ياسمح المحيا جر الهجينية

٦٨

    ،،الـجـزء الـثـامـن والـسـتـيـن،،
سبحان الله وبحمده سبحان الله العظيم،اللهم صل وسلم على نبينا محمد،استغفر الله العظيم وأتوب اليه،لاحول ولاقوة الا بالله
.
.
.
،،وانتهى العرس،،
.
،،قبل صلاة الفجر بساعات،،
..بيت بادي..
،،الكل اتجه لفراشه ياخذ له كم ساعة نوم قبل الصلاة يتريح بها بعد تعب العرس خصوصا وأنه ينتظرهم تعب كثييير بصباح اليوم اللي بعده من تنظيف للخيمة واللي حولها،،
سعود اللي ماجاه نوم متمدد عند المشب ينتظر قهوته اللي عالحطب تجهز ك عقد حواجبه وهو يسمع صوت الباب وقف وهو يتجه له:بالهون بالهون لافيك ذالحين،،فتح الباب واتسعت عيونه بصدمة من وجودها بهالوقت ولحالها وبفجعة،،بخوت!!علامش!!
بخوت تطالعه بدموعها
سعود بفجعة:بش شين؟جسّار به شين؟
بخوت بغصتها:سعود
سعود مسك يدها سحبها ودخلها وخرج راسه وهو يلتفت يمين ويسار واتسعت عيونه وهو يطالع جسّار على يساره
جسّار واقف متكتف ومتلثم بشماغه متكي بظهره ع جدار بيت بادي وهو يطالع الارض
سعود مرر نظره بينهم وهو عاقد حواجبه وزفر طالع بخوت:اقضبي مكانش شوين ومعود،،خرج واتجه لجسّار،،جسّار
جسّار ابتسم ابتسامة شاحبة وهو يعتدل بوقفته ويفك شماغه بوجه كاسيه السواد:هلا
سعود زفر بصوت وهو يثني يديه على وسطه:علامك؟وشو له وجهك مسود!!
جسّار اتسعت عيونه:وشو سواد الله يهديك بس!!
سعود بنرفزة منه وهو يفك يديه:وثمن وشو له غادين بها يمّنا!!!
جسّار تنهد:تبكي بكى يقطع القلب ولاتبي تقعد معي بنفس البيت
سعود اتسعت عيونه:وشو!!
جسّار تنهد بقلة حيلة
سعود بعصبية:وانت من راعيت دميعاتها غديت بها يمّنا!!هاذي ماهي بسواتن ابدن ياجسار!!،،مشى،،
جسّار لحقه ومسكه عند الباب:سعود تعوذ من ابليس
سعود سحب يده وبحدة:وانت بعد اقضب مكانك لامني اعود يمك،،دخل للبيت،،
بخوت خافت وهي تطالع حدة ملامحه
سعود وقف قبالها واخذ نفس وهو يطالع وجهها:علامش؟
بخوت:مااريده ياسعود مااريد الجيزة خلاص
سعود تنهد:وش عمل بش؟مذيش(أذاها)؟مد يده عليش حتى اجزها من اولها؟
بخوت هزت راسها بلا
سعود:اجل وشو له توجسين هالعلم؟!!
بخوت تطالعها بدموعها وهي ساكتة
سعود مسك كفوفها واحتضنها بكفوفه:هذا جسّار جسّار يابخوت ماهو بغيث ولا يخبر لهالغيث درب وش اللي مروعش منه دامه مااوجس يمش شين ولاغاظ خاطرش بشي(شهق)اصلا متى امداه يغيظش!!توش اتخبرينه!!
