ياسمح المحيا جر الهجينية

الجزء الرابع عشر

                   ،،الــجــزء الـرابـع عـشـر،،
اللهم صل وسلم على نبينا محمد،لاحول ولاقوة الا بالله،لااله الا الله،سبحان الله،الحمدلله،الله اكبر
.
بيت الجد نشمي
..غرفة راشد..
عذبة تعلق ثياب راشد بالدولاب
راشد واقف قبال تسريحته يقفل ازارير ثوبه ويعدل ترسيمة شماغه يسرق نظرات لامه اللي وراه بالمراية زفر واتجه لامه وهو يأخذ باقي الثياب من يدها
عذبة سحبت الثياب من يده:رح خلص امورك وخل شغل البيت لي
راشد اخذ الثياب من يدها وعلقهن وقفل الدولاب ثم مسكها من يدها ومشى لسريره وجلس امه عليه وجلس جنبها وهو محتضن كفوفها وطالعها:يمه
عذبة ابتسمت وهي تضغط على يده:ياروح امك ودنيتها
راشد طالع امه بتردد
عذبة:لاتشيل هم بتال عمك لسانه شين لكن قلبه ابيض بيزعل يوم يومين وحتى شهرين لكن مايقدر يزعل اكثر عياله أغلى عنده من عيونه ومايتحمل بدونهم
راشد ابتسم وهو ينزل نظره لكف امه المحترقة واللي ماعاد تنفعها بشي ورفعها لشفايفه وباسها ثم ضمها لصدره:يمه انتي تدرين بغلاتك عندي؟
عذبة مسحت على خده بيدها الثانية وهي تبتسم:ادري ياراشد ادري لو طلبتك عيونك  بتعطيني إياهن وانت مابتسألني ليش
راشد:يمه تدرين اني مااسوي شي بدون رضاك
عذبة قطبت جبينها وهي تطالعه
راشد بجدية:تقوين فراقي؟
عذبة ضربته ع كتفه بخفة وبابتسامة:علامك صاير مثل عيال عمك تبهّر(تكذب)السوالف
راشد يطالعها ساكت بجديته
عذبة تغير وجهها:راشد وش صاير؟
.
بيت مسفر
جواد نازل عالدرج بسرعة ووقف قبال اهله وهم يفطرون وبحدة:يبه مو بعلى كيفه جدي!!يعني اسوي اللي يبيه وانا ساكت بدون اعتراض!!!
ابو جواد ضحك بدون لايطالعه ثم تنهد وهو يهز راْسه ومكمل فطوره
ام جواد عقدت حواجبها وهي تطالعه
شذى بنرفزة:قل الحمدلله طلعت من بين عيال عمي قطعة وحدة
جواد بعصبية:انتي اسكتي محد كلمك
ابو جواد بحدة:انت اللي اسكت واحترم نفسك وانت تكلم بناتي!!
جواد توسعت عيونه
ام جواد بربكة:تعوذ من الشيطان يامسفر قل لااله الا الله
جواد عض شفته بقهر:وانا؟مو ولدك!!
ابو جواد:ايه ولدي لكن الظاهر من أفعالك انك ولدي على الورق بس ولّا الباقي مالي فيه مو انت كل شي يمشي بكيفك وعلى هواك
جواد رفع صوته:يبه!!
ابو جواد بحدة:قصر صوتك لا أجرّك(اسحبك)من بلعومك
،،الكل يطالعه باستغراب من أسلوبه،،
جواد انصدم من تعامل ابوه الجديد
ابو جواد:تربيتي مانفعت معك ماينفع لك الا عمك
جواد بصراخ:يبه انا ماابي امجاد هو غصب الزواج غصب!!
