عيون الجليد

الحلقة15

هشام يحكي:
عاودت التسجيل اكثر من 5 مرات..نحاول نفهم ما بين السطور..واش قصدو بهاد الهدرة..تكيت لتالي..عديت يدي على وجهي..مفهمتش..مفهمتش واش راهو صاري..يعني فالاخر طلع تزوجها لهدف !!..واش من هدف من الاساس و شكون هادا لي كان يحكي معاه..باز اكيد كان يخدم ضد جماعتي معا كاش واحد..المشكل دك هو شكون هادا !!..يمكن بوليس..و يمكن ناس وحدوخرين..المافيا الايطاليا اعدائها ميتحسبوش..بعت التسجيلات لرؤساء الجماعات لوخرين..فأسرع وقت لازم نعقدو اجتماع..خاطر للدك منعرفش لصالح شكون كان يخدم ياسين..مدة 5 سنين كاملين و هو وسط منا..و عارف كلش علينا..لازم نجبد لي كان يخدم معاه..و نعرف مخططاتو..وقفت فبلاصتي..كسلت عظامي..رجع كلامو عليها تعدى فراصي..كبست على يدي..فالاخير طلع متزوجها لمصلحة..فلحظات رجعت ردت فعلها وقت عرفت حقيقتو بين عينيا..دموعها و صدمتها..منعرفش علاه تفكرتهم بالضبط دك..لي عارفوانو الاحسن منخليهاش تسمعهم..خاطر ردة فعلها مشي مضمونة..يمكن تنهار اكتر..تنهدت خرجت للكوزينة..اول ما دخلت قابلني طبسيها فارغ..عرفتها كلاتو..تبسمت تلقائيا..غريبة الطفلة هادي..بكات خاطر وكلتها مغرفة منو بالغصب اومبعد كلاتو كامل..قبل ما نقدم..سمعت صوت فالصالة..تلفت مستغرب..قربت بلعقل..وقفت عند الباب عقدت حواجبي و انا نشوف فيها..عاطيتني بالظهر..تحوس فالقجور..منعرفش على واش بالضبط..نزلت بتصوير بطئ لجسمها..بلعت ريقي..لابسة فيزو و تريكو قصير شوية من ظهرها يبان..مشي من عادتها !!..
انا: فيرا
تلفتت ليا..طاحت عيني فعينها..عينيا حامو على وجها كامل فثواني..قلبي دق بالقاوي..نظرة عينيها..نظرة عينيها لي مبدلة..ولا يمكن انا حسيتها مبدلة..لكلام وحل فحلقي..مقدرتش نخرجو و مقدرتش نحي عيني من عينيها..حاجة تجبد فيا..جليد !..هي بالذات..و اخيرا لقيت كلمة توصف النظرة لي شفتها دك فعينيها..نظرة جليد..عيوون الجليد..بأتم معنى الكلمة..محسيتش لروحي كيفاه قربتلها..عينيها كأنهم مغناطيس و قاعدين يجبدو فيا ليها..وقفت قدامها قد قد..هبطت راصي ليها..منعرفش كيفاه خرج صوتي..حاولت نبينو عادي قد ما نقدر
انا: واش راك ديري
تبسمت على جنب..
فيرا: نحوس على رصاصات ال GLOCK 26 لقيت المخزن فارغ
رفداتو في وجهي تلعب بيه..عينيا وساعو..شفت فيه و رجعت شفت فيها..بقيت نشوف معاه سرحت فيها..نحاول نفهم واش هاد التغيير..فيقني صوتها..
فيرا: بلعت لسانك ؟ راني نسقسي فيك
رمشت عينيا شحال من مرة..فقت على روحي..تلفت يمين و يسار..تبسمت على جنب..عديت ابهامي على شفتي نضحك..جبدت عليها بخطوات..نشوف فيها ملفوق للتحت..تكات بيدها عالطابل تاع التيليفيزيون موراها..و اليد ثانية تلعب بالسلاح فيديها..رجعت كبست ملامحي..قربت ليها..بدني لسق فدنها..معملت حتى غياكسيون..تشوف معايا فسكات..رميت يدي للقجر لي موراها..فتحتو من غير ما نزل عيني من عينيها..جبدت الرصاصات..رجعت بعدت عليها..مديت يدي..
انا: هاهم..
نزلت براصها ليدي..تبسمت على جنب شدتهم من عندي..فتحت السلاح دارتهم..رجعت طلعت راصها..
