#نسيبه
لالا نوسه نوسه مانحبش من يناديني بأمه الاسم هدا..
المهم اني نوسه عبدالحكيم الكاتب..اها اخت هيثم..غير راجو شويه ايه اخته اخت هيثم لكن عشت عمري كله في ليبيا..
اني وبلا زهاق كبد ابله جغرافيا نقري فثانوية ولاد مش تقولوا تقري فرجاله كيف دايره معاهم ودين الله غير يسمعوا بإسمي من قبل مانوصل فيهم يطيروا طيارة للفصول ويبيسوا في مقاعدهم..
مدايرتلهم الرعب..ممكن هدا علاش ماتجوزتش لتوا ماهو الذكورة يخافوا مني...حتى جريوات خالد وخالد بطوبته لما تفسد سيارتي نلوحها في ورشتهم بالبلاش يصلحوها مع الشكر...
ايه واكره مانكره اكرررره مانكره ولده الكبير خليل الحيوان مسميني اندرديكر وراهو عرفت بالصدفه باك يقدر يقولها فوجهي وحق من خلقه نخلي عيونه الزرق طرطريات..
المهم بلا كترة دوة بعدين ان شاء الله تعرفوني اكثر..
