علاقتي بـ ياسمين بقت متوتره شديد و لو اتكلمت معاي بتقول لي السلام عليكم و خلاص ، طبعاً هي لمن رجعت بيتهم في اليوم داك ما جات المدرسه أسبوع كامل في الأسبوع دا مشيت ليها مرتين و كان واضح انو هي ما عايزاني أكون جنبها ، طبعاً أهلها جوا راجعين في تاني يوم طوالي من ما هي رجعت بيتهم ، بعديها بقت تجي المدرسه عادي بس هي الما كانت عاديه ، و المشكله إنها بتلومني على حاجه انا ما لي يد فيها! يعنى لو كنت كلمت سامر انو هي بتحبو أول شي حيفهمني غلط و تاني شي أكيد ما حيخلي ريان عشان بس عرف انو ياسمين بتحبو! ماف سبب يخليهو يتصرف بأنانيه و يقدم سعادة ريان "البحبها"على سعادة ياسمين "البتحبو" ، و هي ذاتا عارفه كدا بس لسه بتقول انو لازم يعرف مع إنها متأكده انو سمعها لمن كنا واقفين جنب باب الصاله، أصلاً هي عملتها واضحه و ما بستبعد انها مشت باركت ليهو عشان يشوف الدموع الفي عيونها و طلعت طوالي عشان هو يلحقها و فعلاً دا الحصل و دا الكانت عايزاهو يحصل ، ما عارفاها بأي منطق عملت كدا و اتوقعت انو هو يخلي ريان و يلغي حفلة العرس عشانها!!
المهم الفتره دي بالذات بقيت اتأخر في المدرسه لأنو امتحاناتهم قربت و شغاله ليهم مراجعات مكثفه ، استاذه سهام كان مفروض ترجع بعد ما تمت الأربعين بس عشان ولدها لسه صغير ما حتقدر تجي إلا بعد شهر شهرين كدا ، فالحصص اتراكمت علي ، في يوم الجمعه سمعت أمي بتتكلم مع وحده ما جاراتنا و حسب السمعتو سامر و ريان جاين من السفر بكرا ، في اليوم البعديهو طوالي شفت سمر جايه ناطه في بيت ناس خالتو إنصاف ، طبعاً كنت مرسله و الباب كان فاتح قبل ما أدخل شايفاها من بعيد داخله و طالعه تنظف و ترتب ساي و في الآخر قعدت تغسل ، البت دي متخلفه كيف ، هسي المفروض تنضف بيتهم ولا بيت ناس خالتو إنصاف !غيتو جنس محن ، لمن دخلت سمعت عامر قال كان بقول ليها والله تعبناك معانا يا سمر ، قالت ليهو بدلع كدا: يخسي عليك يا عامر ما تقول كدا تعبكم راحه بالنسبه لي ، و قعد يتكلم و يتكلم معاها طبعاً هي كانت بتغسل ليهو في ملابسو في الحوش ، قلت ليهم السلام عليكم و دخلت جوه لخالتو إنصاف و انا شكلي مخطوف و صوتي رايح من شدة الزعل بالجلاله قدرت أقول ليها أمي قالت ليك عايز الحلل و الصحاني بتاعة الجمعيه لأنها حترجعها ليهم بكرا ، قالت لي سمح ، مشت جابتهم لي و جات قالت لي لكن ما كتار و تقال عليك؟
قلت ليها ح أشيل جزو و ارجع اشيل الجزو التاني ، قالت لي سمح ، شلت جزو منهم و حاولت قدر الإمكان ما أعاين لـ الفقر الإتنين القاعدين في الحوش ديلك و اعمل نفسي طرشه و عميانه ، بس سمعتهم كانوا بتكلموا عن العرس و قال ليها عندي نيه اعرس قريب إن شاء الله ، انا من غير ما أحس وقعت الصحاني كلها و كويس انها ما كانت مصنوعه من قزاز ، طبعاً هم الإتنين عاينوا لي و انا بقيت واقفه بس و بحاول استوعب في الكلام السمعتو ، عامر عاين لي بنظرة كدا ما قدرت افهمها مع إبتسامه ، سمر قالت لي بسم الله مالك يا بت؟
