Jin Ki Jawaani, Yoongi Ka Budhapa

Ch - 3 - Krodhit Yoongi

Jin's POV:

Maine apni aankhein kholte hi jhatt se bandh kar di, sir dard jo ho raha tha. Aisa laga jaise kisi ne zor se ghuma ke frying pan maara ho.
Kal ki ghatnayein yaaddasht mein dhundhli si thi. Bar aur Yoongi dimaag mein lagatar ghoom rahe the.

"Paani aur pain killers lele" yeh awaaz mere kaano pe padhi. Maine bina aankhein khole hi uss insaan ko pehechaan liya. Jabh aankhein kholi toh dekha Yoongi as usual apne poker face ke saath paani ka glass aur tablets aage kiye khada tha. Aas paas dekhne par pata chala ki main mere bed pe tha.

Maine bina Yoongi se nazrein milaye aur bina kuch kahe pain killers khake paani piya. Jabh himmat karke nazrein milayi toh Yoongi shaanti se meri ore dekh raha tha. Uski shaanti mujhe aane waale kisi toofan ka sanket de rahi thi. 

Jaisa main expect kar raha tha, waisa kuch bhi nahi hua. Yoongi mere bedroom ke hi ek couch pe jaake baith gaya aur waha rakhi Champak comics padhne laga.

"Ab kuch bolega bhi? Gaali hi maar de par yeh cold treatment na diya kar" maine Yoongi ko full tashan mein bola.

Uske chehre pe koi change nahi tha. Funny comic padhkar hasi aani chahiye par Yoongi ko dekhkar aisa lag raha tha maano woh apne dost ko maarne ke 101 tareeke dhundh raha ho. Ab woh Champak comics rakhkar  Phantom comics mein jhankne laga. Itna jaldi toh mera mood bhi nahi badalta hai, jitne jaldi iske comics badalte hai.

Uske phone pe achanak notif aaya toh woh comic baju mein rakhke phone dekhne laga. Phone mein dekhte dekhte woh smile kar raha tha.

Maine use ek takiya phenkke maara fir bhi woh na hila. Fir ek chaddar ka gola banakar uske sir pe feka fir bhi muh se ek shabd nahi.

Bed se uthkar main uske baju jaake baith gaya. Uske phone mein jabh jhankne ki koshish ki toh usne phone side mein rakh diya.

"Hello, Mr. Min Yoongi, aap 2 shabd kahenge?" maine vinamratapurwak pucha.

"Do shabd" Yoongi ne chaturai se jawab diya.

"Kuch toh bol" main bhadak utha.

"Kuch toh" woh bhi kam nahi tha.

"Chal sorry" maine dheemi awaaz mein kaha.

"Kya kaha? Mujhe sunai nahi de raha hai" Yoongi kuch zyada hi hoshiyaari dikha raha tha.

Main bhi kuch kam nahi tha. Maine waha rakhi comic cheene aur usko roll karke Yoongi ke kaano pe lagakar zor se sorry kaha.

Yoongi ko chadha ghussa, uske haath ki khaane se pehle hi main uthkar bhaagne hi waala tha jab usne mere haath ko zor se pakda aur apne nakhoon gadhane laga. Sahi mayeno mein yeh ek billae waali harkat thi. Maine bhi apne daaton se prahar kiya aur uske ussi haath ko kata. Jaise hi mera haath release hua hum dono hi phoot-phootke hasne lage.

Meri nazar wall clock pe padhi toh pata chala ki subah ke 11 baj rahe the.
Dhyaan mein aaya ki aaj toh Monday tha, iska matlab Yoongi ke office mein pohochne ka samay nikal chuka tha. Maine jabh yeh baat Yoongi se puchi toh woh kehne laga ki mere jaise insaan ko woh hangover mein akela chodhkar nahi jaa sakta tha isliye usne off le liya. Uska thoughtful swabhav dekhke mann toh kar raha tha ki abhi jaake uske gaal kheenchu par fir aisa karne pe dhulai hone ke chances 100% the.

