Ｙｏｕ 'ｒｅ Ｍｙ Ｄｅｓｔｉｎｙ💌

မင်းရဲ့ပရိတ်သတ်လေး🍒

     မျက်နှာသစ်ဆေးအမြှုပ်များကိုရေဖြင့်ပြောင်စင်အောင်ဆေးကြောသုတ်သင်ပြီးနောက်လည်ပင်းတွင်ပတ်ထားသည့် မျက်နှာသုတ်ပုဝါအညိုရောင်
လေးဖြင့် မျက်နှာအနှံ့ခပ်ဖွဖွသုတ်လိုက်သည်။
      အနည်းငယ်ထူသောမျက်ခုံးတန်းတို့တွင်ခိုကပ်တွယ်ငြိနေဆဲရေစက်ကလေးများကို
ပုဝါဖြင့်ဖိကာတို့လိုက်ပြီးမှ ပုဝါကိုလည်ပင်းမှာပြန်လည်သိုင်းပတ်ချည်နှောင်လိုက်သည်။ထို့နောက်တိုက်ပြီးသား သွားတိုက်တံကို မျက်နှာသစ်ကြွေဘေစင်အနောက်ရှိနံရံမှ ပလတ်စတစ်ခွက်လေးထဲလှမ်းစိုက်လိုက်ပြီး မှန်ထဲမှ ကိုယ့်မျက်နှာကိုယ်သေချာကြည့်မိ၏။

" အသားတွေခြောက်နေသလိုပဲ .. မဖြစ်သေးပါဘူး နားရက်လေးတော့ skincare သေချာလုပ်ဦးမှပါပဲ .."

တစ်ကိုယ်တည်းရေရွတ်ရင်း ရေချိုးခန်းမှထွက်ကာအခန်းထဲပြန်ဝင်လိုက်တော့ မရွှေပိုး ကတော့ကုတင်ပေါ်မှာမှောက်လျက်သားအတိုင်း အိပ်မောကျနေဆဲ။ ညကတစ်ညလုံးမူးပြဲကာသောင်းကျန်းထားတာ သူမဟုတ်
သည့်အတိုင်းနှစ်နှစ်ခြိုက်ခြိုက်အိပ်နေလိုက်သည်မှာအိမ်မက်ထဲမှာကမ္ဘာတောင်ပတ်နေပြီထင်၏။
    မှန်တင်ခုံရှေ့တွင်အသာအယာဝင်ထိုင်လိုက်ပြီး ခုံပေါ်မှာအစီအရီရှိနေသော
toner,serum ,essences ,suncreamဘူးများကိုတစ်ဘူးဆီဖွင့်ကာအနံ့ခံကြည့်ရင်း ဘာအရင်စလိမ်းရမှန်းမသိဖြစ်နေမိပြန်သည်။ဘူးတိုင်းလိုလိုရွှေပိုး အကြံပေးသမျှဝယ်ဖြစ်တာချည်းဖြစ်သလိုအခုထိ skin care နှင့်ပတ်သက်ပြီးမကျွမ်းကျင်သမျှ သူငယ်ချင်းမ ကိုပဲဆရာတင်နေရဆဲ။
တစ်ဘူးစီအနံ့လိုက်ခံကြည့်နေမိပြီးမှ နောက်ဆုံးMoisturizer ခပ်ပါးပါးပုတ်လိမ်းကာ လည်ပင်းမှာပတ်ထားဆဲတဘတ်ကို ချိတ်မှာသွားပြန်ချိတ်ပြီး အခန်းတံခါးဖွင့်ကာ မီးဖိုခန်းရှိရာဘက်သို့ထွက်လာခဲ့လိုက်သည်။
သူမ နေထိုင်ရာတိုက်ခန်းလေးမှာ အိပ်ခန်းတစ်ခန်း ဧည့်ခန်း ထမင်းစားခန်းနှင့်မီးဖိုခန်းတွဲလျက်ပါပြီး ပြောရလောက်အောင်
မကျယ်ဝန်းသော်လည်းကျဥ်းတော့မကျဥ်းပါ။တိုက်ခန်းပိုင်ရှင်အန်တီမိုးကလည်း ​ရွှေပိုး အ​ဒေါ်ဝမ်းကွဲ​တော်စပ်​နေသူမို့ စ​ပေါ်လည်း
မယူဘဲတစ်လချင်းသာ လခ ယူ​ပေးသည်မို့အဆင်​ပြေသထက်​ပြေသွားရသည်။
       တိုက်ခန်းက ကန်ထရိုက်တိုက်ဖြစ်ပြီး​
သုံးလွှာရှိကာ တစ်လွှာတွင်အခန်း​သုံးခန်းစီရှိသည်။ သူမ က သုံးလွှာဘယ်ဘက်ခြမ်းအခန်းတွင်​နေတာဖြစ်ပြီး သူမ အခန်းနှင့်မျက်​စောင်းထိုးရှိအခန်းတစ်ခန်း ​သာလွတ်​နေသေးလျက်ကျန်အခန်းတိုင်းကလူအပြည့်ဖြစ်သည်။အပိုင်ဝယ်​နေသူများရှိသလို သူမ ကဲ့သို့ပင်ငှား​နေသူများလည်းရှိကြသည်။ ​
အန်တီမိုးကမြေပိုင်ရှင်ဖြစ်ပြီး အခန်းများကိုအန်တီမိုးနှင့်တိုက်ခန်း​ဆောက်သည့်ကန်ထရိုက်တို့တစ်ဝက်စီပိုင်ကြသည်လို့​တော့ ​ရွှေပိုး တစ်ခါက​ပြောဖူး၏။
       အန်တီမိုး ကတော့ဒီရပ်ကွက်မှာမနေဘဲ
ရွှေပိုး နှင့်တစ်လမ်းထဲမှာပဲ သူမမိသားစုနှင့်
နေထိုင်သည်။ တိုက်ခန်းများကိုပြန်​တော့
မ​ရောင်းဘဲအခန်းငှားစားခြင်းဖြစ်သည်လို့လည်း ​ရွှေပိုး က​ပြောပြ​သေး၏။
         ဘယ်လိုပဲဖြစ်ဖြစ် နယ်မြို့လေးကနေရန်ကုန်ရောက်လာပြီးတစ်ကိုယ်တည်းရုန်းကန်ရှင်သန်ရသည့်ဘဝမှာ အကူအညီ​ပေးသည့်အတွက် အန်တီမိုး ကို သူမ​ကျေးဇူးတင်မိသည်က​တော့အမှန်ပဲဖြစ်သည်။