ام جواد انصدمت مادرت عن الموضوع والبنات مو باقل من صدمتها
ابو جواد:قل هالكلام لجدك انا مالي شغل بينك وبينه
جواد بغبنة:جدي مو بسامع لي بيسوي اللي براسه وبس
ابو جواد تنهد وهو يطالعه:اترك جدك الحين واترك سالفتك مع امجاد
جواد يطالعه بتكشيرة
ابو جواد ابتسم:لاتحسب انك سلمت من عيال عمك البارح انك بتسلم من عمك
جواد توتر وهو عارف عمه
ابو جواد:ثم عيال عمك مو بتاركينك وهم دروا بسواتك باختهم
جواد بتكشيرته:حلفوا عند جدي مايلمسوني
ابو جواد بضحكة:ايه حلفوا مايلمسونك البارح لكن ماحلفوا مايلمسونك اليوم!!،،انفجر يضحك،،
شذى ابتسمت:ياويلك جاك الموت ياتارك الصلاة
ابو جواد بابتسامة وسط خفة ضحكته:الله يعينك على ماابتلاك فيه
جواد احتدت ملامحه:فيهم خير يلمسوني!!وربي اقرب مركز وهيّن اذا تنازلت
ابو جواد اختفت ابتسامته وبتهديد:وهين اذا سويتها ياجواد ورب النعمة ان تشوف وجهي الثاني
جواد صرخ:يضربوني واسكت لهم حلوة ذي!!
ابو جواد صرخ:حقك وقليل فيك بعد ياللي مابوجهك حيا!!
.
بيت نشمي
عذبة جالسة عالفطور بضيق خاطر واضح للكل
الجدة منيرة تفطر وهي تطالعها بشك
الجد نشمي يتقهوى وهو ساكت يفكر
الجدة منيرة:بنت ياعذبة
عذبة طالعتها:سمي يمه
الجدة منيرة:وينه الحشاشة(اخر العنقود وتنقال للوحيد)
عذبة زفرت:راح لدوامه
الجد نشمي طالعها:عساه طيب؟
عذبة مامن خلاف بخير بفضل الله
الجدة منيرة:احد متعرّض له طلاب مدير ولا مدرسين معه؟
عذبة:لا يمه ماعليه الحمدلله مرتاح بدوامه
الجدة منيرة بنص عين:عذبة كان احد قايله شي منّا ولا منّا ابك عيال عادل عون يقول هه يلقاهم كلهم حايفينه(حوله)
الجد نشمي بزعل يخالطه حدة وهو يتلفت لمنيرة:وش هالهروج يامرة تدورين المشاكل للعيال انتي!!
الجدة منيرة فزت ببداية كلامه فجعها ثم كشرت بوجهه:انت علامك انا بس أعلمها ان عيال عادل فيه كان احد تعرّض له هم اخوان ويستفزع بهم ويعاونونه!!علامك ثرت علي!!
الجد نشمي بحدة:وش بش ياعذبة؟عسى اللي مشغلش خيرن على خير
عذبة اللي مستحيل تكذب لاسمعت لهجة ابوها البدوية وهو مايتكلم بها الا نادرا زفرت:راشد يبه راشد
الجد نشمي بجدية:دارين(داري)انه راشد علامه؟
عذبة بحزن:راشد جاه انتداب
الجد نشمي قطب جبينه باستخفاف للموقف:بـــس!!!
الجدة منيرة طالعته وبزعل:نشمي!!
الجد نشمي طالعها:ويوم انه جاه انتداب وش صار!!اللي يشوفها تقل عسكري راسلينه للحد!!
عذبة طالعته بتكشيرة
الجدة منيرة:اعوذ بالله من فمك يانشمي!!قل شين زين ولّا اسكت!!
الجد نشمي بحدة:آفا!!تسكتيني يامنيرة!!
عذبة وقفت:اروح اجهز اغراضه
الجد نشمي:ايه اعجلي ولمّيهن(اجمعيها)حتى ترضين
عذبة مشت بسرعة قبل تطيح دمعتها وتدري ابوها مابيرحمها بالعكس بيخاصمها
منيرة طالعته:نشمي انت ماعندك قليب!!حرام عليك تقول لها هاللون وانت خابرن عذبة وقليبها المعلّق براشد
الجد نشمي:الا خيرة من ربي يومه ارسل له هالانتداب بلكن(يمكن)تكّب(تترك)الولد ويعرف لنفسه وهي بعد تخف عنه وتشوف عمرها وهي ماغير شغلها الشاغل راشد وأموره!!
