💕تشرح وتتجنب تشبح جيهته..
من غير شي ملخبطه من وجوده معاها في نفس المكان..
غريب عليها اللي تحس بيه عمرها ماحست بيه ولاقابلت فى حياتها شاب دار معاها هكي..
ع قد ماقرت الثانويه سنين الجامعه ..
مافيش شاب اطفل عليها زي ماهو قاعد يتطفل...
ولافي شاب ازعجها زي ماهو قاعد يزعج فيها...
ولافي مرة حد ركز...
انها...ماتضحكش هلبه وغالب ع وجهها العبوس....
امنه وهي توزع فنظرها عليهم:في المحاضرة الجايه نبيه وطبعا كل طالب وطالبه فيكم هو بنفسه حيتكلم عن موضوع بحثه...
جت عينها فعينه...
ابتسم ابتسامه حلوة بالمرة💕...
رمشت عيونها...وغيرتهم طول للاب ووجهها تغير لونه للأحمر..
هو ضحك...
⚡عبدالقادر..
الحق اول مرة نشوف وحده لما تتحشم عيونها يرمشوا..
بس حركتها هادي تلخبط فيا اني 💓
لمت حاجتها وقالت: نشوفكم في محاضرة غدوة إن شاء الله...وقالت بالتشديد...الساااعه...اتنيين..
ضحك وفهم قصدها..
ماشيه جهة الباب بتطلع ..
شبحتله بطرف عينها لقاته يشبحلها..
طول شبحت القدام وطلعت..
عبدالقادر تنهد...وناض طول...
وطبعا وراها...😒
⚡عبدالقادر..
اكيد وراها مالا ورا مني...
علاش جاي اصلا للكليه اني..
جمان:باهي فهمنا😑
ضحك وكمل طريقه...
جي جنبها..وهو حاط ايديه ورا ظهره قال..
عبدالقادر: غدوة من 2 الى 4 ولا..
امنه بدون ماتشبحله:ايه.
عبدالقادر: وبتعطيهم كاملات..
امنه.:ولاينقصوا دقيقه..
ضحك وقال: بالله قوليلي منين انتي ..
امنه وقفت وقالت بعصبيه: انت صحيح وجه وبارد هكي ديما!!
عبدالقادر ضحك وهو يحك فلحيته:الحق ..ايه..ديما..
امنه غمضت عيونها وفتحتهم بنفاد صبر: اسمع لو بتستمر هكي حنوصلك مواصيل سودا ..نصيحه ابعد عن شري وغنيله..
وفاتت من حداه..
وهو واقف زي المسبوه..بعدين التفتت لحقها بعيونه برفعة حواجب وقال ...واني نبي نوصلها المواصيل السودا هادي💓
كيف جاي بيلحقها ..
شدوه صحابه..
فاروق:تعالى جاي فهمنا شن قصتك معاها..
جلال:وضعك اليومين هادوا مريب..
عبدالقادر بضحكه: عارف روحي ياكلاب لازم نحكيلكم..بس هاه قبلها تعزموني ع زوز شاورما ووحده هامبورغا..
جمان:نهار احرش 😳
عبدالقادر بضحكه:خاش صالة حديد عزيزتي 😎وجسم قوي يبي دعم ...
جمان : تي غير باهي انت ياعريض المنكبين😏
هز كتافه وضحك...
واني ضحكت😂..
وكمل طريقه مع صحابه للكافتيريا وهو يحكيلهم....
🌟🌟🌟🌟🌟🌟🌟🌟🌟🌟
هي كانت طالعه من الكليه بتمشي لحوش امها بعد غيرت اختها رأيها ولغت فكرة المشيه لحوش حناها...
طول الطريق وهي حاسه بثقل ع قلبها من المشيه..
ماحد في الحوش طايقها حتى امها تتعامل معاها وكأنها مش بنتها...
ممكن لأن هي سبب طلاق امها وبوها..
كانوا اهله يعايروا في امها بعيب البنت الخلقي وطبعا هدا نتاج الجهل...
حتى حناها ام بوها المتسميه ع اسمها ماكانتش تحبها وكانت تنادي فيها العايبه..
