[COMPLETED] ဗီလိန်ဗျူဟာ || ဘာသာပြန်

[၈၇] မင်းကိုယုံတယ်။

!unicode!

အခန်း(၉၄) မင်းကိုယုံတယ်။

......

ယွင်ရှဲ့သူ့ကိုမယုံပေ၊ သူ၏လက်မောင်းများတင်းကြပ်သွားခဲ့သည်။ သူ့ဘဝတွင် သူတောင့်မခံနိုင်ဆုံးသောအရာကား ကျန်းရွှင်းယီဝမ်းနည်းနေသည်ကိုမြင်ရခြင်းဖြစ်သည်။ အခုသူ့ကိုမြင်လိုက်ရသော် သူ၏နှလုံးသားမှာယိုယွင်းလာပြီး ဘာဖြစ်လို့လဲဟုမေးချင်ပေမဲ့ ဘယ်လိုမေးရမယ်မှန်းလည်းမသိပေ။ သူတုံ့ဆိုင်းနေမိရင်းဖြင့် ချောင်းခြောက်ဆိုးသံတစ်သံကို သူ့အနောက်တွင်ရုတ်တရက်ကြားလိုက်ရသည်။

နှစ်ဦးသားတစ်ပြိုင်နက်တည်းခေါင်းလှည့်ကြည့်လိုက်ရာ ကျန်းမော့လုံကလည်းဓားပျံစီးလာသည်ကို မြင်လိုက်ရသည်။ သူကားလေထုထဲတွင်ရပ်နေကာ သူ့ခြေထောက်အောက်တွင်တော့ အရှုပ်အထွေးပုံကြီးရှိနေသည်။ သူသည် လက်နောက်ပစ်လျက်သားဖြင့် လူနှစ်ဦးအားခက်ထန်စွာကြည့်နေကာ သူ၏မျက်နှာထားမှာ သူ၏သမီးတွင် လျို့ဝှက်ချစ်သူရှိနေကြောင်းသိရှိသွားသည့် ဒေါသထွက်နေသောအဖေတစ်​ယောက်နှင့်နှိုင်းယှဥ်၍ရသည်။

ကျန်းရွှင်းယီက ရှင်းပြဖို့ရော၊ ဖုံးကွယ်ရန်ပါမကြိုးစားပေ။ ဘာမှမဖြစ်ခဲ့သည့်နှယ် သူယွင်ရှဲ့ကိုလွှတ်ပေးလိုက်သည်။

"မော့လုံ၊ မင်းကကောဘာလို့ဒီမှာရှိနေတာလဲ။ ဒီနေရာကလူတစ်ယောက်ပဲဝင်လို့ရတယ်မပြောခဲ့...?"

သူထိုသို့ပြောပြီးနောက်တွင် အနီးတစ်ဝိုက်ကိုကြည့်လိုက်ရာ ကူကယ်ရာမဲ့စွာရယ်လိုက်မိပြီး ဘာမှထပ်မပြောဖို့ဆုံးဖြတ်လိုက်တော့သည်။ ဤနေရာကားပျက်စီးသွားပြီဖြစ်ကာ လူရာချီ၊ ထောင်ချီဝင်လာခဲ့ရင်တောင်မှ ကိစ္စမရှိတော့ပါပေ။ သို့သော် သူတို့တွေးထင်ထားသကဲ့သို့ ခြောက်ခြားဖွယ်ကိစ္စမရှိသည်မှတစ်ပါး၊ အမှိုက်ပုံကြီးကသူတို့အားဝန်းရံနေကာ မြင်နိုင်စွမ်းမှာလည်းအလွန်အမင်းနိမ့်ပါးလှသည်။ လက်ရှိတွင်၊ သူတို့သုံးယောက်မှလွဲ၍ ထိုနေရာတွင်မည်သူမျှမရှိပေ။

ကျန်းမော့လုံက ကျန်းရွှင်းယီ၏စကားကိုမတုံ့ပြန်ဘဲ ထိုအစား လေးနက်သောမျက်နှာထားနှင့်မေးလာသည်။
"မင်းတို့နှစ်​ယောက်ကြားမှာ...ဘာတွေဖြစ်နေတာလဲ။"