عيون الجليد

الحلقة27

فيرا تحكي:
قربت لمرايا نحط فالروج..حطيتو فوق الكوافوز بعد ما كملت..رفدت شعري للفوق شديتو..طاحت عيني على تراس العضة..تبسمت..رفدت يدي عديت صوابعي عليها بلعقل..تنحات شوية بقاو غير اثر نيابو..غمضت عينيا نتفكر فهاداك الاحساس..قلبي دق بالقاوي..رجعت فتحت عينيا بالزربة وقت تعدا صوتها فودني..كانت معاه..متأكدة كانت معاه لبارح..عضيت شفتي بقوة نمنع فدموعي لي تجمعو فعينيا..تنهدت نبعد فهاد الفكرة من راصي..منيش حابة نبكي..منيش حابة يوجعني قلبي دك..رفدت الشال..حطيتو على رقبتي نغطيها بيه..تبعدت بخطوات عالمرايا..تبسمت و انا نشوف فروحي..تريكو فوق السرة فالغوج.و سروال نوار ..فاست كوير نوار .. تالون كلاسيك..شعري مبوكلي شديتو (ذيل حصان)..مكياج خفيف .منعرف واش صاريلي هاد الفترة الاخيرة..وليت نهتم بروحي و منظري بزاف عكس واش كنت..قربت لسرير رفدت تيليفوني..كبست عليه فيدي..مزلت مترددة..لبارح كنت راح نقولو..كنت راح ناخذ اذنو..تراجعت بعد ما سمعت صوتها..معندوش الحق يدخل روحو فيا و هو يدير لي حب عليه..خذيت نفس طويل..حطيت التيليفون فصاكي..رفدتو و خرجت..هبطت بالزربة لتحت..طاحت عيني فعينها..واقفة عند الباب..مربعة يديها تڨحرلي..بلعت ريقي..قربت ليها..
انا: وصل ؟
وردية: وصل وصل..بصح منضمنلكش واش يدير هشام لوكان يعرف
انا: ميهمنيش..هو طلب و انا نفذ
وردية: واش نقولك..انا راني خذرتك و نتي دبري راصك
انا: متخافيش معندو ما يدير
بستها من راصها..بعدتلي مالباب..خرجت نجري..اصلا متأخرة..منعرف ادا كنت نطمن فيها و لا في روحي بهاديك الهدرة..الحاجة الوحيدة لي قاعدة نقنع روحي بيها انو مشي من حقو يتحكم فيا و هو يدير لي حب عليه..اصلا مكاش حاجة تربطنا باش يتحكم فيا..
طلعت راصي..طاحت عيني عليه..تبسمتو..ردلي التبسيمة..زربت فخطواتي ليه..فتحت الباب تاع الطونوبيل طلعت..
انا: ديزولي تأخرت عليك
مهدي: هه عادي الجمال هادا لي خرجتي بيه اكيد لازملو وقت
انا: ههههه ميرسي عيشك
ضحك معايا..تلفت لطريق..ديمارا..شوية و رجعت حكيت..
انا: بصح مزال مقتليش وين رايحين
مهدي: كي نوصلو تشوفي..
سكت..رمى يدو للبوست شعلو..تبسمت و انا نسمع فالغنية..تكيت لتالي نشوف معا الطريق و نتمتم معاها..
🎶I can only imagine how it is to be with you..from the first day i saw you face i knew this love was true..but you are already taken nothing i can do..so i can only imagine how it is to be with you🎶
شوية و سمعو يحكي..
مهدي: الظاهر متأثرة بزاف
تلفت ليه..ضحكت معاه..
انا: هههه وي
ضحكت معاه..رجعت تلفت لطريق..ما فقت غير وقت شد فران..طلعت راصي نشوف وين رانا..
انا: واش هادا ؟
مهدي: اهبطي دك تعرفي
فتح الباب هبطت..لحقتو..قربت ليه..عقدت حواجبي و انا نشوف معا البلاصة..ميتم..شفت فيه..تلفت ليا..
انا: علاه جينا هنا
مهدي: كل يوم خميس نجي لعندهم..منعرف علاه حبيتك تجي معايا..يمكن خاطر نحس روحك طفولية و انسب بلاصة تقدري تجي ليها
تبسمت معاه..متوقعتوش يكون هكا..صدمني..كنت مفكراتو راجل مافيا برك و ميهموه غير الدراهم و خدمتو..رجعت تلفت للميتم نحكي..
انا: تعرف انو حتى انا تربيت فميتم..
مهدي: عارف..يمكن على هاديك حبيت نجيبك معايا..