عانت هلبه في طفولتها لين وصلت لسن 5سنوات لين وصلوا امها وبوها لمرحلة الطلاق بسبب هالمشاكل..
وامها صارلها نفور منها بسبب اللي صار...
مجرد جاها موضوع زواج طول واقفت ولما طلب منها الراجل اللي بيتزوجها انها تخلي بنتها عند اماليها او تردها لبوها...
طول مشت لبوها وبلغاته والاب رفض...
عطتها لامها ..وخدتها بكل حب ورحابة صدر وربتها احسن تربيه..
وخالها كذلك حاول يحل محل الأب ولو شويه..
بس مهما يديروا ....
مش حيقدروا يغنوها عن وجود الأب والأم...
واللي يزيد الوجع اكثر انهم ع قيد الحياة ورافضين وجودها فحياتهم..
وصلت لحوش امها..
درست السيارة قدام الباب ونزلت..
لقت الباب الخارجي مردود...
فتحاته بحذر وخشت...
لقت راجل امها واقف عليه خوه..
خشت وقالت:السلام عليكم..
ردوا :وعليكم السلام..
وكملت طريقها داخل وعيونها لوطا....
ونظرات سلف امها الخبيثه تلاحق فيها...
وصلت في الباب وطقت..
شويه وفتحت امها...
مريم: اهلا..وسلمت عليها بالخد..
خششتها وصكرت الباب..
امنه؛كيف حالك..
مريم :الحمد لله انتي شن دايرة ..
امنه:الحمد الله ماشي الحال..
مريم:تلقي روبين في دارهم... ومشت للكوجينه..
اما هي تنهدت ومشت طول للدار...
طقت الباب...
"خشي"..
فتحت الباب وخشت لقت اختها مقعمزة تزلمط في صوابع رجليها..
امنه:السلام عليكم..
روبين: ياهلا..قعمزي..
امنه ابتسمت بتهكم وقعمزت ع الكرسي.
روبين وهي لاهيه باللي دير فيه: شجو..
امنه: تمام...شن هو الموضوع اللي تبيني فيه..
روبين شبحتلها برفعة حواجب:مستعجله!
امنه:ايه عندي ماندير مش فاضيه..
تمالكت نفسها روبين وحطت الزمالطو ع الكامدينو وقالت.
روبين: امم..بنقولك..المدة اللي فاتت تسلفت من بنيه فلوس لحاجه ضروريه هلبه وقتها..المهم البنيه توا تبي فلوسها واني الحق..خفت نطلب من بابا يديرلي مشكله..وقصة طويله عريضه....فلوسمحتي يعني من فضلك..تسلفيهولي؟!
امنه ابتسمت بتهكم وقالت:تخلصي سلف بسلف...
روبين طارتلها: قصدي كان ماتبيش تعطي قولي مانبيش نعطي مانشحتش اني..
امنه ضحكت بتهكم وقالت:باهي كم تبي..
شبحتلها شويه بعدين قالت:2000
امنه فتحت عيونها بصدمه:2000!!!
روبين :ايه..
امنه : شن درتي بيهم هادم !!
روبين:شي يخصني ..هاه شن قلتي بتعطي ولالا..
امنه شبحتلها شويه بعدين قالت:باهي...
ابتسمت روبين بفرح وقالت: امتى بتجيبهم...
امنه ناضت وقفت:تعالي غدوة لحوش حناك وخوديهم...
روبين شبحتلها بحده.
امنه اشرت بسابتها عليها:ولأخر مرة تطلبي مني مرة تانيه مش حنعطي.
لفت وتوجهت للباب وفتحاته وطلعت..
روبين بحقد: كان حاجتك عند الكلب قوله ياسيدي...
اما امنه طلعت بدون حتى ماتقول لأمها بالسلامه...
لأنها زايده ناقصه...
فتحت الباب لقت راجل امها قدامها...
شبحلها من فوق للوطا... هي وخرت وهو خش...
بعده طول طلعت وصكرت الباب وراها....
وطول توجهت للباب الخارجي وطلعت...
خدت نفس عميق وركبت سيارتها وتحركت..
