متقلبين الود

٣٤

دينا

ناموا البنات بعد اذان الفجر ياقلبي امس تعبوا والله وانا تجاهلت كل شي سلبي وجلست انتظر موعد دوام قيس يبدأ عشان اتاكد انه صاحي وبعد ساعتين شفته اتصل في الواتس واستانست جيت برسل له بس لحظه انا مافكرت وش بكتب له يووه ليتني جهزت كلام من اليوم
ارسلت عليه شكر وكيف انه اسعدني وقت ماكنت متضايقه ومهمومه وكيف غير مزاجي
قيس: جدك ان شاء الله بخير لا تتضايقين وتزعلين نفسك
يووه ذا يحسبني متضايقه عشان جدي بس يالله خل يفهم كذا
دينا: ان شاء الله بس الضيقه تجي غصب مو بكيفي
قيس: فهاذي صادقه مابيدنا نسوي شي.ج
دينا: انت ماشي لدوامك اللحين صح؟
قيس: صح بس ماعندي مشكله ترا اذ خايفه تزعجيني او شي
دينا: اووه ياحظي
قيس: ملاك تقول انك مختفيه وماتتصلين عليها توها تحلطم عندي وتقول شكلها زعلت وما اعجبتها هديتك وكلام كثير
دينا هههههههههههههههههههههههههههههههههههههههههههههههههههههههههههههههه ملاك ياخي اذ مالقت سبب تخترع سبب بس لا انا امس كنت تعبانه وصح قفلت جوالي
قيس: عسا ما شر
دينا: ماشر ان شاء الله بس ضيقه موقف صار لي امس خلاني اتمنى الموت
يووه انا ليش قلت كذا وعاد قيس اتصل علي شكله استغرب ام الورطه صدق رديت عليه وحاولت يكون صوتي طبيعي
دينا: هلا
قيس: وش اللي صار لك امس وش فيك
دينا بكذب: تهاوشت مع بنات وصار بيننا كلام وكذا
قيس: دينا لا تصرفين وش اللي صار امس
دينا : والله بس صارت هوسه بسيطه بيني وبين ناس وخلاص عدت على خير ماتأذيت ولا شي
قيس: المسجات اللي تزعجك رجعت ارسلت عليك
دينا: وش دخل لا لا
بيني وبين نفسي اقول يازين الازعاجات عند اللي بغى يصير
دينا: لا قيس لاتشغل نفسك والله مشكله بسيطه وبعدها عرفت ان جدي تعبان فتجمعت علي من كل جهه

ومرت المكالمه روتينيه كذا بس اللي ما يعرفه قيس ان مكالمته البسيطه ذي اعطتني طمأنينه وراحه بعد الخوف اللي صار لي

رندا

يالله لك الحمد خلصت اليوم ستين صفحه كلها ذاكرتها ان شاء الله اذ استمريت على ذا النظام بجيب الدرجه اللي اتمناها خلاص حسيت الطب في بالي انا بدخل طب وبدرس وبنجح فيه
شفت الساعه كم وطلعت ٣ عصر يووه ماسويت غداء لابوي طلعت من غرفتي ولقيته نايم عند التلفزيون ياقلبي واضح تعبان دخلت المطبخ وبديت اجهز الاغراض بسوي له عصيده بالتمر خفيفه وحلوه تعلمت اشويها حطيت المويه على النار تغلي شوي ورحت اتصلت على الممرضه اللي عند امي من الصباح ماتطمنت عليها وقالت بخير وامورها طيبه الحمدلله كلها كم اسبوع وتجي امي البيت
رحت القروب لقيت ملاك فاقده دينا وتسال عنها رحت شفت لقيت الرسايل اللي ارسلتها عليها من امس ما ردت عليها يووه ذي الثانيه وش فيها كنت بقول يمكن قفلت الجوال وبدت تذاكر بس ذا من سابع المستحيلات ابداً ممكن يصير ذا الشي