الجدة منيرة:محد قايلن لا يانشمي لكن انت لاتزيدها وانت خابرن طبوعها
الجد نشمي:انتي يامنيرة ماتعرفين لعذبة عذبة مايصلح لها الا
ابو غازي قاطع كلامه بدخوله:السلام عليكم
الجدة منيرة:وعليكم السلام والرحمة
الجد نشمي تغير وجهه
ابو غازي انحنى لامه وسلم على راسها
الجد نشمي ووقف ومشى
ابو غازي اعتدل بوقفته وهو يطالع ابوه:رد السلام واجب ياابو عادل
الجد نشمي بحدة:وعليكم السلام ورحمة الله وبركاته ارتحت!!والاجر وأخذناه كامل لكن انت وش اخذت من ورا دعاويك على عيالك غير الذنب!!
الجدة منيرة تطالع نقاشهم الحاد وهي متعودة عليهم وبتكشيرة:ناقصكم بتال ويكمل الدرزن
ابو غازي كشر بوجهه وهو يسمع طاريه
الجد نشمي:مرده يوم يعاند يعاند على سنع مير انت اللهم ياكافي مااقول غير الله يحشرك مع امثالك بالدنيا وتذوق ماذاقه الضعيف منك كرهته بروحه وهو صغيّر وهججته عنك وهو كبير!!
ابو غازي بحدة:يبه انت الغلطان تقويهم علي وهم مايصدقون يلقون احد معهم وخاصة ذَا اللي ذلف الله لايـ
الجدة منيرة ضربته بطرف عصاها على رجله من ورا:اعقب ياعادل تدعي على عيّيلك(عيالك)اهب مابقلبك رحمة!!
الجد نشمي:أوحيت امك ياعادل اوحيتها!!
ابو غازي بقهر للحين:يبه انا راضين باي ديرة لو انه على الحد لكن مالقى غير ام جلاجل
الجد منيرة شهقت وهي ضربت صدرها بيديها وتطالع عادل:ياحسرتي ام جلاجل!!ام جلاجل ماغيرها!!،،طالعت الجد نشمي:عسى علمته يانشمي علمته مايقول هو ولد من،،التفتت لعادل،،علمّته ياعادل ردّوه ابك لايذلف يمهم لايذلف للموت برجوله والله ان مايرحمونه!!
الجد نشمي بحدة:اوص يامنيرة اقصري حسش ماهم بعاملين له شي وهو منهم وفيهم خلي الولد يشوف اموره
الجدة منيرة طالعت الجد نشمي:أمور وش يانشمي؟انت أرسلته يمّه؟هو طشّه(رماه)وهو صغيّر مارحم ضعفه ابك لو درا من يكون
الجد نشمي قاطعها بحدة:مـنـيـررة!!!
الجدة منيرة طنشته وطالعت عادل:افزع ياعادل افزع وردّه(رجعه)
ابو غازي:اميمتي يايمه محدن مسوي له شي حتى لو دروا من يكون لاتنسين من يكون عادل الحين
الجد نشمي طالعه:ماهم مسوين له شي صحيح لكن مو بعشان سواد عيونك ياعادل لا!!عشان اللي انت خابر
ابو غازي ابتسم:عاد تصدق يبه جازت لي ام جلاجل خله يتنقع هناك ويعرف العناد وش يسوي به
الجد نشمي ابتسم بتحدي وهو يطالعه بنظرة حادة:الظاهر ماتعرف بتال ياعادل
ابو غازي كشّر بوجهه
الجد نشمي:طالع روحك بالمراية وتشوف العناد اللي برأسك هو نفسه اللي مورثه لولدك ياعادل
ابو غازي بحدة:عناده بيجيب اجله
الجد نشمي:ولدك ماهو بمتهور وعلمّتك يعاند على سنع مو بمثلك
ابو غازي صرخ:يبه!!
