عراقي انا وافتخر...

شاعري المفضل عريان السيد خلف

قصائد للشاعر الكبير عريان السيد خلف
ادك روحي .. نذر للجايب بشارة
واورجه على الجروح ، المالهن جارة

جرح ينزف ..
جرح باني .. على بسماره –
خجل .. والمايخاف اللوم..
يرضه بذلته وعاره

يالمبشر ..
متى المكَصوص جنحه يطولن كَصاره ؟

ومتى الوكت التراده ، يبدل اطواره
ومتى العايش غريب ، ايأمن بداره ... ؟

يالمبشر .. ممحله الروح ..
غيمك .. عزّت امطاره

وجثيره المايهزها الضيم ..
جن كَلوبها حجارة

ولو لذة عشيج الموت ..
كَلبه .. يموت باسراره

لجن ، شانت على المذبوح ..
دمه .. يضيع فجّاره

دَفك عينك ، زمانك ليل ..
ليل .. يريدله انطاره

ولا كلشي الجليته يطيح زنجاره
ولا كلمن يموت يضيع تذكاره

هلبت .. مات (جيــــفاره .. ؟)
اوهلبت .. (هوشي منه ) انكَطعت اخباره ..؟

عمت عين الوجاغ الماتشب ناره

ولو دنياك غداره

ولو .. جرحك ..
جرف تعبان .. تغفه الآخ باكتاره

لجن .. بيه العتب شاره

من اشوفن : دانك السفان
.. صار الروج .. حدّاره

يا هالتشبر ، خيال الليل ..
وترد كَاصره شباره
على هونك .. بيه الك حسبات
كلها غيوم مطارة

بدمع ،يا دمعة المهظوم ..
ما تعتاز .. تسياره

يناري .. المالجم عاره
على هونك .. من يهاب السيل ..
لو ينخاض تياره
على هونك .. من تربّه هلال
.. غطت غيمته انواره

دَذر ، جرح الصبر بارود ..
خل يتباهن اكتاره

يبارغ .. من تضيف الموت ..
يخشى الموت .. خطاره

آنه الجرحك .. عشت مجروح ..
وانت .. بعشر معشاره

الم بيه الوجع نيشان
ثاير ... ما يرد ثاره

واهزك هزة المطعون ،
من تتلايم اكتاره

على وكتك والوكت مشوار ..
غمّه الباع مشواره

واداري العيب تتداره
اداري العين .. وانت العين ..
والدم .. اورفيف الدم

اداري الآه .. انت الآه ..
وانخه الروح .. لا تهتم

اداري الحيف .. كل الحيف ..
ظل بيك الحلم .. يحلم

اداري اوكَضت روحي نذور ..
لاوِد لا شمل يلتم

يهاوي الروح غم الروح
كون ابشان ما تحلم

يباجي العين ..
ذل العين بالدمعات تتوشم

هظم ....
والشال هظم الناس
لوجّه الموت ما يندم

لَوَن .. شحت دموع الغيض ..
خل دمع العتب .. يلتم