နှစ်တစ်နှစ်၏ မိုးအကုန် ဆောင်းအကူးကာလ။ အချိန်အားဖြင့်ဆိုလျှင် ၂၀၁၆ခုနှစ်၊ နှစ်ကုန်လုဆဲဆဲအချိန်၌ဖြစ်သည်။ ရန်ကုန်ဆောင်းသည် ရှမ်းပြည်နယ်နှင့် အချို့သောဒေသများ၏ ဆောင်းဥတုနီးပါး အချမ်းဒဏ်ကိုမခံစားရသော်လည်း ဆောင်းရာသီ၏အငွေ့အသက်များကိုတော့ ထိတွေ့ခံစားရပေ၏။
ရန်ကုန်မြို့၏ အထင်ကရနေရာတစ်ခုဟုဆိုနိုင်သည့် မြို့လယ်ရှိမဟာဗန္ဓုလပန်းခြံတွင် အနားယူအပန်းဖြေသူများ၊ ပြေးလွှားဆော့ကစားနေသူများနှင့် စည်ကားလျက်ရှိပေသည်။ ညနေစောင်းနေအေးချိန်လည်းဖြစ်တာကြောင့် ရာသီဥတုက အနည်းငယ်
ချမ်းစိမ့်စိမ့်ဖြစ်နေခဲ့သည်။ပန်းခြံအဝင်လမ်းတစ်လျှောက် ဘေးတစ်ဖက် တစ်ချက်စီတွင် အရောင်အသွေးစုံလင်လှသော သစ်ပင်ပန်းမန်များနှင့်ခြံရံထားပြီး သက်တမ်းရင့် နှစ်ရှည်ပင်များကလည်း သူ့ထက်ငါအပြိုင် ဂုဏ်ဝင့်လျက် အထက်ကောင်းကင်ပြင်ကို ငေးမျှော်ကြည့်နေကြပေသည်။
ထိုပန်းခြံအတွင်းရှိ သက်တမ်းရှည်သစ်ပင်များအနီးက ကွန်ကရစ်လောင်းထားသော အုတ်ခုံတစ်ခုံပေါ်တွင် အထက်တန်းကျောင်းသားအရွယ် ကောင်လေးနှစ်ဦးထိုင်နေကြသည်။ မျက်ခုံးမွှေးမထူတထူ၊ အသားကဖြူဖြူဖွေးဖွေးနှင့် အရပ်မြင့်ဟန်ရှိသည့် ကောင်လေးတစ်ယောက်က သဲကြီးမဲကြီးနှင့် ဂိမ်းကစားနေ၏။ ရယ်လိုက်တိုင်း လက်ဝဲဘက်အခြမ်းက သွားတက်ကလေးပေါ်နေတတ်ပြီး ဗမာဆန်ဆန် ဝင်းလတ်သောအသားအရည်ကိုပိုင်ဆိုင်ထားသည့် ကောင်လေးကတော့ ဂိမ်းထဲအာရုံရောက်နေသော သူ၏နံဘေးမှကောင်လေးကို တွေတွေကလေး စောင်းငဲ့ကြည့်နေလေသည်။ ထိုကောင်လေးနှစ်ယောက်သည် အလယ်တန်းကျောင်းသားအရွယ်ကတည်းက ပုခုံးဖက်ပေါင်းလာကြသည့် ဆိုးတူကောင်းဘက် ငယ်သူငယ်ချင်းများဖြစ်ကြသည်။ တစ်ယောက်အခက်အခဲတွေ့ ချိန်တိုင်း ကျန်တစ်ယောက်က မားမားမတ်မတ်နှင့် ရင်ဆိုင်ဖြေရှင်းပေးသလို တစ်ဦးကဝမ်းနည်းသည့်အခါတွင်လည်း ကျန်တစ်ဦးက ရင်ဖွင့်စရာနားတစ်စုံအဖြစ်၊ ဒါမှမဟုတ် တွဲထူဖို့လက်တစ်ဖက်အဖြစ် အသင့်ရှိနေခဲ့ကြပေသည်။
YOU ARE READING
ကာလာစုံဝတ္ထုတိုများ စုစည်းမှု
Short Storyကာလာစုံဝတ္ထုတိုများသည် မိမိတို့ပတ်ဝန်းကျင်တွင် ဖြစ်လေ့၊ ဖြစ်ထရှိသည့်ဖြစ်ရပ်များထဲမှ အချို့သောဖြစ်စဥ်တို့ကို လက်တွေ့ နှင့်စိတ်ကူးစိတ်သန်းတို့ပေါင်းစပ်ကာ ဖန်တီးရေးသားထားခြင်းဖြစ်ပါသည်။