🌟..
في السيارة اللي مدرسة قدام المدرسه كانت مقعمزة تستنى في صاحبتها اللي كانت داخل تشوف في مشكلة اختها..
داخل..
تحديدا في غرفة المديرة..
كان صوت المديرة هو المسموع..
المديره:مش اول مرة تجيب صاحبها للمعهد وتتلاقى هي وياه وراه..وهالمرة بس شديتها بالجرم المشهود..وراهو مش هكي بس..وبدت تعد ع صوابعها..اختك قليله ادب..لسانها طويل..فاشله قي قرايتها..المدرسات يشكوا منها..
نزلت يدها وقالت..واني تغاضيت عنها هلبه وفوتت لكن لهني وساد خلاص..اني معاش نقبلها عندي في المعهد..هونا بروا سجلوها في المعاهد السايبه اللي لافيها رقيب ولاحسيب ادير ماتبي..
امنه كانت تسمع في كلام المديرة وهي تشوف لأختها بحده..
وسيرين منزله راسها لوطا ودموعها ينزلوا..
شبحت آمنه للمديرة وقالت:عطوني ملفها..المكان هدا ماينفعش بيها بنرفعها لأحسن منه..لناس فعلا تخدم في وزارة التربيه..والتعليم..
رفعت سيرين عيونها وشبحت لآمنه..
المديره:والله عزيزتي اللي يجينا متربي من حوشهم تنفع معاه الربايه اللي هني..وأختك مانفع فيها شي..
ابتسمت امنه بتهكم وهزت راسها وهي تقول:باهي جيبوا ملفها...
...........
في الطريق..
كانت سيرين تشبح للروشن ودموعها ينزلوا..
وآمنه مرة مرة تشبحلها من المرايه..
وهبه اللي حست ان الوضع مش تمام..دارت روحها مش مركزة عليهم..
شويه وحطتها آمنه قدام حوشهم..
بعد نزلت هبه..
ركبت سيرين القدام..وآمنه تحركت طول..
سيرين بلعت ريقها وشبحت لآمنه وقالت:شن بيصير فيا توا؟
امنه بحده:توا تسألي شن بيصير فيك!؟مافكرتيش فيه قبل وانتي ديري فاللي درتيه..
سيرين عقدت حواجبها وقالت:اسمعي ماديريليش فيها الجو متاعك ايوه..وانتي ماصدقتي شديتي عليا حاجه..خلاص معاش نبي نعرف شي...
امنه ابتسمت بسخريه وقالت:اوكي تمام..
تو نقول لبوك ع اللي صار ونعطيه الملف متاعك وهو يقولك شن يصير بعدين..
سيرين:شن قصدك انتي تهددي فيا!! اني الغبيه والحماره اللي كلمتك علاش نكلم فيك ماهو خديت ملفي وروحت بلامنية وحدة زيك..
آمنه تسمع فيها وهي تسوق ووصلت لقمة الإنفعال..
اختها فوق غلطها وفوق اللي سمعاته من المديره بسببها مازال بكل عين قويه تتكلم وتتمادى معاها...لاإحترام لاتقدير انها جتها...وحده غيرها كانت تنصلت من المسؤوليه وقالت مادخليش بيها..
لكن طول مشتلها تجري بدون ماتفكر في شي غير الاخوه اللي بيناتهم..
سيرين:نزليني نزلي..تو ناخد تاكسي ونروح بروحي..
امنه كانت تغز ع سنونها من الغضب وهي مطبقه شواربها ع بعض بقوة..
سيرين بصوت عالي:نزليني قتلك..
امنه بغضب درست السيارة ع تركينه وقالت بصوت عالي وهل تخبط ع الدومان:ضمي فمك صكري فمك..صكريه..
شدت الدومان وهي تقول..مش ساد اللي سمعته من هزايب واهانات بسببك..اول مرة في حياتي نسمع كلام زي هدا..ونحس روحي مخزيه قدام حد..لو كنت مكانك عيني مانقيمهاش..فمي مانفتحاش..لو كنت مكانك تمنيت ربي ياخد روحي ولاخليت حد يتكلم ع بوي وامي بهالأسلوب..
ولاخليت حد يحتقرني ويتعامل معاي وكأني شيطانة رجيم..بنت بلا اخلاق مايبوهاش في مكان محترم...
نزلوا دموع امنه وهي تقول...لو كنت مكانك كنت بكيت ع روحي..
سيرين قعدت تشبح لأمنه بعيون جاحظات ودموعها ينزلوا..
آمنه شبحت القدام وبدت تبكي..
بعدين حطت راسها ع الدومان وهي تبكي بقوة..
وسيرين تشبحلها بصدمه..ودموعها ينزلوا معاها..
تلقائيا حطت يدها في الشنطه وطلعت منها كلينكس ومداته لآمنه وقالت:خودي..
آمنه قامت راسها وشبحت جنبها ليد اختها شافت الكلينكس..