🌟🌟🌟🌟🌟🌟🌟🌟🌟🌟🌟🌟🌟
غير بالك ع خاطر صعبت عليك المرة هادي ..
عبدالقادر وهو ياكل: اممم...لاالامش هكي...بلع وقال ..البنت مش عاديه بكل..
جلال :كيف يعني مش عاديه..
عبدالقادر رفع حاجبه وقال:مش عاديه وخلاص مافيش داعي للتفاصيل..
فاروق ضحك برفعه حواجب:لااااا شويه بس...اشر عليه بصبعه..غرت..غرت ولا...ولا..
جلال:هههههههههه
⚡عبدالقادر
قصدك اللي صار توا غيره!
جمان: كيف يعني ماتعرفهاش..
عبدالقادر: نعرف النخوه والغيريه ايه..لكن الغيرة هديكا اللي يغني عليها عاصي..بحبك وبغار ياويلي من الغيره ...لحظه!!!
رفع حواجبه وهو مبتسم وقال بصدمه: اوووووه💓💓
عبدالقادر ابتسم بإحراج وهو ياكل وماعلقش..
فاروق: جللو الحكايه جديات!!
جلال بضحكه:باين هكي !!
عبدالقادر وهو يضحك ومغمض عيونه بإحراج: باه انت وياه انفعوني بشي ...كيف ندير معاها..
شبحوا لبعض...
بعدين فاروق قال: اني نقولك....
وبدي يسمع في نصايح صاحبه وهو ياكل بإيديه ورجليه😂
⚡عبدالقادر
قل هو والله احد💓
جمان: ههههههه...خليك لاهي مع اصحابك نشوفوهم وين بيرفعوك...
عبدالقادر بضحكه؛يستر الله حسك خوفتيني😅
جمان:😁
🌟🌟🌟🌟🌟🌟🌟🌟🌟🌟🌟🌟🌟🌟
الساعه 5:00عصرا..
مقعمزة تخدم ع اللاب...
وترتب في اسماء الطلبه حسب الأبجديه..
بدت بالألف طبعا....
امورها كانوا ماشيين تمام لين وصلت في حرف العين..
"عبدالقادر الأمين"...
وقفت عند اسمه....
مجرد خطر عليها..وخطروا عليها نظراته...
رمشت عيونها بخجل..💓
<< اسمك ياطالب...
"عبد القادر يابوعنب ضاق الحال عليا..
داوي حالي يابوعنب سيدي روف عليا"...
هو ابتسم وقعد يشوف في القائمه اللي قدامها: عبدالقادر الأمين..شبحلها وع وجهه نفس الإبتسامه..ليش..>>
امنه بوجه محمر:فاشل...حتى كلمات الاغنيه مش جايبهم صح...تافه...
<< شبحلها وقال بإبتسامه:تقولي ياقدروة واني نحبه الاسم هدا..>>
حطت ايديها ع وجهها ومسحاته..بعدين زفرت ...
حركت راسها ايمين ويسار بسرعه ...وحطت يدها ع اللاب وكملت خدمتها..
وهي هاربه من شي مش عارفاته شن هو..💕
🌟🌟🌟🌟🌟🌟🌟🌟🌟🌟🌟🌟
وهادي القهيوة المزبوطه مع مقريضات يحبهم قلبك..
خدي منها الصفرة وحطها قدامه:تسلمي يابلبله..
نبيله :ايه شن الريح اللي حدفاتك عليا..
عبدالقادر وهو ياكل في المقروض: امم...عيب عاد...ديما ندور فيك ..اني..
جمان: كول بعدين تكلم..
ضحك وهو يمضغ..
نبيله : شن يضحك فيك..
جمان وعبدالقادر 😳😳
عبدالقادر: احمم...لاشي..بنقولك خالتي احمم..نبي نرفعك معاي توا لمعرض السيارات بناخد سيارة جديده وذوقك ياسمح ..غمزلها...خطير..
نبيله بضحكه: مانقدرش ياملسن.
عبدالقادر قعد يمسح فيده بالكنينكس وقال بإستغراب:علاش..
نبيله :خالتك غرفه جايه...