بخوت بشهقاتها:مير ياسعود انت خابرن علتي
سعود فك يديها من يديه وهو يمسك يمينها بيمينه ويسحبها وراه وخرج من البيت
جسّار اللي متكتف قبال الباب فك يديه وهو يطالعه وثم طالعها
بخوت قشعر كل جسمها وهي تطالع جسّار وقفت
سعود سحبها بالقوة
بخوت زادت دموعها
سعود مد يساره ومسك يد جسار وسحبه بعصبية
جسّار تقدم خطوة من سحبة سعود
سعود حط يد بخوت بيد جسار
بخوت تحاول تسحب يدها وهي تهمس بصوت كله غصة ورجا:سعود ياسعود
جسّار عض شفته السفلية بقهر وحزن عليها وهو يطالع خوفها
سعود ضم يديهم بين يديه وهو يضغط عليهم ويطالعها:بخوت
بخوت تشاهق باستسلام وهي تطالع سعود
سعود:ماهو انا اللي ارخصش لرجلن مايسوى وثمن يابخوت راعيه راعيه
بخوت هزت راسها بلا
سعود:راعيه يابخوت راعيه
بخوت طالعت جسار بتردد للحظة
جسّار صاد بوجهه اللي مرتسم عليه الانكسار
بخوت رجعت عينها بسرعة لسعود
سعود زفر:جسّار اوحيتي جسّار وانا اللي حطيت يدش بيده هالمرة انا ماهو لاحدن غيري لانه يستاهلش ويصونش ويحطش بعويناته يابخوت يعني مايسدش راي سعود بهالاجودي يابخوت؟
بخوت هدت شهقاتها وهي تطالعه
سعود ترك يديهم وطالع جسار:جسار
جسّار طالعه وهو يرسم ابتسامة بالقوة:مايحتاج تقول شي فاهم ياسعود فاهم
بخوت التفتت تطالعه بصدمة من كلامه
سعود زفر:بيض الله وجهك وجمل حالك
جسّار بابتسامته:ووجهك بس ماله داعي هالكلام
بخوت نزلت راسها وهي تسمع رده
جسّار:وثم انا عارف الموضوع وعاذر والحمدلله على كل حال
سعود تنهد وطالع بخوت
جسّار تكلم بعد ماانتبه لبخوت اللي منزله راسها ماتطالع احد:عاد نستأذنكم والمعذرة ازعجناكم
سعود ابتسم وهو يسمعه:مامن ازعاج ومبروك ياجسار مبروك
جسّار:تصبح على خير،،مشى ويده بيد بخوت اللي تمشي وهي ساكتة،،
.
..بيت مفلح..
،،المجلس المتواضع الصغير،،
راشد متمدد على جنبه عالفراش وهو ماجاه نوم ينتظر متى تجي له ابتسم وهو يحس بيديها تحاوط وسطه وجسمها يلاصق جسمها وبلهجتها:أبطيتي!!
هيفاء زفرت:عمتي مارقدت
راشد فك يديها وهو يلتفت لها ويحاوطها من خصرها بيديه ووجهه قبال وجهها وبزعل:وليش قلتي لا من البداية!!ماتبيني يعني!!
هيفاء باحراج:وشلون تريدني ارقد يمك وهم يخبرون!!
راشد اتسعت عيونه وبلهجتها:رجلك!!
هيفاء:رجلي بالبيت ماهو بنظارتهم(قدامهم)
راشد هز راسه بيأس وتركها:ليش جاية طيب؟
هيفاء:اسلم عليك واتخبر علومك
راشد ميل فمه:وش تبين بعلومي!!انتي ماتبيني انتهينا!!
هيفاء جلست وهي تطالعه:علامك خنفرت علي!!
راشد جلس وبزعل:وليش مااخنفر هاه!!،،صد بوجهه وهو يتكتف،،تزعليني وتقولين ليش تخنفر!!
هيفاء زفرت بوسط تكشيرة:ابشر بالرضاوة اللي تبرد قليبك
راشد طالعها بسرعة بابتسامة وحماس:وش وش وش الرضاوة؟
هيفاء ابتسمت وهي تشوف حماسه:لبن عتقى الغالية
راشد كشر بوجهه وهمس بحلطمة سريعة:يا ذي العتقى اللي بتنشب لي شكلها وحدة من خواتك وانا ماادري!!
هيفاء كشرت:علامك تهوجس بروحك!!علمني وش اللي مغيظك ذالحين!!
راشد زفر:وينه اللبن الحين؟
هيفاء وقفت:قم غدينا يم البل وأبشر باللي يسرك
راشد:الحين!!!
هيفاء انحنت وهي تمسك يده تحركها تبيه يوقف:قم قم يالله قم
راشد امتلى ضيقة مافيه حيل يتحرك من تعب الزواج لام نفسه وهو اللي تحمس للرضاوة وحمسها معه
هيفاء تركته:أريدك ترعي عتقى ماتخبرتها لذالحين قم معي
راشد بنفسه:الله يعني عليك ياعتقى صدق بلوى وابتليت فيها!!
هيفاء تخصرت:بتغدي معي ولا اغدي بروحي؟
.
