🌟..
بعد مرور يومين...
الساعه 10:30صباحا..
طلعت آمنه من الحوش للجنان متوجهه لسيارة خالها وهي تقول:اني طلعت..
وصلت في السيارة وركبت من الخلف..
وشويه وطلعوا حناها وخالها وهو شاد فيده شكاير..
وصلوا في السيارة..
محمد فتح الباب لأمه بش تركب..
بعد ركبت صكر الباب ومشي للباب الخلفي وفتحه وحط الشكاير جنب آمنه..
بعدين صكر الباب ومشي ركب..
آمنه:علاش حطيتوا جنبي المشلتت مانقدرش نقاومه!
تبرة:تمدي عليه يدك نوريك..
محمد بضحكه:اصبري لين نوصلوا للحوازة..
امنه بضحكه عجز:ربي يصبرني..
وشغل خالها السيارة وتحرك...
وطلعوا من الحوش متوجهين لمزرعة خال آمنه بش يقضوا فيها يومين...
🍂في الوقت اللي كان صاير فيه نقاش محتدم بين بوها ومرته...
عمران:ع صبح ربي تفتحيلي فهالمواضيع!
الهاديه بنرفزة:حرقتلي دمي ببرودك..تي نقولك ياراجل بنتك لازم تجي عندك كان قعدت عند حناها وخالها تو يسلبوا اللي هناك...هادم ماخلوهاش عندهم محبه فيها تي هي امها اللي هي امها مش طايقتها هما علاش يربوها..يربوا بنت مش بنتهم واضح غرضهم..
عمران:البنت مش صغيره مانقدرش نجبرها تجي تقعد عندي كان ماتبيش..
الهاديه:وتقول فيها عادي هكي!! خبطت بإيديها ع فخادها وقالت..بيهبلني هالراجل!..ضمت شواربها لداخل بغضب بعدين قالت..اني اللي عليا درته خلاص ماتجيش بعدين تقولي ياريتني سمعت كلامك..
وناضت ومشت من حداه وهي معصبه..
عمران وهو يشوفلها بربع قال:ع اساس انتي اطيقيها ولاتبيها تجي تقعد هني خوف عليها! كان مانعرفك نقول الحق..
غير عيونه لصفرة الفطور قدامه..خدي شريحه جبنه وكلاها في مرة...
🌟🌟🌟🌟🌟🌟
"هادي اخر حاويه"
قال كلامه هدا وهو يتابع في نقل الحاويات اللي وصلت للميناء في شاحنات بش يرفعوها لمخازنهم..
حط ايديه ورا ظهره ومشي للسيارة وهو يقول:بارك الله فيكم...السلام عليكم..
وموظفين الميناء يردوا عليه في تحيته..
وصل سيارة فتح الباب وركب...
وصكره...فجأة رن تليفونه..طلعه من جيبه بالطوه الدخلاني وشاف الشاشه..
فتح الخط طول لما شاف المتصل ورد..
عبدالقادر:شن صار معاك؟!.......................ايه...............ايه ايه نعرفها.................ع يمين وع يسار؟!................كويس كويس زبطت وين زبطت وين..........منور حبيبي.......السلام عليكم...
وصكر وهو يضحك وقال:قادم اليك يانسيبي بعد العصر رد بالك تطلع هني ولاهني..
وشغل السيارة وتحرك وهو يغني...
🌟🌟🌟🌟🌟
في حوش حاج فرج...
تحديدا في الصاله..
تجديده:يعني كويسه حق البنيه ياأشرف؟
اشرف بعد مارشف من القهوة قال:امم ياحناي حسب ماحكالي البنت اخلاقها ذهب..لو كنت مكانه مستحيل نفرط فيها..
فتحيه:باهي وامتى تولي مكانه!؟
اشرف بضحكه:كيف!
تجديده:قصدها امتى تفكر في الزواز حتى انت..حوش وعندك والخدمه وواتيه..شن ناقصك بش ماتزوزش راك اكبر من المنجوه قدورة..
اشرف بضحكه:لما نلقوا وحده زي اللي لقاها قدورة ياحناي..
فتحيه:فيه هلبه هلبه انت غير قول باهي بس..
اشرف ابتسم وقال:تمو موضوع هالمنجوه ع قولة حناي بعدين ساهل...حط الفنجان وناض وهو يقول..هي توا بالإذن عطلنا ع الموعد..
فتحيه:ربي ييسر امرك ياأمي ويفتح عليك..
تجديده:مربوحه وليدي مربوحه..
اشرف بإبتسامه:السلام عليكم..
ولف ومشي طلع من حداهم..
تنهدت تجديده وقالت:مانخمم كان في هداكا المريوح كلا شروفه مافي عليه خوف..
فتحيه:يما قدورة راجل ينعبى عليه راهو مالاحظتيش قداش تغير الفترة الاخيره حتى الخدمه ولى يخدم..
تجديده:خايفتها طهقه وخلاص يابنيتي غير بش نزوزوه وبعد يتزوز يولي كيف ماكان..
فتحيه:تس تس..مااعتقدش يما..نحس فيه متغير حق من داخل هكي..مش طهقه ع قولتك..
تنهدت تجديده وقالت:إن شاء الله يابنتي ان شاء الله..
🍂🍂🍂🍂🍂🍂
الساعه الواحده ظهرا..
كان عمران واصل بسيارته لحوش جد آمنه من امها..
نزل من السيارة ومشي رن جرس الإنترفون...
