آ کہ وابستہ ہیں اس حسن کی یادیں تجھ سے
جس نے اِس دل کو پری خانہ بنا رکھا تھا
جس کی الفت میں بھلا رکھی تھی دنیا ہم نے
دہر کو دہر کا افسانہ بنا رکھا تھا
آشنہ ہیں تیرے قدموں سے وہ راہیں جن پر
اُس کی مدہوش جوانی نے عنائت کی تھی
کارواں گزرے ہیں جن سے اُسی رعنائ کے
جس کی اِن آنکھوں نے بے سود عبادت کی تھی
تجھ سے کھیلی ہیں وہ محبوب ہوائیں جن میں
اُس کے ملبوس کی افسردہ مہک باقی ہے
تجھ پہ بھی برسا ہے اُس بام سے مہتاب کا نور
جس میں بیتی ہوئی راتوں کی کسک باقی ہے
تُو نے دیکھی ہے وہ پیشانی، وہ رخسار، وہ ہونٹ
زندگی جن کے تصوّر میں لٹا دی ہم نے
تجھ پہ اٹھی ہیں وہ کھوئ ہوئ ساحر آنکھیں
تجھ کو معلوم ہے کیوں عمر گنوا دی ہم نے
ہم پہ مشترکہ ہیں احسان غمِ الفت کے
اتنے احسان کے گنواؤں تو گنوا نہ سکوں
ہم نے اِس عشق میں کیا کھویا ہے کیا سیکھا ہے
جز تیرے اور کو سمجھاؤں تو سمجھا نہ سکوں
عاجزی سیکھی، غریبوں کی حمایت سیکھی
یاس و حرمان کے دکھ درد کے معنی سیکھے
زیر دستوں کے مصائب کو سمجھنا سیکھا
سرد آہوں کے، رخِ زرد کے معنی سیکھے
جب کہیں بیٹھ کے روتے ہیں وہ بےکس جن کے
اشک آنکھوں میں بلکتے ہوئے سو جاتے ہیں
نا توانوں کے نوالوں پہ جھپٹتے ہیں عقاب
بازو تولے ہوئے، منڈلاتے ہوئے آتے ہیں
جب کبھی بِکتا ہے بازار میں مزدور کا گوشت
شاہراؤں پہ غریبوں کا لہو بہتا ہے
آگ سی سینے میں رہ رہ کے اُبلتی ہے نہ پوچھ
اپنے دل پر مجھے قابو ہی نہیں رہتا ہے
- فیض احمد فیض -
♦♦♦♦♦♦♦♦♦♦♦♦♦♦
Aa k wabasta hain us husn ki yaadein tujh se
Jis ne is dil ko pari khana bana rakha tha
Jis ki ulfat main bhula rakhi thi dunya hum ne
Dehar ko dehar ka afsana bana rakha tha
Aashna hain teray qadmon se wo raahein jin pr
Us ki madhosh jawani ne inayat ki thi
Kaarwaan guzre hain jin se usi ra'nai k
Jis ki in aakhon ne be-sood ibadat ki thi
Tujh se kheli hain wo mehboob hawaein jin main
Us k malboos ki afsurda mehak baqi hai
Tujh pe barsa hai us baam se mehtab ka noor
Jis main beeti hui raaton ki kasak baqi hai
Tu ne dekhi hai wo peshani, wo rukhsar, wo haunt
Zindagi jin k tasawwur main luta di hum ne
Tujh pe uthi hain wo khoyi hui sahir aankhein
Tujh ko maaloom hai kyun umr gawaa di hum ne
Hum pe mushtarka hai ehsaan ghum e ulfat k
Itne ehsaan k ginwaon tou ginwa na sakun
Hum ne is ishq main kya khoya hai kya seekha hai
Juz teray aur ko samjhaon tou samjha na sakun
Aajazi seekhi, ghareebon ki himayat seekhi
Yaas o harmaan k dukh dard k maani seekhe
Zer daston k masaib ko samajhna seekha
Sard aahon k, rukh e zard k maani seekhe
Jab kahin beth k rotay hain wo be-kas jin k
Ashk aankhon main bilakte huay sou jate hain
Na-tawaanon k niwalon pe jhapat'te hain uqaab
Bazoo tolay huay, mandlaate huay aate hain
Jab kabhi bikta hai bazaar main mazdoor ka gosht
Shahra'on pe ghareebon ka lahu behta hai
Aag si seene main reh reh kr ubalti hai na puch
Apne dil pr mujhe qaboo hi nahi rehta
- Faiz Ahmed Faiz -
