Places & Souvenirs - BORACAY 3 - Island Adventure, Island Magic

Part 8

"HOW DO you feel about scuba diving?" tanong sa kanya ni Drigo.

Nasa Da Mario sila at katatapos lang kumain ng inorder nitong brunch. Kaharap nila ngayon ang umuusok pang kape nito while she was waiting for her fruit shake to be served.

"Diving?" ulit niya. Naalala niya ang mga larawang ipinasa sa kanya ni Avery. Kuha iyon sa assignment nitong underwater beauty ng Boracay Island. At wala siyang matandaang namintas sa lahat ng nakakita niyon. Bigla ay nakadama siya ng kuryusidad kung gaanong paghanga ang maaaring maramdaman niya kapag mismong siya ang makakita ng mga iyon.

Tumango si Drigo. "Binabalak ko talaga iyan. And maybe kaya lang hindi pa natutuloy ay parang wala ako sa mood dahil wala naman akong makakasama. If you would join me, wala nang dahilan para manatiling balak na lang ang balak ko."

"I saw a lot of pictures ng underwater scenes nitong isla," maingat na sabi niya. Wala siyang planong magbigay ng iba pang detalye tungkol sa kanya. Maliban na lamang siguro kung magtatanong ito. "Every detail is magnificent. At malaki ang palagay kong hindi lamang iyon dahil sa talento ng underwater photographer."

"I agree. So when are we going to discover that beauty?"

"Nag-iimbita ka na naman?" she asked teasingly. Inilapit niya sa bibig ang baso ng fruit shake na isinilbi sa kanya.

"Why not? I like you, Maia. Masarap kang kausap. Masarap kang kasama."

"Nasasabi mo na iyan?" she asked in disbelief. "We've just met this morning."

"Yeah. And the first impression really lasts."

"Impression? What kind of impression do you have in me?" curious na tanong niya.

"You're interesting."

For what? Malalim ang tinuran nito ngunit hindi na niya ginawang isatinig ang nasa isip.

"How about tomorrow morning? Ideal daw na lumusong sa umaga. Kokontrata ako ng bangka saka ng gadgets."

"I don't know."

"Come on, Maia. You have achieved a nice tan at sunog na rin ako sa kadya-jogging hanggang mid-morning. What don't we make tomorrow a bit different? Puwede rin tayong mag-parasailing sa hapon kung gusto mo."

She laughed softly. "Iyon nga lang diving, hindi pa ako makapagdesisyon, parasailing pa. Puro mga active sports pa naman iyan."

"Ayaw mo? Baka naman hindi mo pa lang nasusubukan, Maia. It's a sure fun. Scuba diving was my hobby when I was in college. I actually missed the fun and adventure."

"I don't want to commit. Pag-iisipan ko muna."

"Okay." Pinanood nito ang pagsaid niya ng fruit shake. He paid the bill matapos siyang mag-aya na.

MAGKASALO din sila ni Drigo sa isang light breakfast kinabukasan. Mabilis nilang tinapos iyon sapagkat dumating na ang inarkilang bangka pati diving suits at gadgets nila. Kagabi pa ay pumayag na siya sa imbitasyon nito. Hindi naman niya talaga pinag-isipan nang matagal ang pagpayag. At isa pa, sa anyo ni Drigo ay waring hindi naman talaga ito titigil hangga't hindi siya napapapayag.

She took her dinner alone last night. Hindi nag-imbita si Drigo gayong ginawa naman nitong visible ang sarili sa paligid niya. Napansin niyang kapag nasa cottage siya ay naroron lang din ito sa cottage nito. At dahil wala siya sa mood na maglibot pa kahapon, namalagi lang siya sa cottage. Nagbasa siya ng libro niya sa terrace. At napapansin niya si Drigo na parang hulog naman ang atensyon sa pagbabasa ng diyaryo nito.

Pero hindi ito lumapit. Kung ilang beses na nagkatinginan sila at nagkasya na lang sa pagngingitian. Nang bumaba ang araw ay pumasok na siya sa cottage. She made her own dinner at kinain iyon. Matutulog na sana siya nang kumatok si Drigo.