مافيش رد..عاود رن مرة تانيه..لارد..
طلع تليفونه من جيبه ودور ع رقم آمنه..لما لقاه اتصل بيها طول..
🌸وآمنه وقتها حاطه تليفونها داخل في الحوش متاع الحوازة...
وطالعه برا طارحه صلايتها هي وحناها ويصلوا في الظهر وسط الطبيعه الحلوة..
وحداهم بمسافه طنجرة في طبيخه مكرونه يطيبوا فيها ع الحطب..
وخالها محمد طالع يصلي جامع قريب عليهم وحاط تليفونه ع الصامت..
🍂عمران ضيق عيونه وقال:هادم وين هجوا!؟..معقول يكون كلام الهاديه حق !؟
عقد حواجبه بعدين مشي لسيارته وركب وتحرك طول...
🌟🌟🌟🌟🌟
قدام معرض السيارات اللي يملكه اسماعيل..
كانوا واقفين الزوز ع سيارة عبدالقادر يشربوا في قهوة خدوها من مقهى مجاور للمعرض ويهدرزوا..
عبدالقادر:والله احسن مادرت خوك في النهايه..
اسماعيل مسح دقنه وقال:هو الحق مش زي باقي خوته هدا علاش جبته هني وخدمته...
عبدالقادر شرب من القهوة بعدين هز راسه تأييدا لكلام اسماعيل..
اسماعيل؛خلينا توا فيك انت..جديات بتمشي لبوها تكلمه!؟
عبدالقادر:لا بصارة..
اسماعيل:ياتافه قصدي مرات مايقبلكش كان مشيت بروحك..
عبد القادر:اني ماشي بنفتح معاه الموضوع..ولو عطاني الضي الأخضر وهذا اكيد بإذن الله..نجيبله جاهه..
إسماعيل ابتسم على جنب وقال:صحه ليها هالاستاذة دارت معجزة..
ابتسم عبدالقادر وشرب من القهوة..
🍂🍂🍂🍂🍂
وهو ماشي بطريقه للحوازة...
كان يشوف في تليفونه وهو يقول:شن يبي هدا توا!؟ مانيش معاودله ماغير بينكد عليها وعلينا وخلاص..
رد تليفونه لجيبه..
وصل في الباب..فتحه وخش..
بعدين صكره ومشي بطريقه لأمه وبنت اخته اللي كانوا مقعمزات يهدرزوا..
تبرة تشوف في الطنجرة..وآمنه تقرض في السلاطه...
امنه بإبتسامه:اهو خالي جي..
تبرة شبحتله وقالت:خل نحط المكرونه..
وخدت الصونيه اللي مكسرة فيها المكرونه سباقيتي..
وصبتها في الطنجره...
وصل فيهم محمد وقعمز وهو يقول:قريب الغدي؟
تبره:شويه ويطيب..
امنه:تسهف ريحتها..
محمد بإبتسامه؛ايه واصله لبرا..عطيك الصحه يام..
تبره:سلمك وليدي..
ابتسمت امنه وقالت:خالو بنسألك..
محمد:اسألي..
امنه:خالو مازال ماتفكرش في الزواج..
محمد ضحك..
تبره:ع شني تضحك ترا قولي؟
محمد بضحكه:ماهو من الاول عارف شدانكم فيا ع الطلعه هادي مش بلاش..
امنه ضحكت وقالت:خالي فكر في الموضوع بجديه لامتى بتقعد وحداني هكي..
محمد:مش وحداني اني معاكم..
تبره:مش عينك...امنه سيورها يجيها نصيبها..
واني بندوملك العمر كله..
امنه ومحمد باصوات متقطعه:يطول في عمرك ع الطاعه حناي...ربي يحفظك يام معاش تقولي هكي..
تبرة:ياودي هاالطريق كلنا ليها..ومافي حد فينا مادارش ومش داير عيله..وانت لابد ادير غصب عنك..
محمد بضحكه:باهي ياودي ماقلناش لا..لكن مش قبل مانفرح بآمنه..
امنه بضحكه:كانك بتراجيني اني ياقعادك وحداني طول عمرك..
الحاجه تبره رقالها من كلامهم وقالت:ترا اسكت انت وياها خير وماوالله نقول لطنجره هكي بيدي نكفيها..وجعلكم ماتغديتوا...
محمد :لالالاا كله الا المكرونه اللي تبيه نديره..
وامنه تضحك..
وتبره تمرر في نظرات الغضب عليهم الزوز...
🌟🌟🌟🌟🌟
الساعه 5:15عصرا..
طلع من داره وهو بكامل اناقته وعطره معبي الأرجاء..
بس كان في قمة التوتر..
🌟عبدالقادر:فوق من القمه كان فيها كيف..اني عارف وضعها الاجتماعي كويس..وشبه عارف ان علاقتها ببوها مش قويه وهدا اللي زاد وترني شويه..وبدت نرتب في الكلام في راسي ونقول ونعاود..لكن مع هذا كله مش هامني..المهم امونه تولي من نصيبي بسسس..
"ورفله وسمانا فينا..زي النار على البنزينه"
عقد حواجبه وهو يضحك ومش للصاله لقي حناه تغني وتكشك..واشرف مقعمز حداها يضحك..
اتكي ع قفص الباب وقال:شن في!؟
تجديده:ولد عمتك شغلوه طول في المستشفى ومعاها مصحه..وعياده...الله يبارك..