فيرا: واش رايك فعرض خاص !
فهمت قصدها..عوجت فمي..
انا: صح رئيس مافيا بصح منحبش عروض الاكشن..يعجبوني اكثر عروض لي شومبغ دو نوي غمزتلها..ڨحرتلي..قلبت عينيها..خدودها حمارو..تمتم بين شفافها..
فيرا: منحرف
سمعتها..شديت ضحكتي بالسيف..تعدمت نحشمها..حبيت نتأكد انها نفسها فيرا جبروت و التغيير مشي جذري..
انا: قلتي حاجة !
مردتليش..نزلت بيدها ليدي..شدتني من صوابعي..نزلت راصينشوف معا يدها..
فيرا: ارواح
مخلاتنيش نرد عليها..خرجت و شايدتني و تجبدفيا موراها..محبيتش نقاطعها..طاوعتها..نمشي و عيني على يدها لي شايدة زوج صبعتين برك من يدي..ضحكت..يدها كاملة جات غير قيس زوج صبعتين من يدي..فرخة و حصلت فجرتي..خرجت لبرا..و انا نتبع فيها ساكت..بزاف اسئلة فراصي..واش حكاية هاد التغيير !..و فأقل من ساعتين ؟؟..واش صرالها..علاه راهي هكا..فقت وقت حبست و طلقت يدي شوية شوية..طلعا راصي ليها..شافت فيا..غمزتلي و فاتتني بخطوات..وقفت مقابلة الهدف..فتحت رجليها..رجل للقدام و رجل للور..صوبت عالهدف..جبدت سلاح الامان..تنهدت..ب3 ثواني طلقت 3 رصاصات..متهزت منها حتى شعرة..بقات مكاونسية فبلاصتها..طلعت راصي لاهداف..وحدة تمااما فالهدف..و زوج بعاد عليه بحوالي 3 و 4سنتيم..طلعت حواجبي..عقلي بلوكا !!..واش الحاجة لي تبدلت دك ؟!..واش صرا باش تبدلت نظرتها، لسبها، حتى تسديدها، كلش تبدل فساعتين !!! كيفااه هكا ؟
فيرا تحكي: (تصويتاتكم 🌟)
بقيت مسمرة فبلاصتي..مشي قادرة نتحرك..مركزة معا الهدف..مزالني نشوف فيه كأنو ياسين قدامي..كأني صاورت على ياسين..ياسين لي ستغلني..تخيلتو كأني راح نتيري عليه فنص راصو..
ما فقت غير على نفسو لي فرقتي..نفسو لي حرقني..غمضت عينيا بقوة..حسيت بيدو لي تحطت على خصري..قاس لحمي..يدو بااردة..عضيت شفتي نتمالك فروحي..رفد يدو شدلي سعري لي من قدام..ردهولي بلعقل مور ودني..يتحرك بلعقل..مقدرتش نتحرك..نزل عليا اكثر..عدا صبعو على خدي..حتى لودني..نزل يحكي فودني..
هشام: واش بيك
صوتو خرج هادي..ببحة غريبة مفهمتهاش..كملت على لي بيا..ظهرو لاسق فظهري..نسمع فصوت انفاسو المتناغمة..قلبي دق بالقاوي..خذيت نفس طويل..نحاول نظم ضربات قلبي..فتحت عينيا بلعقل..جبدت روحي منو بلعقل قبل ما يحس بيا..تلفت ليه..رمست تبسيمة باردة على وجهي..حاولت نتحكم فصوتي باش ميخرجش يرعش..
انا: مبيا والو
عينيه دارو على وجهي كامل..و رجع تركز فعينيا..تبسمت بتڨوعير
هشام: بواش نفسر التغيير هادا
ضحكت..قربت ليه..رفدت السلاح حطيتو على صدرو..نطلع و نهبط فيه بلعقل..مشي فاهمة واش راني ندير..و مشي فاهمة كيفاه راني نتحرك..لسقت فيه حتى مولاتش مسافة بيناتنا..نزل راصو يشوف معايا..
انا: نقدرو نقولو فيرا جديدة
قبل ما نكمل نحكي..ماحسيت غير بيدي لي تلوات مور ظهري..شدلي يدي مور ظهري بيد وحدة..و اليد الثانية غرسها فخصري..طلعني ليه..عضيت شفتي بكل قوتي..نمنع روحي باش منعيطش ملوجع..طلعني حتى جا وجهي معا وجهو..مولاتش مسافة بيناتنا..يحكي بين شفافي..صوتو هاد المرة خرج مكبوس بغش..