انتبهت على نفسي و نزلت لملمت الصحاني سريع سريع و مشيت بيتنا قبل ما ادخل البيت دموعي جرت ، مسحتهم بطرف التوب و دخلت ، قلت لـ أمي مصدعه و ما قادره امشي اجيب باقي الصحاني ، قالت لي خلاص ما مشكله خليهم ، يمكن قضيت يومي داك كلو بكى و الصداع مسكني بالجد ، تاني يوم ما قدرت امشي المدرسه كنت حاسه نفسي محمومه ، حتى من سريري ما قدرت أقوم ، أمي كان المفروض تمشي و ترجع لـ ناس الجمعيه حاجاتم بس لمن شافتني تعبانه شديد خلت المشى و قالت لي احسن نمشي المركز ، قلت ليها لا ما ماشه صداع و حيخف ، قالت لي ما شايفه شكلك بقى عامل كيف؟ عيونك دي لمن واقعه ، و هي بتتكلم معاي كدا جات خالتو إنصاف داخله سلمت علينا و قالت لي كُر علي مالك يا بتي؟
أمي قالت ليها مصدعه و شوفي جسمها مسخن كيف و حالفه ما تمشي الدكتور ، خالتو إنصاف قالت لي شكلك زيي كدا ما بدوري الدكاتره لكن اسمعي كلام أمك يا بتي، قلت ليها لا لا انا كويسه، قالت لي خلاص استحمي عشان الحمى دي تخف شويه ، فعلاً لمن استحميت حسيت الحُمى خفت شويه ، قلت لأمي هسي بقيت كويسه فـ امشي لناس الجمعيه ، قالت لي متأكده قلت ليها آيي متأكده ، المهم مع العصريه كدا أمي جات راجعه ، دخلت استحمت و عملت لينا الغدا ، ختت لأبوي و سراج بس لأني قلت ليها ما جعانه ، عملت لي نشا و ختتو جنبو و جهزت ليها صينيه قالت ماشه بيها لناس خالتو إنصاف عشان ريان و سامر جوا راجعين ، بعد ما مشت قعدت جوه براي و مليت من الرقاد مع اني كنت حاسه بكتمه بس وقفت على حيلي و لبست توبي و مشيت لـ أمي في بيت ناس خالتو إنصاف سلمت عليهم و قعدت جنب أمي، شكلهم ضبحوا للعرسان ، أمي قالت لي ما كان تجي ، قلت ليها بقيت أحسن ، خالتو إنصاف قالت لي ريان جوه مع رجاء و بنات الجيران أمشي ليهم، فعلاً مشيت ليهم و سلمت على ريان و كعادتها بتسلم علي بطرف أصابعها ، بس ما شاء الله بقت سمحه سمحه شديد و الحنه و الرسم خلوها تبقى النجفه ، طبعاً سمر كانت لاصقه فيها و تشيل و تتظارف معاها شغاله ليها حظوو أخو عرس وحده خلقه و أخلاق لو لف الدنيا دي كلها ما بلقى زيها ، غيتو بس ربنا يخليكم لبعض و يحفظكم من الحساد و الناس النفوسها وسخه ، طبعاً عارفاها قاصداني بالكلام دا ، المشكله انو كلامها بقى كلو مطاعنه لي و انا كان يكسروا رقبتي ما بقعد مع ناس بتطاعن بالكلام فطوالي استأذنت منهم و طلعت و انا قلبي واجعني وجعه ، خالتو إنصاف قلت لي ماشه وين يا بتي اقعدي اتغدي معانا! قلت ليها تعبانه والله