عبدالقادر باندهاش:ماشااء الله..بعدين رجع عقد حواجبه وقال..باهي شن دخل ورفله في الموضوع!؟
اشرف بضحكه:حتى اني مش عارف..
تجديده:يااهبل انت وياه يااللي ماتعرفوا حاجه..بروا شوفوا الناس اللي شاده مكانات في الدوله وحتى برا عند الفرنجيه تلقاهم قريب كلهم ورفله..ديما حني هكي متعليين..
عبدالقادر مسح لحيته وهو يضحك وقال:تي ماهو من كل تركينه فهالبلاد تلقي فيها ناس بارزين يام مش غير حني بس..
تجديده وهي ترقص في حواجبها:لايابابا احني غير..
ضحكوا الزوز..بعدين أشرف قال:ماتناقشهاش في الحاجات هادي..
عبدالقادر:حتى اني بنسكت..
تجديده وهو ماطه شواربها للأسفل بإزدراء تشبحلهم من فوق للوطا وقالت:طيح سعدكم ومزالكم انت وياه..واشرت ع اشرف وهي تقول.. مش عارفه كيف وليت دكتور انت!!
عبدالقادر واشرف شبحوا لبعض وهما يضحكوا..
بعدين قال عبدالقادر قال:هي اني طالع تويجه ماتبي شي..
ضيقت عيونها وقالت:تعال هني وقولي وين ماشي وانت مهندم هكي..
رفع حواجبه وقال:مهندم!!؟ نزلهم وكمل يقول..ماشي نخطب..تشاوااات..
ولف ومشي بسرعه طلع هارب من حناه..
تجديده وعلى وجهها ملامح الصدمه:تو هدا يتكلم جديات ولايبصر!!؟
اشرف بضحكه:مش عارف...
تجديده حطت ايديها ع راسها وقالت:ياحليلي من هالولد بيهبلني!
🌟🌟🌟🌟🌟
وبرا..
مجرد ركب عبدالقادر السيارة رن تليفونه..
طلعه من جيبه وشاف المتصل..
ضحك ورد..
عبدالقادر:والله والله ماني فاضي ولانقدر نجيك ياعمري انتي..
نبيله:اللطف!تي سلم وانشد قبل يادعوه..
عبدالقادر بسرعه:السلام عليكم شن حالك حالك باهي حتى اني حالي باهي الحمد لله لاوالله اليوم ماتعبي عليا نجيك بلبله..
نبيله بضحكه:عطيك دعوة خير يامكلوب..تي خير في شن مشغول..
عبدالقادر:نقولك بلبله بعد نروح من مشواري نخطم عليك نهدرزوا ان شاء الله..تمام؟
نبيله بإبتسامه:تمام ياسيدي..بالسلامه توا..
عبدالقادر:بالسلامه بلبله..وصكر وحط تليفونه قدامه..
بعدين لبس نظاراته ..وشغل السيارة...
ساوا المرايه كويس..وتحرك...
🌟قطع نص ساعه مسافه ع ماوصل للعنوان المطلوب..
وصل قدام الفيلا مباشرة وهو يشوف في ارقام الحياش المكتوبه عليها...
درس سيارته..
بعدين خدي نفس عميق وقال...يارب سترك وعفوك..
فتح باب السيارة ونزل...
🍂داخل..
كان عمران مقعمز يشوف في اوراق تخص شغله..
اما مرته فكان واخده ولدها وطالعه من الحوش زيارة لحوش اختها..
تفاجأ عمران لما سمع صوت جرس الانترفون..
مط شواربه للأسفل بإستغراب..
بعدين حول اللي فيده وناض..ومشي للجهاز..
حول السماعه وحطها ع وذنه وقال:منو..
"حاج عمران الهوني؟"
عمران:ايه وصلت..من حضرتك..
"اني عبدالقادر الامين..جايك في موضوع "
عمران عقد حواجبه بإستغراب وقال:باهي لحظه بس..
وصكر السماعه..ومشي للباب وهو يقول:الأمين؟! معقوله!
وزاد سرع في مشيته لين وصل في الباب الخارجي..
فتحه..
شاف قدام شاب طويل عريض..حباه ربي بزين الصورة..
انيق في لبسه..وشكله مريح..
ابتسم ابتسامه خفيفه ..
عبدالقادر مد يده وقال:السلام عليكم..
صافحه عمران وقال:وعليكم السلام..
عبدالقادر:شن حالك وحال صحه..
عمران:الحمد لله ياولدي..بعدين طلقوا ايدين بعض وكمل يقول..لامؤاخذة ياولدي ماعرفتكش..
عبدالقادر بإبتسامه:وحتى اني هادي اول مرة نتشرف فيها بيك ونشوفك..سألت عليه وعرفتك كويس اللي عرفته عنك شجعني اليوم نجي نكلمك في موضوعي..
عمران:امم..تفضل ياولدي تفضل..
خش عبدالقادر وهو يقول: يزيد فضلك..بسم الله..
صكر عمران وقال:تفضل..تفضل..
عبدالقادر بإبتسامه:يزيد فضلك..
ودخله للمربوعه...
🌸🌸🌸🌸🌸
وتت صفرة الحلوات والحاجات اللي بيعدوا بيهم شاهي العاله..
صفره فيها...كعك مالح..وكعك حلو...وغريبه باللوز..ومشلتت بالسمن والعسل..
نسقتهم بطريقه حلوة...