بعدين شبحت لأختها..
فجأه..قعدت تضحك..وتضحك...
سيرين ارتسمت ع وجهها ملامح الإستغراب..
وآمنه تضحك..
سيرين:هبلتي؟
امنه:هههههه...وخدت منها الكلينكس..وقعدت تمسح في دموعها وخشمها..وهي تضحك..
وسيرين تشبحلها وتقول:هادي خيرها!!
امنه بضحكه وهي تشوفلها:استغربت..مانحسابش عندكم قلب...
سيرين رفعت حواجبها وقالت بعد شهقت:الحق مش فيك..
وآمنه رجعت تضحك مرة تانيه..
وسيرين غلبتها الضحكه وهي تشوفلها برفعة حواجب وتقول:باهي اسكتي..
وامنه تضحك ..
وسيرين قعدت تشبحلها وهي تضحك غصب عنها..
وامنه تشبحلها وتضحك..
سيرين حدفتها بباكو الكلينكس وهي تضحك..
وامنه شداته وهي تضحك وتقول...ااه ياربي..وكملت ضحك..
🌸🌸🌸🌸🌸
في احدى المطاعم العائليه..
كانوا مقعمزات ع طاوله يراجو في الغدي وهما يهدرزوا..
آمنه وهي حاطه يدها ع خدها قالت:وباهي شن رايك في اللي داره؟! اللي يحب حق يدير هكي..يحطك في موقف زي هدا!؟
تنهدت سيرين وقالت:هو كويس..
امنه نزلت يدها وقالت:كويس ولامش كويس..سيرين اللي يحب حق...الراجل حق..لما يحب مايرضاش للبنت اللي يحبها اللي مايرضاشي لعرضه..مايرضاش يشوه سمعتها ويخليها تتلاقى معاه بالدرقه..ويخليها تخون ثقة بوها وخوتها وعيلتها..يخاف علي سمعتها زي مايخاف ع سمعته لانه يبيها تولي مرته بعدين..
سيرين تنهدت وشبحت لشيشة الميه..
امنه تنهدت وقالت:شوفي سيرين اني هني مانظرش عليك ولانتفلسف اني بس خايفه عليك..ومانبيكش ضيعي نفسك..اهي بدت بطردك من المعهد والله
اعلم لوين توصل بعدين..
سيرين شبحتلها وقالت بقلق:باهي قوليلي كيف ندير توا!؟ والله لو بابا يعرف يقددني..
آمنه ضمت شواربها لداخل وهي تشبح للفراغ وتفكر..
وسيرين تشبحلها بقلق وتوتر..
امنه:امم..شبحتلها وقالت..خليها عليا وبإذن الله ندير حل..
سيرين:يعني لما نقعد في الحوش ويسألوني علاش مانمشيش شن نقول؟
امنه:قولي ان النظام في المعهد ماعجبكش وانك تبي تحولي لواحد تاني احسن منه..
سيرين بتهكم:ايه وهما طول بيقولولي اللي تبيه ياسيرين اللي يساعدك نديروه انتي بس اشري ع المكان اللي تبي تقري فيه وحني نحطوك فيه..!
امنه بضحكه:اني تو نكلمهم..
سيرين ابتسمت بتهكم وقعدت ساكته..
امنه:عارفه ان كلامي مالاش وزن عندهم لكن تو نحاول والله المستعان..
سيرين ابتسمت ابتسامه خفيفه بعدين قالت:جيعانه..
امنه بإبتسامه:شويه ويجيبوا الغدي..رفعت حواجبها وقالت..نسيت نكلم حنينه!..
رفعت تليفونها وخشت ع الأرقام وحطت ع رقم حناها واتصلت بيها..
حطت التليفون على وذنها..
وسيرين تراقب فيها..
آمنه بإبتسامه:السلام عليكم حنينه.......ايه حبيبتي اليوم بنعطل شويه........لالا ماتخلليش غدي........باهي حبيبتي...تمام....بالسلامه...نزلت التليفون بعد ماصكرت حناها..
وشبحت القدام ...
وسيرين تشبحلها...بعدين استغربت لما شافت ملامح الدهشه ارتسمت ع وجهها..
التفتت وشبحت وين ماتشبح رفعت حاجبها بعدين شبحت لأختها وابتسمت بمكر وقالت:من هو هدا!؟
امنه شبحت لاختها ووجهها مولي احمر:معاش تشبحي غادي!
سيرين بضحكه:جديات امنه هدا منو!؟
امنه بحده:هدا واحد تافه وفاضي..
سيرين بضحكه:لا الباين في قصة طويله..احكيلي احكي..
امنه:ماعندي مانحكي..
ع جية النادل بالغدي..
قعد يحطلهم في الصواني..
وسيرين تراقب في ملامح الخجل والارتباك ع وجه اختها..
مشي النادل بعد ماحط الغدي..
