كنت مفتكره إني الوحيده الما عارفه عامر سافر وين بس مؤخراً اكتشفت انو أهلو برضو ما عارفين عنو أي حاجه غير انو برا السودان بس ما معروف وين ، و أهلو ما قادرين يصلوا ليهو و شرايحو مقفله ، طول الـ 8 شهور دي خالتو إنصاف بتجيني في البيت بتبكي قدرتها و بتسألني اذا عامر اتصل علي ولا لا ، حتى ريان بقت تجيني و تسألني عنو ، هم مفتكرين انو لو فكر يتصل على زول حيتصل علي انا.....في آخر مره جاتني فيها خالتو إنصاف جابت لي معاها قروش كـ عادتها بس رفضت أشيلها لأنها من عامر ، رغم انو ما معروف وين بس كان برسل لي و لـ أهلو قروش عن طريق صحبو بس موصيهو ما يقول لـ زول هو وين بس دايماً بقول لـ صحبو قول ليهم اني كويس ، خالتو إنصاف قالت لي يا بتي عليك الله اعفي لي انا مره كبيره و في مقام أمك معقوله يهون عليك كل يوم امشي و اجي عشان أطلب منك العفو و انتي ما رضيانه يا بتي؟ والله ضميري كل يوم بأنبني و قلبي ماكلني شديد لأني سببت الخراب دا كلو ، بسببي ولدي طفش و جيهتو ذاتا ما معروفه وين ، انا اعمل شنو عشان تعفي لي و عشان الأوضاع ترجع زي زمان ، اقسم بالله تعبت من الحياة دي و من وجع القلب دا ، انا ما معروف احتمال باكر دا أموت بس قبل ما الله يشيل أمانتو اعفي لي يا بتي و عليك الله لو لقيتي طريقه توصلك لـ ولدي اتكلمي معاهو يمكن يسمع منك و يرجع....
قالت كدا و قعدت تبكي بحرقه لمن بكتنا انا و أمي معاها ، أخوي سيف كان واقف جنب الباب عاين لينا كدا و مشى طبعاً هو كان عايز يدخل المحكمه في قصة طلاقنا انا و عامر بس أبوي ما سمح ليهو ، حضنت خالتو إنصاف و قلت ليها يشهد الله انا عافيه ليك يا خالتو إنصاف و ما زعلانه منك ، يمكن الحاجه الماف زول عارفها اني كذا مره رسلت و اتصلت على عامر ، رغم توتري من المكالمات بس قاومت نفسي و اتصلت كتير على مدار 8 شهور دي كلها بس ماف فايده و تلفونو مغلق .....في نهاية اليوم دا و قبل ما انوم مع انو الساعه كانت يادوب 8 بس عشان حياتي بقت كئيبه و ممله فـ النوم هو كان انسب حل ممكن ينسيني الحزن دا كلو ، دخلت الفيس الطولت منو و كتبت في صفحتي : "وجودك مطمئن كـ حنوا المرضعات على الفطيم ، كـ سجدة اناء الليل ، كـ قمر في ليلة موحشة ظلماء ، كـ اجابة دعوة ظللنا نرددها سنين ، غيابك اخذ مني كل هذا الإطمئنان و اكثر.....فأرجوك عد! " ، رغم الكومنتات و اللايكات العملها البوست بعد 5 دقايق ، ما هماني ، فايدتو شنو اذا هو ما حيشوفو؟! ، قفلت تلفوني و نمت على كدا ، في اليوم البعديهو دخلت الفيس عشان احذف البوست الكتبتو لأني نسيت انو أخواني من أصدقائي في الفيس ، ان شاء الله ما يكونوا شافوهو بس واضح انهم قروا الكلام لأنهم متفاعلين معاهو ، مع ذلك حذفت البوست و قبل ما اطلع من الفيس لمحت رساله في الماسنجر ، غمضت عيوني و رغم اني عارفه الحاجه دي شبه مستحيله بس اتمنيت انها تكون منو هو ، بس لمن شفت الإسم مسجل بـ "ولد البدري" ظني خاب ، قربت أبكي و مع ذلك فتحت الرساله كان مكتوب فيها :
"وجودكِ لطيفُُ گ نسمةٍ باردةٍ في عزِ حرٍ ، كـ أول شربة ماءٍ لـ صائم ، گ هطول أمطار بعد سنوات عجاف......، مشتاق ليك "
قلت ليهو لو سمحت احترم نفسك حـ احظرك ...قبل ما اتخذ أي إجراء كتب لي من عرفتيني؟ ...ممكن ما تعرفيني من الإسم بس معقوله احساسي و مشاعري ما وصلتك؟
اتخلعت و ختيت يدي على خشمي اتذكرت ياداب إنو جدو اسمو البدري و هو متعلق بيهو شديد عشان كدا كاتب "ولد البدري " كتبت ليهو بلهفه: عامر؟
_ ايوه ، كيفك ، كويسه انتي؟
على طول قعدت أبكي و خليت التلفون على جنب ، دقيقتين و انا ببكي و قلبي واجعني شديد ، رسلت ليهو: لو بالجد بهمك تعرف اني كويسه أو لا ما كنت اختفيت سنه إلا شهرين يا عامر
_ حقك علي بس كان لازم أبعد
قلت ليهو بالجد كان لازم تبعد ؟....قال لي ايوه! قلت ليهو بضيق طيب ليه ما فكرت في حالة أمك و أبوك و أخواتك؟ عارف يا أستاذ إنها كل يوم بتبكي و تجي تسألني عنك؟ عارف إنها من يوم غبت و هي ما كويسه و دايماً عيونها مليانه دموع؟أقلاها كان تتصل تطمنها عليك و تسمعها صوتك ما تختفي و تخلي صحبك هو اليطمنهم عليك ..
_ عارف يا مها والله عارف و كلكم حقكم علي
قلت ليهو طيب و هسي؟.....ما حترجع ؟
_ ما عارف
