#ذنبي_أني_ظلمت
الحلقه الأولي.
للكاتبه#zezo_a_saad
أسمي أريج أبوالقاسم فتحي ...عمري حاليا 28 سنه .
قصتي معاكم تبدأ من اليوم الساعه9:00 الصبح بتاريخ15 أكتوبر 2010 .
أنا حاليا عارفين شن اندير نودع في زميلاتي اللي شاركوني الزنزانه "اي صح زنزانه السجن " لمده 5 سنوات خلي نحكيلكم شوي عن حياتي:-
بالاول أسمي وعمري عرفته صح..بابا أسمه ابوالقاسم مهندس معمارى ويشتغل بشركه مقاولات صغيره ع قده وعمره 55 سنه ..
ماما أسمها سالمه مدرسه لغه عربيه عمرها 50 سنه ..
عشت حياتي وأنا بنت وحيده بين أمي وبوي ...مرت السنين ووقت صار عمري19 سنه جدي "فتحي "توفي..وعند هنا بدت المرحله السوده بحياتي رح نقوللكم ليش "لما جدي توفي سيب 5 أولاد"علي+مبروك+أبوالقاسم+محمد+مصباح"
وماكان عنده بنات رح تتسائلو وين المشكله!! ..المشكله أنه ماقسم الأرث قبل مايتوفي وهنا بدي الصراع وطبعا بابا كان الحلقه الأضعف بأعتباره ماعنده ولد يشيل أسمه مرت سنه بالتحديد ع وفاه جدي والعراك والصراعات ع صفيح ساخن لعند تحديدا 12/3/2003 كان أسود يوم بحياتي عشان وقتها بابا أكتشف أن خوته ضحكوا عليه وزورو أوراق قدام المحكمه أنه عقيم وان انا مش بنته وأن جدي حرمه من الميراث لأنه كان غاضب عليه ...بابا لما جاه أشعار المحكمه وعرف القضيه ماتحمل القضيه وطب ساكت جلطه بالدماغ عطاته بس 3 ساعات وتوفي ....مرو 3 ايام العزاء وبعدها عمامي لزوني أنا وأمي روحنا عند خوالي ومرت شهور العده وأنا وماما يعلم بحالنا كان ربي صدمه فراق بابا عمامي وتصرفهم كلام الناس كلها كانت ضربات توجع ...بس لسه الاسوء ماشفنا منه شي ...وكابوسه بدي أول ما ماما كملت العده "خالي يوسف" خو ماما الكبير والوحيد العايش من خوتها الأثنين "ماما كانت عيلتها تتكون من 3 اولاد وبنتين ...يوسف وعبدالله وبشير...وسالمه ونعيمه" خوالي عبدالله وبشير توفي الاتنين وكان سبب الوفاة هو مرض القلب نفس سبب وفاة جدي والد مامتي ...أما خالي يوسف متزوج وبصغاره عمره 60 سنه بس مشكلته تعرفوا شني "الشرب" بالنسبه لخالتي نعيمه متزوجه ومقاطعه خالي لأن اطباعه سيئه من وقت وفاة جدي ونينه ماعاد تجي ولا تتواصل معاه ...المهم نرجع بيكم لحديثنا خالي يوسف عيشنا أيام سود من الذل والاهانه وكل مايسمع كلام من الناس يجي يفش غله فينا وبيوم كنت قاعده مع ماما بحوش جدي ودخل علينا الظهريه.
يوسف:-أنتي
سالمه:-نعم ياوخي
يوسف:-لمي دبشك انتي وبنتك شوي وعادل يجي ياخذكم
سالمه بأستغراب:-عادل من
يوسف:-عادل راجلك أنا عطيتك ليه وبعد ساعه جاي هو والشيخ عشان يقرى الفاتحه وتنقلعي معاه فاهمه
سالمه:-بس أنا مش راضيه ومستحيل نتزوج بعد ابوالقاسم
أريج ببكاء وعياط:-أنت من تحساب روحك عشان ادير هكي فينا
يوسف:-بعصبيه سلب حزام بنطلونه "الساعه تعرفي أنا من يابنت الكلب"
ونزل فينا ضرب أنا وماما لعند أنا اغمي عليا وشفعتلي ماما بأنها طلبت منه يوقف وهيا رح توافق ع الزواج من عادل .
