#نارك_جنة
#الحلقة_12
قبل الغداء بشويا جنات اترن على سفيان ماردش عليها ...وبعد اشويا سمعت حد خش ..اطلعت تحسابه سفيان روح لاقت خوها جلال 😳😂
جنات منصدمة : كيف صار 😳
جلال ضحك وجاء ضمها : جنات شن اخبارك
جنات ضماته وتبكي : نجك ليا ..أمتى طلعت ..وكيف 😭
مع خشت سفيان وفخري وراءه ..وجنات وخرت عن خوها تمسح في ادموعها : جيتوا ...جلال هذا سفيان ..أكيد مش...
جلال أبتسم وبحت في سفيان : لا كيف ..نعرفه اكويس
جنات اتبحت فيهم وحست في شي مش فاهمته : ككيف مافهمتش من وين تعرفه
جلال : تعالي جوا ليش امصبيين هنا ..وتوا انقولك
خشوا وجنات اعيونها على سفيان ..قمعزوا في دار المعيشة ..وجلال خش على سليمة في المطبخ : خييير ياسلوما شن اخبارك
سليمة التفتت عليه ومش مصدقة وجلال جاء بسرعة وضمها : امرايف عليك وحق ربي
سليمة ضماته وتبكي : الحمدالله على السلامة ..زينك ساعة اللي شفتك فيه ..الحمدالله على السلامة ياجلال😭
جلال : خلاص ورأسي ماتبكي ..اااها شن البنة هذه ..شن امطيبة ..زيطة عاد جايتك جنات ونسيبك 😂
سليمة : اسسس عيب يسمع فيك الراجل
جنات امصبية على باب المطبخ اتبحت في جلال وسليمة وتضحك وتبكي في نفس الوقت ..وسفيان قاعد امركز عليها ..وكانت هذه اول مرة سفيان ايشوف جنات مع عائلتها ..وكل مرة ايزيد ايفكر هل فعلا جنات دمرت حياة توفيق ؟!!
طلع جلال وخش للحوش وجنات امعاه ..ايطلع في دبش يبي يدوش ..وجنات تبي تعرف كيف طلع
جنات : هيا جلال احكي حرقت دمي راه
جلال خذا دبش من دولابه وطلع : ياسلام ..تبي تقنعيني انك مش عارفة شي 😏
جنات تلحق فيه : جلال وربي مش عارفة شي ..تعال فهمني قبل
جلال اتكى على باب الحمام : يعني راجلك طلعني من غير مايقولك
جنات انصدمت : راجلي ؟!!! قصدك سفيان
جلال : ليش أنتي كم متزوجة واحد 😑
جنات : بلاسماطة جلال ..والله تحكي جد ..سفيان هوا اللي طلعك 🥺
جلال : شوفي أنا قاعد ماد وجهي ..ويجي العسكري طلعني ..ولما مشيت امعاه قالوا عندك افراج ..بعد طلعت القيت صاحب المحل وامعاه فخري و واحد اخرى ..وطبعا طلع سفيان
جنات : باهي ..شن صار بعدها
جلال : ماصار شي ..أنا طبعا نعرف فخري بس . سلمت عليه ...وصاحب المحل عدا على طول ..وفي الطريق فخري عرفني على سفيان ..ومنهم عرفت أنهم خلصوا صاحب المحل في بضاعته وطلعت