سيرين بدت تاكل وهي تراقب في آمنه..
وامنه سمت بالله وبدت تاكل..بس كانت مرتبكه شويه وهي تاكل..
🌟عبدالقادر..
عبدالقادر:طبعا يعني بنشوفها بهالحال اللي كانت فيه بعد جتها المكالمه وتبوني مانلحقهاش..مستحيل طبعا..المهم فهمت ان في مشكله عند اختها في المدرسه ولا معهد مش عارف..ولما طلعوا طبعااا..لحقتهم..وشفتها وهي تتعارك مع اختها وبعدين قعدت تبكي..وفجاة ضحكت..هههه..حالاتها كلهم يزيدوا يجذبوا فيا ليها..هي غير توافق عليا بس والله نخليها عمرها كله تضحك..
"تفضل خوي"
عبد القادر بإبتسامه:مشكور خوي..
حط النادل الغدي لعبدالقادر..
وعبدالقادر بدي ياكل وعيونه ع آمنه...
🌸تغدوا امنه واختها..
امنه كانت متوترة هلبه وماصدقت اختها كملت طول خدت اختها وطلعوا من المطعم جري..
في الطريق..
سيرين:هههههه..بالله عليك احكيلي..
امنه وهي تسوق:ماعندي مانحكيلك ياسيرين هدا واحد تاافه..شوفي حركاته اللي يدير فيهم..زيه زي هالتافهين اللي يحطوا في راسهم بيطيحوا وحده يقعدوا في جرتها لين يطيحوها في شباكهم..
سيرين:مالقاش غيرك!؟
امنه شبحتله لحظه بعدين شبحت القدام وسكتت..
سيرين:فهمتيني غلط راهو..قصدي هو يشبح فيك تباني ملتزمه وعاقله!!
امنه:والمعنى!؟.
سيرين:يعني هدا ناوي الجديات فهمتيني...
امنه وهي ساكته تفكر في كلامها...
《 اني قبل عمري ماوقفت وقفه زي هادي ع بنت..وقفة نكون فيها..متوتر..ملخبط.....مش عارف منين نبدا الكلام ولا شن نقول..لكن....
"ترضي تتزوجيني"》
حركت راسها يمين ويسار نفيا وهي تقول:لالا النوعيه هادي مايفكروش هكي..اهما تلقيهم يفتخروا بعدد البنات اللي طيحوهم في شباكهم..ولما تعصى عليهم وحده يقعدوا وراها لين يضموها للقائمه..اما علاش اني بالذات فممكن تلقيه هو وصحابه متراهنين متلا انه يطيح هالمعقده العايبه..
وابتسمت ابتسامه جانبيه وهي تشوف لاختها ع جنب..
ابتسمت سيرين بإحراج وقعدت ساكته ماعرفتش شن ترد..
وامنه شبحت القدام وع وجهها نفس الأبتسامه..
شويه وسيرين فتحت شنطتها وطلعت منها عطر وهي تقول:ريحتي دجاج وثومه..
وبدت تبخ..امنه تشبحلها مره مره ع جنب...
شبحتلها سيرين وقالت بضحكه:ماتغلاش عليك..
وبخت لآمنه
امنه بفجعه:لالالا سيرين لا..
سيرين وخرت يدها وهي مخلوعه...
وقفت آمنه السيارة تركينه..
خدت شيشة الميه..وفتحت الباب قعمزت في السيارة ورجليها برا..
وخدت طرف الشاربه اللي جت فيه بخة العطر وصبت عليها شوية مية بعد فتحت الشيشه وهي قعدت تكد فيها بصبعها..
وسيرين تتفرج عليها..
لعند ماكملت ورجعت قعمزت كويس في السيارات وصكرت الباب..
سيرين:لهالدرجه العطر ماعجبكش..ريحة الياسمين هدا!؟
امنه ابتسمت وهي تشغل في السياره قالت:لا بالعكس ريحته حلوه..
وتحركت..
سيرين:عندك حساسيه قصدك!؟
امنه بضحكه:تس..
سيرين:اها فهمتك ماتبي مني شي ولا!؟
امنه:هههههه...لاوالله ماهكي ياهبله..ابتسمت وقالت..مانبيش نولي زانيه..
سيرين بصدمه:زانيه!!!!
امنه:ايه زانيه..الرسول قال المراة او البنت اللي تطلع برا حوشها وهي متعطره وشموا الرجاله الاجانب عنها ريحتها زانيه...
سيرين بتعجب:متأكده انتي؟!
امنه:طبعا..فكري فيها انتي..الراجل بطبيعته معروف
الغريزة عنده قويه جدا ولما تلقي شي يثيرها صعب جدا يسيطر عليها..والعطر من اهم الحاجات اللي ثيره..لما يشمه عليك تلقائيا عقله حيجيبله الرذيله والعياذ بالله..مرات مايبانش عليه راهو...لكن هادي طبيعته اللي ربي خلقه عليها..