عجبتها الصفره..
ناضت ومشت طول للحوش داخل بتجيب تليفونها وتصورها وتحطها في الستوري..
🌸زي هلبه يحبوا يصوروا الحاجات الحلوة سوا كانت صفره حلوة زي صفرة امنه توا..او غدي واعشي عادي او في عزومه..
مش لغرض المنظرة والفخفخه...ممكن يكون شي بسيط جدا..بس اسعدهم وعجبهم وحبوا يشاركوا بيه الناس..🌸
وصلت امنه لمكان تليفونه وخداته..
وهي طالعه شاف الشاشه..وقفت في مكانها لما لقت مكالمات من بوها..
مش متعوده بيه يكلمها الا للضرورة..
انتابها شعور بالقلق عليه..طول اتصلت بيه..
..........
"انت طالب عندها؟!"
عبدالقادر بإبتسامه يخفي بيها ربكته:ايه لكن اكبر منها في العمر...عطلت شويه في القرايه..وهادي اخر سنه ونتخرج ان شاء الله..
عمران وهو متعجب:يعني هي..موافقه!
عبدالقادر:الحق والله مانعرف..بنتك الصراحه محترمه فوق ماتتصور ماعطتنيش فرصه نفتح معاها الموضوع واني قلت نجيك طول نفتح معاك الموضوع وانت تكلمها..وبإذن الله لما نحصل الرد بالموافقه نبعت العيله..
عمران رفع حواجبه ونزلهم وعقدهم بعدين قال:انت من عيلة مني بالزبط..
عبدالقادر:عيلة الأمين..جدي فرج عبدالسلام الامين..صاحب سوق"الأمين"..
عمران بإندهاش:الحاج فرج اللي ولاده منعم وجمعه ومحمد الله يرحمه..
عبدالقادر وهو متفاجئ:بوي محمد رحمة الله عليه..
عمران بدهشه:انت ولد المرحوم محمد!...
ناض عمران وجي لعبدالقادر وهو فاتح ايديه..
وعبدالقادر ناض طول وهو في قمة المفاجأه..
حضنه عمران وقال:الله يرحمه بوك كان صاحبي..وجدك فرج هو وبوي الله يرحمه كانوا زي الخوت..
عبدالقادر ارتسمت ع وجهه ابتسامة فرح عريضه من الوذن للوذن...
🌟عبدالقادر:وقعدت تزغرط في داخلي..لولولولولولييييي..هههههه
🌸وهدا كله وتليفون عمران يرن بروحه في الصالون...
تنهدت امنه بعدين خدت الصفره ومشت بيها لحناها وخالها...
🍂🍂🍂🍂🍂🍂🍂
الساعه 9:25ليلا..
الهاديه:معقوله ماتندريش عليه ومافي بيناتهم شي!؟
عمران:تندري ولاماتندريش..اني العيله هادي نعرفهم كويس وحتى حالتهم الماديه خير مني بألف مره لاخاشين ع طمع ولاغيره..الولد يبيها جديات..واني موافق..
الهاديه:كيف تعطيها هكي طول مرات تطلع فيه مصيبه ولقي بنتك ع عيبها حتوافق عليه طول وتحصل بعدين..
عمران:مستحيل..قتلك العيله هادي نعرفهم من قبل مانحلم بمريم حتى الحلم..
الهاديه بعصبيه؛شن جاب سريتها هادي توا!؟
عمران خبط كفوفه ببعض وقال:لاإله الاالله!..ناض وهو يقول..اقعدي فيها..ومشي لدار النوم طول..
وهي تشوفله بغيظ وتقول:راحت راحت هالمصيبه! اففف..
🌟🌟🌟🌟🌟
"لالا!! ولد الحاج عبدالكريم الهوني !"
عبدالقادر بضحكه:ايه ياجدي ويعرف عمامي وبوي..
فرج بدهشه:سبحان الله!
تجديده:نذكر اخر مرة مشتيلهم فيها في عرس وحده من بناتهم بعدين هونا حولنا ومعاش نندروا عليهم ولاهما يندروا علينا..
فرج:بعد وفاة بوهم معاش نندري عليهم ...الحق كان راجل ونعم الناس..وولده عمران كان صاحب عمك جمعه وبوك الله يرحمه..
تجديده تنهدت بحسرة وقالت:ايه والله..الله يرحمه..
عبدالقادر :الله يرحمه ويسامحه..يعني ع هكي الموضوع عاجبكم؟
تجديده:ماعندي مانقول فيه...
فرج:لا انت المده الأخيره ربي هاديك للصراط المستقيم حق..
ضحك عبدالقادر وقال:ربي يزيدنا...
🌟🌟🌟🌟🌟
وعدوا من هداك اليوم..يومين..
سمعت بيهم امنه من بوها ع موضوع الخاطب الجديد بس ماتعرفش التفاصيل...
مابتش ترفض طول بش ماثيرش غضب بوها ويرجع يطالبها تعيش معاه وممكن يجبرها حتى الاجبار..
لهدا اتفقت معاه انها تجيه لمكتبه بعد ماتروح من الكليه...
اما عبدالقادر..
فكان يراجي في الرد بفارغ الصبر وخدي بنصيحة اشرف اللي قاله معاش يفتح معاها الموضوع مرة تانيه مادام خلاه في يده بوها....
وهو اختار يصبر..ويستنى اما يقطف ثمرة صبره...
🌸🌸🌸🌸🌸
الساعه 8:00صباحا..