بجيكم يوم تاني ، كويس انو جات وحده و لهتها عني ، أشرت لأمي من بعيد عشان تعرف اني ماشه البيت ، المهم لمن جيت طالعه و قبل ما أصل الباب جاني صوت بقول معقوله مها يا مها! لمن إتلفت لقيتو سامر ، كان جاي من حوش الرجال ، سلمت عليهو و سألني عن صحتي و أخباري و كدا ، ما عارفه بس حسيتو عايز يقول حاجه ، و تقريباً عرفت هو عايز يسأل عن شنو ، قال لـ ياسمين كيف؟
قلت ليهو كويسه الحمدلله ، سمر قالت ضحكت و قالت ليهو مالك بتسأل عن ياسمين أكيد كويسه! مالا يعنى؟ قال ليها لا لا بس عشان استغربت ما شفتها قبيل في بيتنا مع انو عمتي جات......سكت مسافه و بعديها رجع ، بقينا أنا و سمر ، ربعت يدينها و قالت لي انا عارفه حركاتك يا مها و عارفه حركات ياسمين ، سامر دا خلاص عرس و مفروض انتي و ياسمين تبعدو عنو ، و بعدين هو لو كان عايز ياسمين دي الحيخليهو يعرس ريان شنو؟ مالو من زمان عميان منها؟
استغربت هي عرفت من وين و على أي اساس قالت الكلام دا! ....بس دي سمر و ماف حاجه بتفوتها أكيد هي سمعتنا انا و ياسمين لمن كنا بنتكلم بخصوص الموضوع دا في بيتهم و أكيد عرفت إنو ياسمين بت عمتها بتحب أخوها ، ربعت ليها يديني و قلت ليها الحركات و الفهم الوسخان دا بتعرفي ليهو انتي ، ما تشوفيني ساكته و تقول انا ما عارفه السواطه البتعمليها ، انا عارفه كل حاجه حتى لمن حاولتي توسوسي لـ عامر و قلت ليهو اني لاصقه في أخوك و بحاول اعمل مشاكل بينو و بين ريان.....طبعاً هي اتخلعت سكتت مسافه و بعديها قالت لي انا ما كذبت و القلتو حقيقه و حالياً بعد ما سامر راح من يدك انتي و ياسمين شايفاك خاته عينك على عامر 😏
قلت ليها الكلام دا قوليهو لنفسك يا عسل ، ما انا الخليت بيتنا و جيت انضف بيوت الناس و ما انا الخليت ملابس ناس بيتنا و جيت اغسل ملابس الناس ، غيتو خفه زي دي لا شفناها لا سمعنا بيها 😏
قالت لي اسمعيني يا بت الناس ، اشتغل هنا ولا في بيتنا دا ما مجال اختصاصك ، ان شاء الله أخلي بيتنا و أجي اسكن هنا انتي ما تدخلي و في الآخر ديل بقوا أهلي، هم ما اعترضوا انتي البخليك تزعلي و تعترضي شنو ؟
ضحكت و قلت ليها و اساساً ليه يعترضوا و هم لقوا ليهم حبشيه شغاله بالمجان؟
كلامي وجعها شديد ، ما باقي ليها إلا تكفتني ، قالت لي الحبشيه الشايفاها قدامك دي بكرا حتبقى مرة ولدهم 😏
قلت ليها اذاً بتعترفي انك عملتي دا كلو عشان تلفتي انتباهم صح؟