سمر

زياره مالك اليوم غريبه هذه وش جايبه مو وقته ابداً انا ابجلس مع دينا عشان نعرف نتصرف وش نسوي في موضوعها وذا ازعجنا بكثر هذرته وسوالفه هو والعيال
مالك: تعالي انتي ماتستحين اليوم كل العالم جايين يزورون جدي الا انتي ابوي فقدك وينها وينها
دينا بدون نفس: اذ فضيت رحت
مالك: لا ياحبيبي ذي مو ديوانيه ولا سوق ذا عيادة المريض مافيها اذ فضيت
دينا: خلاص طيب بزوره
سمر : جدك وش فيه بالضبط
مالك : جته جلطه والله العالم ان دينا او ملاك خويتها اللي دعوا عليه لانهم هم الوحيدين اللي على الطالعه والنازله قالوا جعلك الجلطه وجعلك الجلطه
دينا: مو انا اللي ادعي على جدي وبعدين اذ استجابت دعوتي على جدتي ليش ما استجابت دعوتي عليك
مالك: يمكن ربي حفظني بعدين تعالي وجهك ليه كذا احسه مختلف
سمر: مانامت من امس المهم خلاص ماودك تزيح ترا طفشنا عندنا سوالف بنات بنسولف فيها
مالك: لا والله الطفش الفف مشعل راح يدور له وظيفه توه ذهن نفسه والباقين اللي يذاكر واللي عنده اختبارات واللي سافر
سمر بقهر: طيب روح ذاكر انت بعد
مالك: لا ما احب الا على سيره المسافر نسيت اقولك دينا تخيلي من سافر بيدرس برا يعني انا الصراحه منبهر من عيال عمي
دينا بدون نفس: من
مالك: يوسف ..
كلنا انصدمنا وطالعنا ببعض ودينا حاولت تكون طبيعيه ومالك كمل كلامه
مالك: عاد يقول انه يأمن مستقبله ومشعل يوم شافه استوعب نفسه وراح يدور له وظيفه بس عاد فاتك شكل يوسف راح  المطار ووجهه مفقع هههههههههههههههههههههههههههههههههههههههههههههههههههههههههههههههه
دينا بتوتر لاحظناه كلنا الا السبيكه مالك كمل كلامه: مدري تهاوش مع تركي هو جاي يزور جدي يودعه وناداه تركي بيكلمه على جنب بس اللي حصل انه صفقه والله لو انه يهودي ما صار فيه كذا وعماني استغربوا ويقولون ليش يا تركي يقول بس كذا اشتهيت اضربه وعماني تعرفون مايحبون يعصبون مره على تركي وراح فيها الضعيف
دينا: مالك عادي تروح ترانا طفشنا
مالك بعصبيه: خلاص ياخي والله لو سر الدوله هنا كل شوي وحده تقومني الشرهه مو عليكم على اللي جالس معكم
طلع مالك من هنا كلنا نطينا عند دينا وجلسنا بنفهم منها وش ناويه تسوي
سمر: دينا علمي اهله دينا لاتسكتين بلغي سوي اي شي
دينا بعجز: وش بيصير فيه يعني هو مو بالديره لو بلغت عليه وش استفدنا
مها بقهر: الحقير عساه مايرجع الصايع عساه بحادث يشله شل يصير يتمنى يسوي حركه ومايقدر الله لايسامحه دنيا ولا اخره
الكل: امين
دينا بتوتر: شوفوافيه رقم غريب من امس يتصل علي تتوقعون من انا خايفه ارد وتكون تنتظرني مفاجأه
سمر: يارب اللي فبالي وينه هاتي انا اتصل عليه
اخذت جوالها ولقيت رقم مستمر يتصل له كم مره اتصلت عليه ومن ثاني رنه رد سكتت البنات ورفعت السبيكر
سمر :الوو
: هلا سلام عليكم
يمهه انصدمت يوم طلع صوت رجال بس كملت
سمر: متصل علي اخوي خير بغيت شي
: ابي صاحبه الجوال
يووه ذا بعد عرف اني مو دينا يمه وش المصيبه الجايه احاول اتوقعها ماقدرت
سمر: عادي كلمني انا صاحبه الجوال تعبانه والكلام اللي بتقوله بوصله لها
: انا ولد عمها قولي لها تركي ولد عمك بيكلمك فيه موضوع مايصير اقوله لك شوي خاص
سمر: عرفته اقصد عرفت الموضوع اللي بتتكلم عنه عشان كذا دينا تعبانه منه ومالها نفس ترد وانت اخلص علي
تركي بهدوء:  قولي لها تراه اخذ اللي يستاهله انا سويت اللي علي ضربته وذبحت بعارينه وكل شي قدرت اسويه وهو الرخمه اصلاً سافر يعني لاتشيل هم اذ بترجع البيت واذ تبا هي تسوي شي ثاني من ابسط حقوقها ترا وانا معها
سمر بقهر: ماصار فيه شي للحين من اللي لازم يصير ودينا مابترجع البيت لين ترتاح ورجاء لا انت ولا احد من عيال عمها الباقين يتعرض لها ذي مو اول مره قبلها سوالف كثير خلاص حلو عنها وبعدين انت مسوي مصلح اجتماعي تراك مثله مثلك ماتحلون لها ولا لكم دخل فيها
طلال: ما اخذت راحتي الا اني عارف انها حلال، تراني اصير عم دينا اذ ماتعرفين
سمر: خلاص شكراً كثر الله خيرك
قفلت من عنده وجلست دينا تقول يووه نسيت انه صح يطلع عمي لانه رضع مع جدتها يوم تركته امه وكلام كثير بس اللي قاهرني اللحين الكلب المسافر  ذاك كيف نتصرف معه وش الحل !؟

