الشيهانة
الجزء السابع
ماما والله مارايحة ويا ولا بينا علاقة..
بس خل افهمج فدوة..
فركت وجهها وحجت باعصاب..احجي كلشي
لا اكطع النعال عليج هسه..
لا عفية ماما لاا تضربيني الله يخليج..حجيتها
وانا ارجف..انهاريت لان اول مرة امي تتصرف
هيجي وياي..اعرفها عصبية وقوية وبوقت
تتعصب نبقى نرجف منها..بس اول مرة
انحط بهيج موقف..
هسه تحجين لو احط الحجاية بحلك ابوج واخوانج؟؟
حجيت برجفة وانا اريد انطق ماكدر..
جريت نفس ومسحت دموعي..ماما هو مرتين او ثلاثة
حاجاني..
بس مو شي شخصي ابد وغلاتج ..حجيتها وبجيت..
عوفي البجي وكملي ..
اي هو ساعدني ع مود الدرجة لان بهادر حاطلي
مو استحقاقي..
وليش ماحاطلج درجة زينة؟؟
ماما مو تعرفي يكرهني ..
اعرف عابت ذيج الكصة وانت غير تكليلنا
جان ابوج راح حطه عد حده..
بعد هي صارت صدفة وعرف حيادر وساعدني
وامس ..اجه..
اي واجه شراد؟
خطبني وكال انا ..
يحبج؟؟
هزيت راسي وانا مدنكة..
اي ادري بي حاط عينه عليج وامه تلوب عليج
ونسوانهم يكولن هاي التريد تخطبها ام منذر..
حاولت ابعدج عنهم لان مايناسبوج..
ماما انت مدللة وعيشتج تختلف..يعجبج تصيرين
مثل حنين؟؟تسولف امها تكعد الصبح وتخبز
وياهن وطول اليوم كراب وخطار طاب طالع..
تتحملين هيج عيشة انت؟؟
هزيت راسي ..لا ورفضته اصلا وكتله طلبك
مرفوض..
وشلون اخذتي السبحة؟
نساها وراح كلت خطية تبقى ..بس كلت من
اشوف حنين انطيها الها..
لا خليها يمي وانا اتصرف..وحجيج راح
اخذه راس مال واصدك مابينكم شي..
بس اذا عرفت مجذبة عليه يا شاها الكلية تنسيها
وازوجج لاول واحد يخطبج..
بس ماانطيج لهذا المتخلف فاهمة؟؟
هزيت راسي وسكتت..هي طلعت وخلت الباب
مفتوح وراها..
انقهرت لان انهزت ثقتها بية..
قررت اسد هالموضوع نهائياً وماافكر بي..
ماريد ماما تبقى تشك بيه واصلا انا فعلاً
مااتوافق وياه ولا اكدر اعيش
عيشته...
رجعت غطيت راسي بالللحاف وبقيت
ابجي..
مر وقت شوية وصاحت عليه ..شاهااا..كومي
تأخرنا صارت ظهر..
كمت غسلت وجهي ورحت لكيتها بغرفتها..
باوعتلي وهي تلف بحجابها..
شمنتظرة مامبدلة؟
مابيه حيل ماما ماريد اروح..
روحي بدلي وتعاي بسرعة..
ماكدرت اجادلها..رحت بدلت واجيت..
طلعنا وهي ساكتة..
لحد ماوصلنا للسوك وحاجتني..
لا تبقين مغيمة..حجيي وياج لمصلحتج..
ولو جان غير واحد مااتصرف هيج..
بس هالعائلة تنسيها وتنسين شي اسمه
حيادر..
ابد ماافكر بي بعد بس انت لا تزعلين مني
ولا تفكرين..
لا مخلية ثقتي بيج بس اخاف من هيج اشكال..
ابن العرب اذا رادله وحدة يسوي الممكن
والمستحيل حتى ياخذها..
بس مدام انت رافضته ممكن نخلص منه ..
تطمني ماما رافضته وبعد اخر مرة نحجي
بهذا الموضوع..
عفية عليج هيج اريدج..