عكسنا حني النساوين..قليل النادر لو في وحده شمت عطر راجل تنفتن بيها لكن مايصيرش فينا زي مايصير فيهم..
سيرين قعدت تفكر في كلام اختها وهي تشوف لشيشة العطر..
امنه شبحتلها بربع عين بعدين شبحت القدام وقالت:يعني تخيلي كل واحد شم ريحة عطرك كيف فكر فيك!
ارتسمت ع وجه سيرين ملامح الاشمئزاز..
امنه سكتت..
وسيرين ردت شيشة العطر للشنطه وصكرت وشبحت القدام وقعدت ساكته...
🌸لحظات..
ووصلوا لحوش اهل سيرين..
درست امنه...
سيرين:بتنزلي معاي ولا؟
امنه:اكيد..
نزلت امنه..ونزلت بعدها سيرين...
جت سيرين للباب وفتحاته بالمفتاح وقالت لامنه:خشي..
امنه بضحكه:ماتخافيش مش هاربه..
سيرين بضحكه:خزي عليك والله ماهكي قصدي الحق فيا اللي قلت ندير لقطه محترمه..
امنه:هههههه..
سيرين:مالا والله لما نخش قبلك..
خشت سيرين وامنه خشت وراها وهي تضحك..
صكرت سرين الباب وهي تقول:زي اضحكي ياضحاكه..ويقولوا عليك كئيبه تضحكي اكثر مني..
هدت امنه ضحك وقالت بتنهيده:اللي حواليك هما اللي يخلوك كئيبه وانتي بس اللي تقدري اضحكي روحك وتفرفيحها..
سيرين ابتسمت بإحراج للمرة التانيه وقعدت ساكته..
امنه شبحت للسيارات وقالت:في حد عندكم..
سيرين:اها ايه..هادي سيارة عمي..
امنه اضايقت وكانت تبي تلف وتطلع..لكن ماتقدرش تخذل اختها...
سيرين:تعالي نخشوا..
امنه هزت راسها ومشوا مع بعض..
داخل...
مريم:نصيبات ياحامد..
حامد "سلفها":كان نعرف بنتك على شني شايفه روحها..
الزبير بتهكم:شايفه روحها بفلوس بوها..
حامد:والله لولا فلوس بوها مافي واحد يشبح في وجهها..
وهالكلمه جت في وذن امنه لما خشت داخل الحوش هي واختها..
سيرين سمعتها وشبحت لآمنه..
وامنه قعدت وقفت وهي تسمع..
مريم:فلوس بوها شنو!! باك تحسابها تكساب حاجه ولاعندها حاجه..ولاالعقرب اللي واخدها بوها بتخليها تورث! نقص يدي من منبتها كان ماحطت يدها ع كل شي وخلاته يكتب اللي هناك بإسم الولد..
الزبير:تس تس..عندي معلومات ان بوها كاتبلها شي بإسمها..
مريم بإستغراب:من وينلك المعلومات..
حامد:اني سألتك بطريقتي وعرفت..
سيرين شدت يد امنه..
امنه شبحت ليد اختها..حست بشعور عمرها ماحساته شعور حلو هلبه..شبحت لأختها بعدين ابتسمت..
وخدت يدها ومشوا الزوز..
امنه لما بانوا عليها قالت:السلام عليكم..
هما تفاجئوا لما شافوها..
الزبير ناض وهو يقول:قصدك سيرين لتوا ماروحتش! نحسابها داخل..
مريم بتوتر:قلت شوره باصهم عطل..
ابتسمت امنه بتهكم وقالت؛الباص ماجاش اتصلت بيا بش نروح بيها..
مريم باستغراب:اتصلت بيك انتي!
امنه:وعلاش ماتتصلش بيا مش اختها اني!؟
الزبير شبح لسيرين وقال:مافيش مشكله..وقعمز..
سيرين بربكه:بنخش نبدل..
امنه طلقت يدها..وسيرين لفت طول ومشت للدار وهي خايفه..
فتحت الباب وخشت لقت روبين راقده..
زفرت وصكرت الباب..
برا..
امنه:معليشي نبيكم في موضوع..
وحامد يشبحلها من فوق لتحت..
الزبير رفع حاجبه وشبح لخوه وقال:موضوع شنو!؟
ع باله امنه رجعت عن رفضها..
امنه مشت قعمزت ع كرسي وهي تقول:صراحة سيرين مش عاجبها المعهد اللي تقرا فيه وتبي تحول منه..
مريم:ترا فكيني من دلع البنوت..ماتبيش تقرا نعرفها..
الزبير:علاش من شن يشكي المعهد؟
امنه:قالت مش مرتاحه فيها وديما تصير معاها مشاكل غادي..
الزبير:مش خاشلي دماغ الكلام هدا..
امنه تنهدت وقالت:لكن اني خش دماغي كلامها...المهم..اني مستعده ننقلها لمعهد تاني خاص ممتاز جدا نعرف اصحابه كويس..
