#نارك_جنة
#الحلقة_1
سليمة : انزلي يابنية ..راكي اطيحي ..اكسر سعدك ..ايش رقاك فوق
جنات متشعبطة مع عريشة العنب وتقطع : اسكتي يا اجديدة
فضحتي بيا ..يسمعوا فيك الناس في الشارع ..نقطع كم عنقود عنب ونازلة
سليمة : ليش مارجيتي جلال لعند ايجي ..راه ركب فوق وقطعلك
جنات ضحكت بهزوا : جلال هههه ..ماندري عنه وين واخذ وجه ..مايجي الا عقاب الليل ..هذا كان جاك واعي لروحه😑
سليمة قمعزت تحت عريشة العنب وتنهدت بحزن : ااااه يهديه الله ويهديك ...انزلي الله يربحك ..خلاص
جنات قطعت اخر عنقود عنب ونزلت : أني نزلت ..تريحي وأنتي ديما اتعيطي ورايا
سليمة : لاني خايفة عليك ...وأنتي دايرة دوت القرد ديما متشعبطة من مكان لمكان
جنات ضحكت : 😂😂😂 هذه اخرتها يا اجديدة ..قعدت قرد ..صحيت عليها ..عموما عمري ماشفت قرد يأكل في عنب 😁
سليمة : لمن تبيه هذا كله
جنات شايلة شكارة فيها عنب وجت قمعزت جنب اجديدتها وتحكي بصوت واطي : عيت عمي عبدالسلام عندهم عشاء ..ومودة قالتلي قطعيلي عنب تبيه بعد العشاء للضيوف
سليمة : من جائهم
جنات : اصحاب بوها ..عشاء رجالة يعني ..ريحي روحك مافيش عزومة 😁
سليمة : حتى كأن عزموني ماني ماشية ..اعظيماتي وجعاتني 😑
جنات ضحكت وصبت بأست راس جدتها : نجك ليا وأنتي بسرعة ماتزعلي 😂😂 ورأسك أنتي انطيبلك عشاء من لاخر ..كم عندي سلوما أنا 😂
سليمة ابتسمت : والله اللسانك هذا مايقدر عليه واحد ...وين ماشية ؟!!
جنات تلبس في سباطها كانت امحولته عشان ترقى فوق عريشة العنب ..وتبي تطلع من الباب : ماشية لمودة نعطيها العنب وانرد مش مطولة
سليمة : البسي وشاحك اكويس
جنات اقلبت عيونها بملل : ريتي هالجمال اللي خايفة عليه ..اخسارة ماني قاعدة في رقبتك ..واللي امدادي عندهن عرم اعيال 😕
سليمة تنهدت : والله كان عليا نا ..مانيش كارهة قعدتك امعايا ..مونستني أنتي وخوك
جنات : أطمني شكلها امطولة الاقامة عندك ...الرجالة توا يبوا غير البنت الصغيرة والسمحة 🙃
طلعت جنات للحوش جيرانهم عيت عبدالسلام لاصقين فيهم ..وفي نفس الوقت حوش صحبتها من هي صغيرة مودة
سليمة صبت وقعدت اتلم في جرت الورق والعنب اللي طاح من العريشة ..وهي تفكر في بنت بنتها جنات ..وتدعي ربي ايجيها نصيب ايعوضها الحزن اللي عشاته من وهي صغيرة 💔💔