"Jin, chal aaj shopping chalte hai. Blue T-shirt ke liye jo tune itne aansu bahaye hai woh dila ke toh deni padegi warna kaise chalega." Yoongi ne wink ke saath jawab diya.

Embarrassment se mere kaan laal ho gaye the.

"Ab Bollywood heroine ki tarah sharmana bandh kar aur tayyar ho ja, thodi der mein nikalte hai" Yoongi ne yeh keh ke mujhe aur embarrass kar diya.

Usne mere hi kapde bina permission liye hakh se uthaye aur bathroom  mein change karne chala gaya.

Maine uske aane tak couch pe hi wait karne ka faisla kiya itne mein uske phone pe notification aaya. Ekdum se meri nazar contact name "Jhope😳" pe padhi. "Main tumse milna chahunga😊" yeh message usi Jhope ne bheja tha. Mera Savdhaan India dekhne waala shakki dimaag Bullet Train se bhi tezz daudne laga. Kaun hai yeh ladka🤔, pata toh lagana padega.

*********

Hum meri Activa pe double seat ja rahe the. Main drive kar raha tha aur Yoongi mere peeche baitha hua tha.

"Yoongi, itne dur kyu baitha hai thoda paas aa aur mujhe pakadke baith, speed breaker aaya toh udkar gaadi ke bahar land ho jayega" maine use sujhav diya.

"Main thik hu, koi zarurat nahi lag rahi" Yoongi ne nakaar diya.

Achanak se speed breaker aaya aur mere adventurous aur shararti dimaag mein idea aaya. Maine jaanke speed moderate rakhi taaki Yoongi ko sabak sikha saku. Speed breaker pe jaise hi gaadi kudi, Yoongi ne mujhe kaske pakad liya.

"Ab kyu pakda😏😜?" maine windshield wiper jaise hasne ke baad pucha toh usne mujhe peeth pe mukka maara.

************

Hum shopping karne mall mein gaye aur Yoongi ne paise kharch karne ki zimmedari li. Dur se dekhkar bohot log use kanjoos samjhte the par banda bada dildaar tha. Main kitna bhi pareshaan kyu na kar du, woh mere liye kuch bhi kar sakta tha. Aisi thi humari dosti.

Humne mall mein alag alag dukaanein dekhi. Kaafi jagah muft mein trial kiya aur bina kuch khareede hi bhaag bhi gaye. Aakhir mein ek aache brand ke kapde hum dono ko hi pasand aaye. Yoongi ne khudke liye kuch beanies li aur mujhe  jo bhi T-shirt pasand ho woh lene ke liye kaha. Main ghadi ghadi price tag dekhkar mann badal raha tha kyuki main nahi chahta tha ki Yoongi mujhpe zyada paise kharch kare par usne mujhe paiso ki chinta kiye bina jo marzi woh lene ke liye kaha.

Shopping ke baad hum lunch karne gaye. Lunch aane tak humne juice peene ka decide kiya. Maine mango toh usne ruh afza mangaya. Hum juice pe hi rahe the tabh maine usko Jhope ke baare mein pucha, banda juice pe choke kar gaya. Maine uski peet thapthapai aur usko paani pilaya aur usne purana classmate keh kar baat taal di. Uske hav bhav dekhkar main samjh chuka tha ki ya toh yeh jhooth bol raha tha ya fir kuch chupa raha tha. Maine baat ko nahi ghasita aur samay aane pe Yoongi khud bata dega yeh socha. Lunch ke bhi paise lakh mana karne ke baad bhi usi ne diye.

Jab hum ghar jaane Activa ke paas  pohoche toh mujhe achanak se usko gale lagakar thank you bolne ki iccha hui jo maine bilkul nahi taali. Usne mere hug ko return karte hue kaha, "Ab zyada senti mat ho, mujhe mere ghar drop karke tu apne ghar ja, mess ke hours shuru hone waale hai." Maine ek badi si smile di aur hum wahase nikal gaye.