Jin Ki Jawaani, Yoongi Ka Budhapa

Ch 5 - Yaara O Yaara

Jin's POV:

Yoongi badla badla sa vyavhaar kar raha tha. Uske chehre pe alag hi rahat dikhai deti thi maano Eno khaakar acidity se chutkara mila ho. Khudke phone mein dekhke aise hasta tha jaise koi Akash Chanchlani ka funny video dekhke hasta hai. Mujhe laga kahi pyaar vyaar mein toh nahi padh gaya? Fir realise kiya, yeh namumkin hai.

Kuch hi mahine pehle ki baat lelo, maine haath pair jodke Yoongi ko  meri purani dost ka number send kiya tha. Usse baat karke raat ko Good Night message bhejne ki jagah Yoongi ne use daayan ka gif bhej diya. Batao bhala, kaun aisa karta hai? Meri dost ne Yoongi se baat karna bandh toh kiya hi, saath mein mera bhi 1 hafte tak call nahi uthaya😭. Aisa ladka pyaar mein kaise padh sakta tha?

Mere dimaag mein aaya idea. Maine uss insaan ko phone lagaya jo meri iss khufiya raaz se parda uthane mein madat kar sakta tha.

"Hello. Tujhe mera ek kaam karna hoga. Iss kaam ke badle tere gharpe Kurkure aur Lays ke 2 bakso ke saath 1 mahine ke free Banana milk ka supply pohoch jayega. Agar manzoor hai toh kaali pahadi ke peeche aake shaam 5 baje mil." Maine phone ko jeb mein daala aur iss saude ke liye tayari karne laga.

Shaam 5 baje, main kaali pahadi ke peeche pohoch gaya. Apne kaale chashmeh ko thik karke, time dekhte hue main Phir Hera Pheri ke Akshay Kumar jaise uss insaan ke intezaar mein khada ho gaya. Itne hi der mein mere kaan mein kisine dheemi awaaz mein phusphusaya. "Maal laya."

Andhera badh raha tha. Darr ke maare main kaapne laga. Yeh pakka bhooth hai, meri mann ki aatma ne kaha. Uss bhooth ne jabh mujhe backhug kiya, aur bhaiyya bola tabh mujhe iss bhooth ke friendly hone ka ehsaas hua. "Arre waah, bhooton ko bhi izzat karna aata hai, insaano se acche hai yeh toh."

Jabh main palta toh maine bhooth nahi par uss vyakti ko paya jo mujhse milne aane waala tha. Jungkook uska naam tha. Mohallae ki har taaza khabar jaise kiske bacche ka mundan hai, kiska chakkar kiske saath chal raha hai, inn baaton ki jaankari  kisiko ho na ho Jungkook ko humesha rehti thi. Ek baar toh Jungkook ne premi jode Jackson aur Jinyoung ko bhagane mein madat bhi ki thi.

Dil ka bada saaf ladka tha apna Jungkook par khaane peene ka thoda lalchi tha. Help ke badle ek rupaye nahi leta par Banana milk dedo toh yeh tumhare liye chand taare bhi tod la sakta tha.

Jin: "Arre Jungkook, tu hai? Aur kis maal ki baat kar raha hai. Main koi aise waise kaam nahi karta."

Jungkook: "Main unn Lays aur Kurkure ke bakso ki baat kar raha hu."

Jin: "Kaam wagera kiye bina teri rishwat maangne ki himaat kaise hui?"

Jungkook: "Bilkul waise hi jaise aapki Tony Kakkar jaise chashmeh pehenne ki himmat hui😂"

Main yaha isse kaam karane aaya tha ya apni beizzati karwane? Kisi aur se hi compare kar deta par Tony Kakkar?😢

Jin: "Woh sabh baatein hata, kaam ki baat pe aa. Min Yoongi pata hai?"