جي الشيخ وقري الفاتحه ومشينا مع عادل هذا وطبعا كان نسخه عن يوسف "شن بيكون مثلا اكيد دام صديقه زيه" مرت شهور وشهور وماما تتحمل ف الضرب والاهانه منه كل ليله يروح فيها سكران ..من غير فلوسها اللي ياخذ فيهم ومايخلينا شي ..لما وصل عمرى22 سنه وكنت وقتها ندرس ف لغات بالجامعه "كان حلمي نكون أستاذه لغه فرنسيه" قررت نشتغل ونساعد ماما ونفسي ف المصروف بأعتبار أن السيد"عادل" مش مخلينا شي من معاش ماما أشتغلت سكرتيره بمركز لتعليم اللغات وبيوم كنت مروحه الساعه 7:00 المغرب من العمل فتحت بابا الشقه وسمعت عياط ماما نعرفش كيف جريت ع مكان العياط وكان بالمطبخ وشفت منظر مرعب "عادل سكران وماسك ماما ضاربها لعند وجهها دم وماسك بيده الكرسي وبينزله ع راسه من خوفي ع ماما ومن غير مانحس لقيت نفسي ماسكه سكينه وغرستها بظهره طعنته عدت طعنات لعند ماطاح مقتول بعدها ماعاد أستوعبت شي ... مرت الايام ووصلت القضيه للنيابه وطبعا لأن انا ماعندي سند وحتي خالي شهد ضدي بالمحكمه أن اخلاقي سيئه انا وامي هذا ليش عادل كان يضرب فينا وبالمقابل اخت عادل اسمها "ورده" وكلت محامي كبير عشاني يترافع ضدي بتاريخ15/10/2005 أنحكم عليا بالسجن
لمده 5 سنوات .. دخلت السجن ومازال الايام مارضت ترحمني عشان بعد أسبوع بالتحديد وصلني خبر أن ماما توفت من الحسره عليا وحتي ماقدرت نشوفها أو نودعها وخالي كان مصر يحرمني منها لأخر لحظه ...
مرت عليا السنين طويلة ووصلت لقناعه ان مرات حياتي بالسجن أريح من الطلوع اساسا لمن مازال بنطلع أو ليش عايشه أصلا مريت بحالة أكتئاب وعزله عن الكل لعند بيوم جمعني القدر بأغلي صديقه "مريم"
كانت زميلتي بالسجن ضلت تتقرب مني لعند قعدنا صديقات اكثر شي خلانا نكونو قراب هو أنها هيا الوحيده اللي كانت حاسه بيا وماشافتلي بمنظور المجرمه عشان عاشت نفس مأساة ودخلت بنفس تهمتي بس كانت تهمتها "قتل زوجها" لما مسكاته بفراش الخيانه ف دار نومها .
مريم كانت تشتغل خياطه وعمرها 35 سنه ربي ماكتبلها يكون عندها اطفال لأن زوجها كان رافض أن يجيبوا أطفال بحجه انه لسه مازال وحالتهم الماديه ماتسمح ..المهم مريم كان محكوم علاها ب10 سنين وطبعا كانت سجينه قبلي وكان فاضلها ع مده سجنها 4 سنوات و7 شهور ..مرو الايام وبعدها السنين وانا ومريم كنا نشتغلو بالتطريز والحياكه وكان ف ظابطه تساعد فينا بأنها تجيبلنا ف اامستلزمات وبعد نكملو الشغل تبيعلنا البضاعه ونصمدو فلوسنا ع جنب...هكي عشت حياتي لمده 5 سنوات بين جدران السجن واليوم انا واقفه نودع ف صديقات عشت معاهم كل المده اللي فاتت من عمري بين ظلم وقهر وألم وتوا أنا طالعه ورح نمضي ف حياة مش عارفه شن مكتوبلي فيها.