⚡عبدالقادر...
اوووووووو ااممممم جيييييييي🤦♂️
عبدالقادر وهو مضيق عيونها:شن جيبها!
نبيله بضحكه:خالتك يامعفن..
عبدالقادر:ايه خالتي صح بس نشهد بالله مدرهتلي كبدي الفترة الأخيرة..
رن الجرس..
فنص عيونه...
نبيله :ههههههه اهم جو...وناضت..
عبدالقادر غمض عيونه بشده..
جمان: شن قصتها خالتك هادي..
فتح عيونه وقال: قصتها قصه..ياستي شادتها فجرتي تبي تلصقني فوحده من بناويتها ..وبناويتها ..شبح فوق..يااارب سامحني ياااربي سامحني...قعد يعد ع صوابعه...شيونيه..ع غباء ع رزن دم ....عكرش وجهه وقال....شن بنحكيلك لنحكيلك..
مد ايديه قدامه وقال: اهما تفضلي تعرفي عليهم بروحك...
خشت خالته غرفه وبناتها التلاته...
البنات مش شينات بالخلقه..شينات باللي دايرين فرواحهم..
الحواجب خط ومكياج..وشعر طالع من الوشاح والكبه من اللتالي..
⚡عبدالقادر
سطل زواق مكفي ع روسهم..
جمان: هههههههه..
واللبس الضيق... والظوافر سيف مزلمطات بألوان واشكال..
⚡عبدالقادر
ناض..
بإختصار..مزيتااااااات
جمان:😂
غرفه:قدوووورة الغالي....وقدمتله
وهو فتح ايديه ومبتسم بإستسلام وحضنها...
والبنات قعدوا يساوا في ارواحهم ع شاشات تليفوناتهم..
بعد خالته: خزي يامعفن لاتنشد لادور لاتجي ..
وقدورة طاح يبرر ويكذب ويحط ..
جو البنات سلموا عليه وهدا فيسهم😍😍😍
المهم قعمزوا يهدرزوا...
وهو يجامل ويساير وخلاص..
والبنات محاصرينه بالنظرات...😍😍😍
⚡عبدالقادر...
ديري حل نبي نطلع..
جمان:ماعندك وين تمشي توا اقعد.
عبدالقادر: والمعرض!!
جت نبيله بصفرة : انستي ياغريفه..
غرفه :الله يأنسك ياحبيبه..
قعدت تفرق عليهم ووصلت في قادر...
عبدالقادر: حيي يابلبله دايره بسوسه وهدا وين اطلعيها..
غرفه بضحكه:لاهادي بسبوسه جايبينها حني معانا دارتها موده بنتي..
عبدالقادرابتسم مجامله وخدي طرف... وكيف جاي بياكل..
جمان بهلع: لاااااااااااا...
⚡عبدالقادر
خييرك!!
جمان: بسبوسه!!
عبدالقادربضحكه : ايه بسبوسه باينه مش خبزة ف.....
فنص ...
وزع نظره ايمين ويسار
بين خالته وبناتها وتحديدا موده اللي كانت تبتسمله..
عبدالقادر ضحك بربكه:اه..هاكي هاااه..وردها...
نبيله شبحتله بإستغراب...
غرفه: خيرك رديتها!!
شبحلها شويه... بعدين حط يده ع خده : سوسه..عندي سوسه...سوست...وابتسم بربكه..
نبيله وخرت وحطت الصفرة وهي تشوفله بإستغراب..
وحطت الصفرة ع الطاوله...
غرفه: توجع فيك هلبه وليدي..
رفع حواجبه وهو مدبل عيونه...
تمثيل احترافي..😂
مودة بنت خالته بصوت مطنن اكيد زبطتوه: عندي بنادوول في الشنته كدورة...
وجهه تعكرش..
⚡عبدالقادر
مصرين يسحروني 😖
جمان:لازم ننقد الموقف...
ورن تليفونه ..
ناض واقف...طلعه من جيبه ورد بدون مايشوف مني..
عبدالقادر:ايوه...جايك..توا..توا....هي هاني طالع..
