كرونيك: و_شاءت_الاقدار

43

🎶 الحلقة 43 🎶
-حبيبتي انا اليوم ماعنديش برشا خدمة (يحكي و يسكر في قفالي الشوميز ) موش باش نطول في الشركة ... (اسد)
-باهي (احلام)
-توصي على حاجة نجيبهالك !!
-لا ...
-باهي مالا تو نخليك و رد بالك على روحك (هز الفاست و خارج)
-أسد! !
-روحو !! و عيونو! (رجع دارلها )
-نجم ن..!! تروح انت بريماس مالمدرسة ولا نمشيلها انا !!
-ماتعبش روحك تو نكلم حازم (خوه) يروح بيها لدارنا هي و زيد الليله نحب نقعدو رأس رأس انا وياك ..(و غمزها)
-ااه لا ريماس مانجمش تقعد بعيدة عليا نتوحشها... قلو يجيبها عيشك
-موش باش تمشي للمريخ .. هاي هنا في دار جدتها خطوتين تكون عندها ( يمسحلها على خدها) و انا ناخذ راحتي شويا مع مرتي !ماعنديش الحق !!
-(وخرت ) ماعادش بكري عليك أسد ربي يعينك
خلاتو واقف و مشات و هو خرج...
.... متكية عالكنابي تخمم فلي عملتو ... يا ريتها مامشاتلو زيد و يا ريتها ماحكاتش معاه و ماقتلو شي ... نادمة ... غلطة كان يفيق بيها أسد يقضي عليهم الزوز و يمحيهم مالدنيا
-ااه يا أحلام شعملت في روحك علاش هكا حياتي موش كاتبلي نفرح ياربي فرجها عليا راني تعبت و ماعادش عندي قدرة نتحمل أكثر من هكة ...
تسمع في الباب يدق قامت تحل
-شكون ألي جاي عالصباح !! زعما أسد نسى حاجة ..!!
.........
-زيد! ! (جبدتو دخلتو فيسع و قعدت تتلفت يمين و يسار شافهمش حد و بعد دخلت و سكرت الباب ) شمجيبك .. مهبول ياخي !!
-انا نحبك و انت تحبني ! لازمك تجي معايا ... هيا نهربو. . نبعدو عالناس الكل و نعيشو حياتنا مرتاحين!!
-ههه زيد شارب حاجة ولا شبيك! ! سكران !! لاباس في مخك قلو نهربو ..
-نحكي بجدي أحلام. . الحل الوحيد أننا نهربو !!
-زيد برا امشي .. عيشك موش ناقصة هبال انا ..
-و انا موش ماشي إلا ماتجي معايا .. خممت مليح ... جمعة كاملة نفكر في حل و هاذا هو أنسب حل
-بالنسبة ليك ... اما انا مانجمش نهرب و نخلي ولادي ورايا خاصة ريماس .. مستحيل ...
سمعو صوت كرهبة وقفت قدام الدار ... مشات تجري تطل مالشباك. .. تفجعت و ولات ترعش ... رجليها رخو بيها شويا لا داخت ... رجعتلو تجري
-أسد. .. أسد جا يا زيد (تجبد فيه دخلتو للبيت ) اقعد هنا و رد بالك تخرج ... امان زيد اسمع الكلام لصالحنا الاثنين ..
و خرجت ... مشات حلت باب الشارع ... لقاتو قدامها و في يدو المفتاح
- لاباس أحلام شبيك ؟؟.
-لا شي سمعت حس خرجت نشوف هاو نلقاك انت
-أي باهي (و دخل )
-شبيك رجعت فيسع انت !!
-نسيت أوراق رجعت نهزهم (ماشي في اتجاه البيت )
-(وقفت قدامو ) لاا .. تو انا نجيبهملك
دخلت فيسع و جابتهملو و هو مستغرب من تصرفاتها ...
-أحلام متأكدة لاباس !! شبيك هكا مفجوعة و خايفة
-ااه أي. لا لا شي .. اما (هبطت راسها ) نخمم في اليل و برا
-ههه عزيزتي الخوافة هي (يقرص فيها من خدودها) انساها الحكاية ماتخممش فيها و في الليل تو نتفاهمو ..
-باهي ... رد بالك على روحك
خلاها و خرج و هي قعدت تعس عليه لين مشا ...
رجعت لزيد خرجتو مالبيت
-انساني و نحيني من مخك يا زيد .. تفهم فيا ... ألي بيناتنا وفا عندو 5 سنين ...
تكركر فيه وراها للباب و دوب ماحلتلو ... رجعت خطوتين لتالي ... مصدومة ...