من سيل المدامع باد مني الثوب
مااضن مثل ونتي يون يعقوب
يوسف يوم گالولة كلاه ذيب
اجلبنك يليلي ثنعش تجليبة
اجلبنك ياليلي والدمع يهمل
اله رنه وطجيج يجفل المجبل
زرع غيري حصد ومصوفر السنبل
وانا رويطة وحندكوك اليوم ترتيبه
اجلبنك ياليلي وبينك وبيني
يمين الجان غمضت للصبح عيني
ولك حشم ولك صيح اليعاديني
ولك لا يالهوى خذ گلبي وجيبه
اجلبنك ياليلي ثنعش تجليبة
اجلبنك ياليلي والدمع همال
يخيف من الهدير ونازل من جبال
عليه احرب زماني بجيش سبع ارتال
مدجج بالسلاح وعالي ترتيبة
اجلبنك ياليلي ومن تطول افرح
لأني بيك انوح وبالنهار اسرح
گالو بالفتح اقرا {والم نشرح }
بلچن الله يزيل تعذيبه
اجلبنك يليلي وعود گمت اقرا
بأول بسملة وخنگتني العبرة
شلون الهج بغيرة وناره موجره
بگلبي وصوبن چبدي اليشاشيلة
اجلبنك ياليلي والدمع يهمل
الحجل بالساق لايصعد ولاينزل
عليه احرب زماني بدهر مايبطل
حربه وياي حرب مطيري ورتيبه
اجلبنك ياليلي سعاتاً ساعة
وابالع چن رضيع الماله رضاعة
ياليلي الليله ليله كون وداعة
تجيني لگلبي انشلعن چلاليبه
اجلبنك ياليلي والنجوم شهود
ارعى للصبح واحسب وارد ردود
لو هادن عيوني ،الروح كيف تهود!
مادام تلوج من دهري ومصاعيبة
