CHAPTER - 6
[What's Wrong with Jungkook]
Unicode#
မိုးထဲရေထဲ ဂျောင်ဂုကို ပွေ့ဖက်ထားခဲ့သော ထယ်ယောင်းမှာ အလွမ်းစိတ်တို့ မည်မျှကြီးမားသည်မသိ။ လွတ်ထွက်သွားတော့မည့်အလား တင်းတင်းကျပ်ကျပ် ပွေ့ဖက်ထားမိသည်က ဆယ်မိနစ်နီးပါးခန့်ပင် ကြာသွားခဲ့ပြီ။
" အစ်ကို ကျွန်တော့်ကို ပြောစရာရှိတယ်ဆိုရင် ဒီလိုမျိုး အကြာကြီး ဖက်မထားပါနဲ့လား။ ဒီလိုနဲ့ပဲ ကျွန်တော်တို့နှစ်ယောက်လုံး အအေးမိပြီး ဖျားတော့မယ် "
ဂျောင်ဂု သတိပေးလာမှ ထယ်ယောင်း သတိပြန်ဝင်ကာ ဖက်ထားသည်ကိုပြန်လွှတ်ပေးရင်း အားတုံ့အားနာဖြစ်ဟန်ဖြင့်ကြည့်မိသည်။ အခုမှ ပထမဆုံးတွေ့ဖူးသည့် လူတစ်ယောက်က သူ့ကိုအကြာကြီး လာဖက်ထားခဲ့တာ ဂျောင်ဂုအတွက် စိတ်မသက်မသာဖြစ်လိမ့်မည်။
" ငါ တောင်းပန်ပါတယ် ဂျောင်ဂု။ ငါကမင်းကို သိနေပေမယ့် မင်းက ငါ့ကို မသိဘူးဆိုတော့ ငါ့လုပ်ရပ်ကြောင့် မင်း စိတ်အနှောင့်အယှက်ဖြစ်သွားမှာပဲ။ မင်း အဝတ်အစားတွေလည်း စိုသွားပြီဆိုတော့ ငါ့အိမ်လိုက်ခဲ့ပြီး အဝတ်လိုက်လဲပါလား။ မင်းကို ငါပြောချင်တာတွေလည်း တစ်ဝကြီးပြောချင်သေးတယ်။ ငါက တကယ် လူကောင်းလေးပါ။ မင်း ယုံယုံကြည်ကြည်နဲ့ ငါ့အိမ်ကို လိုက်ခဲ့လို့ရတယ် "
ထယ်ယောင်းစကားကြောင့် ဂျောင်ဂုက သူ့ကိုသေချာစိုက်ကြည့်လာခဲ့ပြီး တစ်စုံတရာကို အလေးအနက် စဥ်းစားဟန်ပြုသည်။ ဆံနွယ်ထက်မှ တတောက်တောက်စီးကျလာသော ရေစက်များက သူ့မျက်စိရှေ့က ထယ်ယောင်းကို သည်းသည်းကွဲကွဲမြင်နိုင်ဖို့အရေး အနှောင့်အယှက်ပေးနေပြန်သည်။
" အင်းပါ မင်းငါ့ကို မယုံကြည်ရင်လည်း ငါမင်းကို အပြစ်မမြင်ပါဘူး။ လူရိုးဆိုတာ သုဿာန်မှာတောင် တွေ့ရဖို့ မသေချာတော့တဲ့ခေတ်မှာ အခုမှတွေ့ဖူးတဲ့ ငါ့ကို မင်းယုံကြည်ဖို့ ခက်ခဲနေမှာပေါ့ "
သူ့အကြောင်းနှင့်သူ စဥ်းစားခန်းဝင်နေခိုက် မျက်နှာငယ်လေးဖြစ်ကာ ညည်းညူသံပါပါ စကားဆိုလာသော ထယ်ယောင်းကို ဂျောင်ဂု ထိတ်ထိတ်ပျာပျာဖြင့် လက်ကာပြလိုက်သည်။ သူ့အတွက်က ထယ်ယောင်းကို မယုံကြည်၍မဟုတ်...ထယ်ယောင်းအိမ်လိုက်သွား၍ ဖြစ်လာမည့် အကျိုးဆက်ကိုသာ စိုးထိတ်နေမိခြင်းပေ။
YOU ARE READING
Rain On Me (Completed)
Short Story🏅Best Fiction Award (Eden Contest) မိုးတဖွဲဖွဲရွာတဲ့ နေ့လေးတစ်နေ့မှာ ကျွန်တော့်ဘဝရဲ့ ပထမဆုံး သူငယ်ချင်းနဲ့ ဆုံတွေ့ခွင့်ရခဲ့တယ်။ နောက်တော့ သူက ကျွန်တော့်ရဲ့ ပထမဆုံးချစ်သူဖြစ်လာခဲ့ပြီး မိုးရာသီဇာတ်လမ်းလေးတစ်ပုဒ် ဖြစ်တည်လာခဲ့တယ်။