جسّار يمشي ويده بيدها يسحبها
بخوت تمشي وراه وهي تهل دموعها
جسّار زفر وهو ماعاد فيه يتحمل وقف والتفت لها
بخوت وقفت عبرتها بحلقها وهي تطالعه برعب
جسّار بحدة:امسحي دموعك وارفعي راسك!!
بخوت تطالعه وهي تحس ببرودة بعظامها من الخوف
جسّار:انتي زوجتي وانا أخذتك وانا قد الأمانة ومسؤول عنها قدام ربي قبل اهلك!!
بخوت بلعت ريقها
جسّار:يدي ماانمدت على خواتي بيوم حتى تنهد عليك ياللي صرتي زوجتي الحين ومستحيل تنكد واذا انرفعت قبل تنكد اكسريها يابخوت
بخوت تطالعه بسكوت
جسّار:انسي كل اللي عشتيه قبل هذاك خسيس وانتي اليوم بحمى رجال انتي وجهي ولحيتي وراعية بيتي واللي أمنتها عليه واللي يفكر ينطق كلمة عنك وانتي على ذمتي ذبحته قبل ينطقها
بخوت طالعته وهي تهدي نفسها
جسّار ضغط على يدها:امسحي دموعك يازوجة جسار
بخوت اخترقت قلبها الكلمة
جسّار:ويخسي من ينزل دمعتك يابخوت يخسي
بخوت مسكت يده بعد ماكان هو اللي يسحبها وهي تنزل راسها
جسّار حس بمسكتها زفر براحة:رافعي راسك قلت
بخوت طالعته
جسّار:ارفعي راسي واللي يناظرك اذبحيه بنظراتهم لاترحمينه،،ضغط على يدها،،ارفعي راسك فوق وانتي معي ارفعيه،،مشى،،
بخوت تطالع جنبه وهي تمشي وراه مانطقت حرف
.
راشد فروته على أكتافه يمشي وراها وبيده الكشاف:لاتبعدين
هيفاء طرحتها على أكتافها وبدون عباية بحكم الظلام اللي يغطي المكان تسرع بخطواتها بحماس لقدام ثم تلتفت وراها وهي تهدي خطواتها حتى يوصل لها:اعجل علامك بطي؟!!
راشد زفر:ترا رايحين للبل
هيفاء اللي واقفة قباله تناظره يوصل لها وهي تنط بمكانها من الحماس وبابتسامة:ايه ايه خابرة انه البل!!بتذوق لبن عتقى يطرح الطير بالوادي من زينه
راشد كشر:متاكدة ماتبين تسمميني؟
هيفاء وقفت حركة وكشرت:علامك انت علي الليلة؟
راشد مر من جنبها وبتقطيبة جبينه:مافيني شي!!
هيفاء تكتفت وهي تمشي وراه:ماانت بمعجبني الليلة وش اللي مغيظك علمني
راشد وقف قبال شبك الابل والتفت لها:تبين الصدق ولا ولد عمه؟
هيفاء بنرفزة وهي تفك تكتيفتها:مايريد لها نشدة!!الصحيح!!
راشد:الصحيح ماابي رضاوتي لبن وش هالرضاوة!!
هيفاء عقدت حواجبها:تريد تمر اجل؟!!
راشد بيموت من غبنته وهي مو فاهمة تلميحاته:ولا تمر!!
هيفاء:الخنجر ومحزمه بالبال ماغفلت عنه مير ماهو بذالحين!!
راشد بنرفزة:ماابي لبن ولا تمر ولا خنجر ولا محزمه
هيفاء بعصبية:علمني وش تريد اجل!!!
راشد طالعها:راضيني بغير اللي قلتي
هيفاء بتكشيرة:وش تر،،سكتت وهي تستوعب وتغير وجهها وبلعثمة،،وش هالعلم!!!
راشد ثبت الكشاف على وجهها
هيفاء غمضت عيونها بانزعاج من النور
راشد:وين وين!!وين راحت افكارك!!
هيفاء وهي تغطي عيونها بيدها وبعصبية من إحراجها:هماك توجسه!!
راشد اتسعت عيونه وهو يشيل الكشاف عن وجهها:والله ماقلته!!
هيفاء شهقت:يمه يالاكذاب!!
