil hoti par yeh Sunny Deol ka fanboy bhi tha. Room ke har ek kone mein Sunny Deol ke ghussail posters lage hue the. Room ke andar se zor zor se awazein aati toh wahase pass hone waale uske family members samjh jaate ki yeh Sunny Deol ki kisi film ka dialogue maar raha hai. Ghatak aur Gadar toh maano 100 se zyada baar dekh rakhi thi isliye toh inn filmon ke dialogues neend se uthake bhi puchlo toh bina soche samjhe muh se apne aap nikal padne ki puri guarantee thi. Fanboying ki hadein toh tabh paar hui jabh usne "Dhai kilo" waala dialogue sunke dumbells ke dwara apne haath ko dhai kilo ka banane ki koshish ki jisme usko safalta bhi nahi mili.

Bhale hi Yoongi ke kayi dost berozgaar the par woh khud bada kaamgar vyakti tha. Call center mein 9 se 5 waali naukri thik thak chal rahi thi side by side woh lyricist ke taur pe bhi accha kama leta tha. Rishtedaro ko beech mein taang ghusane ki aadat thi par unke muh bandh karne mein isne bhi mastery kar rakhi thi. Kabhi Chacha ji ya kisi Aunty ke muh se apne baccho ki tarraki ki baat nikalti toh woh Instagram kholke unke peeth peeche ki jaane waali asli tarraki se unko waakif kara deta. Isliye toh sabhi log usse dar darke jeete the.

Yoongi apne job ke beechke break mein office canteen se Idli sambar ke maze utha hi raha tha utne mein use ek phone call aaya. Phone pe dhyaan gaya toh usne apne best-friend Jin ki goggle waali embarrassing contact photo ko paya.

Kim Seokjin 27 saal ka bada hi anokha vyakti tha. Koi isko handsome kahe na kahe yeh khudko zarur bol liya karta tha. Adventurous life jeene aur humesha khush rehne ko usne apne  life ka mantra bana liya tha. Khaana aur khilana iski anginat aadaton mein se ek thi. Jabhi koi iske gharme jaata yeh usko itna khaana khilata ki uska apne ghar laut pane mein mushkilon ka samna karna padhta. Issi cheez ko usne business mein convert karne ke baare mein bade dhyaanse socha aur issi badolat usne gharse hi mess operate karne ki shuruaat ki.

Jin apne ma-baap se dur rehta tha darasal woh Patna se Mumbai job ke silsile mein aaya tha par fir isse uska mann uth gaya. Parental pressure mein MCom toh kar baitha par job karne ki tanik bhi iccha nahi thi. Thoda idhar udhar se loan leke aur paise jugadkar ab mess mein hi puri kasar lagaya karta tha.

Jin ki girlfriend bhi thi aur inki love-story bhi apne aap mein hi unique thi. Jin ki girlfriend Mini ek college student thi jo 2 saheliyo ke saath sharing pe ek room mein raha karti thi. Ek din woh mess ki talash mein dar dar bhatak rahi thi tabh uski nazar Jin ke gharke aage lage board "EatJin Food Services" pe padhi. Usne andar jaake dekha toh ek handsome sa ladka apron pehne haath mein karchi liye ek pyaari si smile ke saath kitchen se nikla. Usne menu aur rates puchkar tasting ki toh matar paneer se toh pyaar hua hi par saath hi saath matar paneer banane waale Jin se bhi ho gaya. Jabh usne Jin se business card maanga toh uski ungliyaan Jin ki ungliyon ke against brush hui aur woh sharm se laal ho gayi. Woh Jin ko yuhi menu puchne ke bahane aksar phoncall karti thi aur flirt karne ki koshish mein lag jaati. Yeh silsila chalta gaya aur dekhte hi dekhte dusri ore se bhi pyaar ho gaya.

Khair, Yoongi Idli sambar ko side mein rakhkar phone uthane ke mood mein nahi tha isliye usne ignore karna hi behtar samjha. Phone na uthane ki wajahse Jin ne bhi message ka sahara liya. Yoongi ne eyeroll karke finally message padh reply dene ke baare mein socha par message padhte hi woh darr sa gaya.

Handpump Jin :
YOONNNGGGIIIIII

HELP MEEHHKHVJjN

PLEASEJGCGHBKmM

I'M IN DANGERhFTtBM

ADDRESS - **************

Yoongi ne call lagaya toh phone connect hone ka naam hi nahi le raha tha. In Rahesyamay messages ke peeche ka kaaran pata lagana zaruri bann gaya tha. Apne idli sambar ka tyaag karke Yoongi full speed mein office ke bahar dauda aur working hours mein hi apni bike pe baith wahase champat ho gaya. Diye gaye address pe pohochne mein 10 minute se zyada nahi lage. Jabh usne hadbadi mein sir ghuma ke yaha waha Jin ko dhundhne ki koshish ki toh usko ek traffic police waale se jhagadta hua paya.

"Tumhe pata nahi mera baap kaun hai😡" Jin police waale ko dhamki de raha tha.

"Oh hero, baap ki dhamki na kisi aur ko dena Activa leke side mein aa" Police waala bhi rutbe mein bol padha.

Yoongi ne police waale se baat ko samjhne ki koshish ki toh paya ki Jin bina license gaadi leke ghum raha tha. Yoongi ne Jin ko aise ghusse ke saatg ghoorke dekha ki police waala kuch kare na kare woh Jin ki dhulai zarur karega. Yoongi ne settlement kar mamla yahi khatam karne ki baat ki toh usme bhi Jin ko problem hone lagi. Matlab madat karo aur chaar baatein bhi suno, bas yehi bacha tha ab jeevan mein. Jabh maamla thanda hua toh dono ke jaanme jaan aayi.

"Mera asli yaar hai tu." Jin hug karne laga toh Yoongi ne usne dhakke se dur kar diya.

"Bhakk😡, tu ek number ka kamina hai, mujhe laga kahi accident toh nahi karwa baitha isliye main yaha kaam-dhandha tyaagke turant aa pohocha. Woh toh chalo thik hai, idli sambar jo pure 50 Rs ka hota hai usko bhi pura khaana naseeb na hua sabh teri wajahse. Teri girlfriend bhi haina usko kyu nahi bulaya? Baat mat kar ab mujhse😡" Yoongi ka ghussa kam hone ka naam nahi le raha tha.

"Arre mere jigri yaar, mere sansar, maaf karde. Jaha tak baat rahi idli sambar ki woh main tujhe khila dunga. Aur Mini se mera thoda jhagda chal raha hai isliye usko nahi bulaya.
License ke bina gaadi chalana ek adventurous experience hai aur life mein adventure ke bina maza nahi aata" Jin ne samjhaya.

"Main bol raha hu yeh adventure tujhe ek din le dubenga." Yoongi ne chetavani di.

"Kuch bhi nahi hoga, zara tu bhi adventure kar liya kaise muh latka ke ghumta rehta hai. Tujhe dekhke kisiko bhi yeh galatfaimi ho sakti hai ki tera peth kharab hai. Kahi kisi din koi tujhe Kayam Churan na offer karde😂." Jin ne chidhate hue kaha.

Yoongi ne apne khaulte hue ghusse ka fir pradarshan diya.

"Ab chal idli sambar khaane, treat meri tarafse" Jin ne offer kiya aur dono hi pass ke South Indian Restaurant mein kota pura karne  chale gaye.