مريم:معهد خاص!! تحسابينا راقدين ع بنك!؟
الزبير بتهكم:مش زي السي عمران اني راه..
حامد يشبح لآمنه بحده..
امنه:عارفاتك مش زيه لهدا اني بنصرف عليها انتم مالكمش دخل..
شبحولها الزبير ومريم بتعجب..
امنه:انتي قلتي هي ماتبيش تقرا..وواضح ان دماغها بالهون شويه وتبي ناس تقري بضمير..والمعهد اللي نعرفه فيه ناس اكفاء وامكانيات كويسه..
الزبير برفعة حواجب:امم..هو انتي اختها الكبيره..والحقيقه انتي انسانه عاقله واني عندي فيك ثقه..حطيها وين ماتبي..
شبحتله مريم بإندهاش..
امنه ابتسمت بتهكم وقالت:خلاص غدوة بإذن الله ناخد ملفها من المعهد...وناضت..
الزبير:بتروحي!
امنه:ايه عطلت ع الحوش..
ولفت ومشت وهي تقول:السلام عليكم..
ردوا عليها الزبير ومريم...
ومريم تشبحلها وهي تفكر..
اما الزبير شبح لحامد..وحامد شبحله غمزله بعينه..
وحامد فهمه طول..
وناض...ساوا روحه...ومشي طلع وراها..
اما مريم ناضت ومشت طول لدار بناتها..
الزبير ابتسم بتنهيده ساخره وحطت ايديه ورا راسه واتكى ع مسند الكنبه وغمض عيونه..
🍂🍂🍂
في دار البنات..
"مش خاشلي دماغ اللي قالاته"
سيرين بضحكه:ياماما بنتك هادي عبيطه ودرويشه..تصخفتلها شويه وجعتها ودارت مانبي..
مريم مطت شورابها للأسفل وقالت:غريبه..مانعرفهاش هبله..ع هكي حتى موضوعها مع عمك حامد يصير منه كان ضحك عليها بكلمتين..
سيرين ضحكت وقالت:باهي قوليلي شن الغدي..
مريم:كسكسي..
سيرين:ووك جعااانه...
ومشت طلعت من الدار..
وامها طلعت وراها وخلوا روبين راقده تنخط برغم دوشتهم..
🍂فهالوقت..
برا....
وصلت امنه لسيارتها وكيف جت بتفتحها..
شافت يد محطوطه ع بابها..
وبعدت وهي تقول :شن التصرفات هادي!!؟
من بعيد شويه كان عبدالقادر يشوف فيها من مرايه السيارة وبدي الدم يغلي في عروقه..
حامد؛علاش رفضتيني..
امنه بحده:مانبيش نتزوج..
حامد:لكن هدا حرام..
امنه بتهكم :حرام!!قصدك تعرف الحلال من الحرام انت!
حامد عقد حواجبه وقال:شن قصدك!؟
امنه:اللي فهمته..لهالسبب رفضتك...
حامد ماتحملش اهاناتها وقال:اللي زيك مفروض تحمد ربها اللي في من شبحلها..
امنه:المفروض نستغفر ربي ع ذنب درته خلاك انت تشبحلي..وترا لو سمحت حول ماتخلنيش نجيبلك الشرطه..
هو شبحلها من فوق لتحت..بعدين وخر..
وهي جت للباب فتحاته وركبت وصكراته بقوة..
بعدين شغلت السيارة وتحركت..
حامد وهو معاها بعيونه يشبحلها بنظرات تهديد:تو نوريك كيف نعرف الحلال من الحرام يابنت#### كان ما خليتكش تبوسي رجلي بش ناخدك مانبداش حامد..
ولف ومشي خش لحوش خوه..
🌸في الطريق..
امنه:استغفر الله واتوب اليه..شن هالنماذج اللي انطيح فيها..مافيش واحد سوي.!! استغفر الله العظيم استغفر الله...
بعدين تنهدت وبدت تستغفر...
ووراها عبدالقادر اللي كان مضايق ويفكر في الشخص اللي وقف عليها وكلمها كان باينله انها معصبه وهي تكلم فيه وهو يبان عليه مش مزبوط...
قعد يفكر هكي...لين وصلها لحوشهم وشافها خشت..
بعدين مشي طول..
عبدالقادر:كيف يصير توا العطله بدت..معاش فيها كيف نشوفها مرة تانيه....
فجأة فنص عيونه وقال..
عبدالقادر:حيييي ع عمك ياقادر حييي المحل...جدي...حييي عليا حييي!!..
ولف بسرعه ومشي جري للمحل...
🍂🍂🍂🍂🍂🍂
الساعه الثامنه والنصف مساءا..
كان واقف في داره يلم في حوايجه في شنطة..
يشبح لتليفونه اللي يرن وقلبه واجعه بعدين خداه فصل المكالمه وصكره..