الجد نشمي بحدة:اوص ياعادل ولّا والله ان تذوق العصا من جديد ثم يالدايخ ماتدري وش صاير ببناتك من وراك
ابو غازي انخطف وجهه ونطق:وش فيهن؟!!
الجد نشمي:لاتخاف بتال اللي غربلته(بهذله)اخذ حقك وحقهن،،مشى،،
ابو غازي لحقه ووقف قدّامه وهو يطالعه وبشر:وش فيهن امجاد ورهايف وش مسويات؟!!
الجد نشمي طالعه للحظات وهو يشوف تفسيره الغلط لكلامه زفر:لاتظلمهن ياويلك من الله حتى البنيات ماسلمن من شرك!!
ابو غازي قطب جبينه
الجد نشمي:جواد ياعادل جواد
..........****..........
بتال وصل للديرة واخيرا بعد مسيرة عشر ساعات متواصلة على طريق يحفه من يمين ويسار صحرا قاحلة خالي من كل شي تقريبا
بتال وصل للديرة واخيرا بعد مسيرة عشر ساعات متواصلة على طريق يحفه من يمين ويسار صحرا قاحلة خالي من كل شي تقريبا ماعدا كم شجرة تلمحها كل بعد كم كيلو او محطة للسيارات وصل وهو كله تعب اول مرة يسافر كل هالمدة لحاله لكن تعبه يخالطه حماس كبير لبيئة جديدة بيتعرف عليها وصل الساعة ٤ العصر تحديدا دخل للديرة وهو يلف بالسيارة يتأمل الديرة بجوها المختلف تماما عن جو المدينة هدا سرعته اكثر وهو مهدي اصلا ونزل نظارته وهو يشوف شايب يمشي قدّامه ووقف جنبه وبابتسامة:مسّيت بالخير ياعم
الشايب التفت يطالعه بتكشيرة ولارد
بتال استغرب لكن كمل عادي:ياعم تعرف وين المركز؟
الشايب يخزه بنظرات وهو يشوف هالغريب
بتال بنفسه:يمكن مايعرف..اقصد المستوصف تعرف وينه
الشايب بحدة:ماهناه(مافي)مستاصف رح يم المستشفى بالمحافظة،،مشى بدون مايعطي بتال فرصة يتكلم،،
بتال يطالعه باستغراب من ردّة فعله نزل النظارة على عيونه وكمل طريقه
..........****..........
بيت خالد
ابو صايل:ياحياك الله ياغازي
غازي فنجاله بيده برسمية معتادة:يسلمك ويبقيك ياعم
عذاري دخلت:يبه،،وقفت وسكتت وهي انصدمت من وجوده ماكانت تدري فرحت انه جا لكن اخفت هالشعور ولا وضح عليها ابد ميلت فمها وهي تتصنع الزعل،،
ابو صايل:تعالي ياعذاري تعالي وقهوينا
عذاري مشت وهي تجر خطواتها وسحبت الثلاجة بملل وهي ترمش لغازي وصدت عنه متجهة لابوها
غازي ارتفع حاجبه ثم ابتسم وهو يهز راْسه ويطالع الارض
عذاري مدت يدها لابوها:فنجالك يبه
ابو صايل حط الفنجال بيدها وهو يغطيه من فوق ويوقف:عساها دايمة
عذاري توسعت عيونها:يبه؟!
ابو صايل ابتسم لها وهو يلفها ودفها عالخفيف لجهة غازي:قهوي زوجك،،طالع غازي وبتشديد،،تقهوى ياابو عادل تقهوى،،خرج،،
،،تبادلوا النظرات بصمت وكلن يعاتب الثاني بعيونه،،
عذاري حطت الثلاجة عالطاولة وجلست مكان ابوها قبال غازي وهي تزفر وتتكتف:القهوة قدامك فهو نفسك كان خاطرك فيها
غازي توسعت عيونه:قومي صبي لي قهوة ياعذاري
عذاري ماردت
غازي بحدة:عذاري!!!