في الطريق...
سيرين:الزي متاعهم حلو..
امنه بإبتسامه:عجبك؟
سيرين:ايه بالذات لونه الوردي..
امنه قعدت مبتسمه وهي ساكته..
وصلوا للمعهد..
ونزلوا الزوز من السيارة...
كانت سيرين لابسه الزي الموحد اللي يخص المعهد..
كان عباره ع بلوزة واسعه فضفاضه توصل للركبه لونها وردي ولاتشف...
وتحتها قونه "تنوره" لونها ازرق غامق
ع شاربه متوسطه الحجم لونها ازرق غامق...
ومانع المعهد وضع الزينه ع وجه...
خشوا الزوز داخل...
واستقبلتهم المسؤوله عن المعهد في مكتبها...
المديرة:عندنا مجموعه من القوانين اكيد اطلعت عليها سيرين..
سيرين:ايه شفتهم في الصفحه..
المديره:تقدري تلتزمي بيهم؟
سيرين:ان شاء الله..
امنه:هي طبعا عاديه يعني مش زي هلبه طالبات هني..مش ملتزمه هلبه..
سيرين:ايه..هدا علاش نبيكم توسعوا بالكم معاي شويه..
ضحكوا المديره وآمنه..
بعدين قالت المديره:حني بالنا واسع هلبه ياسيرين..امم..سيرين تعرفي معنى اسمك؟
عقدت حواجبها بضحكه وقالت:لالا الحق..
شبحتلها امنه وهي شاده ضحكتها .
المديره:تو نقولك..سيرين معناه المرأة الشبعانه او اللي تاكل هلبه او الممتلئه..
امنه:اسم ع مسمى ولا؟
سيرين:حيي!! ماما هي اللي سمتني تحسابه حاجه باهيه!
المديرة وامنه:هههههههههه...
🍂🍂🍂🍂🍂
جامعه طرابلس..قاطع"ب"
كلية الإقتصاد..
"وشن هالغلا اللي نزل في آمنه فجأه"
روبين وهي تشبح القدام وتلعب بحزام شنطتها بغيظ قالت:وين نندري ع دعوتها اني..متغيره هاربه مقلوبه قلبة شخشير..اليوم مشت معاها للمعهد الجديد وهي لابسه شلاتيت زي شلاتيت الداعشيات..
رتاج:شكلها حطتها في معهد الجماعه الملتزمين..لكن غريبه اختك تموت في اللبس والطرحات والمكياج شن غيرها هكي!؟
روبين بغيظ:اخرتي حنعرف..شوفي شوفي التافهه كيف تهدرز عليه وتضحك..
رتاج:وانتي مالك بيه!! يابنتي خيرك ماتبيش تفهمي ان هدا واحد ملعب وصايع مافيشي امان..صدقيني ماك محصله منه حاجه..
روبين:ع اساس محصله من هداكا المعقد حاجه! اخ ياربي غير امتى نفتك منه بس..
رتاج:هبله وعبيطه ياصاحبتي..
روبين قعدت تشبح لاسماعيل وهو يهدرز ع البنات ودمها يغلي غلي...
وهو مستمتع بإستفزازها بش يوصل للي يبيه ويحقق انتقامه ويثأر لكرامته...
🌸🌸🌸🌸🌸
وصلت أمنه للكليه...
ولما خشتلها..لاإراديا قعدوا عيونها يدوروا عليه مش بيدها..
شعور في قلبها تحس بيه اتجاهه ومش قادرة تسيطر عليه..
وعيونها اللي يدوروا فيه ماصادفهمش ولاشافوه..
حس القلب بخيبه وحزن..وخشت للقسم وهي مضايقه...
🌟🌟🌟🌟🌟
وهو كاين مقعمز في حوش خالته نبيله يفطر هو وياها..
هديكا العجه البيضا اللي سايحه عليهم طروف جبنة الشرايح..
وحداهم صونيه فيها هريسه..وصونيه زيتون..وصونيه طماطم شرايح..وصونيه فيها طروف الكيكه الإنجليزيه..
ومعاهم طواسي شاهي وفناجين قهوه وباكو حليب ومالقي عصير برتقال طبيعي وطازة...
وعمكم قدو ياكل وخالته تحط قدامه في الخبزة المدورة وتقوله:كول كول...
وهو زي مايقولوا...ماتوصي يتيم ع بكي..
عبدالقادر:الظلم حرام..اتقي الله..اني نبش تنبيش وخالتي تغصب عليا تغصيب..
نبيله:باهي كويس مدام العيلتين طلعوا معارف امورك سالكه معناها..
عبدالقادر:هي اللي مخوفتني ياخالتي..خايف ترفض..
نبيله:اعترف ياولد مقلل ادب معاها انت؟!رايه عليك شي؟!
عبدالقادر تنهد وقال؛ياما شايف اكيد والله اعلم شن سامعه..
نبيله:كان ع علاقاتك زمان..كانت كلها طيش شباب..ومادرتش فيها شي يحشمك..وفي النهايه الراجل مايعيبه شي..
عبدالقادر:شن مايعيبه شي ياخالتي هادي!؟ يعيبه ويعيبه بالذات مع بنات الناس اللي زي امنه...واحد زيي...حط ايديه ع وجهه ومسحه بعدين نزلهم وقال...توترت هلبه هلبه..
نبيله بضيق:اول مرة نشوفك هكي وليدي!..
