الجزء_الثامن_والاربعون
#الشيهانة
فزيت الصبح حيادر ماموجود بالفراش..
باوعت ساعة سبعة الا ربع..
احس معدتي فايرة مختنكة..بسرعة كمت للحمام..
ارتاحت معدتي واستقرت ..بعدها سبحت وطلعت..
لبست ثوب قصير وبلا ردن..
طلعت حيادر مو بالصالة..رفعت البردة شفته
جاي يرش بالحديقة..
هو بيتنا من جان قديم قبل لا نشتري بي نخلة
وورد يسمو جهنمي وكم زرعة صغار..
ماكدر اطلع لان ملابسي مكشوفة..دكيت الشباك..
وهو ذب الجكارة وراح طفى الماي
ودخل..
صباحو حبيي..
صباحج ورد ..وجهج يضوي اليوم..
مرتااحة حيل..شنو تتريك؟
عساج يبعد اهلي..انا سويت الجاي وسلكت
بيض ..انت كيفج شتردين سوي..
اوكي اكل وياك بيض..علمني اسوي جاي بلييز..
سكتي لا تذكريني بجايج..
ههههه السويته الكم بخطوبة الماتتسمى..
اي ههه اباوع الوادم لسانها ثكل خفت يجطلون
يمكم ونبتلي..
مو جاي تكول جنة كريز..
ههههههه ترى مزقتني..هو شوي ثخين جان..
ولج ياثخين غير اذا زفتت بي جسر الكزيزة يضل عمر..
اي بعد بعد سويني كلشي مااعرف..حجيت ويرطمت..
باوع لشفافي وضحك ..تعاي شو يمي عدي سالفة
وياج..
لا عيني مشكور..امشي نتريك ..صدك تروح
للشغل مو؟
اي اروح وانت رجعي نامي ارتاحي ماعندج شي..
دخلت للمطبخ وانا احجي ويا واصب..شنو عاجبك
تتغدا؟
خبز وماي ..
لا صعبة حبيبي شوف غيرها..
ها جا تدبرين غير اكلة..
باوعتله ماقابلة..نزل كوب الجاي من حلكه وضحك..
اتشاقى وياج شيهانتي شبيج..عادي سوي
اي شي ثلاجتج عامرة وشتردين يمج..
اوك اليوم اكابل اليوتيوب واضبطلك اكلة..
اي وانا اجيب روب بدربي..عاد صار ماصار اكل
تبن وروب..
يبووو ابقى حشش ابقى..
وبقى كل شوي يذبلي حجاية ناصب علي..
خلص ويدل وقبل لا يطلع للشغل وصاني..
راح اطلع بابج قفلي واي شي تحتاجي
لو يصير شي خابريني واذا ماجاوبت خابري
وليد..
ويمج عبر بيتين اهل جنة بيت عمي وهم كرابتنا..
انا موصيهم عليج ..
لا تخاف حياتي امان ماعليه شي..باسني بكصتي
وطلع..
قفلت ورا الابواب وفتت جوا مانعسانة..نظفت
البيت تنظيفة خفيفة لان مابي شي..
احتاريت شطبخ وانامامجربة..كلت ابدي بالبسيط..
سلكت فاصوليا ولحم..من وكفت وي ماما بالمطبخ
جنت احفظ بس مااطبق..
ع الاتذكره واليوتيوب مشيت شغلي..
وهم ماما خابرتني وسالتها وشرحتلي..
لحد الظهر انسلكت وطبختها بس طعمها حلو
حسبته..
اجه حيادر الظهر وتغدا وكام يحارشني يكلي مو انت
طبختي واحلفله ويضحك هيج يريد يغثني..
بس كمل اكله كال رايح اشوف سالفة سارة..
راح وحدة ونص تقريبا..انا فتت تمددت وخابرت
الدكتورة ع مود سارة واخذت منها الاوكي وخابرت
ام عادل كتلها بس روحو هي تعرف سارة اصلا
من راحت وياي..
لان انا ماخابرتها تذكرتها كالت البنية ام البركع..