انا: خلينا ندخلو
هزلي براصو ايه..قرب ليا كتر..دخلنا كيف كيف..متوقعتش باش يجيبني لهنا..اخر حاجة ستنيتها هي هادي..دخلنا لداخل..تمشينا فساحة كبيرة..الظاهر يلعبو فيها..معمرة العاب دراري صغار بالون..بوبيات..للحظات رجعو بين عينيا الايام لي عديتهم فالميتم..للاسف نقدر نقول انو كانو اسوء ايام حياتي..و ابشعهم..غمضت عينيا بقوة و انا نتفكر فيهم..محسيتش لروحي كيفاه يديتو من يدو كبشت فيه..هبط راصو ليا..طلعت عينيا ليه..محكيت حتى كلمة بصح متأكدة انو فهمني..حط يدو فوق يدي يطمن فيا..و كملنا دخلنا لداخل..اول ما دخلنا مااباب الصغيرة قربت منا مرأة..تبان كبيرة شوية..وقفت قدامنا..مدتلو يدها
ميڨان: مرحبا بيك مسيو مهدي
مدلها يدو صافحها..عقدت حواجبي..طلعت راصي بالزربة ليه..نسأل فيه..تبسملي يحكي..
مهدي: ميتم لاجئين عرب..و اغلبهم دزيريين
انا: اااه حسبتو ايطالي
مهدي: هههه نو
ميڨان: مرحبا بيك مدام
تلفت ليها..صافحتها..
انا: و بيك عيشك..
مهدي: وين راهي؟
عقدت حواجبي..نحاول نفهم عليمن راهو يحكي..ردتلو
ميڨان: كي العادة..فالجنينة الخلفية تاع اليمتم..
مهدي: نقدرو ندخلو عندها ؟
ميڨان: اكيد..تفضلو
تمشات قدامنا..درت ليه..
انا: شكون ؟
مهدي: ارواحي دك تشوفي
تمشى قدامي..لحقتهم..شوية و فتحتلنا باب الجنينة..
ميڨان: راح نخليكم على راحتكم معاها
مهدي: ميرسي
تبسمتلنا و راحت..بقيت فبلاصتي..نشوف معا مهدي لي دخل..يقرب للجعلولة (ارجوحة)..قعدت حواجبي مفاهمة والو..تبعتو..نشوف معا طفلة صغيرة عاطيتني بالظهر..قاعدة لتم..قرب ليهاقعدا جونو قدامها..اول ما شافتو ترمات عليه..بقيت نشوف معاهم من بعيد..للحظات و نتا تشوف معاهم تحسهم كلي اب و بنتو..بصراحة..صدمني فيه..شوية و جبد روحو عليها..نشوف معاه يحكي معاها..طلع راصو ليا..عملي بيدو باش نقرب ليهم..تبسمتلو..قربت ليهم..وقفت موراها..رفدت يدي حطيتها على شعرها..طلعت راصها ليا..تبسمتلها..نزلت ليها..نحكي..
انا : هاااي
مردتليش..جبدت روحها مني..لسقت فيه اكثر..رفد يديه حطهم على ظهرها..
مهدي: لينا يا روحي..متخافيش هادي صديقتي انا جبتها..
شافت فيا بطرف العين..شديت يدها بين صوابعي..تلفت ليا..تشوف معايا..مركزة فعينيا..
انا: لينا..اسمك شباب..انا فيرا تشرفت بمعرفتك..
شوية و تبسمتلي تحكي..
لينا: حتى انا
فرحت وقت سمعتها تحكي..منعرف علاه كي شفتها اول وهلة فكرتها متحكيش..حطيت يدي على شعرها..
انا: شحال عمرك ؟
عملتلي بيدها خمسة..عرفت انو عمرها 5 سنين..
لينا: و نتي ؟
انا: عمري 20
لينا: يوووو بزاف..
ضحكت معاها..رجعت حكات..
لينا: تلعبو معايا ؟
شفت معا مهدي..تبسملي هزلي براصو ايه..رجعت شفت فيها..هزيتلها براصي ايه..ضحكت..جبدتنا فيزوج من يدينا..تطبع فينا معاها..قعدتنا عالارض..حطيت قدامنا الكارطا..لي ليڨو..دار تاع باربي..و بزاف حاجات..منعرفش شحال تعدا علينا وقت و حنا نلعبو معاها..محسيتش بالوقت..يمكن اكثر من ساعتين..شوية و سمعنا صوتها مورانا..
ميڨان: لينا عزيزتي..وقت القيلولة تاعك يا روحي
شافت فينا و رجعت شافت فيها..وقفت..وقفنا جرتها..
