အလွမ်းတွေအထပ်ထပ်နဲ့ဖုန်တက်နေတဲ့နှလုံးသားတံခါးချပ်ပေါ်က
ပိုင်ရှင်မရှိတော့လို့ သံချေးအလိပ်လိပ်နဲ့ယိုယွင်းနေတဲ့သော့ခလောက်ကိုဖွင့်တော့
နှလုံးသားပိတ်ကားချပ်ပေါ်မှာ တန်းစီကျလာတဲ့ နွေးထွေးနေဆဲအမှတ်တရတွေက မအိုဟောင်းသေးဘဲ အချစ်ရယ်။အဖြစ်အပျက်တွေ၊ချစ်ခြင်းတွေကသာ ပင်လယ်ရေ
ထဲဦးတည်ချက်မဲ့မျောပါသွားတဲ့ပြာမှုန့်တွေလို အစအနတောင်မကျန်ဘဲပျက်ပြယ်လွယ်ခဲ့ပေမဲ့
အမှတ်တရတွေကိုတော့ သေရာပါမဲ့အမာရွတ်လို ငါ့နှလုံးသားထဲမှာ 'ထာဝရ' ဆိုတဲ့စကားလုံးနဲ့အတူမြှုပ်နှံထားမှာ။အစိမ်းရောင်ရောင်ခြည်လေးတွေဖြာနေတဲ့ တိမ်ဆုပ်ဖြူဖြူလေးလို ခြေဖမိုးသန့်သန့်လေးရယ်၊ခရမ်းရောင်အမျှင်တန်းယှက်တဲ့ နေရောင်ခနေတဲ့ပါးပြင်နုနုလေးတွေ၊ ပထမဆုံးအကြိမ်နားဆင်ခွင့်ရခဲ့တဲ့ ရယ်သံလွင်လွင်လေးတွေစွက်တဲ့ ဆည်းလည်းလေးလိုအသံသြသြလေး၊ လက်ဖဝါးလေးထဲ ကလေးငယ်လို ဘောလ်ပင်နဲ့လျှောက်ခြစ်ထားတဲ့ ခြစ်ရာလေးရယ်။
မျက်လုံးပိတ်ပိတ်၊ဖွင့်ဖွင့် ကိုယ့်ကမ္ဘာငယ်တစ်ခွင်လုံးမှာ မြင်မြင်ရာကတော့ မင်းရဲ့ပုံရိပ်ယောင်တွေပါပဲ။
မတန်မရာမှန်းမိထားလို့ သိမ်ငယ်မှုအလင်္ကာတွေနဲ့အတူ တုံ့ဆိုင်းမှုကဗျာတွေအထပ်ထပ်သီကုံးရင်း နေမင်းကြီးလိုထည်ဝါနေတဲ့မင်းရဲ့ဖဝါးအနားတောင်ကပ်ဖို့မရဲခဲ့တဲ့အညတရသတ္တဝါတစ်ကောင်ရယ်ပါ။
မျက်ရည်ကျတဲ့အထိမြတ်နိုးရတဲ့ တစ်ဦးတည်းသောဖြစ်တည်မှုလေးက မပိုင်ဆိုင်ချင်လို့လွှတ်ချခဲ့တယ်လို့
စိမ်းစိမ်းကားကားစွပ်စွဲလာတဲ့အခါ ကိုယ့်နှလုံးသားကအခါခါသေရသလို နာကျင်မှုသံသရာစက်ဝန်းထဲနေ့နေ့ညညလည်ရပါတယ်။တကယ်တော့မပိုင်ဆိုင်ချင်လို့မဟုတ်ဘဲ မပိုင်နိုင်မှန်းနားလည်နေလို့ဆိုတာ ကိုယ့်နှလုံးသားဟစ်ကြွေးသံကိုမင်းနှလုံးသားနဲ့နားဆင်နိုင်လာတဲ့တစ်နေ့မင်းအလိုလိုသဘောပေါက်လာပါလိမ့်မယ်။
𝚂𝚎𝚙 23,2021
YOU ARE READING
Cheap Feelings
Non-Fictionစိတ်ပေါ့ပါးအောင် ရေးချင်ရာတွေလျှောက်ရေးမဲ့ စာအုပ်တစ်အုပ်မို့ စိတ်ဝင်စားစရာလုံးဝကောင်းမှာမဟုတ်လောက်ပါ!❤