ع طقة الباب..."زيد"
زيد لما سمع امه ارتبك..خدي الشنطه حطها تحت السرير وهو يقول:شويه يام..
ونزل غطا السرير وغطاها...
بعدين مشي فتح الباب..
وردة:العشي واتي تعال تعشى دايرة بازلياء ورز تحبهم مع بعض..
زيد ابتسم وهو يحاول يخفي حزنه وقال:حاضر..
باس راسها امه وحاوطها من كتافها ومشي هو وياها..
🍂🍂🍂🍂🍂
في مكان تاني...
في جنان حوش ام أمنه..
سيرين ببكي:امنه عندها حق..
بعدين ضربت ع رقمها..وحطت التليفون ع وذنها..
🌸🌸🌸🌸
مقعمزة تصلح في وراقي الامتحان..
فيدها ورقة عبدالقادر وهي سرحانه تفكر..
معقوله يكون صادق معاها!! معقوله يكون ناوي فعلا يرتبط بيها!!..علاش هي!؟...معقوله واحد زيه قدر يشوف فيها ماشافوه غيره من الشباب العاقلين اللي يتميزوا بالمواصفات اللي تتمناها في نظرها!؟
التغيير اللي طرأ عليه في القرايه يعتبر علامه ع صدقه معاها وانها فعلا قدرت تأثر فيه..
ارتسمت ع وجهها ابتسامه خفيفه لما اذكرت عرضه عليها الزواج..
فجأه..
رجعها تليفونها اللي رن للواقع..
مسحت ع عيونها...بعدين غمضتهم وفتحتهم..وخدت التليفون شافت المتصل..
فتحت الخط وردت..
امنه:السلام عليكم..
سيرين بنبرة باكيه:وعليكم السلام..
امنه بقلق:خيره صوتك؟
سرين ببكي:عندك حق ياآمنه عندك حق..نتصل بيه مايردش وفي الاخير صكر في وجهي وصكره مرة وحده..
امنه تنهدت وقالت:معليشي سيرين معليشي..تتعلمي من غلطك معليشي..واحمدي ربك اللي بعدك عنه بكري بكري..
سيرين ببكي؛وين بكري بالله..
امنه بفجعه:شن قصدك حي عليك!؟
سيرين ببكي:تي لالا..مش زي مافهمتي..قصدي حبيته ياامنه تعلقت بيه..
زفرت امنه وهي حاطه يدها ع قلبها بعدين قالت:تو تنسيه ياسيرين..مع الوقت..
سيرين بلعت ريقها وقالت:يارب نقدر..
امنه حطت خصلت شعرها ورا وذنها وقالت:بإذن الله تقدري ياسيرين..انتي بس حطي عقلك في راسك توا وفكري في قرايتك بس..وكله يجيبه ربي بعدين..
سيرين مسحت دموعها وقالت:ايه حقه بنقولك حاجه..بالله عليك ماتزعليش مني..بكري ماما جت تسأل فيا علاش كلمتك انتي وكيف صار ومن هالدوة..رشفت وقالت..مستغربه يعني...مشي قتلها انتي هبله واني ضحكت عليك بكلمتين..
امنه قعدت تضحك..
سيرين:بترجع تضحك الضحاكه..
امنه بضحكه:متوقعه منكم كل شي..
سيرين؛لسانك مسنن..
امنه:ههههه..يقولوا فيها...المهم توا اني بإذن الله بنمشي يوم السبت نسجلك في معهد بنات للحاسوب..معهد ممتاز هلبه عندهم صفحة ع الفيس..اسم المعهد"الزهراء"...
سيرين:تمام..تو نشوفه..ايه حقه تعالي هني بكري هداكا لحقنا للحوش..لحقك بعد روحتي؟
امنه:سرين مش فاضيه عندي ماندير..سلاماااااات..
وصكرت عليها..
وسيرين تضحك..
نزلت التليفون ومشت بتخش للحوش...
خشت..
وين وصلت للدار وخشتلها..لقت روبين لاهيه بتليفونها..مشت قعمزت ع سريرها..
روبين شبحتلها وقالت:شن ماتبيش تحكي!؟
سرين:شن بنحكي؟
روبين:اللي صار معاك وخلاك تكلمي هديكا..
سيرين:حكيت..
روبين:كذابه..
سيرين شبحتلها وقالت:انتي حرة..تصدقي ولاتكذبي..
روبين قلبت عيونها وشبحت لتليفونها وقالت:تو نعرف بعدين ماتقدريش ادرقي هلبه..
سيرين ببرود؛امباااه..وخدت تليفونها..وخشت ع الفيس..
🌟🌟🌟🌟🌟
خشوا للحوش هما الزوز ويهدرزوا..
فرج:تي تعرف لو عطلت شويه بس راهو وريتك مخطرك الأسود..
عبدالقادر وهو مبتسم بربكه:خلاص يافروجه أنسى عاد..