لينا: راح تولو ؟
مهدي: اكيد
شافت فيا كأنها تسأل فيا..نزلت ليها..حطيت يديا على وجها نحكي..
انا: اكيد راح نرجع
عنقتني..لفيت يديا عليها..شوية و جبدت روحها..قربت تجري لميڨان..شدتها من يدها..عملتنا باي باي و راحت معاها..بقيت نتبع فيها بعينيا حتى راحت..تنهدت..سمعتو يحكي..
مهدي: مغلطتش كي جبتك لهنا
انا: هههه علاه
مهدي: خاطر لينا ارتاحتلك..نظن لاحظتي انها متحكيش بزاف و جابدة روحها عالدراري لي هنا و قلييل وين تحكي معا كاش واحد..و مدام حكات معاك معنتها نتي الشخص الصح مالمكان الصح
تبسمتلو..يمكن خاطر حست بيا..خاطر حست انا متشابهين..كي شفتها حسيت روحي قاعدة نشوف فنسخة مصغرة مني..
انا: خلينا نروحو
هزلي براصو ايه..نزلت رفدت صاكي..خرجنا ملتم كيف كيف..ركبنا..ديمارا..تكيت لتالي نحكي..
انا: مهدي..ميرسي خاطر جبتني..رتحت بزاف
مهدي: انا لي لازم نقولك ميرسي خاطر خليتي لينا تخرج من حيز الوحدة تاعها شوية..
انا: راح نولو ؟
شاف معايا..طاحت عينو فعيني..نظرتو مفهمتهاش..بقيت مركزة معاه..شوية و تبسملي..
مهدي: اكيد
رديتلو التبسيمة..رجع تلفت لطريق..تنهدت..جبدت تيليفوني نتفقد فيه..اول ما فتحتوعينيا خرجو..17 ابال من هشام..عضيت شفتي بقوة..كيفاه مسمعتوش..فتحت لي ميساج..نقرا فيهم و نعاود.."حسابي معا ### اومبعد"..."### وين راااكي"..."عاجبك الحال و نتي شايدة يدو ؟"..."واااو نتوما الثلاثة راكم تبانو عائلة سعيدة"..."بوسيه تحاسبك ###".."عجبك الحال معاه ### راكي فرحانة دك ؟".....
عينيا وساعو..فمي تحل..عديت يدي عالتيليفون بالزربة..نحوس على كاش كاميرا..وليت نشوف يمين و يسار..نحوس عليه..وجهي راح الوان و رجع الوان..منيش مصدقة كيفاهعارف كامل هاد ااحاجات..باز اكيد مرااقبنا..بصح ويين رااه..قاطعني صوتو لي خرج يسأل فيا..
مهدي: فيرا لاباس ؟
تلفت ليه..هزيتلو براصي ايه..
مهدي: متأكدة وجهك رجع صفر؟
انا: مممم غير ساعات ندوخ مالطونوبيل
مهدي: تحبي نحبسلك
انا: نو مكاين لاش خلاص دك
مهدي: كيما تحبي..ادا عاودتي دختي قوليلي
هزيتلو براصي ايه..رميت يدي لشباك فتحتو..خذيت نفس طويل نهدي فروحي..مدام مهدش علينا مقبيل معنتها معندو ما يدير دك..اما فالدار..فربي معايا و خلاص..غمضت عينيا و رجعت فتحتهم..نقوي فروحي..موجدة ملبارح لكلام لي راح نقولهولو..لازم يتحط عند حدو..تلفت لعندو..نزلت بعينيا بين المقعد تاعي و المقعد تاعو..عينيا لمعو و انا نشوف فتيليفونو..هدفي يفصلني عليه سنتمترات برك..قلبي دق..رجعت طلعت بعينيا ليه..مركز معا الطريق..قبل ما نلحق نرمي يدي ليه..حسيت بخبطة قوية ماللور فالطونوبيل خلاتني نتهز و نتنفظ..
انا: اااااه
مهدي: ### ## شكوووون هادااا
عينيا خرجو..للحظات فكرتو هشام..درت بالزربة للور..قلبي طاح و انا نشوف فطونوبيل كحلة تابعتنا و فيها رجال دايرين لي ماسك..درت نجري عند مهدي..
انا: مهدددددي شكووون هادو
خبط الفواون بيديه يعيط..
مهدي: معلاااباااليش لااحقيناا..
انا: وااش حدييير
مردليش..زاد فالفيتاس اكثر..شديت بيديا فالكرسي..غمضت عينيا بقوة..نسمع فيه يحكي..
مهدي: فيراا انا هدفهم..اول ما نشد فران اهبطي بالزربة و اهربي
عينيا وساعو..تلفت ليه بالزربة..