شبحلها وابتسم وهو يقول:اول مرة..ريتي يابلبله اول مرة..لأني اول مرة نحس بحاجه طالعه من هني...وحط يده ع قلبه..
نبيله انفجرت ضحك..
هو رمش عيونه بإستغراب..
نبيله:ههههههه..مش طالع عليك..
عبدالقادر ضم شواربه لداخل بعصبيه بعدبن حط الخبزة وقال:هي معاش نبي مرة وحده ارفعي فطورك..
نبيله بضحكه:بعد مسحت الصواني..بعد شبع قال بااااع..
عبدالقادر قعد يشبحلها بربع عين..
وهي ناضت تضحك وتلم في الصواني...
🌸🌸🌸🌸🌸
الساعه 11:00صباحا..
طلعت آمنه من المعمل وهي تتكلم بالتليفون..
امنه:ايه تومي جايه اليوم للدار ان شاء الله..وبنجيب معاي ضيفتين راهو...ضحكت وكملت وهي تقول..باهي نشوفك بعدين ان شاء الله...السلام عليكم..نزلت تليفونها وصكرت وهي تقول..شن حاصل في رجلي!؟
وقفت وشافت للدروج..
بعدين مشت ناحيته وخشت تحته بش تحول كندرتها وتشوف شن في رجلها..
🍂فهالوقت..
كانوا فاروق وجلال نازلين مع بعض من الدروج يهدرزوا..
فاروق:قدو قال مش جاي صورله الشيت..
امنه سمعتهم وقعدت منتبهه معاهم..
جلال بضحكه:ع سيرة قدو..بيني وبينك فاروق بيني وبينك مصدق انه كبد في الأستاذه؟
فاروق تنهد وقال:تبي الحق ياجللو مش عارف محتار..
جلال:تو حني نعرفوا قدو مع بعض صحاب من زمان هلبه..يموت ع البنات ويفرفش ع البنات الحلوات بالذات وهو عالعموم صاحب كل الاشكال والألوان..
فاروق:المعنى؟
جلال:المعنى انه حط الاستاذه هادي في راسه من معاملتها ليه ولأنها صغيره يبي يطيحها وبعدين يجبد عليها..
فاروق:يجبد عليها! يمشي لبوها ويكلمه!..
انصدمت امنه والدموع معبيات عيونها وقلبها يدق بقوة..
جلال بإبتسامه ماكره:ماهو شاف الطريق هادي هي اللي توصللها..يخطبها ويفوت معاها شهر ولااتنين بعدين يقوللها باي باي..
فاروق:تصدق حتى اني هكي فكرت..لان التغيير اللي صارله بسرعه خلاني نشك..لكن وجعتني هي..
جلال:ماتوجعكش..ماضنيش ماشي عليه جوه..
فاروق:نقول ان شاء الله يطلع تفكيري اني وياك غلط..
جلال بضحكه:ان شاء الله..
فاروق:برا برا المحاضرة قريب تبدا ودكتورها نفاخ..
جلال:ايه..يكسر الرقبه..
ومشوا الزوز مع بعض..
بعد ماحرقوا قلب آمنه...وخلوها تحس بوجع في صدرها أشبه بوجع الذبحة الصدريه..
ودموعها ينزلوا بروحهم وهي فاتحه عيونها بصدمه شديده..
وتتخيل في كلامهم لو صار حق!!
مجرد انها تتخيل تحس في روحها تموت في اللحظه الف مره..
شيئا فشيئا...تبدلت ملامح وجهها للغضب...
مسحت دموعها بعنف..
ومشت طلعت من تحت الدروج...
وقعدت تمشي بعصبيه وهي تشوف لرجلها..
لعند ماوصلت للمكتب متاعها..
فتحت الباب طول بقوة..
قام عصام راسه وشبحلها شاف حالتها قال:خيرك استاذه مريضه!؟
امنه خشت وردت الباب شويه وقالت:نبي منك خدمه استاذ..
عصام رفع حواجبه وقال:واني تحت أمرك!...
🍂🍂🍂🍂🍂🍂🍂🍂🍂🍂🍂🍂🍂🍂🍂🍂🍂
الساعه الثامنه مساءا..
سيرين:جوه حلو هلبه مكان راقي لين خلاص..
روبين بتهكم:بتستيشخي شكلك! الباين عليك دايره فالطه كبيره بش خشيتي ع الجو هو بين يوم وليله..
مريم بصدمه:روبين!..
سيرين حرقها كلام اختها اللي مايتحمله حد لهدا ردت عليها تقول:العمايل والفلايط خليتهم لأمثالك اللي تسيبي خطيبها وتجريلي في جرة واحد صايع..
ومشت وخلتهم وهي معصبه ع الآخر..
ناضت مريم لروبين وقالت وهي مفنصه عيونها:شن تقول اختك!؟
روبين ناضت وهي تقول بثقه مصطنعه تخفي بيها خوفها:كذابه ياماما حتى انتي تصدقي فيها! بلعاني قلبت عليا الطاوله ع خاطر نعرف انها مصاحبه واحد يجيها للمعهد الاول كل يوم..
خبطت مريم بيدها ع وجهها ومشت طول تجري لدار..
روبين رفعت حاجبها وقالت؛تستاهلي مايجيك يافتانه..
"لااا ياماما لااا بالله عليك لاا"
"ياكلبه يامسخه..هدا علاش امنه حولاتك من غادي.."
"اااه ياماما اااه.."