فرج ضربه ع رقبته من الخلف وقال:باهي خش قدامي خش يازوفري..
عبدالقادر تحسس رقبته من الخلف وقال بضحكه:لكن تصدق جدي خدمتكم تبي دماغ مفتوح..
فرج:كويس اللي فاهم الحاجه هادي..خلي دماغك مفتوح ديما ياولد ماتخلي حد يضحك عليك..
عبدالقادر رفع حاجبه اليسار وقال:تقصد عمامي..
فرج ضربه مرة تانيه نفس الضربه..
عبدالقادر وهويتحسس في رقبته:أححح.....هههههه...وهرب من حداه..
وفجأة وقف وقعد يشوف قدامه وهو فاتح عيونه ع وسعهم بدهشه..بعدين قال: اووو..هههههوو..دارها جدي وجابلك سعي ياحناي..
تجديده وهي توكل في الخرفان:جابلي عينك..
وقفت ع حيلها وقالت..هادم جايبهم لولد عمتك غدوة ان شاء الله مروح من السفر بيديرله عزومه..
عبدالقادر وهو يشبح للخرفان:يابخته اشرف بحب فروجه..
تجديده:ومن امتى جدك قصر معاك يامعفن!
فرج:انت انجح نجاحه وشوف شن نديرولك..
عبدالقادر ابتسم ع جنب وقال:عن قريب ان شاء الله وقريب هلبه..تفرحوا بيا بدال الفرحه..توينز...
ومشي من حداهم وهو يغني:هنا صدقت..حلمي وبدأت ..
وجداه وجده قعدوا معاه بعيونهم..
بعدين قالت تجديده:شن داير في الخدمه..
فرج:اهو بادي يتعلم لكن مازال يبي ياخدها جديات شويه..
تجديده:والمناجيه عمامه؟
فرج:يتفرجوا من بعيد ماعندهم مايديروا...تنهد وكمل يقول..خل نمشي نصلي..وانتي وتي العشي..
ومشي..
تجديده:حاضر ياحاج..
وولفت وطلعت من الزريبه الصغيره اللي داروها للخرفان اللي ناويين يذبحوهم في العزومه....
🌟🌟🌟🌟🌟
وجي تاني يوم..
وبعد عصره مباشرة...
خش اشرف وسط اهله واحبابه لحوش جده فرج..
والنوبه شغاله...
وبوه من فرحته يرقص عليها..
وعبدالقادر يشبحله وهو مبتسم بإزدراء...
اما اشرف فكان فرحان لأبعد حد..
💕وفعلا الأنسان مايفرحش بنجاحه حق الا لما يشوف فرحة اللي يحبهم ليه..💕
بعد ربع ساعه..
خش داخل للنساوين..
استقبلاته امه بأشواقها العارمه وفرحتها الكبيرة بيه...
وكذلك حناها وباقي افراد عيلته من بوه وامه...
وبعد سلامه عليهم طلع لمربوعة الرجاله..
قعمزه جده في نص الجلسه..
كان عبدالقادر يشبحله وهو مبتسم ويتخيل في روحه في مكانه...
حس بشعور غريب زاد في داخله حماس رهيب بش يوصل لهاللحظه...
وهو يشبح لأشرف..اشرف شبحله..
استاقظ عبدالقادر وابتسمله وهو يغمز بعينه..
ردله اشرف الغمزة مع ضحكه...
🌟🌟🌟🌟🌟🌟
الساعه 1:30ليلا...
في جنان الحوش..
بعد مافضي من الناس..واهل الحوش رقدوا...
هما الزوز قعمزوا برا يتجاذبوا اطراف الحديث عن كل شي صار معاهم خلال سنين غيابه...
عن قرب...وين مامقعمز عبدالقادر..
عبدالقادر:ايييه..نسيت نعرفكم ع ولد عمتي فتحيه اشرف..ليه مده غايب لين نسيته..هدا ولد عمتي مالاش علاقه ببوه تمام..يعني لاشابه اباه وظلم..ههههه...المهم..
من يوم يومه عاقل رزين..كنت اني وياه الكلمه وعكسها...
وديما يقارنوا بيني وبينه..وديييما...زعميتهم بيشجعوني ع القرايه لما يخلوني نغير منه وطروح ايام زمان اكيد تعرفوها متاع اشرف شاطر خير منك..طيح سعدك برا شوف اشرف كيف نجح..ياريتك تجي في نص اشرف..ومن هالدوة...واني كنت ثلاجه مامعبر حد..عاجبني حالي وعاجبتني روحي..هههه..المهم شروفه خش الطب وتخرج وطلع برا قري مش عارف شن حصل وروح....الحق ياربي نعزه ويعزني...
راجل كويس طيب ومش متاع تكويش..واهم حاجه اهم حاجه...مش نفاخ زي بوه...
اشرف:انت فيك حاجه متغيره..