عذاري طالعته بتحدي ماردت ولاقامت
غازي نزل فنجاله عالطاولة:كثر خيرك يابنت الاجواد جاد الله عليك
عذاري كشرت بوجهها
غازي:اللي جا ببالي دام عمي اتصل اكيد انتي اللي قلتي له وجيت طاير قلت اكيد مشتاقة وماهنت لها نومة مثلك ياغازي!!،،ضحك بخفة،،سقى الله ذيك الأيام يوم كل قلبٍ تعلّق بخليله!!
عذاري عضت طرف شفتها وهي تشد على كفها اللي تخفيه عنه
غازي:عالعموم استودعتك الله بكرة مسافر والله أعلم أرجع ولّا ماأرجع،،مشى من المكان خارج،،
عذاري لحقته وهي تحاوطه من وسطه ولامس خدها ظهره
غازي طالع يديها وابتسم
عذاري:وربي انك قاسي ياغازي ومااقسى منك احد!!
غازي بهدوء:واللي سويتيه ياعذاري
عذاري:تدري قلبي مايطاوعني تروح وانت زعلان
غازي زفر:وللحين زعلان بعد سواتك
عذاري:ترمي هالكلام وتمشي ببرود مابقلبك محبة!!
غازي:قايل لك الغلا موجود ياعذاري لكن انتي مايملى عينك الموجود
عذاري تركته وبزعلها:عيني مليانة ياغازي لكن انت ماتحسب لي حساب انا مو الاولى فيه قبلي كثيييير
غازي التفت يطالعها:ماقبلك احد يالزعول لكن انتي  تقيمين الأمور من منظورك
عذاري:شفت!!للحين فيه قبلي وانا اخر العالم
غازي احتدت نظرته:عذاري!!
عذاري اخذت نفس:متى راجع؟
غازي:اذا ربي راد(شاء)
عذاري بتردد وهي تتكتف وتصد بوجهها عنه رغم انها تطالعه عن طرف:وبتروح وانت زعلان؟
غازي:ماسمعت اللي ابيه للحين!!
عذاري تنهدت وهي تطالعه:اسفة
غازي كشر بوجهه وهو يميل فمه:مو هذا اللي ابي اسمعه
عذاري قطبت جبينها
غازي طالعها ساكت
عذاري ابتسمت وهي تنزل نظرها للأرض
غازي ابتسم لابتسامتها للحظة لكن شالها وهو يقول:هو صح اني زعلان عاللي صار لكن هالموضوع احلّه اذا رجعت ويبي له قعدة مضبوطة ياعذاري
عذاري اختفت ابتسامتها وهي تطالعه بقهر:يعني للحين هم قبلي وانا الأخير!!كالعادة مالي اَي خصوصية
غازي بحدة:عذاري!!لاتخليني امشي وانا مسمعك كلام يسّم ويزعّل
عذاري تطالعه وهي تعض شفتها تكتم باقي الكلام
غازي زفر:استغفر الله العظيم هذا انتي ماترتاحين الا اذا جبتي الكلام لنفسك!!وزعلنا بعض!!
عذاري بنرفزة:وشو الكلام بالضبط ياغازي!!حدث العاقل بمايعقل!!
غازي بعصبية:والله الحق علي اللي جاي اسلم عليك قبل سفرتي كان مشيت ولا مريتك
عذاري بقهر:روح وش تنتظر!!واقف قدامي ليش!!