هشام: تغييرك هادا مشي عليا..و السلاح هادا ميترفدش عليا..كيما بنيتك قادر نهدمك
انا: مشي نتا لي بنيتني..انا بنيت روحي بنفسي هشام الرااشدي
لزيت على سناني كتر وقت قلت اسمو..تبسم بخبث..عيني فعينو..نيفي يقيس فنيفو..نتنفسو فنفس الهواء..صدري معا صدرو..نحاول نشد روحي قدامو قد ما نقدر..قرب مني اكثر..غمضت عينيا تلقائيا..خدي معا خدو..رجع شغل معنقني..حكى فودني..
هشام: عيون الجليد( تصويتاتكم 🌟)
تبسمت بإنكسار معا هاد الكلمة..دورت راصي لوجها حتى تحطو شفافي فوق خدو..حكيت و شفافي فوق خدو..
انا: بالضبط
كبس عليا اكثر فحضنو..جسمي تكهرب..معلاباليش منين جاتني هاد الجرءة بالضبط..يمكن خاطر القوة تنولد من الالم..عينيا حرقوني..حسيت دموعي راح ينزلو..عضيت شفتي..جبدن وجهو شوية من غير ما يبعد..ما حسيت غير بسنانو تغرسو فخدي..عيطت بكامل قوتي شديتو من شعرو مالتالي..
انا: اااااااه
خبستو من رقبتو..غمضت عينيا بقوة..نحى شفافو بلعقل..عدا نيفو من خدي حتى وصل لنيفي..حط شفافو على نيفي..باسني منو بوسة صغيرة..عينيا وساعو من حركتو..متوقعتهاش..قاطعة صدمتي يحكي..
هشام: تفكري دايمن بلي نتي تابعة ليا..قوتك متستخدمش معايا خاطر انا لي عطيتهالك..
مقدرتش نردلو..من جيهة مصدومة من حركتو..و من جيهة العضة توجع فيا..خفت نحكي يخرج صوتي ببحة دموع..شحال تقهر..شحال توجع هاديك اللحظة وقت تخيرك الدنيا يا تسكت يا تكشفك دموعك..طلقني بلعقل..حطني عالارض..منغير ما يبعد عيني على عينو..ضحك على جنب..رفد صبعو حطها على خدي بلاصة العضة..و تمشى بلعقل حتى لنيفي..دغدغني..غضمت عينيا..وصل لنيفي قرصني منو..
هشام: صغرون
قلبي دق بالقاوي..نحس فيه راح يخرج مبلاصتو..فتحت عينيا على نسمة لهواء الباردة لي ضربتني وقت بعد عليا..فتحت عينيا نشوفو عاطيني بالظهر يتمشى لدار..يديه فالجياب..
منعرف واش هاد الاحساس بالضبط..منعرف واش هاد الحاجة لي فداخل تاعي قاعدة تقولي الحقيه..شديه..اترماي فحضنو..ابكي عندو..كبست على يديا نمنع فروحي..حطيت يدي على قلبي..نحكي معا روحي«اشششش حبس ما تصرب هكا..حبس»..خذيت نفس طويل..مزال الطريق قدامي طويلة..مراحش نضعف من اول نهار..و مراحش نرجع للور..اصلا مبقاتش كاين فرصة لتراجع..
متكية عالحيط..نشوف معاه..عاطيني بالظهر يطيب..سارحة معاه..نحاول قد ما نقدر منفكرش..منيش حابة نفكر فحاجات راح يقيسوني ولا يبكوني..منيش حابة نفكر فلي راح و لا فلي جاي..منيش حابة نوجع قلبي بالتفكير..
شوية و تلفت..طاحت عيني فعينو..بقى لثواني مركز معايا..طلعت حاجبي..نزل عينيه حط الماكلة فوق الطابلة..و قعد..قربت جبدت الكرسي قعدت..نزلت راصي ناكل و حتى هو..ناكلو فسكات..طلعت راصي بلعقل وقت حسيت نظرتو تركزت معايا..نشوف معاه يتبسم شبه ابتسامة ركزت اكثر معا عينيه وين قاعد يشوف بالضبط..عرفتو يشوف فخدي..قلبت عينيا..رجعت شعري مور ودني بغزول..تراس العضة تاعو مزالها هكاك..قاطعتو نحكي..