انا: هبببلت كيفاااه نخليك
خبط الفولون و زاد فالفيتاس كتر..يحكي و يعيط..
مهدي: ### ديرييي لي قتلك عليييه بلا هدررة علابالي واش راني ندير
بلعت ريقي بالسيف..مقدرتش نزيد معاه فالهدرة..قلبي نحس فيه راح يخرج مبلاصتو و هوما مزال لاحقينا..رجع حكى..
مهدي: راح نحبسلك عند منعرج..اهبطي على يدك اليمين بين الشجر تخرجي لطريق الرئيسي
بلعت ريقي بالسيف..
انا: ب بصح ن ن...
مهدي: وجججججدي روووحك
مقدرت نزيد حتى حرف..اكيد عندو طريقة باش يسلك روحو..منيش حابة نكون عائق قدامو..كبشت فدوزاني..حطيت يدي عالباب باش نفتحها..شد فران بالقاوي..حتى قبل ما تحبس الطونوبيل نزلت..كلش صرا فثواني..رجع ديمارا من غير ما يغلق الباب..تخبط الباب..بقيت مسمرة فبلاصتي..نستوعب فواش صاري..ما فقت غير وقت حبست الطونوبيل بعيد عليا شوية..و هبط واحد منها و كملت طارت مور مهدي..ساعتها برك استوعبت انو لي نزل راح يلاحقني..معلاباليش منين جاتني هاديك القوة و معلاباليش كيفاه تلفت و قلعت نجري من الجيهة لي قالي عليها مهدي..نجري بأقصى سرعة عندي وسط الشجر..نجري و الدموع ينزلو وحدهم من عينيا..كلمة وحدة نتمتم بيها بين شفافي.."هشام سلكني".
نسمع فخطواتو مورايا..متأكدة قاعد يجري مورايا اما محاولتش حتى اني نتلفت ليه..منعرفش شكون و واش قادر يدير فيا..اعطيني غير نهرب..حتى اني مشي قاعدة نحس بلوجع من هاد الاغصان لي قاعدين يجرحو فيا..فوجهي فيديا..فكل بلاصة..نجري و نلهث..شعري تفتح..دوزاني طاحو فكل بلاصة باقي غير تيليفوني فيدي..نزلت راصي ليه نحاول نلقى فرصة نعيط لهشااام..منعرف فاش تعثرت رجلي..ملقيت روحي غير فالارض..وجهي و يديا جاو فالتراب..غمضت عينيا بقوة..عيطت بكامل صوتي ملوجع..كبست عليا يديا..رفدت روحي بالسيف تقعدت..نشوف معا الجونو تاعي مجروح و الدم يسيل منو..تلفت مورايا..عينيا خرجو و انا نشوف فهاداك المقنع قريب يلحقني..تقاويت على روحي..رفدت روحي بالسيف..نجري و نعرج..شادة فالشجر و نجري..شوية و موليتش نسمع خطواتو مورايا..صوتو تقطع و مبقيتش سمعتو..معا هذا محاولتش حتى نتلفت مورايا..محاولتش نحوس عليه..تكيت على اول شجرة جات قدامي..حطيت يدي على قلبي نتنفس بالقاوي..نحس فروحي راح تطلع..وجيعة قوية فجنبي..النفس نطلع فيه بالسيف..اول ما فتحت عينيا..تهزيت و تحطيت على صوت رصاصة..عينيا وساعو..اما محسيتهاش قاستني..مشي فيا..محسيتش بيها دخلت فيا..قبل ما نلحق نتلفت  مورايا..حسيت بيد تحطت على فمي..عينيا خرجو..رفدت يديا بالسيف حطيتها عليه..تلفت يد ثانية على كرشي بالزربة..شوية و هديت..هديت وقت شميت ريحتو..و عقلت لمستو..لمستو لي نميزها بين الف لمسة..و ريحتو لي مستحيل نغلط فيها..هو..و شكون من غيرو..حبيبي..هديت وقت عرفتو هو و حسيت بنفسو فرقبتي..شكون من غيرو يقدر يمسني و يحضني هكا..شكون من غيرو يقدر يقربلي لهاد ابدرجة..تكيت راصي على كتفو..ظهري معا صدرو..نفسو فرقبتي..دموعي نزلو اكثر..غمضت عينيا براحة..عرفتو قتل هاداك..نزل يدو من فمي بلعقل..اول ما قدرت نحكي..اسمو خرج تلقائيا من بين شفافي..