غازي تقدم خطوة وهو يرفع يده بيضربها
عذاري تطالعه بحدة
غازي طالعها بحدة وهو يزفر ويكتم غيظه نزل يده ومشى تركها
عذاري تطالع مقفاه وهو يخرج بخطوات سريعة بلعت ريقها وهي تحاول تحبس دموعها اللي تمردت ونزلت غصب عنها وبنفسها:هذا انت دايم انت الصح وانا الغلط ياغازي دايم
عذاري جلست ع طرف الطاولة اللي وراه وهي تسحب منديل من علبة المنديل اللي جنبها تمسح دموعها الخفيفة
غازي دخل بخطوات سريعة مد يده وسحبها من يدها له وهو يضمها لحضنه باس جبينها وهو يدفنها فيه اكثر:على كثر ماتزعليني لكن هالقلب مايطاوعني امشي وانا كاسر خاطرك
عذاري هلت دموعها لكلامه تدري بحبه لها ويدري بحبها له لكن دايم عنادهم سيد الموقف ضمته بصوتها الراجف:مطول هالمرة؟
غازي:الله أعلم ماادري كالعادة
عذاري:انتبه لنفسك
غازي باس جبينها مرة ثانية:انتبهي لنفسك وشوي ارجعي لبيتك
عذاري كشرت بوجهها وهي تضربه ع ظهره بخفة
غازي ضحك بخفة وهو يمسح على يدها اليسار بيده اليمين وهي لازالت بحضنه:أقوله صادق ارجعي بيتك يومين ثم خليك ببيت اهلك لحد ماارجع
عذاري تنهدت ولو ان الموضوع مو عاجبها:ان شاء الله
غازي باس جبينها وطول شوي ثم ضمها اكثر وهو يبتعد عن جبينها:استودعتك الله يازعولتي اللي تعاند
عذاري بلعت غصتها
غازي لف عنها وابتعد بدون لايطالعها وكان هذا حالهم المعتاد بكل سفرة له يوادعون بعض بدون لاتلتقي عيونهم ببعض
عذاري بلعت غصتها وهي تقاوم عبرتها:استودعتك ربي يالجلف(القاسي)
غازي دخل يده بجيبه وطلع جواله وهو يتصل:ها وش سويتم؟،،ابتسم،،جايكم الحين لاتستعجلون
.........****..........
بتال يلف بالسيارة وهو مصدوم من تعامل أهل الديرة معه قلب الأمور براسه مو لاقي سبب مقنع حتى يتجاهلونه ولايردون عليه اصلا اسرع بالسيارة وهو يشوف شايب ووراه عجوز على مسافة وقف جنبه وتعمّد يقدم بالسيارة لقدام حتى لايتحسس الشايب وقف وهو ينزل قزاز السيارة من جهة الراكب:السلام عليكم ياعم
مفلح دف ثريا بطرف مركوعه لوراه شوي:طسّي(اذلفي)يامرة وش له غاديتن وسط الرجال
ثريا رجعت خطوة لورا وهي تنزل الزنبيل(سلة كبيرة من سعف النخل)
مفلح طالع بتال من فوق لتحت وبجلافة:وعليكم السلام والرحمة
بتال:مسّيت بالخير ياعم
مفلح بتكشيرته:الخير وين وانت وين يالمتشحّط(لبسه ضيق عليه)
بتال عقد حواجبه مو فاهم الكلمة لكن ابتسم:وين الخير يضيعني ووجهك قبالي ياعم
مفلح تنحنح:وش باغي؟
ثريا استندت عالسيارة وهي تحس بثقل ودوخة
مفلح:علامش يامرة؟
بتال انتبه لها:عسى ماشر ياعم؟
مفلح بحدة وعيون بتخرج من مكانها:انشغل بروحك ولاتوايق بخلق الله
بتال مافهم الكلمة لكن فهمها من الجملة:ياعم اركب معي انت واهلك اوصلك لبيتك
مفلح رفع مركوعه وحطه ع مراية السيارة وهو يضربها وبحدة:انشغل بروحك الله يشغلك يالمتشحط
بتال كشّر بوجهه
ثريا طاحت عالارض مغمى عليها
مفلح توسعت عيونه وهو يطالعها
بتال نزل من السيارة بسرعة وانحنى شبه جالس جنبها وهو يمسك يدها يفحص نبضها وماحس الا بضربة ع كتفه وكتم المه ورفع راْسه يطالعه بتكشيرة
مفلح اللي قبال بتال ضربه ع كتفه بمركبته وبحدة وغيره:اعقب إتلمّس محارمنا،،رفع مركوعه وضربه مرة ثانية،،
بتال اعترض الضربة بيده ومسك مركوعه وابتسم:ياعم الله يهديك مالمست محارمك عبث الوضع ضرورة وللضرورة احكام
مفلح سحب مركوعه بقوة ودف بتال من كتفه وبحدة:اعقب محدن شاورك!!
