معلوات دينيه

حوارات شبابية

حوارات شبابية

السلام عليكم مشكلتي اني كلما اتوب ارجع أذنب
كلما اوعد رب العالمين ارجع اخلف الوعد تعبت
من نفسي شسوي ومنين أبدى وشلون اتصرف
وي هالنفس الإمارة بالسوء؟

وعليكم السلام و الرحمة....

شوفي اختي اخي قبل كلشي خلي ببالك انك بمجرد
تفكيرك بهالأمور هي تقرب لله يعني بها الظروف
الصعبة الدنعيشها وهالاغراءات والفساد الخلقي
اللي دنشوفه كدامنه وانت دتفكر شلوت توصل
لله وشلون تتقرب هذا شي عظيم
رب العالمين حتى على هاي يثبتك تخيل

مادام عندك تأنيب ضمير تجاه الذنب ف انت بخير
مادام تضوج من تروح المكان بي معصية ف انت بخير
مادام تندم ع الذنب اللي سويته ورا فتره
قصيرة ف انت بخير

بس...!
صحيح انت بخير ...بس خيرك اللي انت بي ضعيف
صحيح انت مؤمن.... بس إيمانك اللي انت بي ضعيف

احنه نحتاج:  ذنب+إصرار على تركه
أكثر مانحتاج :ذنب+بكاء على فعله
اكو واحد من يسوي ذنب يبجي.. بس يبجي حتى
يريح ضميره بس اكو لا كل دمعه تنزل منه تهد جبل
من الذنوب اللي على ظهره هاي الدموع هي اللي
راح تغسل حديقة قلبه وراح ترجع تزهر من جديد ََ..

كل إنسان بينه معرض للذنوب من الصبح لليل
اصلا احنا حياتنا عباره عن جبهة ابليس يرفع
واحنه نكبس..... والبطل مو اللي سوه الذنب
وبعدين ندم وكام يبجي... لا.. البطل هو الي وكف
كدام الذنب ومال لا الله أهم

مو بس المجاهد بالجبهة انت هم بالجبهة
واني هم بالجبهة عندك عتاد لا تكلني ما عندي شي
تدري شنو عندك؟
عندك صلاة إذا التزمت بوقتها راح تكدر تنتصر
حتى على إسرائيلك(شيطانك الاكبر)..
(قل رب بما اغوينتي لازينن لهم في الارض ولا
غوينهم أجمعين (39) الا عبادك منهم المخلصين(40) )

وهم عندك عتاد الصدقة تصدق مو شرط بفلوس
ذيننا مجاني مو بفلوس!
ابتسم بوجه امك... هاي صدقة
خفف جرح واحد بكلامك.. هاي صدقة
علم طفل سورة الفاتحة.. هاي صدقة
اهدي تسبيحة الزهراء نيابة عن شخص
عنده حاجه.. هاي صدقة
خليك دائما قريب من الناس اللي تشوف بيهم الله
حمل بموبايلك صوتيات ياثرن بيك مثلا قصائد او
قصص أو أي شي من هالقبيل واسمعهن دائما..
خلي فد شي كدام عينك مثلا اكو سوارات مكتوب
عليهن يازهراء أو يا صاحب الزمان.. خليهن
بيدك حتى من يصير كدامك ذنب تباوع عليه
وتكول لأجل هالاسم ماراح ارتكب هالذنب
أو مثلا خلفية جهازك خليها فد شي يأثر بيك
والأهم ثم الأهم هو القرآن..
تدري ان الانسان كلما يباوع أكثر لآيات
القرآن كلما يزيد توفيقه لغض البصر؟

خليك اية تمشي ع الكل 💙
خلي القرآن قريب من قلبك ومنك 💙

ودائما حافظ على ذكر يلهج بي لسانك..(ولساني
بذكرك لهجا)
طبعا بدون منك لانو كل ذنب تسوي هو
سهم ترمي بقلب الإمام
من تسوي ذنب تخيل اكو رأس مقطوع
ديباوعلك من كربلاء.. ينتظر منك أكثر من هذا..
والله يوفقنا ويوفقك لكل خير 💙✨