انا: ه هشام
سمعتو وقت تنهد..تنهد بحرقة..بلهفة..رفد يدو حطها على وجهي يبعد فشعري لتالي و يمسحلي على وجهي..ستحليت لمستو..يحكي فرد وقت..
هشام: راك مليحة ؟
سكت..وجعتني نبرة صوتو..من غير ما نشوف فيه..من غير ما نشوف معا عينيه..من نبرة صوتو برك حسيت بزعافو..بخوفو..بقلبو لي قاعد يضرب بالقاوي..اما لي قهرني فيها..انها باااردة..صوتو خرج ببرود..ببرود مشي متعودة عليه معاه..رجع حكى..
هشام: راكي تسمعي فيا فيرا جاوبيني
انا: مممم..مليحة
تنهد براحة..نزل بيدو لتحت فخذي..رفدني بالسياسة فحضنو..حطيت راصي على كتفو..كبشت فيه اكثر..دموعي محبوش يحبسو..قلبي لتو يضرب بالقاوي..منيش مصدقة اني عاشت كامل هاد الشئ فربع ساعة..غمضت عينيا بقوة..منيش حابة نفكر فلي صرا..منيش حابو نتفكر..عمري ما خفت كيما خفت اليوم..رجعت مالموت بشعرة..
حسيت بيه وقت حطنا فطونوبيل..فتحت عينيا شوية..نشوف معاها..وجهو معا وجهي..عينيه فعيني..ندرتو قتلتني..نظرة لوم..غضت..خوف..خلاتني نبلع ريقي بالسيف..رفد يدو عداها على وجهي بلعقل..رجع شعري لتالي..غمضت عينيا بقوة وقت كبس على شعري..
انا: اااه هشام و وجعتنني
مردليش..جيست جبد يدو بلعقل و بعد بالزربة و خبط الباب غلقها..تهزيت و تحطيت..عرفتها راح تكون اخرتي هاد المرة..ثواني و ركب قدامي..ديمارا طاير..تنهدت و انا نشوف معاه..منعرفش واش راهو يستنى فيا..نزلت راصي..شوية و لحقني ميساج لتيليفوني..فتحتو نقرا فيه..من عند مهدي..عينيا وساعو وقت تفكرتو.."عرفتو هشام داك..متخافيش عليا انا لحقوني رجالي..منبعد نحكو"..تنهدت براحة..دك رتاحيت و طمنت..سلكنا منها فاخر لحظة..
هشام: فرررحتي ### فرحححتي كي بعتلك ميساااج و عرفتيه لاباااس عليه ااا اهدري
تهزيت و تنفظت من عياطو..تلفت ليه..يحكي و كابس عالفولون بكل قوتو..عروق يديه راح يطرطقو..وجهو حمر و عينيه حمورا جمر..منعرف كيفاه عرف انو مهدي لي بعتلي ميساج..بلعت ريقي بالسيف..نحاول نحكي..
انا: ه هشام ان...
هشام: اششش فيرا اشششش منسمعش صوتك اشششش متهدريش
بقيت نشوف معاه و انا نترعد..يحكي و حاط يدو على شفافو يسكت فيا..بلعت ريقي للمرة الالف..صوتو خرج بزعاف..بنبرة برود..بغضب يمكن متخلقتش كلمات كافية باش توصفو..حاساتو قنبلة و لا بركان قدامي..تلفت لطريق..غمضت عينيا و رجعت فتحتهم..عارفة مراحش نسلك وقت نوصلو..بصح رغم هادا مراحش نسمحلو يعمل لي حب عليه..و يخرج هاد الزعاف فيا..حتى انا عندي كلام نقولهولو..و حتى انا عندي كيفاه ندافع على روحي..رغم هاد لوجع لي راهو فيا و هاد الجروح كاملين بصح مراحش نسكتلو و نخلي لهدرة في قلبي..موجدة لكلام لي نعطيهولو..بزااف هكا..معندوش الحق يتحكم فيا لهاد الدرجة..مننكرش اني ميتة من خوفي منو..بصح فنفس الوقت لازم تتحط النقاط عالحروف..لازم نفهم منو علاه قاعد يعمل معايا هكا..
★★★
الحلقة😙😙
رايكم لبنات✌و اطوني توقعاتكم😈😈🔥نسحق توقعاتكم كاااامل💋✌
وااش حيصرا فالحلقة الجاااية😱و واش من نقاط ناوية فيرا تحطهم عالحروف ؟؟ 😱😱و هاااد المرة هشام راح يعاقب فيرا ؟ كيفاه حيكون عقابو ؟؟؟ كيفاااه راح يخرج زعافو😈🔥💣💣
تفااعلو تفاااعلو تفااعلو لكرونيك رااهي بداااات😙💜