"تعرفي كان ماانصلحش حالك في المعهد هدا تموتي في الحوش لين يجي نصيب يرفعك من قدام وجهي..تفوو..حيوانه"
شويه وسمعت روبين باب الدار تقربع بقوة..
وشافت امها ماشيه لدار النوم وهي تنزل في كمامها وتقول:اللي تجيب البنات عمرها ماترتاح سحقيتكم..
وخشت دارها وصكرت الباب بقوة..
وروبين مشت للكوجينه وهي تضحك...
🍂🍂🍂🍂🍂
في باحة دار الأيتام...
كانت واقفه ع صاحبتها المسؤوله ع المكان..
تماضر بقلق:تهورتي ياآمنه..تهورتي..
امنه بحده ودموعها في عيونها:بالعكس اللي درت اصح شي نديره في حياتي كلها..كان ماريبتاش مانبداش اني امنه..
تماضر:ياآمنه اجتنبوا كثيرا من الظن ان بعض الظن اثم...
امنه:قتلك سمعت هالكلام من صحابه!
تماضر:اذاجاءكم فاسق بنبأ فتبينوا ان تصيبوا قوما بجهالة فتصبحوا على مافعلتم نادمين..
امنه:سمعتهم بالصدفه ماحد جاني وقالي ع شي..وخلاص ياسر تماضر مش حنتراجع ع اللي درته بكل..تصبحي ع خير..
ولفت ومشت بسرعه..
وتماضر تشوفلها بقلق وهي تقول:ان شاء الله ماتندمي ياصاحبتي...
🍂🍂🍂🍂
وعدت هديكا الليله على امنه من اصعب الليالي..
كانت تصلي وتبكي وتدعي لربي يجبر كسر قلبها ويعوضها خير..وتحمد فيه انه وقظها بكري قبل لطيح في فخ كبير..ع حسب مافهمت وقتها...
والله اعلم كيف جاها وكيف رقدت...
🌟عكسه هو اللي رقد بكري..ناوي يمشي للكليه اقل شي يشوفها من بعيد لبعيد...
في الوقت اللي كان فيه عمران في قمة غضبه من بنته اللي اخلفت موعدها معاه وماجتش وفهم منها وقتها انها رافضه لهدا خدي قرار بإجبارها ع اختيار بين امرين..
ياتوافق على عبدالقادر..ياتعيش معاه في حوشه...
🍂🍂🍂🍂🍂
وجي تاني يوم...
مع الساعه تسعه كان عبد القادر خاش للكليه..وع وجهه ابتسامه حلوة..
فجأة بدت تختفي لما شاف صحابه مع مجموعه طلبه واقفين يشوفوا لحاجه معلقه ع الحيط..
عبدالقادر:مصرع نزلوا جدول الأمتحانات النهائيه!
مشالهم...
وين وصل فيهم قال:السلام عليكم..
كلهم شبحوله...
عبدالقادر استغرب نظراتهم وقال بضحكه:خيركم شن في!
فاروق وجلال قعدوا يشبحوله بضيق وهما ساكتين..
هو زاد استغرب وقدم شاف للورقه..
لقي فيها
"ع الطالب عبدالقادر محمد الامين الحضور لمجلس التأديب الساعه 11:00صباحا"
فهاللحظه ارعدت السماء اللي كانت ملبده بالغيوم..
هو انفجع..والتفت شبح للي واقفين حداه...ومن بينهم صحابه..
فاروق:ترا تعالى قادر..
هو شبحلهم شويه..
بعدين مشي لصحابه..
والطلبه انفضوا من قدام الإعلان..
🍂🍂🍂🍂
"امنه انتي استعجلتي..مفروض تأكدتي قبل والتصرف اللي ديريه وقتها انك ترفضيه وبس"
امنه بحده:لا لازم نأدبه ونربيه قبل..ونخليهم يلزوه من هني..
هبه شبحتلها بضيق وقعدت ساكته..
وامنه قعدت سرحانه تشبح في الفراغ ونار والعه فيها من الغضب..
🥀الغضب اللي نهي عنه احد الصحابه لما جي وقاله:اوصني..
قاله...لاتغضب..الغصب احب الفرص اللي يحسن الشيطان استغلالها🥀
🌟🌟🌟🌟
في المدرج...
هما الثلاته مقعمزين..
عبدالقادر وهو مصدوم:مش عارف شن صاير !!
فاروق:عارف من السبب ولا؟
شبحله عبدالقادر وقال:مستحيل..ماديرهاش..وعلاش بديرها بعد كلمت بوها؟!مفروض تتأكد من حسن نيتي توا..
جلال بحيره:باهي مني بس!المشكله حني ماتفارقناش بكل ماريناك درت حاجه مع حد من الدكاتره!..
عبدالقادر عقد حواجبه وقال:بعد ساعه نعرفوا كل شي..
وصحابه الزوز يشبحوله وهما مضايقين ع خاطره...
💎ومر الوقت كيف مامر....
وجت الساعه الحادية عشر..
ومشي عبدالقادر للقاعه اللي فيها المجلس..
طق الباب...
"ادخل"..
فتحه..وخش...
عبدالقادر:السلام عليكم..
بعدين وقف في مكانه وهو يشوفلها بصدمه...
كانت تشبحله بنظرة حادة...كلها حقد..
عميد الكليه:تعالى قعمز ياعبدالقادر..
هو بلع ريقه ومشي وهو مصدوم للكرسي..
