ငါလေးကတာဝန်ကျေတဲ့ဇနီးလေးနဲ့မေတ္တာရှင်မိခင်ဖြစ်လာတယ်[ဘာသာပြန်]

*151* ရုန်ယိခန္ဓာကိုယ်က ကိုယ်တိုင်ရောက်လာခြင်း

"ကျွန်တော့်ရဲ့ ခန္ဓာကိုယ်ကို ကျွန်တော်ထိန်းချုပ်ကြည့်လို့ရမလားမသိဘူး..ဟို.. ကျွန်တော်ပြောချင်တာက.. ကျွန်တော်က ခေါင်းထဲမှာ တစ်ခုခုကို စဥ်းစားလိုက်တာနဲ့ သူက ကျွန်တော့်အတွက် လုပ်ပေးလိမ့်မယ်ထင်တယ်"

ရုန်ယိ သူ့ခန္ဓာကိုယ်က ဆံပင်အရှည်ပြောင်းလိုက်ကာ သူတို့အဝတ်အစားတွေ ဝတ်ဆင်ထားတာကို တွေးကြည့်လိုက်မိသည်။ ယင်ကျင်းရဲ့က သူ့ခန္ဓာကိုယ်က ဒီအဝတ်အစားတွေ ဒီဆံပင်ပုံတွေနဲ့ ကြည့်ရတာ ထူးဆန်းနေတယ်ဟု တစ်ခါပြောဖူးလေသည်။ ဒါကြောင့်သာ သူ့ခန္ဓာကိုယ်က ယင်ကျင်းရဲ့ရဲ့ အကြိုက်ကို လိုက်ပြီး ပြောင်းလဲလိုက်တာ ဖြစ်ပေလိမ့်မည်။

ယင်ကျင်းရဲ့လည်း ဒီဖြစ်နိုင်ချေကို တွေးမိတာကြောင့်
"လျှို့ဝှက်ဂူလမ်းကြောင်းထဲမှာ မင်းခန္ဓာကိုယ်ကို တွေ့ခဲ့တုန်းက မင်းရဲ့ဝိညာဥ် ဒါမှမဟုတ် အသိစိတ်တစ်ပိုင်းတစ်စကို အမှုမှတ်အမှတ်မဲ့နဲ့ မင်းခန္ဓာကိုယ်ထဲကို လွှဲပြောင်းခဲ့မိတာဖြစ်လိမ့်မယ်.. ဒါကြောင့်သာ သူ့မှာ ဒီလိုလှုပ်ရှားနိုင်တဲ့ အသိစိတ်ရှိနေတာ"

"ဒါပေမဲ့ အကယ်၍ သူသာ ကျွန်တော် တွေးတောနေတဲ့အတိုင်း လိုက်လုပ်တယ်ဆိုရင် ကျွန်တော်တို့ သူ့ကို ဒီလောက်ခက်ခက်ခဲခဲ လိုက်ရှာဖမ်းနေစရာမလိုသလို သူလည်း ကျွန်တော်တို့ဆီကနေ ပုန်းကွယ်နေစရာမလိုဘူးလေ"

ယင်ကျင်းရဲ့က ခဏလောက်တွေးကြည့်ပြီး ပြန်ပြောလိုက်သည်။
"ကြည့်ရတာ မင်းခန္ဓာကိုယ်ထဲကို ပြန်သွားချင်တဲ့ မင်းရဲ့ ဆန္ဒက ခိုင်မာမှုမရှိသေးတာကြောင့်နေမှာပေါ့.. သူက မင်း စိတ်ရဲ့အနက်ရှိုင်းဆုံးနေရာက အတွေးတွေအရ ကိုယ်တို့ဆီကနေ ပုန်းကွယ်နေတာဘဲဖြစ်လိမ့်မယ်"

သူပြောတာ မှန်လေသည်။ ရုန်ယိမှာ စိတ်ထဲ၌ တစ်ကယ့်ကို ဝိရောဓိဖြစ်နေမိသည်။ သူ သူ့ခန္ဓာကိုယ်ထဲကို ပြန်သွားချင်ပေမဲ့ တစ်ချိန်တည်းမှာဘဲ သူ့မျက်စိရှေ့က အရာအားလုံးကို ဆုံးရှုံးသွားရပြီး ကလေးတွေက သူ့ကို လုံးဝမမှတ်မိတော့မှာကို ကြောက်နေမိ၏။

"သူ့ကို အရင်ဖမ်းရအောင်.. သူ့ကို ဖမ်းလို့မမိဘူးဆိုမှဘဲ ကျွန်တော့်အတွေးတွေနဲ့ သူ့ရဲ့လှုပ်ရှားမှုတွေကို ထိန်းချုပ်လို့ရမလားလို့ လုပ်ကြည့်လိုက်မယ်"