ချစ်သော...ဦး(Uni+Zawgyi)[Completed]

Part(15)

Unicode

ဒီနေ့တော့ မဟော်ကျောင်းသွားလို့လည်းမမှီနိုင်တော့။ ဒါ့ပြင်နေလည်းသိပ်မကောင်းချင်သေးတာကြောင့် ဦးထွက်သွားသည်နှင့်အိမ်ထဲသို့သာပြန်ဝင်လာခဲ့တော့သည်။

ဗိုက်နည်းနည်းဆာနေသည်မို့ အိမ်ထဲသို့ဝင်ဝင်ချင်းမှာပင် ကျောပိုးအိတ်တွေလည်းမချနိုင်သေးဘဲ မီးဖိုခန်းတွင်းသို့သာအလျှင်အမြန်ဝင်မိပါ၏။

စားဖိုဆောင်ကိုတာဝန်ယူရသော အဒေါ်ကြီးနှင့်သူ၏တူမလေးတို့မှာ နေ့လည်စာအတွက်ပြင်ဆင်ချက်ပြုတ်နေသည်။
သူတို့က အိမ်ကြီးအတွင်းမှာတော့သိပ်မနေကြပါ။သူတို့အလုပ်ပြီးသည်နှင့်အလုပ်သမားတန်းလျားသို့ပြန်ကြရသည်။မဟော့်အဖေ မဟာ့အနေနှင့်က ဒီအိမ်အတွင်းမှာမိသားစုမှလွဲ၍တစ်ခြားသူစိမ်းများနေထိုင်ရန်ခွင့်မပြုသောကြောင့်ဖြစ်၏။

"ဒေါ်ကြီး ကျွန်တော်ဗိုက်ဆာလို့ တစ်ခုခုစီစဥ်ပေးပါဦး"

"ခဏလေးနော် သားမဟော် "

"ဟုတ်"

မဟော်သည် စိုထိုင်းသောကျောပိုးအိတ်အတွင်းမှ စာအုပ်များကိုထုတ်ကြည့်မိသည်။

"စိတ်ပျက်လိုက်တာ"

ရေတွေစိုနေသောစာအုပ်များမှာ မှင်တွေပါပျံ့နေလေ၏။စုတ်ပြတ်သတ်နေသောစာအုပ်များက အပူပြန်ပေးလျှင်တောင်အဆင်မပြေနိုင်တော့သည်မို့ မဟော်သည် ထိုစာအုပ်များကို အမှိုက်ပုံးထဲထည့်ရန်မီးဖိုချောင်အပြင်နောက်ဖေးဘက်သို့ထွက်လာခဲ့တော့သည်။
နောက်တစ်နေ့မှပဲ ဇွဲကိုတို့ဆီကစာအုပ်ငှားပြီး
မိတ္တူကူးလိုက်တော့မည်လေ။

အမှိုက်ပုံးမှ ခြေနင်းခုံကိုနင်းလိုက်သည့်အချိန်တွင် ပန်းကန်ကွဲများစွာကအမှိုက်ပုံးထဲမှာနေရာယူနေလေ၏။မဟော်သည် ဒီလောက်များတဲ့ပန်းကန်တွေကွဲအောင်ပင်ပေါ့ဆရသလား ဟူသောအတွေးနှင့် အဒေါ်ကြီးတို့ကိုမေးရန် အိမ်တွင်းသို့ပြန်ဝင်ခဲ့လေသည်။

"ဒေါ်ကြီး ပန်းကန်တွေအများကြီးဘာလို့ကွဲသွားတာတုန်း ဖေဖေသိရင်ဆူလိမ့်မယ်နော်"

ဟုတ်သည်။မဟာရောင်နီသည် စည်းကမ်းမရှိပေါ့ဆပြီးနမော်နမဲ့နိုင်တာမျိုးကိုမကြိုက်ပါ။ပစ္စည်းများဆုံးရှုံးသည်ထက် ရှပ်ပြာသည်ကိုမုန်းသည်။အလုပ်သမားတွေထဲတွင် အဲ့လိုပေါ့ဆလျှင်လည်းတစ်ခါတည်း အလုပ်ထုတ်ပစ်တတ်ပါ၏။