الشيهانه

٢٣

الشيهانة
الجزء الثالث والعشرون

............🍁............

قبل لا اجاوب حنين ع حجايتها التافهة..
ماما ردتها..عيبب شنو هالمفردات؟
انت شبيج تسوفلتي وكمتي ماتثمنين كلامج ..
ياا شبيكم اتشاقى ترى..
تتشاقين بحدود..شفتي البنية رايحة ويا من
الصبح لليل حتى تحجين هيج حجاية تعبانة..

مو مشكلة ماما..هي يعني لان عاشت
هالامور عبالها الكل مثلها..
شدعوة يابة شدعوة شحجينا..حجت وهي
تكوم..
انا صوجي كلبي عليج وخايفة ع مصلحتج..
وعافتنا وكامت..

انا عدلت كعدتي وماما اندارتلي..
خو ماصار شي؟امبين بايسج
فوك حلكج متحسس..
بس شوية ..
يعني ماطلب غير شي؟؟
لا ابد..
اي ماشي..ابقي يمي لا تكومين بعد..

ماتدرين شلون ياخذون نظرة..وهالحنين
عندج متلونة..
صدك ماما شبيج وياها الاحظج ضايجة
منها..
كلش ضايجة وخايفة عليج منها..
ليش شصار؟؟يعني سوت شي..
لا ماسوت..

يعني سبب شدتج وي حيادر هي؟؟
حجيها بالبداية خوفني بس بعدين ذبيته
ورا ظهري..
لان اعرفها تنغث منج وتحس نفسها
اقل منج..شعور نقص عدها
راح تسببلج مشاكل..

مالي علاقة بيها ماما..
راح تكابليها وتكعدين بنفس البيت..
اكيد الج علاقة..
بس انا ابتعدت عنها كلش..
البعدج عنها حيادر..
لا ماما اني لوحدي..
اي لوحدج طبعا..بس حيادر سبب خلاج
تعرفين طينتها..

كم مرة احذرج من طيبتج الزايدة..بس ماتنتبهين..
لحد ما عادتج ووكفت بطريقج انت ويا يلا
ابتعدتي عنها..
صفنت وسالتها..شلون عرفتي..

اول احتمال افكر بي ماكو غيره..ولان
دخلتلي بنفس الموشح وسوت نفسها
تحذر..بس انا كاشفة طينتها واعرف
شوكت الطمها ع حلكها..

انا خوفي عليج لان انت ماتكرهين ولا تحقدين..
راح يتعبوج هوااي..
ادعيلي ماما..اذا تحبيني ادعيلي..
الله يبعد عنج شر الناس ويوفقج..حجت وهي
صافنة..
بس حسيتها كلش انغثت من حنين وحجايتها..

ورا الاذان ردنا نطلع ماقبلو ..كالو اصلا
ذابحين ومسوين وجبة عشا..
بقينا بس ابد ماتحركت من مكاني..حيادر راسلني
وتطمن عليه خاف ماما حجت..
طمنته ماحجت اي شي..

جانو بناتهم هواي وماعرف احد غير
الي عرفوني عليهم..
البقية كلهم ينظرولي شي غريب..
يتبسبسون كدامي ..لو يسالون منو هاي
ويعبرون عبالك انا احجي غير لغة ومافهمهم..
بس هاجر كل شوية تجي يمي..تكلي هاي فلانة
هي فلانة هيج تقربلنا وانا نصهم نسيتهم
لان هواي..

بوقت الرجعة راسلت حيادر حتى يرجعنا..
شوية وخابر كال طلعو انا بالحديقة انتظركم..
بعد ماسلمنا وانطونا حلويات كومة مسوين
علاكات ع مود المولد ..
صعدت بالسيارة ..هالمرة هدوء بس
سلم حيادر وماما ردت..