.............
بمكان أخر:-
أسمى هشام جمعه صالح ..عمري 33 سنه دكتور جراحه ... بابا هو جمعه عمره 58 سنه ويشتغل مدرس تربيه أسلاميه وماما هيا سعاد عمرها 56 سنه فلسطينيه الاصل وتزوجها بابا من غير رضا أهله ومن بعدها تبرو منه عشان هالسبب عشت بين بابا وماما لعند وصل عمري17سنه وقتها أكتشفنا أن بابا عنده كانسر بالدم وللأسف تأخر وقت اكتشاف المرض وبعد 6 شهور توفي ..قعدت عايش مع ماما وكانت أنسانه مكافحه بمعني الكلمه ربتني وكبرتني وكان طموحها تشوفني دكتور وقت وصل عمري 25 سنه وكنت كيف داخل سنه رابعه طب بشري ماما قررت تزور جدي وحناي بفلسطين لأنهم طلبو يشوفوها وكان بوقتها جدي تعبان حاولت نمنعها تمشي بس بالأخر ماقدرت نوقف بوجهها مشت لفلسطين ودخلت من معبر رفح ووصلت لغزة وبعد أسبوع اتصل بيا خالي وبلغني ان ماما وجدي وحناي أستشهدوؤ بغاره اسرائيليه دخلت بحاله نفسيه صعبه وانطويت ع نفسي لعند جمعني ربي بأخ وصديق وتوأم روح أسمه"فؤاد"كان زميلي وطبعا اصغر مني بسنه لأني بهذيك الفتره دخلت بأكتئاب بعد وفاة امي ووقفت سنه وبعدها قررت نكمل ونحققلها حلمها كملت وكان كل يوم علاقتي تقوى بفؤاد وبيوم عرفني ع خطيبته إسراء زميلتنا حتي هيا وكل يوم علاقتنا تزيد اكثر واكثر وأشتغلنا مع بعض وأنضاف لقائمه صداقتنا ملاك صديقه اسراء وفؤاد "وكانت فعلا ملاك" حياتي وعمرى بعد مرور علي علاقتنا كقروب رباعي سنتين عشقت فيهم ملاك عشق أعمي ولما أستقرت اموري تقدمتلها عانيت وعانيت وكافحت وكافحت معايا هيا لعند اهلها وافقوا يعطوهالي تزوجنا وقبلنا ب4 شهور تزوج فؤاد وأسراء عشت معاها أحلي 5 سنوات بعمري ورزقنا ربي ببنوته وأخترنالها أسم "هزان" ... مرت الايام وهزان صار عمرها 4 سنوات ونص وبيوم كنت براوند بالمستشفي لعند اتصل بيا رقم غريب وقعد يتصل ويتصل لعند رديت وهنا بدت حياتى تسواد "مشيت لمكان الاستدعاء وكانت قدام المصرف قربت وانا نحس بالدنيا تلف بيا كان ف جثه ممدده ومخطيه بشرشف أبيض قربت منها بايدين ترجف ونفس شبه مقطوع ووقت عريت ع وجهها كانت هيا "ملاك حبيبتي وزوجتي وكل حياتي " انقتلت وهيا طالعه من المصرف ف عمليه سرقه ومن يومها حياتي وقفت اليوم ملاك ليها متوفيه 9 شهور وحياتي وقفت من يوم فارقتني الشي الوحيد اللي مخليني عايش هو بنتي "هزان"..وياعالم كيف رح نكمل حياتي وكيف رح نعيش باقي الايام الجايه.
هذو هما ابطالنا اما الباقي رح تتعرفو عليهم بباقي الحلقات ..يارب تعجبكم كبدايه وطبعا ماتنسو التفاعل واللايك والكومنت ولو لقيت تفاعل حلو وتشجيع رح نكمل معاكم .
وتحياتي ليكم
#zezo_a_saad🌹❤