نوف

اللي صاير بدوني مضايقني حتى لو هي سوت ان الموضوع عادي انا اعرف انها جالسه تعاني لوحدها حقدت على الرجال كلهم دينا مو اول وحده تتعرض لشيء كذا فيه بنات صار لهم اقوى من كذا اذكر بنات في الابتدائي كان حارس المدرسه نفسه يتعرض لهم
استقبلت القبله ورفعت يديني وبديت ادعي
ياررب انجنا بنات حواء منهم يارب من اراد بنا سوء فأخذه عندك وسلط عليه كل انواع الامراض والاسقام
قطع علي دعائي صوت جوالي يرن رحت لقيته وائل ماقدرت اتحمل من امس ماكلمته يجي ببالي انه ما يكلمني بسبب حب وسوالف مثل مايقول صرت افكر انه يسمع صوتي بطريقه شهوانيه قلت لازم احط حد له اللحين عشان لا اضعف بعدين
رديت عليه قبل لا يقفل الخط : سلام
وائل: هلا هلا وعليكم السلام والرحمه وينك ياشيخه مختفيه من امس اتصل ارسل ومافيه خبر
نوف: متضايقه شوي
وائل بقلق او يتهأالي:وش فيك فيك شي
نوف : مو فيه في وحده عزيزه علي ومن بعد قصتها انا قررتت قرار ابيك تعرفه
وائل: هاتي قرارك كلي اذان صاغيه
نوف بغصه: وائل احسني غلطانه بالطريقه ذي وانا اكلمك من ورا علم اهلي انا عصيت ربي قبل لا اعصيك تأنيب الضمير يلاحقني من مكان للثاني خلاص لو سمحت حتى المكالمات ما رح ارجع اكلمك انا الف فكره وفكره جات ببالي ولا اقدر اتحملها
وائل: نوف وش فيك خلاص نحنا عارفين انه حرام بس ربي غفور رحيم
نوف بقهر: وربي شديد العقاب ياوائل انا وش يضمني ببقى حيه وعايشه لين ربي يتوب علي افرض اللحين قبض روحي ملك الموت وش الحل عشان كذا كلمتك اول ماحسيت بالفكره ذي صح عشان لا بعدين افكر واتردد
وائل بجمود وقهر لاحظته: مقدر اجبرك على شي اللي تبينه سويه بس تذكري ان رقمي عندك وقت ما احتجتي شي رني علي بس استودعتك الله الله يحفظك وانا بس اكون نفسي بيكون ساعتها لكل حادث حديث
قفل الخط وانا انهرت ماقدرت اتحمل نبره صوته كم كلمه قالها لاحظت قد ايش قويه انا اللحين من بقي لي اذ احتجت افضفض واستشير بكلم منو حسيت بوحده تضمني رفعت راسي لقيتها دينا حطيت راسي على صدرها وبكيت بكيت وائل وبكيت حالتها وبكيت نفسيتي انا كنت مخططه كم خطوه عشان انتقم من ذاك بس سافر وخرب كل شي
دينا وهي تمسح على شعري: ترا امك وخالاتي جو من السوق غسلي وجهك قبل تطلعين
نوف: اوكي
دينا: سويتي الصح نوف حبيبي كلامك اعجبني وريحني عرفت طريقه تفكيرك رغم اني ماني فاهمه القصه زين
نوف : انتي سمعتي
دينا: ايه سمعت وارتحت اللي يبيك نوف يجيك مع الباب انا وحتى اكلم قيس بعد ماخطبني نادر اكلمه والله واذ كلمته حسيت بتانيب ضمير مع انه جاء مع الباب
نوف: فيه احساس راحه فيني وبنفس الوقت احساس فراغ
دينا: بتروح مع الوقت المهم كنت اناديك تراهم ينادونا للعشاء انزلي قبل لا يطب علينا احد وبعدها لي جلسه معك
نوف: انزلي وبغسل وجهي ولاحقتك