بالسيف شده ووخره وقعمز عليه...
وهو يشوف لآمنه..
وهي مغيرة عيونها عنه وتشبح لتليفونها المحطوط ع الطاوله ...
العميد:عبدالقادر..
غير عيونه عنها وشبح للعميد..
وعصام يشوفله برفعة حاجب...
🍂🍂🍂🍂🍂
روبين:هو مايبنيش نطلع من الكليه اني بنطلع وبنمشيله غادي بش نطيرهاله مزبوك وهكي تعلق بيني وبينه ونتقربع..
رتاج:عقلك في راسك تعرفي خلاص..
لبست نظاراتها وهي تقول:يللا سلام...
ومشت بسرعه..
رتاج:مهبوله...
ومشت بطريقها للكافتيريا..
🍂🍂🍂🍂🍂
"مش مرة مش اتنين..واني سكتت وفوتت ومشيت لين طفح الكيل يادكتور..واسأل استاد عصام ع صحة كلامي"
هو كان منزل راسه لوطا ويشبح لصوابعه اللي مشبكهم في بعض وع وجهه ابتسامه جانبيه..
عصام اللي كان يشبحله قال:صحيح..واني شاهد ع مرة اعترض فيها طريقها قدام الطلبه..ودرت معاه مشكله كبيره .
امنه:اني اصلا مش عارفه كيف واحد زيه مازال قاعد هني علاش مافصلتوشي من زمان!وجوده حيسبب هلبه مشاكل مستقبلا..
العميد:عبدالقادر...
قام راسه وهو محتفظ بإبتسامته قال:اممم..
العميد؛ماعندك شي تقوله ادافع بيه عن نفسك؟.
ابتسم بأسف وقال:لا..
هي شبحتله بحده وعيونها تعبوا دموع..
العميد:امم..مادام هكي..معناها القرار اللي حنتخدوه هني في المجلس تستحقه..
مرر نظره العميد ع الأعضاء اللي كانوا حاضرين معاه..
هزوا روسهم بالموافقه..
العميد شبح لآمنه:اعتبر نفسك مفصول من هاللحظه ياعبدالقادر..
ابتسم وهوضام شواربه لداخل بقوة..
بعدين ناض..وقال:تمام..تمام..
ولف ومشي للباب..
وهو تشوفله بطرف عينها...
بعد طلع..حست بقلبها وجعها ع الآخر...وصدرها ضاق هلبه...
🍂اما هو..
طلع وهو حاس بخيبة امل موجعه لأبعد حد..
دار كل شي كما يجب..
شد في قرايته...بدي يخدم...
قطع سريب العلاقات....لما خش لقلبه حب حقيقي اختار يخش بيه من الباب...
علاش بعد قرر يستقيم ويغير حياته تكون هادي النتيجه!؟
في حاجه ناقصه...في شي غلط...اكيد...
هدا الكلام اللي كان يحدث بيه عبدالقادر نفسه وهو طالع من الكليه...
🍂🍂🍂🍂🍂
الساعه الواحده ظهرا..
وصلت امنه في الساحه المدرسه فيها سيارتها...
مجرد ماوصلت للسياره..
حطت يدها ع مقبض متاع الباب...وبدت تبكي بصمت...
"علاش باهي"..
حولت يدها من ع الباب والتفتت...
عبدالقادر قدملها وقال؛علاش!! غلطت لما درت الصح والأصول وجيت من الباب!
امنه بحده ودموعها ينزلوا:وهو كل حد جي من الباب لازم يصدقوه!
عبد القادر بصدمه:قصدك انتي لعند هاللحظه مش مصدقه!؟
هي قعدت تشبح لشنطتها..بعدين ربعت ايديها وقعدت ساكته..
ارتسمت ع وجهه ابتسامة ألم وقال:تعرفي مهما اديري فيا مسامحك برغم كل شي والله مسامحك..وصدقيني مش حنتخلى عنك ولانخليك يوم تحتاجيني حتلقيني قدامك..
وحنسأل ربي كل يوم ينولني اللي نبيه ولو استجاب وقتها بس حتعرفي صدق نيتي معاك..
هي كانت قالبه وجهها عنه وملامح الحده مسيطره عليه ودموعها مازال ينزلوا..
اما هو ابتسم بألم مرة تانيه..بعدين لبس نظاراته ولف ومشي وهو قلبه موجوع...
وهي شبحتله بألم....حست الصدق في نبرة كلامه..في ردة فعله بعد اللي داراته فيه...حست انها ظلماته...وبدي شعور الندم يتسلل لقلبها...
ع جية عصام...
شافه وهو يقطع في الطريق كيف يكلم فيها..
وصل فيها وقال:شن قال يقولك؟.
امنه مسحت دموعها وهي منزله عيونها لوطا:شي..
🍂فهالوقت..
كان روبين واصله للكليه بباص الجامعه..
نزلها ع الطريق ومشي...
وهي بعد نزلت شبحت جيهة الساحه..
وطاحوا عيونها ع مشهد وصل الدم لراسها..وصدمها بقوة..
عصام خطيبها واقف ع امنه اختها وهي تبكي وهو يبان زي اللي يرضي فيها..
روبين بصدمه:ياحقراء!! ياشيطانه!! دايرة روحك شيخه ومحترمه !! وانتي كلبة كلاب!
تبدلت ملامح وجهها للغضب..ومشتلهم طول...
...يتبع...
