SUNFLOWER [COMPLETED]

Part 26

canvasရှေ့မှာထိုင်နေတာကြာပြီဖြစ်ပေမယ့်လည်း ဆေးစမချရသေးသလို ဘယ်လိုပုံမျိုးကို ဆွဲရမလဲဆိုတာလည်း အတွေးထဲမရောက်လာသေး။ အရင် ရိပေါ်နဲ့သာ အတူလာဖူးတာမို့ canvasရှေ့မှာထိုင်နေတဲ့ ရိပေါ်ရဲ့သွင်ပြင်ကိုသာ မြင်ယောင်နေမိတယ်။

မိတ်ဆက်ပေးတဲ့ သူ့ရဲ့နောက်ကွယ်ကရည်ရွယ်ချက်က ရိပေါ်သူ့အပေါ်စိတ်သဘောထားကို ပြင်ဆင်သွားဖို့ကိုပင်။

အခုလိုမျိုး ရှောင်ဖယ်သွားမယ်ဆိုတာက သူ့အစီအစဉ်ထဲမှာမပါခဲ့ပေ။ ရှောင်ဖယ်သွားလိမ့်မယ်လို့လည်း သူတစ်ခါမှမတွေးမိခဲ့ဘူး။ တကယ်ကိုပဲမနေတတ်ပါ။ အနားမှာရှိတဲ့သူက ရုတ်တရက်ကြီးပျောက်ကွယ်သွားတဲ့အခါ အရာရာဟာ နေသားမကျ။ အထီးကျန်မှုဆိုတာဘာလဲ သူပထမဆုံးသိလာရခြင်းပဲ။

ဂရုစိုက်မှုတွေမရတော့သလို ၊ အရိပ်တကြည့်ကြည့်နဲ့ အလိုလိုက်ခြင်းတွေလည်းမရှိတော့။ ကန်တင်းကိုတောင်မှ ခြေဦးလှည့်မလာခဲ့ပါပေ။

လူတွေကနာကျင်ရပါများရင် အဲ့ဒီနာကျင်မှုရဲ့အဝေးမှာ နေတတ်တယ်ဆိုတာကို သူမတွေးမိခဲ့ဘူး။ သူ့လုပ်ရပ်က ရိပေါ်ကို ဘယ်လောက်တောင် နာကျင်သွားစေမလဲ။ အရက်စက်ဆုံးနည်းကိုမှ သူကရွေးချယ်မိလိုက်တယ်မဟုတ်ပါလား။

ကိုယ်ချစ်တဲ့သူက ကောင်မလေးရသွားခြင်း။

သူကကောင်းမယ်ထင်လို့လုပ်လိုက်ရုံပါ။ ကိုကြီးနဲ့ဟွမ့်ရဲ့ပြောစကားတွေ သူ့နားထဲပြန်ကြားယောင်လာတယ်။ သူ့ဆုံးဖြတ်ချက်တွေ ဇဝေဇဝါပါပဲ။ ဒါပေမယ့် လုပ်ပြီးနေမှတော့ ဆက်လုပ်ရုံပဲ ရှိတော့တာပေါ့လေ။

“ရှောင်းကျန့် .. မဆွဲတော့ဘူးလား ”

အပြုံးတစ်ပွင့်နဲ့ အနားကိုရောက်လာတဲ့ ချင့်ကော။ ကလပ်အခန်းထဲမှာတစ်ယောက်မှမရှိတော့ပဲ သူနဲ့ချင့်ကောသာ ကျန်ရှိတော့တယ်။