နေခြည်ဖြာ၍နွေးစေသော်

အပိုင်း (၄) - Unicode

"ဟိုမှာထိုင်မဲ့သူနံမည်က ချမ်းမြလား"

စာရွက်စာတမ်းကိုယ်စီကိုင်ကာ သွားလာနေသူများဖြင့် စည်ကားနေသော ဆယ့်ခုနှစ်လွှာရှိ အင်ဂျင်နီယာရုံးခန်းအတွင်းတွင်ဖြစ်သည်။

ဘုန်းဝဿန်ဆိုသူသည် ဦးစစ်မင်းကို၏ "ချမ်းမြ" ဟူသည့်အခေါ်ကို ခပ်လှမ်းလှမ်းရှိထိုင်ခုံအလွတ်အား လှမ်းကြည့်ရင်း ထိုသို့တုံ့ပြန်သည်။ ချမ်းမြဟူသော ခေါ်သံနောက်တွင် ရုတ်တရက် မော့ကြည့်လာမှုကြောင့် စောစောလေးကပင် လက်သွားသော ဦးစစ်မင်းကို၏မျှော်လင့်ချက် မီးရောင်တို့သည်ကား ယခုတော့ ဖြုတ်ဆို ပြန်ပြတ်ကျပြီး မည်းမှောင်သွားရသည်။

**အဲ့ဒီ့လိုတွေ မမေးဘဲ မင်းကသာ ငါ့ရဲ့ ချမ်းမြလို့ ပြောလိုက်ပါတော့။ ငါ့ရဲ့ အုန်းပင်ကောင်လေးသာ ဖြစ်လိုက်ပါတော့လားကွာ**

ဟုလည်း စိတ်ထဲမှတမ်းတမ်းတတ
တွေးလိုက်မိလေသည်။

အမှန်စင်စစ် ဦးစစ်မင်းကိုသည် သူ့ရှေ့မှလူအား စတွေ့သည့်အချိန်မှစ၍ ယနေ့အထိ ဘုန်းဝဿန်ဟု လက်မခံခဲ့ပေ။ တဖက်လူကိုယ်တိုင်က သူ့ကိုယ်သူ ဘုန်းဝဿန်ဟု မိတ်ဆက်လာသော်လည်း လက်ခံဖို့ရာ ခဲယဉ်းသည်။ လောကမှာ ဒီလောက်တူသောလူ မရှိနိုင်ဘူးဟုလည်း ထင်သည်။ ထို့ကြောင့်သာ စတွေ့ကတည်းက ရင်တုန်ပန်းတုန် ဖြစ်ပြီး ဘာစကားကိုမှလည်း သေသေချာချာ လုံးစိပတ်စိ မပြောသည့်အပြင် ဆုံတွေ့တိုင်းလဲ ဘုန်းဝဿန်ဆိုသော နံမည်အစား ချမ်းမြ ချမ်းမြ ဟုသာ လွှတ်ကနဲ ခေါ်နေမိခြင်းဖြစ်သည်။

သို့သော်ခက်တာက သူတို့ကြားမှ ဆက်ဆံရေးမှာ ဆိုးရွားစွာ ပျက်စီးခဲ့သော ဆက်ဆံရေးဖြစ်သည်။ ထို့ကြောင့် "ချမ်းမြမောင်သည် ဘုန်းဝဿန်ပဲလား" ဟူသော အဖြစ်မှန်ကို သိဖို့အရေး ပထမဆုံးအဆင့်အနေဖြင့် တစ်ဖက်လူနှင့် ပိုပြီးရင်းနှီးအောင်လုပ်ရမည်ဖြစ်သော်လည်း လက်တွေ့တွင် တုံ့ဆိုင်းနေခဲ့မိသည်။ အားနာနေတာလဲပါမည်။ ကြောက်တာလဲပါမည်။ မလုံမလဲဖြစ်တာလဲပါမည်။ မိမိဘာသာလျှင် နေ့စဉ်နေ့တိုင်း၊ ညစဉ်ညတိုင်း အလုပ်လုပ်နေသည်ဖြစ်စေ၊ မလုပ်နေသည်ဖြစ်စေ ထိုသူ့အကြောင်းက ဦးစစ်မင်းကိုခေါင်းထဲရောက်နေရသည်။ အခြား မိသားစု၊ လူမှုရေး ကိစ္စများအား ပုံမှန်အတိုင်းလုပ်ဆောင်နေရင်းကပင် ယခုလက်ရှိပိုင်ဆိုင်ထားသော ဘဝထက် တန်ဖိုးရှိခဲ့သောအတိတ်မှ အကြောင်းများအား အဆမတန်တွေးမိနေသောကြောင့် အိပ်မပျော်သည့်ရောဂါ ပြန်ဖြစ်နေသည်။ အတန်ကြာက ပြတ်သွားသော အိပ်ဆေးတို့ကိုလည်း ပြန်သောက်နေရသည်။ ဖြစ်နိုင်လျှင်တော့ ထိုသူနှင့် ပြန်နီးကပ်ရန် အမြန်ဆုံးကြိုးစားပြီး ထူးခြားဆန်းကြယ်နေသမျှ အရာအားလုံးကိုလည်း ထုတ်ဖော် ပစ်လိုက်ချင်သည်။ အနည်းဆုံးတော့ ဒီနေ့လည် ထမင်းစားတဲ့အခါ အပြင်မှာအတူသွားစားဖို့ ခေါ်ကြည့်မည်။ သည်လိုပဲ စရမည်။