انا: فرحان بروحك ؟
فاق على روحو رمش عينيه ضحك على جنب..تكى لتالي يحكي بتڨوعير..
هشام: مشي بزاف.. موالف ندير كتر
عضيت شفتي..هبطت راصي..نحكي بين شفافي..
انا: منحرف
هشام: اه مسمعتش ؟ قلتي حاجة  ؟
انا: واااالوو
رجعت ناكل..عارفاتو يعمل فيها بلعاني باش يحشمني..فهمت قصدو..مخو خامج منحرف و ميحشمش.. رجعنا ناكلو فصمت..شوية و حكى من غير ما يطلع راصو ليا..
هشام: تعرفي تسوڨي ؟
طلعت راصي ليه..شاف فيا..هزيتلو بكتافي..طلع حاجبو
هشام: يعني ؟
انا: نعرف..نظن يعني نعرف
عوج فمو..
هشام: تظني ؟
هزيتلو براصي ايه..كملت نحكي..
انا: يعني نعرف بصح عندي بزاف مسڨتش
هشام: منين تعرفي ؟
عضيت شفتي..شريط ذكريات رجع جاز قدامي..سكت لثواني..خذيت نفس طويل نحكي..
انا: ياسين كان مخلي طوموبيل فالڨاراج هو كان يخرج بزاف يعني علمني نسوڨ بيها فحالة ادا صرات كاش حاجة
قلب عينيه بحركة مفهمتهش واش قصدو بيها..كمل يحكي..
هشام: مممم مليح..نقص علينا شهر وحدوخر هنا..
انا: يعني راح نروحو ؟
هشام: وين تروحي ؟
انا: قصدي مراحش نبقاو فهاد الدار ؟
هشام: ممممم
انا: وقتاش نروحو ؟
هشام: كي تكوني واجدة
حطيت المغرفة من يدي..نشوف معاه..
انا: راني واجدة
طلع عينيه ليا..فلحظة عينيه دارو على وجهي كامل و رجع تركز فخدي..تبسم على جنب..
هشام: مممم راني نشوف
نفخت بالقاوي..رفدت روحي وقفت..
انا: هاهاها متضحكش
عطيتو بالظهر خارجة..العصب يرفد فيا و يحط..كل مرة يتعمد ينبزني هكا..اول ما وصلت لباب بيتي سمعت باب برا تفتحت..عينيا وساعو..محسيتش لروحي كيفاه تلفت نجري..زربت فخطواتي..لحقتو..لحق يخرج ديجا..قربت للباب فتحتها..تلفت ليا..طلع حاجبو..
هشام: واش كاين !
انا: و وين رايح ؟
عدا يدو على شغرو بغزول..عرفتو تقلق من سؤالي.. رجع شاف معايا..
هشام: واش دخلك نتي ؟ روحي ترقدي احسنلك
انا: ب بصح
هشام: فيراااااا
تهزيت و تنفظت على عيطتو..عضيت شفتي..نفخ بالقاوي..مزاد حتى كلمة..ركب فطوموبيل و عينو متنحاتش من عيني..طار بيها..و خلاني واقفة فبلاصتي..بقيت لثواني مكوانسيا لتم..تنهدت..تبسمت بالسيف..نطمن فروحي..عادي راح يرجع..اصلا صح واش دخلني فيه..يروح ولا ميروحش..مشي شغلي فيه..رجعت تلفت..دخلت و غلقت الباب..رحت ديراكت لبيتي..ترميت فوق السرير..رجعت صورتو بين عينيا..تبسمت..رفدت لمخدة غميت بيها وجهي..نحاول نخرجو من تفكيري..شهر..تعدا شهر من اول نهار شفتو فيع..منعرفش شحال بقيت و انا نحاول نرقد..نحاول نبعدومن مخي..تنهدت..جيت قاعدة..منقدرش ننكر..حاجة وحدة منقدرش ننكرها..اني نحس بالامان وقت يكون جنبي..معلاباليش كيفاه..بصح تأثيرو عليا قوي..وجودو..حضورو..كلهم عندهم تأثير خاض منقدرش ننكرو..حتى بدني يتحرك تلقائيا وقت يكون قدامي..فكرة لهو فالدار برك تخليني نرقد مرتاحة..منعرفش علاه وقت ميكونش عينيا ميتغمضوش..كي يغيب يغيب معاه احساسي بالامان..

~~~~~~~~~~~~~~~~~~~~~~~~~~~~

واش رايكم ؟؟
صوتولي🌟