Rain On Me (Completed)

SPECIAL EPISODE A

(A)

Unicode-

မိုးရေစက်တွေ အငြိုးကြီးကြီးရွာနေတဲ့ကြားက ဂျောင်ဂုခန္ဓာကိုယ်ကို တင်းတင်းကျပ်ကျပ် ပွေ့ဖက်ထားမိတဲ့ ကျွန်တော်...။ တစ်ကိုယ်လုံး ရွှဲရွဲစိုနေခဲ့ပေမယ့် သူ့ခန္ဓာကိုယ်က အနွေးဓာတ်က ကျွန်တော့်ကို နွေးထွေးစေတယ်။

" ဖက်လို့ဝရင် ပြန်လွှတ်ပေးပါတော့လား။ ခင်ဗျားနဲ့ကျွန်တော်က ဒီလိုတွေလုပ်နေဖို့အထိ ရင်းနှီးတဲ့သူတွေ မဟုတ်ကြဘူးလေ "

ပါးစပ်ကလည်းပြော လက်တွေကလည်း ကျွန်တော့်ကိုတွန်းထုတ်ရင်း မယုံနိုင်စရာ စိမ်းစိမ်းကားကားစကားကို ပြောထွက်လာခဲ့တဲ့ ဂျောင်ဂု...။ ရုတ်တရက်ကြီး ပြောင်းလဲသွားတဲ့ သူ့ကြောင့် ကျွန်တော့်မှာ ပြောစရာစကားလုံးတွေတောင် ပျောက်ရှသွားခဲ့ရပြီ။

နေဦး...သူနဲ့ကျွန်တော် ပြန်ဆုံပြီးလို့ ချစ်သူတွေတောင် ဖြစ်နေကြပြီမဟုတ်လား။ ဒါဆို ဘာကြောင့်များ သူနဲ့ကျွန်တော် ပြန်ဆုံတဲ့အချိန်ကို ပြန်ရောက်နေရတာလဲ။ သူနဲ့ကျွန်တော် ချစ်သူတွေဖြစ်ခဲ့ကြတယ်ဆိုတာကရော ကျွန်တော့်စိတ်ကူးနဲ့ ပုံဖော်ခဲ့တဲ့ ပုံရိပ်ယောင်တွေပဲလား...။

" မင်း ဘာတွေပြောနေတာလဲ ဂျောင်ဂု။ ငါနဲ့မင်းက ချစ်သူတွေလေကွာ။ ဘာလို့ ငါမင်းကို ဖက်ထားလို့မရရမှာလဲ "

ခေါင်းထဲထူပူပြီး ဘာမှမတွေးနိုင်တော့တဲ့ ကျွန်တော်ဟာ သူ့ရင်ဘတ်ကို လက်သီးဆုပ်လေးနဲ့ထုရင်း ကြေကြေကွဲကွဲ မေးခွန်းထုတ်မိတယ်။ ကျွန်တော့်မေးခွန်းကိုကြားတော့ ဂျောင်ဂုက ကျွန်တော့်ကို လှောင်သလိုလိုကြည့်ရင်း သူ့ကိုထုရိုက်နေတဲ့ လက်သီးဆုပ်တွေကို ချုပ်ကိုင်တားဆီးလိုက်တယ်။

ွသန်မာတဲ့သူ့လက်တွေကြောင့် အချုပ်ခံထားရတဲ့ ကျွန်တော့်လက်တွေ နာကျင်လာခဲ့တော့ လွှတ်ပေးလိုလွှတ်ပေးငြား ရုန်းကန်မိပေမယ့်လည်း အချည်းအနှီးပဲဖြစ်သွားတယ်။ လက်တွေနာလွန်းလို့ ကျွန်တော့်မျက်နှာလေး ရှုံ့မဲ့နေတာကို မျက်စိအရသာခံပြီးမှ ဆောင့်ကြီးအောင့်ကြီး ပြန်လွှတ်ပေးခဲ့တာ။