متقلبين الود

١٧

       رندا

يالله صبرني دينا وصوتها وازعاجها اكثر شي بتكون امك داعيه عليك فيه اذ كنت معها وهي تتحلطم سواقها تأخر وهي شوي وتجيها جلطه مو متعوده انها تتأخر والذكيه مو حافظه رقم جدها او احد تعرفه واستلمي حتى ماسكتنا انا وملاك لانمشي ونتركها تقول بتفضى المدرسه ويجون ناس يخطفوني الله يخلف على ام جابتها على ذا العقليه
ملاك: بنت بلا دلع تجين معي اللحين ولا طسي مع رنود رنود انتي مع الباص الحكومي صح
رندا: ايه صح تعالي عادي كثير بنات يقطون وجييهم ويجون عادي
دينا: لاا تخيل بس كتمه وزحمه وقرف انا بروح مع عبد الهادي
ملاك: وعبد الهادي وين دينا لاتخليني انسى خوف الله فيك ترانا مصدعين
دينا: ملاك بتروحين مع مين انتي
ملاك: مع رجال ساره اختي اليوم بتمرني
دينا: واخوك لا شغله ولا مشغله ليه مايجي ياخذك قهرر وربي انحرج من رجال اختك بس لو اخوك عادي اكثر من مره رحت معه
ملاك: يعني اكلم اخوي يجي يوصلنا ويترك دوامه عشان اخت دينا اقول رنود انا ماشيه وذي خليها وامشي انتي بعد ويارب تنخطف
دينا وهي تاكل اظافرها: استغفري يالمريضه
رندا: دينا لا تطولينها عبد الهادي ما جاء وش تبين نسوي تعالي معي انا وراي اشغال لليل
دينا: طيب طيب اوففف الله يعيني يالله امشي لاحقتك

طلعت ودينا وراي ركبت الباص وكنا متأخرين وكله بسبب ست الحسن والدلال والعم اللي يسوق السياره يمون معنا يعني احيان يسوي نفسه معصب ويضربنا بالعصا بس ابداً ما احس فيها بس الدلوعه اللي معي سببت لي فضايح وفضايح اول ما دخلنا الباص
العم : انتن وينكن يوم البنيت كلهن جن تسرسرن يوم تعبتن جيتن
دينا: تأخرنا بسببن خاصن
العم بنظره: وشنوهو سببكن
دينا: قلت خاص شخصياً ولا لحظه ما بتفهم خاصن شخصين
العم وهو يضربها بالعصا بشويش مره على رجلها: هاذي منهي بنتن له من متى تروح معنا
دينا: شيل عصاك لاتمد يدك عليك
رندا: معليش السموحه ذي اول مره تروح معنا
العم وهو يرجع لمكانه: واخر مره ان شاء الله يالله اجلسن اذ شفت وحده واقفه كسرت العصا على ظهرها
دينا: قرف رندا مايعرفون ينظفون او اقصد ينظفن
رندا: اجلسي يالخبله تراني واسطه عشان دايم اجي بدري ومنتظمه ولا لو وحده غيري والله ليطردك
دينا: امحق واسطه عند ذا الشايب يارب وربي لارجع البيت والعىن خير عبد الهادي زفت

تركت دينا تبربر فوق راسي مو عاجبها شي تحسب باصنا مثل الباصات اللي متعوده عليها طلعت ورقه اللي كتبت فيها جدولي اليوم
حلو اليوم خفيف بس ارجع اقيل واقوم عصر اخلص شغل الدكتور فراس وبعد المغرب اروح لامي واسلم الشغل والساعه عشره ارجع اذاكر تمام ولا اروع من هيك

                                                            دينا

على الحر والكتمه اللي حاسه فيها بس متحلفه بأخ عبدالهادي اهخخ يا حليلك يامجيد لازم اقول لسمر تتمسك فيه على الاقل اذ ما بيجي يعطي خبر وانا رايحه جهة المجلس اللي دايم الدريولات موجودين فيه الا القى يوسف ولد عمي وولد استاذه جواهر اذكر جدي قال لي انه في عمر مشعل اكبر مني بشوي اربع سنين ممكن
صراحه مو عارفه بالضبط بس ياربي ذا وش جابه بيته هناك بعيد بس بيخرب مخططي في الانتقام من عبد الهادي بس سكت وكملت طريقي بس يوم سمعته يتنحنح عرفت انه بيبدا يتكلم
دينا: هلا
يوسف: هلافيك تو جيت من بيت جدي ادورتس
دينا: ادورني ليه عسا خير
يوسف :كل خير ان شاء الله بس امي كانت تبي تعزمتس شوي للعشاء خوالي عندنا وتباك موجوده وماعندها رقمس وقالت اجي اقول لس عاد انا قلت للخدم بس ماني ضامنهم اخاف يسهون
دينا: اييه ان شاء الله يصير خير .. اقول يوسف ماشفت عبد الهادي
يوسف بأستغراب: عبدالهادي من
دينا: دريول جدي
يوسف: اييه عرفته اللي جابه جديد قبل شهرين يوم عمي ماجد قال بجيب عيالي عندي
دينا: ايه ايه وينه
يوسف: مدري بس ليه تنشدين عنه بغيتوا مشوار شي
دينا: لا النحيس ما جابني اليوم من المدرسه ولا اعطاني خبر وابي انبهه عليه ما يكررها
يوسف: روحي البيت و انا اذ شفته علمته ولا اقول لجدي يهرجه
دينا: لا تنسى يالله تبي شي
يوسف: الله معاك هاه تجين شوي
دينا: ان شاء الله