#نارك_جنة
#الحلقة_9
الساعة 3 جنات راقدة حست بحد قاعد امقمعز جنبها ناضت مفجوعة وتبي اتقمعز ..لكن منى طبست عليها وقربت من وجهها .. ومسكتها من رقبتها تخنق فيها 👿 😰💔
سفيان راقد على سريره ..وكل تفكيره في جنات ..وفجاة باب الدار انفتح وخش فخري
فخري بضحكة كبيرة : وأخيرا يا شيباني
سفيان قمعز : شن في ..وشن جابك هنا عقاب الليل
فخري قمعز جنب سفيان : عندي لك خبر مستحيل اتصدقه وربي
سفيان مستغرب : خبر شنو ..في الوقت هذا
فخري واعيونه مدمعات : أخيراً بتشوف سفيان ..أخيراً بيرجعلك نظرك وأتشوف
سفيان : كيييف ..شن تحكي فخري ..فهمني ؟!!
فخري : البرفسور اللي ايتابع في حالتك في روسيا ..دز مسج للدكتور محمد ..ايبلغ فيه أن عمليتك ممكنة في الوقت الحالي ..وتقدر اديرها وقت ماتبي
سفيان اول مرة وجه يضحك وينور بإبتسامة من القلب من سنين 💔 : تحكي جد ..من قالك ..وكيف عرفت
فخري : الدكتور محمد اتصل بيا توا وقالي ..البرفسور باعثله مسج من بدري بس ..الدكتور وصله متأخر ..وحتى هوا من الفرحه ماقدرش يصبر للصبح وكلمني عشان انوصلك البشرى
سفيان برم ونزل رجليه على الارض ورد الوجه الحزين من جديد : بس أكيد الموضوع بيأخذ وقت ..أمتى انجهز اوراقي والتاشيرة لروسيا وقصص ..يعني مازال ..أاا
فخري مسك يده وشد عليها : ومن قالك بتسافر لروسيا
سفيان : املا شنو ...مش البرفسور هو اللي يبي ايدير العملية ..أكيد بنمشوا لل..
فخري قاطعه : البرفسور قاعد في الاردن ..والاسبوع الجاي بيمشي لتونس ...عنده كم عملية ومن ضمنهم عمليتك أنت
سفيان : قصدك مافيش داعي انسافر للروسيا والعملية بتكون في تونس
فخري ابتسم : ايوا ..وأنا من بكرا الصبح نبي نبدأ في أجراءت السفر ..عشان انسافروا نهاية الاسبوع
سفيان صبا : وليش مستعجل ..مش قلت العملية الاسبوع لاخر
فخري : ماهو ضروري تمشي قبل العملية بكم يوم ..عشان اتأكد على الحجز في المستشفى اللي يبي ايجيه البروفسور الزائر ..زايد عشان اتكمل اجرأءت المستشفى من تحاليل وفحوصات ..وأتكون جاهز ليوم العملية
سفيان تنهد براحة : تمام ..أمتى المفروض نسافروا
فخري : أنا بكرا نبدأ انشوف الجوازت ونحجز في اول طائرة لتونس
سفيان ايهز في رأسه ويفكر : اكويس ..بس أنا في بالي كم مشك...
وسكت سفيان لما سمع عياط جنات وصرخاتها ...وطلع بسرعة من داره وفي جرته فخري ..سفيان فتح باب الدار وخش ..وفخري وقف برا قدام الباب