راشد انصدم من ردة فعلها القوية:اللي يشوفك يقول مرتكب جريمة وبعدين انتي اللي قلتي بتراضيني يالله عطيني الرضاوة الحين
هيفاء مدت سبابة يمينها عالشبك وهي تثني يسارها ع خصرها:رضاوتك جوا الشبك غيرها مافيه
راشد كشر بوجهه زعلان
هيفاء مرت من جنبه متجهة للشبك اللي وراه
راشد مسكها من يدها
هيفاء طالعته وبنرفزة:تريد الرضاوة ولا نقطع طاريها مرتن وحدة
راشد سحبها لحضنه وضمها
هيفاء تجمدت بحضنه
راشد بابتسامة وهو يتكلم بلهجتها:رضاوتي بهاللون ياالفديغة
هيفاء كشرت وهي تضربه بحضنه بشويش وتدفه:كبني كبني عنك هماني فديغة!!
راشد ضحك وهو يضمها اكثر:اصبري اصبري اقولك شي
هيفاء هدت وسط تكشيرتها:وش تريد من الفديغة؟
راشد باسها ع جنب راسها وهو يضحك وتركها ولازال محتضنها:لابغيتي تراضيني خذيني بحضنك
هيفاء خجلت:وش هالعلوم!!
راشد بابتسامة:ويالله باغششك مع انك فطينة
هيفاء كشرت وهي فهمت دقته وقاطعته:تراك غظتني!!
راشد ضحك:ويافطينة لابغيتي مني شي خميني هالخمة،،باسها ع خدها،،
هيفاء وهي تشتت نظرها بالمكان عنه
راشد بابتسامة:واطبعي هالبوسة باي مكان تبين وابشري جاك وانا ولد ابوي
هيفاء:واذا اني أريدك تكبني؟
راشد كشر بزعل وهو يتركها:ها تركتك ارتحتي روحي بس جيبي لي لبن
هيفاء ابتسمت وهي تطالعه:يمه منك مايرضيك شي!!
راشد عطاها جنبه ووجهه عالشبك وبزعله:اللبن اللبن
هيفاء مدت يديها وهي تحاوطه من جنبه وميلت راسها لوجهه وبابتسامة:راشد
راشد وهو يتصنع الثقل ولايطالعها:خير
هيفاء:اغتظت؟
راشد:لا بس جيبي اللبن بسرعة
هيفاء:طيب علامك ماتراعيني؟
راشد:ادور عتقى ابي أشكي لها
هيفاء ضحكت وهي تتركه ووقفت قباله
راشد مثبت عينه عالشبك وبعناد:عتقى ياعتقى تعالي ياعتقى
هيفاء مدت يديها لرقبته وحاوطته وهي تطالعه بابتسامة:كب عتقى وراعني
راشد:انتي ماتبيني!!
هيفاء بابتسامة:وشلون مااريدك وانت غديت قليب هيفاء
راشد ابتسم وهو يحاوط خصرها ويرفعها له:صحيح ياهيفاء
هيفاء:الصحيح كل ابوه ياعوينات هيفاء
راشد ضمها له وهو يقرب وجهه من وجهها 
مفلح اللي نايم عند الشبك جلس وهو يفرك وجهه بانزعاج من الأصوات اللي صحته من نومه:لااله الا الله أصبحنا وأصبح الملك لله
راشد تجمد وهو يسمع صوته وثبت عينه على هيفاء بصدمة واضحة
مفلح يحوس بأغراضه اللي عند راسه يدور الكشاف:المثقول(الكشاف)وين غدا به!!
هيفاء دفت راشد عنها بقوة وتركته وهي تجري للبيت بأسرع ماعندها
راشد التفت لمفلح وهو يبلع ريقه باحراج
مفلح وقف وهو يطالع اللي عند الشبك اتسعت عيونه باستغراب:راشد!!
راشد بربكة:صبحت بالخير ياعم
.
.........****..........
صباح اليوم الجديد
.........****..........
ام جـلاجـل
.
..بيت مفلح..
،،المجلس،،
راشد واقف يقفل ازارير ثوبه وهو يفتح عيونه ويقفلها بمحاولة منه يصحصح وهو مانام الا ساعتين
هيفاء دفت الباب بشويش ودخلت وبابتسامة:وعيت؟
راشد اللي معطي الباب ظهره التفت لها:اه اللي هجت وصلت،،طالع أكمام ثوبه وهو يدخل الكبك،،الحمدلله ذكرتيني
هيفاء كشرت بوجهها وهي تمشي له وتوقف قباله مدت يدها وهي تمسك يده اليمين وتدخل الكبك وعينها على الكبك تقفله:علامك علي!!من لفينا الديرة وانت مغير تغتاظ علي
راشد:نمتي بس؟
هيفاء وهي تقفل كمه اليسار:لا
راشد قطب جبينه:ليش!!