بتال جلس من دفته له وطالعه بتجهّم للحظات وحاول يكتم أعصابه
مفلح:انا خابرن العلة والدوا محدن اوجس لك هرجة!!،،مد مركوعه ولمس فيها ثريا وهزها،،بنت ياثريا يابنت قومي
بتال بحدة:ياعم لازم تروح للمستشفى وش هالكلام!!
مفلح وهو يحرك نهاية مركوعه بوجه بتال:انا ماني قايل لك انشغل بروحك!!انكعم عني وانشغل بروحك الله يشغلك ياقليل الخاتمة،،التفت يطالع ثريا،،انا مرّوح(ماشي)لكن اذا التفت وماأرعيتك(شفتك)تخبرين العلم يم البيت،،مشى،،
بتال وقف:ياعم مايصير هالكلام الله يهديك مايصير!!
مفلح ابتسم للحظة ورجع لتكشيرة وجهه وتنحنح وبصوت عالي:لااله الا الله كل شين زايل الا هو
بتال توسعت عيونه وعض شفته بقهر انحنى عندها ومد يديه يبي يشيلها
ثريا فزت واقفة
بتال جلس عالارض وهو يطالعها مفجوع
ثريا مشت ورا مفلح:اهب يامفلح!!قلبن اسود ووجهن أشهب!!والرحمة مقطوعة منك!!أعوذ بالله من اشكالك!!
مفلح التفت عليها:الا والله اعوذ بالله منش ومن فعايلش ياخايبة الرجا!!تبين توقعيني(تلبسه مصيبة)والله إنش عقوبة(عقاب)عمري
بتال يطالعهم باستغراب وصدمة من اللي يصير ثم ابتسم وهو يشوف مناقرتهم
مفلح:اعجلي بس البنت ماحولها احد وابطينا عنها اليوم اكيد انها تواطي(قلقانة)الحين،،مشى،،
ثريا تمشي وراه:يالله من فضلك اللي يشوفك الحين مايوجس هذا مفلح اللي مغربلها
مفلح:انكعمي بس ماتعرفين تقضبين(تمسكين)لسانش والله ان اجزّه(اقصّه)لش
ثريا:تخسى مير تخسى والله ماتطول تلمسني
مفلح التفت عليها وهو يرفع مركوعه:والله ياثريا ان
ثريا قاطعته وهي ترجع بخطواتها لورا عنه:والله انت يامفلح ان ماأعتقت الضعيفة اني لاأتوطأ ببطنك
مفلح نزل مركوعه وبتحدي:اقربي ابشوف وشلون توطيش!!
بتال بعد ماراحوا رجع لسيارته وركب ولحقهم ووقف عندهم
،،التفتوا عليه وكل واحد يطالعه بحدة،،
بتال بابتسامة:حلفت عليك ياعم ان تركب معي واوصلك لبيتك
مفلح بحدة:والله ان تذوق هالمركوع اذا ماطسّيت
ثريا فتحت الباب اللي ورا الراكب وركبت
بتال طالعها للحظة سريعة ثم طالع مفلح بابتسامة:هاه ياعم بتطلع ولا احرّك؟!!
ثريا وهي تطالع مفلح:امش وكبّه(اتركه)بلكن قنقه اللي بـ*** ينفعه
بتال توسعت عيونه وانصدم من وقاحتها وجرأتها
مفلح ركب عند بتال:تخبرين قنقي وش يعمل بش خليني أعوّد يم البيت هين هين ياثريا هين
ثريا:هذا انت هين هين وماشفت غير شينك على الضعيفة
مفلح التفت عليها كله:والله ان ماصكيتي حلقش،،رفع مركوعه،،ان بواقي سنيناتش(اسنانها)يهبدهن(يكسرهن)هالمركوع
بتال فتح راديو السيارة ع إذاعة القران بصوت عالي ومر من جنب الطريق وتعداه
مفلح يدق بتال ع كتفه بطرف مركوعه وهو حاشر نفسه بهالحركة وبحدة:عّود عوّد وين غادي بنا يافزعة الله وين وين!!