مشي طول للباب بعد حياهم بحركه اليد..وفتح الباب وطلع..
نبيله شبحتلهم وضحكت بربكه:ماشي بيشري سيارة..
غرفه : هههههه..باهي ياحنه..لكن قاعد مطيور بسلامته..
نبيله :ههههههه ايه😅
برا...
⚡عبدالقادر...
ثينكيو جمانو...بيييق لوف...
جمان😳💓💓💓...
ضحك ونقز فسيارته وانطلق للمعرض...
🌟🌟🌟🌟🌟🌟🌟🌟🌟🌟🌟
واقف في الجنان يتكلم بالتليفون..
عصام: مكياج ولبس مش مزبوط لا...
روبين: اكيد من غير ماتقول..
عصام: ونبيك تهتمي بقرايتك وتصفي بمعدل زوجتي نبيها تكون مكافئة ليا في المكانه العلميه..
روبين بضيق :ايه معاك حق..
عصام: لودان وتنسريف مانبيش من كليتك ماتطلعيش الا للضرورة...ره قاعد نوضحلك في كل شي من البدايه بش تكوني ع بينه...
روبين بلعت ريقها وقالت: باهي...
🌟🌟🌟🌟🌟🌟🌟🌟🌟🌟
الساعه 7مساءا..
خاش للحوش وقالب الدنيا بالكلاكسات..
طلعوا جداه وعمته من الحوش يضحكوا...
يشبحوا فيه كيف يرقص في السيارة وفاتح اغنيه لتامر ع طول حسها...
طلع من الروشن ويغني..
واهو جيي اليوم اللي بتمناه ..
واللي بستناه ..
واللي بحلم بيه..
وهما يضحكوا عليه..
طلعله جده يأشر بيده: ت..نزل...انزززل...وصكر العزي..
هو تخزرط وصكر المسجل ونزل من السيارة..
ومشي لجده طول وفتح ايديه وحضنه..
فرج: باااهي حووول..
شد راسه وباسه وقال:ربي مايحرمني من هالصلعه..
شدوا ضحكتهم حناه وعمته..
فرج: الصلعه هادي هي اللي معيشاتك وتغيرلك في السيارات كل عام يازوفري..
عبدالقادر بضحكه: واني شن قلت ..قلت ربي يخليلنا هالصلعه ..
ضربه بوني ع بطنه وخش..
عبدالقادر شاد بطنه:اخخ..في حد مسلطه عليا مش بلاش اللي يدير فيه..
فتحيه بضحكه:من شطانتك...
تجديده بضحكه:يازوفري..
عبدالقادر قعد يضحك وهو شاد بطنه بعدين قال:انديروا دورة..
فتحيه بحماس :راجيني نركب نلبس عبايتي.وركبت تجري
تجديده:وحتى لين ناخد جلابيتي..وخشت طول..
عبدالقادر ضحك بعدين شبح للسيارة وقال: اااه ياقلبي💓
جمان: ماشاء الله قلبك هدا فيه كل شي 😒
عبدالقادر بضحكه: يسموا فيا بوقلب كبير❤
جمان : باهي يابو قلب كبير غدوة خميس..الساعه 2
ابتسم وقال:نراجي فيه بفارغ الصبر💓
جمان:😒
🌟🌟🌟🌟🌟🌟🌟🌟🌟🌟🌟🌟
وجي تاني يوم...
الساعه1:00صباحا..
وصلت للكليه..
ركبت دروج الواجهه...
خشت...
كملت طريقها...متوجهه للقسم...
وهي ماشيه...
شافاته واقف ع بنت...
قعدت تشوفله كيف يهدرز عليها..
كملت طريقها وهي تشبحله بطرف عينها..
وبعدين شبحت القدام وكملت للقسم..
هو رفع عيونه وشافلها وابتسم ع جنب..
🌟كملت مشي ووصلت للمكتب ..
كان فاضي..مشت طول بتقعمز ورا مكتبها ..
تفاجئت هلبه باللي شافاته ع المكتب..
وردة حمراء ملفوف ع ساقها ورقه مربوطه بشريطه رقيقة ذهبيه..