اخذتلي غفوة تقريبا ساعة..فزيت ع صوت الجرس..
كمت لبست عباية وحجاب ورحت افتح..
من ورا الباب صحت منو؟؟
صوت نسوان كالن احنا اهل ام منذر..عرفتهم من
طرف خوال حيادر..
فتحت الباب ودخلو..مرت خاله الخطبني وياها
مرة ثانية اكبر منها وجهال وياهن خمسة..سلمو عليه
ومن وراهم جان خال حيادر موجود..
وهو مدنك سلم علي وباركل ع البيت وراح..
سديت الباب واباوع لمرته نظراتها تريد تفترسني..
تفضلو فوتو..فتحت الاستقبال ودخلو..
وفتت للمطبخ اخذ صينية ماي ورجعت يمهم..
بس كعدت حاجتني مرت خالهم الثانية..شني تخمج
ابيض خية وين يكايش ويا الوصخ..
لا مو كلش ابيض هو اوف وايت مايتوصخ بسرعة
وهم احنا قليل محد يوصخ..
من يمها حجت مرت الصغير..عونج خلصتي من العكربة
الرگطة وطلعتي..
بعد الاستقرار حلو والحمدلله الله سهل..جاوبتها بابتسامة..
جاوبت الثانية..خنشوفه بيتج بلة خو ماعدج احد..
لا تفضلو محد موجود..كمت كدامهم واجو وراي
والجهال ركضو كدامي..وحدة من البنات الصغار
التفتت علي..خالة صدك عدج قراصيات ذهب..
ايي عندي وانت من تكبرين يشترولج لان هسه انت
بنوتة عنونة واخاف يضيعن منج لو اشترولج..
دفعتها امها وطاحت ع وجهها وذيح كملت مشيتها..
دباع الزفرة تريد قراريص..دمشي خية خنشوف..
كامت الطفلة ركضت كدامنا واحنا دخلنا للصالة..
بقو يباوعون للصبغ حجت مرت الصغير..خية حيطانج
ملح خو اسوي ازبري شظري اشخبطه ازخرفه..
لا هاىء احسن مريح للعين..
اخذو راحتو تفرجو هسه اجي..
رحت للمطبخ جاي احضرلهم عصير وفاتو
اخذ العصير والكيك اكلو وكفة وبقى واكفين
بالمطبخ ساعة يمدحون ساعة يذمون..
لحد ما كالو ورانا روحة لبيت ام جليل يقصدون
جيراني اهل جنتهم ..سلمو وطلعو..
للساعة ب٣ رجع حيادر ..سالته عن سارة..
كال راحت وي امي وامها للدكتورة..وشنو اتفقتو؟
اتفقنا ماننطيها اله..ونخطبله بت خالته..
اي هيج من الاول بعد شنو..
هو غير كوة اقتنعو كل مالزكها من باب يفتكها بهادر
من الثاني..
هذا مسيلح يريد بزوجهن ومنا مرته تحش براسه
تريد تخلص منهن..
اي اعرف حتى بوقتها هاجر خطية..زين شلون
اقتنعو..
حاجيت ابوها بحدنا..كتله كلكم تدرون بي دربه
اعوج ويدور نسوان..ليش تورط بتك ويا..وحتى
لو ظلمها ياهو ينصفها..عمها ومرته واحد اخبث
من الثاني..ليش تكسر ظهرها وتضل طول عمرها
تدعي عليك..
عاد كلب انت احجي انا محد يسمعلي..
كتلهم خاف بلوغها يتاخر لو تطلع
مريضة..شوف بت خالتك انسب الك..وانت بكل الاحوال
ماتفيدها..
وحجاية منا حجاية منا..كتله لا تلح زيادة..خاف عبالك
تاخذونها كوة..انا عمها وشك حلك اليجبرها..
سدو موضوعها وامشي بفالك..لا تشيع عليها نهوة
وتنسد قسمتها..عاد ابوي من سمع هيج هم وافقني..
وانحلت..