شبح عبدالقادر لاشرف وقال بضحكه:حاجة زي شني..
اشرف بإبتسامه:مش عارف هكي حسيت...المهم مانكش قدو
الأول..
تنهد عبدالقادر وشبح القدام وابتسم..
اشرف:لالالا..مايجيش هكي..احكي احكي..هات ماعندك..
شبحله عبدالقادر وضحك وقال:هدا ياسيدي..........
🍂🍂🍂🍂🍂
على احدى الشواطيء..
في عز الظلام..اللي ماكانش كاسره الاضي مصباح يد صغير..
كان شاده راجل اربعيني راكب قارب مطاطي..
ويركبوا معاه مجموعه...
لعند ماوصلوا فيه..
الراجل:هيا يازيد اركب معاش في وقت..
زيد:هي شويه بس.. وقدم للقارب..
والراجل مركز معاه...واللي راكبين القارب يشبحوا للبحر وشعور القلق مسيطر وبرغم ذلك ماأثناهمش عن ركوب رحلة الموت هادي..
وفي اللحظه اللي حول فيها زيد شنطته بيدها للراجل..
ماقدرش يحولها..لما حس ان في حد شادها بقوة..
اتفاجأ..ولما التفت انصدم...
اسماعيل جبد الشنطه ولبسها وقال:تحرك قدامي..
الراجل:هدا منو يازيد!
جبد اسماعيل زيد من ذراعه وقال:حد..بروا ع حالهم..يحفظكم ربي..
ومشي بزيد..
وزيد يشبحله وهو مصدوم ومش مصدق..
اسماعيل:لولا شوية الشنابات اللي فوجهك عطيتك طريحه باهيه...ردتلك عقلك يامتخلف..
زيد رمش عيونه بسرعه بعدين شبح القدام وهو ساكت من برا يبان مضايق..بس من داخل كان فرحان هلبه..مش لأنه نجي من موت غالبا يكون محقق في حالات زي هادي..بل لأن خوه هو اللي انقده من نفسه من بعد رحمة الله اللي عطاه هالأخ...
💕¤سنشد عضدك بأخيك¤💕
🌟🌟🌟🌟🌟
"اللي تدوي عليها هادي جديات مازال في منها هني!؟"
عبدالقادر:تصدق مازال في..وهادي الحاجه اللي خلتني نشد فيها..
اشرف بإستغراب:تصدق والله اللي نشوف فيه ع الفيس شي يشيب..تي هدا غير اللي يخشولي ع الخاص مليت من البلوك لين صكرت الرسايل مرة وحده..شي يزهق الكبد..
عبدالقادر:الدنيا تغيرت هلبه هني..هلبه معاش في شي قعد زي زمان..
تنهد اشرف وقال :نسأل الله السلامه...
عبدالقادر:آمين..المهم توا قولي كيف ندير..
طبطب اشرف بيده ع ركبة عبدالقادر وقال:ياولد خالي هادي تمشي لبوها طول تكلمه بش تتأكد من حسن نيتك..
عبدالقادر عقد حواجبه وهو يفكر..
اشرف:النوعيه هادي مايحبوش التلخبيط يبوا كل شي يمشي بما يرضي الله ثم الاصول..
قعد عبدالقادر ساكت شويه وهو يفكر..بعدين ارتسمت ع وجهه ابتسامه خفيفه وشبح لولد عمته واشر عليه بسبابته وهو يهز في راسه قال...انت صح...
وولد عمته يضحك..
🌸🌸🌸🌸
فهالوقت..
كانت امنه مقعمزة تقرا في هاتفه عن طريق برنامج "PDF"
كتاب اسمه "منارات الحب" للكاتبه حنان لاشين..
لفتت انتباهها قطعه تقول فيها الكاتبه...
"الحب: هو أن تتعفف هي..وتستعفف انت حتى تلتقيا على غير موعد! وكأن كلاكما حفظ للأخر امانته في نفسه دون أن يراه..وان تكون انت اول من يخربش ع جدران قلبها كلمة احبك..وتكون هي اول من يترك بصمة عميقه على شغاف قلبك"
ابتسمت بتنهيده بعد قرتها..وبعدين عاودت قرتها لين حفظتها وكتبتها ع منشور في الفيس بوك ونزلتها..
وكان اول من علق هبه..
وهي تقول"مافيش ارقى من هكي"
ردت آمنه"فعلا..جزاك الله خير ياهبه انتي السبب"
هبه"الحمد لله اللي خلاني سبب حاجه حلوة زي هادي امونه'
ردت عليها امنه بإيموجي القلب..
وردت هبه بنفس الأيموجي..
بعدين هبه صكرت الفيس وحطت تليفونها ع الكامدينو..
وحطت راسها ع المخده وهي تقول..
امتى يجي اللي حفظت قلبي ليه؟!
تنهدت من قلبها بعدين قالت....
ياولي الصالحين..هب لي منهم...💖
....يتبع...
