ငါလေးကတာဝန်ကျေတဲ့ဇနီးလေးနဲ့မေတ္တာရှင်မိခင်ဖြစ်လာတယ်[ဘာသာပြန်]

*136* သူကတစ်ကယ်ရယ်ရတယ်

သားရဲမျိုးနွယ်နှစ်စုက ရုန်အိမ်တော်ထဲမှာ အခြေချနေထိုင်လိုက်ကြပြီးနောက် အိမ်တော်ထဲမှာ နောက်ထပ်ရှုခင်းတစ်ခု ပေါ်လာတော့သည်။ နေ့အချိန်မှာဆိုရင် အိမ်တော်ထဲက သစ်ပင်ပန်းပင်တွေက နေရောင်အောက်မှာ ရွှေတောင်တစ်လက်လက်တောက်ပနေတာကိုတွေ့ရပြီး ညမှာဆိုရင်တော့ ခြံဝန်းက နှစ်ပိုင်းကွဲသွားလေသည်။ တစ်ဖက်က သစ်ပင်ပန်းပင်တွေက ရောင်စုံအလင်းတွေတောက်ပနေပြီး တစ်ဖက်ကတော့ အပြာနဲ့အဖြူရောင်အလင်းတွေ တောက်ပနေကြ၏။ အရမ်းလှပလွန်းလေသည်။

သူတို့ သူ့ကို ပိုပြီး ကောင်းမွန်စွာနဲ့ကူညီလာနိုင်ဖို့အတွက် ရုန်ယိက ဆေးညွှန်းတွေနဲ့ မှော်လက်နက်သန့်စင်တဲ့ နည်းလမ်းတွေကိုချရေးပေးပြီး လိုအပ်တာတွေကိုတော့ သူတို့ဘာသာဝယ်ခိုင်းလိုက်သည်။ သူတို့က အများကြီးရှိနေတာကြောင့် သူတို့ဘာသာ သူတို့လုပ်ရင်လုပ် ဒါမှမဟုတ် တစ်ယောက်ယောက်ကို လုပ်ခိုင်းလိုက်ဖို့သာ သူလည်းတတ်နိုင်သည်။

အချိန်တွေ ကုန်ဆုံးသွားပြီး....သိပ်မကြာခင်ဘဲ ၁၂လပိုင်းကို ရောက်လာပြီး နှင်းတွေ စတင်ကျလာလေပြီ။ ဒါပေမဲ့ ရုန်အိမ်တော်ကတော့ အစီအရင်ပြုလုပ်ထားတာကြောင့် တစ်နှစ်ပတ်လုံး နွေဦးလိုမျိုးဘဲ ဖြစ်နေ၏။ ကျင့်ကြံဆင့်မြင့်တဲ့သူတွေအတွက်တော့ ေနွရာသီနဲ့ ဆောင်းရာသီရဲ့အပူချိန်က ဘာမှမကွာခြားပေ.. သူတို့က ပူတာရော အေးတာရော မခံစားရကြ..။ ဒါပေမဲ့ ရုန်ယိ ယင်ထောင်နဲ့ ယင်စန်စန်တို့လို ကျင့်ကြံဆင့်နိမ့်တဲ့သူတွေကျတော့ ဝတ်ရုံအထူကြီးတွေ ဝတ်ထားဖို့လိုတာကြောင့် လုံးလုံးကြီးတွေဖြစ်နေကြပြီး ကို့ယို့ကားယားနိုင်နေကြလေသည်။

ယင်စန်စန်က အခုမှလမ်းလျှောက်သင်ခါစဖြစ်တာကြောင့် ရပ်နိုင်ဖို့ ကြိုးစားနေလေသည်။ ဒါပေမဲ့ မြေပြင်ပေါ်မှာက နှင်းတွေချည်းဘဲဖြစ်နေတာကြောင့် သူ့မှာ ချော်ချော်ထွက်နေပြီး နောက်ဆုံးမှာတော့ ဟန်ချက်ပျက်ကာ ဘေးနားကနှင်းပုံထဲကိုလဲကျသွားတော့လေသည်။

"ဟားဟားဟားဟား...."

ဒီမြင်ကွင်းကိုတွေ့တဲ့အခါ ရုန်ယိမှာ မနေနိုင်ဘဲ ရယ်လိုက်မိသည်။ အထူးသဖြင့်တော့ ကလေးရဲ့ ခေါင်းလေးက နှင်းထဲမြုပ်နေပြီး သူ့ရဲ့ခြေတံလက်တံတိုတိုလေးတွေနဲ့ ရုန်းကန်နေတာကို တွေ့လိုက်ရတဲ့အချိန်မှာဘဲ ဖြစ်လေသည်။ သူက အရမ်းချစ်စရာကောင်းတယ်လို့ ခံစားလိုက်ရပြီး သူ့ကိုသွားချီကာ မျက်နှာလေးကိုပွတ်ပေးချင်မိစေသည်။