قالت لي عاين ما عايزا أصرف عربي كتير معاك العندي قلتو ليك و كلمي ياسمين تبعد عن أخوي ، قلت ليها هسي ياسمين سألتك و لا جات جنب أخوك؟ و بعدين هي مش بت عمتك! اذاً امشي قولي ليها الكلام دا ما تقوليهو لي انا ، كنت ح أمشي بس سمعت عامر قال سمر! الإتنين إتلفتنا عليهو ، سمر جرت ليهو جري و قالت ليهو ايوه؟ قال ليها عليك الله نادي لي أمي ، قالت ليهو حاضر و مشت و انا عايزا أطق من الزعل قربت أبكي لمن قالت لي "الحبشيه الشايفاها قدامك دي قريباً حتكون مرة ولدهم " لو عامر ما لمح ليها أو صارحها بحاجه زي دي ما كانت حتقول الكلام دا بالثقه دي كلها ، انا بالجلاله كنت ماسكه دموعي ، قبل ما اتحرك عامر قال لي كيفك؟
ما رديت عليهو لأني لو اتكلمت حتظهر نبرة البكى في صوتي و ما ح اقدر امسك دموعي ، هزيت ليهو راسي بس و كنت ح أمشي بس تاني وقفني و قال دقيقه دقيقه مالك انتي؟
مع سؤالو دا انفقعت بالبكى ، و اتذكرت كل مواقفو مع سمر الكانت في الأيام السابقه من أول موقف لحدي اللحظه دي في وقفتي ديك كملت البكى كلو و على العلي الصداع زاد و الحمى زادت و هو شغال لي في شنو؟ .....مالك؟ في زول اتكلم معاك؟ في زول ضايقك؟
بعد ما بكيت كويسه طلعت من بيتهم و مشيت بيتنا و كملت بكاي هناك و وضعي زاد سوء ، رقدت في السرير و انا شايفه طشاش طشاش و رغم انو جسمي كان معرق بس حاسه ببرد شديد ، عشان كدا جبت بطانيه و اتغطيت بيها و انا ما قادره افتح عيوني من شدة التعب و احساس المرض الكنت حاسه بيهو....
بتذكر لمن فتحت عيوني شفت أمي فوق راسي و كانت بتتكلم معاي بس ما عارفاها بتقول في شنو ، المره التانيه لمن فتحت عيوني ما كنت شايفه كويس و سامعه أصوات ناس بس كانت بعيده و بعديها ما شفت و ما سمعت شي ، ما عارفه الحصل شنو بعديها بالضبط و ما عارفه بعد كم من الزمن فتحت عيوني ، بس لمن فتحتهم اتفاجأت بإني في غرفه بيضاء و من الدرب الكان معلق بديهياً كدا عرفت إني في المستشفى ، الممرضه لمن انتبهت لي ، قربت مني و سألتني كم سؤال كدا و بعديها طلعت و جوا أهلي داخلين و أمي دي من جات تبكي و أبوي يهدي فيها ، قالت لي بقيتي كيف ؟
هزيت ليها براسي بس لأني ما كنت قادره اتكلم و صوتي زي الرايح ، سراج قال لي انتي مدام امي قالت ليك ارح المركز و حنستك تحنيس ليه ما مشيتي معاها؟ العناد دا بتخليهو متين انتي؟
طبعاً قال كلامو دا بعصبيه شديده ، أبوي قال ليهو براحه عليها يا ولد ، ما شايف حالتها؟
المهم السمعتو أو العرفتو انو عندي ملاريا و تايفود و نقص في شنو ما عارفه و.....و.....غيتو مصايب كتيره ما قدرت احفظهم ، طبعاً الدنيا كانت ليل فـ سراج قال لأمي و أبوي يرجعوا البيت و هو حيقعد معاي بس أمي أبت حتى أبوي قدر ما سراج حاول معاهم رفضوا يرجعوا البيت ....
سَتُحبك،
بنفسِ الطريقةِ التي تُحب فيها كُتبها، بنفسِ الوتيرةِ التي تحركُ يدها لتظللَ كلمةً استوقفتها في صفحةٍ كاملة بين آلافِ الحروف وعشراتِ الكلمات هي كذلك ستتوقفُ وَتُحبك لكن الفارق أنها لن تُظلِلَك بقلمٍ ما، سوفَ تُظَلِلُكَ بِقلبِها. 💜🥀
يتبع........