هي لفتت نظرها الورده نوع كاميليا ..خدتها...قربتها ليها شمتها ابتسمت ابتسامه خفيفه من كثر ماعجبتها ريحتها وعطتها شعور حلو ..
ركزت بنظرها ع الورقه اللي فساق الوردة..
استغربت..فكت الشريطه...وخدت الورقه ..فتحتها وبدت تقرا
(شفتي الوردة...
استغربتي...
خديتها..
شمتيها...
ابتسمتي...
حبيتيها...
الوردة هادي تشبهني في كل شي والله العظيم
عطيني فرصه بس)...ورسملها سمايل مبتسم في نهايه الورقه(😊)
هي غمضت عيونها بنفاد صبر..
كمكمت الورقه وتوجهت للباب وهي فقمة الغضب..
طلعت من المكتب وتدعي فنفسها انها تلقاه..
وفعلا لقاته..
هو لما شافها ابتسم ورفع حواجبه..
هي طلعت وطول للمكب ولوحتهم في الكناسه..
هو انصدم..
وهي موليه شبحتله وقالت:تعالى للمكتب..وكملت طريقها..
هوضحك وقال للي معاه: بالإذن..
ولحقها طول..
جمان:اني من الأول ماطمنتش لنصايح صحابك..
عبدالقادر بضحكه:باهي ماعندكش فكرة هي فشن تبيني..
جمان: No..😏
هو ضحك ووصل في الباب..
طق..فتحه وخش...
امنه وهي مقعمزة: اسمك..
عبد القادر يابوعنب..
امنه :اسكت اصص..
هو سكت وهو رافع حواجبه..
امنه وهي تشوف للقائمة: عبدالقادر الأمين..صفر في البحث
عبدالقادر بضحكه: غير صلي ع النبي ماي تيتشر ..
امنه شبحتله بحده : عليه الصلاة والسلام..وبعدين هدا اللي يستاهله واحد فاشل ومستهتر زيك اللي حتى الأغاني مش حافظهم كويس...عبدالقادر يابو علام..مش يابو عنب..
عبدالقادر: ههههههههههههههههههههههههههههه
هو يضحك وهي تشوفله بإنجذاب..
لأول مرة قلبها يدق دقة زياده💓
هو بدي يهدي ضحك وشبحلها..
هي رمشت عيونها ونزلتهم طول للقائمه ووجهها احمر ..
هو ابتسم وقال: اممم..شكلك حتكوني معلمتي في كل شي❤
هي بدون ماتشوفله اشرت بيدها وقعدت تحرك فيها بمعنى اطلع...
هو ضحك ووخر خطوة..بعدين لف وطلع..وصكر الباب وراه..
هي قامت عيونها في الباب..
تلقائيا وبدون اراده منها تنهدت...
فنصت لما انفتح الباب فجأه..
بين راسه وقال وهو مبتسم :الساعه 2ولا..
امنه متحشمه ع متنرفزة قالت بصوت فيه عيطه:اييييه..
هو طول صكر الباب...وهو ميت بالضحك..
وطول مشي للقاعه..
قعد في القاعه ساعه الا ربع لين جت الساعه 2
جمان:اوفر ره...
عبدالقادر بضحكه:عارف..بس..مش بيدي والله..💓
جمان: اممم😒
خشوا الطلبه..
وهي خشت بعدهم وصكرت الباب...
فاروق :جبت البحث..
جلال:تي حتى اللاب ماجاباش..
عبدالقادر برفعة حاجب :وانتم شن وظيفتكم يارفاق السوء!!
ضحكوا الزوز..
عبدالقادر: ع التمنكير متاعكم الله زردة السيارة مانكم ضايقينها..
جلال وفاروق😂😂
هي مجرد وصلت للطاوله فنصت...
لقت وردة تانيه ع الطاوله..
رفعت عيونها وشبحتله ..
هو ابتسم ..
رمشت عيونها وقالت: اطلع براااااا...
...يتبع...
مرحبا غزالاتي..
بالله اللي فيكم تعرف جيداء المسؤولة عن القروب اللي يخص رواياتي ع الفيس يقوللها تنزلها غادي...
