ع قد ماكتبت من روايات ونسجت شخصيات رجاليه رائعه من خيالي وشخصيات من ارض الواقع نقلت قصصهم في رواياتي ماوصلتش لهالمرحلة من الجمال..👇
وحدة تحكـي :
لما تجوزت اول فترة كانت عندي رهبة من الحوش الجديد ، مكنتش نرقد كويّس ، كنت نتحشم ف نومتي الطبيعيه ولا ناكل قدامه ع طبيعتي ولا نخش الحمام ..تاني يوم زواج اماليه جونا ، وقعدو وكان من المفروض بنطيبلهم غدي ف خشّيت نوتي ، لقيته خش ورايي طلّع العصير وصبّه فالطواسي ومشي هوا ضيّفهم ..
لما اخته يلي كانت مسافرة جتنا وكانت تبي تتفرّج عالحوش قاللها " دقيقه بس " وخش يتأكد ان الحوش نضيف ، خش ل غرفه النوم عدلها عالسريع لانهم جونا صبح بكري ، ونضف أي حاجة شافها قدامه ، وبعدين طلع قاللها " تفضلي "
كانت حرارتي ترتفع ديما واغلب الوقت عندي صداع نصفي ف مرة من المرات لما حس انّي تعبت وبديت نشد ف راسي واني واقفه ف المطبخ خش وبعدّني ع حرارة الغاز وقف مكاني وقالي " وريني كيف وانا نديرها "
متحشمش من امه يلي فاتت علينا فجأءه ولقاني واقفه ندير ف سلاطه وهوا اللي واقف يطيّب ف الرز ضحك ف وجهها وقاللها " ولدك بدي ست بيت شاطره "
قالتله ف حوشنا معمركش قمت كاشيك ضحك وسألني " نزيد نحطلك تاكلي ولا خلاص 🤍 "تعاركنا مع بعض مره وكنت موتيه شنطتي بش بنمشي ل حوش اماليا ، كنت مقعمزه نحط ف حاجاتي ونبكي ومسكره الدار عليا شوي وطقطق الباب وكانو خوه ومرته جاييّن ، فتحلهم وقعد معاهم شويا وخش طقطق عليا وقالي سلمي عليهم ومتحسسّيهمش انّ حني متعاركين ولا زعلانين من بعض ..
مسحت دموعي وساويت روحي وطلعت مبستمه ف وجههم وقعدت معاهم ، قعمز هوا جنبي وقعد يبصر عليا وكان يوجهلي ف هلبا كلام بش نرد عليه ويحط ف ايده ع كتفي ويضحكلي ، خلاني مقعمزه معاهم وناض فضّى الشنطه ..واكتشفت بعدها أن هو يلي رن علي خوه ومرته وعزمهم بش يعرف يصالحني لانّ كنت مصممة نمشي ،
- وحقيقي مافيش انجاز أكبـر من انّك تختاري شخص صح ، متهونيش عليه ويعـرف يعظّمك قدام النـاس ويحطلك عذرك 🤍.
ربي يرزقكم بالشخص الحنين ♥️