على مَهلِك ..

8

[ 6:30 ]
صحيت بنشاط غريب ..
الويكند خلص ، على اني ما عشته نفس ماخططت له
بس بداية اسبوع جديد يعني بداية جديدة بالنسبة لي

كل اللي حصل امس اني كنت بغرفتي كل الوقت
ولا احد يكلمني ولا اكلم احد
ويارا رجعت بيتها
ماتنلام صراحة اجواء البيت خانقه ..

سويت روتيني المعتاد
حطيت مسكرا وعبيت فراغات حواجبي بشكل بسيط ..
حطيت مرطب وبلشر عالخفيف
تعطرت وابتسمت على شكلي برضا تام
كله خفيف ومريح للنظر
سحبت شنطتي وجوالي وطلعت من الغرفة

ماشفت احد ، بس لقيت مفتاح السياره عالرف
ابتسمت بخفه ورحت وسحبته
واستعديت للخروج ، اقدر اقول انه صباح خير

استوقفني صوته وهو يناديني ..
لا غيرت رأيي مو صباح الخير ابداً

التفت وواجهته لأول مره بعد كلامي هذاك اليوم
شفت ابتسامته ترتسم على وجهه بهدوء :
ليه مستعجلة ؟ انا بوصلك
رديت عليه بكل ثقه وهدوء :
مايحتاج اعرف اسوق ودايماً اوصل نفسي بنفسي
جاوبني وبنفس ابتسامته :
ادري فيك ولكنك باقي تحت السن القانوني للقيادة
وطالما انا هنا ابوك ، يعني انا بوصلك
تفضلي قدامي
ومد يده بينما ينتظرني اعطيه المفتاح

وسعت عيوني من الصدمة
وبالفعل رميت المفتاح والتقطه مني
و طلعت من البيت وهو وراي
وكل تفكيري اختصرته بسؤال واحد
هل هو جاي يتحكم الان بكل أمور البيت ؟
اتوقع كابوسي بدأ ..
مشيتها هالمره لسبب ما اعرفه ، يمكن احاول اتجنب المشاكل لاني ابغاه يكون صباح خير قدر المستطاع ؟

بالسيارة ، كان هدوء وسكوت
حمدت ربي انه ما كان يحاول يفتح معي اي موضوع
ماكنت راح اضمن اسلوبي المحترم صراحة ..

نزلني للمدرسة ،
صح ماكنت ابيه يكلمني
ولكني تمنيت يحصل بيننا اي كلام
اي شيء يحسسني ان كلامي اللي قلته اول
ماضاع هباءً منثورا ..
طنشت أفكاري المتناقضة ودخلت المدرسة ، ولوهلة تذكرتها
ابتسمت بخفه
وأعترف ؟ اشتقت لأستفزازها المستمر لي ..

توجهت لصحباتي وانا احضنهم بكل مافيني
خاطبتني لمى : اشوفك مروقه ؟
ضحكت بخفه : خطأ ، احاول اروق
قاطعتنا لانا وهي متحمسة :
فاتك ايش صار !!
ضحكت لمى وكأنها تذكرت :
بالقوه اجبرت لانا تلتزم الصمت كل الويكند عشان نعلمك وجه لوجه
رديت عليهم بفضول : اوف ايش هالشيء اللي فاتني لدرجة سكتتوا عنه كل هالايام عشان تقولوه بوجهي ؟

دق الجرس يعلن بداية الطابور
مخرب علينا لحظتنا
ولكن مايوقفنا شيء
سحبتني لمى ماخذتني لطابور فصلها
عشان تحكيني ..
لمى : لما غبتي الخميس وكنا بالفسحه
قبل انزل لباقي البنات وقفتني وحده
بالبداية ماعرفتها ، ولكني عرفت انها غرام من لما سألتني عنك !!
ماستوعبت لوهله : دقيقه غرام نفسها غرام؟