ساعة الندم ♤•باللهجة الجزائرية•

البداية

سلام راني واليت بهذا لكورنيك لجديد إن شاء الله يعجبكم و إلا عجبكم نتمنى تدعموني

---------------------☆☆☆☆☆☆☆☆☆☆☆

قاعدة في لمقدمة تع لباتو *الباخرة* نشوف
فلبحر و نقسم فلخبز نفتاتو و نرميه فلما باش نوكل لحوت ولا طيور

شفت سما شحال راهي شابة و صافية قعدت نتأمل و نشوف لجمال تاعها حتى بدأ يبانلي البور *الميناء*

تبسمت و لحيت نواظري تع شمس بداو يبانولي ناس فوق لبور كل واحد لهي بخدمتو وليت لشومبرة تاعي خبيت كتابي و ديت تيليفوني

هبطت بكل ثقة فهذوك دروج حتى شفت واحد مدلي يدو شديت يدو و كمل عاوني نهبط غمضت عينيا لفترة نتحسس ريحة البلاد لي عندي شحال ماجيتش ليها نسمة باردة ضربتني غطيت روحي بيديا

عندو لحق لي قال مكاش كيما بلادك و ناسها الغربة واعرة بزاف بديت نتحي لهذوك لي راهم يخدمو مساكن و نسي نطلعالهم لمورال اموا بكلمة حلوة

شفت واحد يبان فربعين جاي ملبعيد و يضحكلي لابس كوستيم كحل شعرو نصو بشيب مي ضحكة تعو ترد روح 

عمار: مدموزال تسنيم واش راكي

تسنيم: مليحة موسيو " ورميتلوا يدي باش نخمس معه"

عمار: موسيو عمار شوفور تاعك مدموزال " و خمست معها  رفدت لفاليزات حطيتهم في الطونوبيل و سنيتها تجي"

تسنيم: يعطيك صحة عمو عمار

عمار: الله يسلمك مدموزال وين راكي حابة تروحي

تسنيم: عمو عمار عيطلي تسنيم بلا مدموزال راني في عمر بنتك  إذا منشقيكش للدارنا

عمار: كيما تحبي بنتي دار راهي كيما خليتها مابدلنا والو فيها

تسنيم: يعطيكم الصحة كي تهليتوالي فيها هذي دار عزيزة عليا و درت رأسي على تاقة

نشوف ناس و نسي نعقل على طريق تقول ماعندي شحال مجيتش مزال كلش كيما كان شفة طالعة تع دارنا بدأينا نقربو جبدت من صاكي مراية و غوجالاف

درتو و سجمت روحي عودت حطيت نواظري حتى شفت بلي لحقنا هبطت بزربة وغلقت الباب راني متحمسة نشوف دارنا

عمار: تسنيم أطلعي دوك نجيب لكابات

تسنيم: يعطيك صحة عمي عمار مشيت بكل ثقة في هذيك لحومة ناس جاع يشوفوا فيا و كل مانعدي خطوة يتسمع صوت طالون تاعي

طلعت رأسي نشوف نسا لي راهم فتواقي غير لقرع تبسمت نص تبسيمة و طلعت دروج تع دار درت لمفتاح و حليت الباب

أول حاجة ضربتني ريحة الماكلة و الحس بالحنانة لحس لي تحرمت منو عندي شحال لحيت صباطي و لبست بليغة من بلايغ دار وراحت للكوزينة