بتال مسك فرامل وهو ندمان عالساعة اللي وقف لهم فيها ورجع رويس:راجع راجع ماني بغادي بك لمكان
.........****..........
..بيت عادل..
غازي جالس عالطاولة قباله
فيصل عن يمينه
جسّار عن يساره رفع يده وضربه ع فخذه بقوة ومن بين اسنانه:علومك ياولد العم،،ضربه مرة ثانية بقوة اكثر وبابتسامة وراها غبنة،،مشتاق لنا؟حنا والله مافينا ذرة شوق لك
جواد اللي جالس بين جسّار وفيصل وقباله غازي وركبة غازي تلامس ركبته يطالعهم بتكشيرة:الله والشوق اللي بقلبي لكم!!!بموت بموت
،،كلهم ضحكوا بصوت عالي،،
جسّار حط يده ورا رقبة جواد وهو يضغط عليه وبابتسامة:يمه منك ياظريف يالطيف،،اختفت ابتسامته وشده له اكثر وبحدة،،يافرعون يامتسلط ياقليل الحيا
جواد دفه عنه بقوة
جسّار اتسعت عيونه
غازي اشر بيده لجسّار بمعنى اتركه ثم انحنى وهو يتكي باكواعه على اطراف ركبتيه وتكى بدقنه ع كفوفه اللي شابكها بعض وبابتسامة وهو يطالع جواد:ايه وآخر علومك ياولد الـعـم؟
جواد يخاف من غازي اكثر من بتال لان علاقتهم فوق الرسمية ومايعرف عنه شي اخفى توتره:بخير وفضل من الله دام مااشوف وجيهكم
غازي ابتسم:تصدق المفروض تسجد شكر بكل لحظة لأن جدي محلفنا مانلمسك
جواد ابتسم:ليه؟!!تفكر ان مافيه شي يردك وان بكل بساطة بتلمسني!!
غازي قطب جبينه
جواد:كل شي بحقه!!العين بالعين السن بالسن!!
غازي اعتدل بجلسته وهو يطالعه بابتسامة:اها دام الموضوع كذا،،وقف بسرعة وشلت جواد ع رجله بكل قوة،،
جواد صرخ من الم رجله وهو يحسها انكسرت
جسّار وفيصل انصدموا ماتوقعوا يلمسه
غازي جلس وبوسط انفاسه:خلصنا!!كلن اخذ حقه العين بالعين والسن بالسن مو تقوله!!
جسّار ابتسم برضا وهو يسمع كلام غازي
جواد عض شفته يكتم زفرة المه وهو يطالعهم بحدة
غازي مد يده وهو يضرب عالخفيف خد جواد وبابتسامة:والحين ياشاطر تقول لأهلك ماتبي امجاد فاهم
جواد من بين اسنانه:ميت عليها الحين،،صرخ،،ماابيها!!
جسّار ضغط على جواد بقوة
غازي:يالله لك الحمد انت ماتبينا وحنا نعد الأيام نبي فرقاك عجّل واذلف،،غمز له،،كلنا عارفين خفايا القلوب ياجواد،،ابتسم،،والحين برا ضف وجهك دام النفس عليك طيبة
جسّار تركه
جواد وقف ومشى وهو يعرج من الضربة اللي حصلها مشى باتجاه الباب بيخرج ثم التفت وبكره:يوم المنى الا والله عيد يوم انقل من هالمكان وافارقكم
جسار بحدة:حنا اكثر منك بس يالله تقلّع يالله قبل نعيد فيك صدق يالله!!
جواد خرج وهو يتوعد ويتحلطم ماحس الا بيد مسكته من قفاه وتجره
.
.