متقلبين الود

٤٤

دينا

صحيت من غيبوبه العيد واحس راسي مصدع من كثر النوم مدري كم الساعه دورت جوالي حواليني يوم فتحته لقيتها وحده بالليل وش ذا !!يالله فوق خمس مية مكالمه من البنات ومن ملاك ياربييه صح انا ارسلت لها اني بقدم الزواج ونمت اكيد انها بتموت من الفضول
قمت تروشت عشان اصحصح وكان ودي اشرب قهوه بس الآله تحت وماعندي وحده بغرفتي ف اكتفيت بشرب حليب شوكلاته واخذت الجوال بشوف وش صار
يويلي ملاك منهاره و فرحانه ومتفاجأه سجلت لها فويس حكيت لها ليش انا سويت ذا كله وحكيت لها كيف امنت رنود ماتعلم احد وتخلي اغراضي عندها لان بيتها مافيه احد وآمن وارسلته بس جاء صح واحد شكلها نايمه
اخذت نفس الفويس وحولته على قروب البنات اللي فيه نوف وندى ومها وسمر
ورحت اشوف محادثه قيس لقيته مرسل لي
"وإنّي أهيمُ شوقًا إن مرّ بخَاطِري 
‏أتراهُ يَذكُرُني ولو سهوًا ويَبتسِمُ؟"
ياناس ياقلبي يجنن رديت عليه وسألته عن الاحوال عنده وش سوت معه ملاك
وبعدها نزلت تحت ولقيت ضوء المطبخ شغال دخلت لقيت ماما مسويه لها قهوه عربيه وجالسه على الطاوله واضح عليها التفكير
دينا: صباح الخير
ثريا: صباح النور
دينا: غريبه مانمتي ولا نمتي من بدري مثلي
ثريا: لا مانمت حتى رحت لبيت جدك مسوين عشاء
دينا باستغراب: امانه وليه صاحيه لهالحين مو تعب
ثريا: حاولت انام بس افكاري تودي وتجيب تعالي اجلسي بسألك
يمه توترت ماما ماتحط عينها بعيني الله يستر افكارها وين راحت اعرفها واضح فيه شي جهنمي براسها
ثريا بدت: دينا انتي مو من عمرك عشر سنين تقولين مابتزوج الا بعد ما اتوظف واصير مستقله صح ولا
دينا: صح
ثريا: ليش اللحين بس صار عمرك ١٩ تحمستي للزواج
دينا: والله مدري قدر ومكتوب حتى انتي ويوم تطلقتي حلفتي انك ماترجعين وهه شوفيك رجعتي
ثريا: طيب ليش بتقدمين الزواج فيه شي
دينا بعدم فهم: شي يعني ايش
ثريا: انتي جاوبي ليه بتقدمينه
دينا: مدري حسيت اربع سنين طويله ودامني لقيت الشخص اللي يفهمني مافيه مشكله اتزوج وادرس
ثريا وهي تطق اصابعها: يعني منتي بمجبوره ما صار بينكم شي خلاك تنجبرين تقدمينه
جلست احاول استوعب لين وصلت الاشارات لعقلي
دينا بذهول: لا يعقل منجد لا يعقل ماما وش تحسين فيه صار الواحد اذ بغا ياخذ قرار يحسب مليون حساب عشان يسلم من افكاركم
ثريا تقوم: خلاص لاتدوخيني ذي فكره جات ببالي وسألتك يالله انا بروح انام لاتشغلين النار وتنسينها مثل العاده
طلعت ماما من عندي وانا احس مصدومه امانه كيف فكرت كذا يعني وش الدوافع مايحتاج افكر كله بسبب حركة قيس صراحه شوي ما الومها دام الشك دخل قلبها وبعدين انا مستانسه لو تتهمني ماما من اليوم لبكره دامها رجعت ماما اللي اعرفها اللي تقلق علي وتتفقدني مو مثل قبل لو اموت ما عبرتني

نوف

يالله صباح خير وش ذي الورطه من وين طلعت لي ذي المصيبه ادق على دينا ماترد وانا ابداً معرف اتصرف في المواقف اللي كذا ولا اقدر اعلم احد رجعت اتصل على دينا وبعد ست مكالمات قررت ترد
دينا: يختي هاه انا مادريت اني شخصيه هامه في المجتمع لهدرجه يعني بس قدمت زواجي كل العالم تتصل
نوف بقهر: انا وين وانتي وين دينا ورطه ومصيبه
دينا: انتي وين
نوف: عند خوالي عشان كذا مقدر اعبر على راحتي
دينا: غريبه المصايب ماتجي الا فبيت خوالي المهم هاتي وش عندك
نوف: اخت وائل
دينا: وشبها
نوف: دقت علي
دينا: وش تبي
نوف: اقولك اخت وايل دقت علي تقول بجي ازورك على اساس بعايدكم وسوي قدام اهلك انك صديقتي
دينا: طيب وش تبا وش عندها
نوف: مدري قالت لي كذا وانا من الخرشه قلت ابشري وبكره بتجينا
دينا: قلتي ابشري هاه الله يعيني خلاص قفلي ..لحظه لحظه هي متى بتجي
نوف بتوتر: قالت بكره ما حددت
دينا بفكره خطيره: اعطيها لوكيشن بيتنا لان اكيد بكره عيال اخوان جده بيجون يعايدونها وزحمه وقلة ادب واكيد الاسئله والاستفسارات ما بتخلص
نوف: اي بالله صدق خلاص بقولها وبقول لامي صديقتي من زمان عنها بتجي لدوني
دينا: دوري لك اي عذر انا بعد اذان الفجر بروح لبيت جدي ماعايدت عماني
نوف: اوكي هي اتوقع بتجي مساء عصر كذا يعني اخذي راحتك
دينا: بدون ماتقولين يالله استودعتك الله
قفلت من دينا وانا متطمنه طالما هي معي الامور طيبه بس والله اسلوب البنت يخوف تتكلم كأنها روبوت تقول انا اخت وايل وجايه ازورك وعرفيني على اهلك على اني صديقتك وفيه كلام بقوله لك والله اسلوبها يخلي اشجع انسان يتوتر قمت برجع اقول لامي بنمشي عشان اقدر اخذ راحتي وافكر بهدوء