Jungkook: "Kahi aap ussi Min Yoongi ki baat toh nahi kar rahe jiska Pintu naam ke ladke se jhagda ho gaya tha, jiske chalte Yoongi ne badla lene ke liye Pintu ke ghar ke bahar waali deewar pe "Shulabh Shauchalay" likh ke rakh diya tha😂. Main khud bhi ek baar waha halka hone chala gaya, par jabh Pintu ke papa ne gaali maari tabh puri baat samjh mein aayi😅."

Jin: "Ha, wohi Min Yoongi. Woh mere peet peeche kya gul khila raha hai iss baat ka pata karna hai. Mujhe shak hai ki woh kisiko apna dil de baitha hai. Woh insaan kaun hai, pata lagana hai."

Jungkook: "Toh yeh baat hai..... Samjho aapka kaam ho gaya. Par apna waada mat bhulna."

Jin: "Jin ke diye hue waade kabhi jhoothe saabit nahi hote."

Iss deal ko seal karte hue humne, haath milaya.

************************************

Yoongi's POV:

Call center mein kaam karna koi aasaan baat nahi thi. Koi bhi kabhi bhi muh uthaye phone laga deta tha. Itna hi nahi, ajeeb ajeeb sawaal puchte aur farmaishein karte the

Customer 1: "Hello, maine aapse Rupa underwear ka set order kiya tha par aapne mujhe Divya underwear ka set bhej diya? Yeh kis type ka professionalism hai"

Yoongi: "Rupa ho ya Divya, underwear toh underwear hota hai. Aap tension matlo, Divya underwear bhi accha hi hai. Maine khud 5 ka set le rakha hai."

Customer 1: "Apna Divya underwear apne paas rakho. Mujhe pehenne mein koi interest nahi hai"

Yoongi: "Main kaha apna used underwear aapko gift kar raha hu." Main aapko khudka hi pehenne ke liye keh raha hu."

Customer 1: "Bewakoof aadmi, bakwaas bandh kar"

Yoongi: "Jabaan sambhal ke baat kar warna jis Cypher 5 ke verse pe kaam kar raha huna woh gaa ke tujhe diss karne mein mujhe 2 minute bhi nahi lagenge."

Mera dimaag garam hua padha tha. Aur calls lene ka mera bilkul mann nahi tha par meri kismat ko yeh manzoor kaha. Maine apna dimaag thanda karke 2nd call uthaya.

Yoongi: "Hello, main aapki seva mein kya kar sakta hu."

Customer 2: "Meri sewa mein kuch lineay hi ga dijiye"

Yoongi: "Ji yeh koi dating service call center nahi hai, product service call center hai. Aap flirt karna bandh karenge toh badi krupa hogi."

Customer 2: "Aapne hume nahi pehechana yeh jaanke hume taajjub hua."

Yoongi: "Aap kya Taimur Ali Khan hai ki aapko log pehechan jayenge."

Customer 2: "Nahi main Jhope hu, shayad tum pehechan jao."

Yoongi: "Jhope... tumhe yeh number kaha se.....???"

Jhope: "Ssshhhhh, maine tumhari delivery service se guitar mangwaya hai. Main dhunn baja raha hu, kya tum mere liye ek gaana gaoge?"

Yoongi: "Aise kaise, sabh sunn lenge."

Jhope: "Dheemi awaaz mein gao."

Aisa kaunsa gaana tha jo main Jhope ke liye gaa sakta tha? Iss baare mein main vichar karne laga. Tabhi meri zubaan par yeh gaana aaya.

Yoongi: "Yaara O Yaara Milna Hamaara Jaane Kya Rang Laayega
Ab Ek Pal Bhi Tumse Bichhad ke Ye Dil Na Reh Paayega"

Jhope: "Issshhhh"
Sharma ke Jhope ne phone kaat diya.

"Thank you Sunny Deol paaji, aapke gaane ne meri setting kardi." Yeh mann hi mann kehkar main blush karne laga.