هيفاء:ولمت لك الفطور انت واهلك
راشد ابتسم:ليش تكلفين على نفسك كان نمتي
هيفاء وهي تترك يده بعد ماقفلت كبكه وانجرحت لشماغه اللي مفرود عالارض جنبها وهي ترفعه وتمد له:وش كلافته!!ماكبيتك تغدي يم دوامك مقوي(جيعان)حتى اكبك ذالحين!!
راشد اخذ شماغه ولبسها وهي تتكلم ميل نفسه وهو يطبع بوسة على جبينها:الله لايحرمني ياهيف مشكورة
هيفاء تكتفت بابتسامة وهي تطالعه:ماله لزوم هالوجس مير اعجل عمي يحتريك
راشد باستغراب:بيروح معي!!
هيفاء:ازين له يتونس شوي
راشد:براحته الله يحييه،،مشى بيخرج من المجلس،،
هيفاء تمشي وراه
راشد:تبين شي؟
هيفاء:يكثر خيرك ماتقصر مااريد شي
راشد:نامي ورانا خط بالليل
هيفاء:ان شاء الله
راشد وقف ع باب البيت وطالعها بابتسامة:مافيه شي منا ولا منا؟
هيفاء قطبت جبينها مافهمت:وش؟مضيع شين ولاتريد شي
راشد زفر بتكشيرة:ابدن بس اريد لبن عتقى
هيفاء:ولمت لكم شوين منه مع الفطور
راشد خرج:فمان الله فمان الله بس،،خرج،،
.
..بيت الشلة..
،،عالقهوة،،
ابو جواد جالس وهو مميل فمه
ابو غازي:ارتاح ارتاح بس مافيه مسكة خط الا بعد العشا وكلنا مع بعض
ابو جواد:ياعادل وراي شغل
الجدة منيرة:الله والشغل عاد!!
عذبة نزلت فنجالها:وش فيك مستعجل،،طالعت حصة اللي تمشي لهم،،شف ذي زوجها وعيالها راحوا من الفجر وتوها تصحصح
حصة كشرت بوجهها:ماني جالسة عليك!!،،انحنت وهي تسلم على راس امها صبحتوا بالخير،،جلست،،صبي قهوة بس
عذبة دفت لها الثلاجة:مدري من الصغيّرة والله!!
ابو غازي يطالعهم بابتسامة وهو يذكر أيامهم زمان:مابقى غير ابوي
حصة:وينه اصلا؟!
ابو جواد:طلع مع الشباب وعمي للخيمة
حصة اتسعت عيونها وهي تطالع اخوانها:وتركهم وراه!!
عذبة:مو تركهم طردهم وانتي الصادقة!!
ابو غازي تنحنح
حصة ضحكت
عذبة بابتسامة وهي تطالع ابو غازي:مو طردهم صرفهم
حصة بضحكة:هي نفسها طردهم بس بأسلوب محترم
ابو غازي:حصيص!!
حصة:يمّه يالزعول انت!!غصب ماياخذونك معهم
ابو غازي شهق
حصة طنشته وهي تطالع ابو جواد:لكن انت ليش انطردت!!
ابو جواد رفع أكتافه؛مدري عن ابوي وعمي
حصة:مسكين لانك اخوه هذا ذنبك
ابو غازي اتسعت عيونه:يمه شوفي بنتك من اليوم تغلط وساكت عنها!!
الجدة منيرة ضربت حصة:هالبلوى ذي لسانها منبري منها
حصة وهي تمسح على مكان الضربة بتكشيرة وتطالع امها:يمه
الجدة منيرة رفعت عكازها:وصمة لاتوجسين شين لااكسرش بعصاي
حصة:ايه هذا انتي مع عيالك علينا ترا يمه ماعندك الا حنا ثنتين بس!!
ابو جواد بابتسامة:حتى احنا اثنين!!
حصة:انت اوص
الجدة منيرة ضربتها ع رجلها بقوة
حصة:ااااه
الجدة منيرة:تكعمين اخوش وهو بهالعمر استحي!!
حصة ميلت فمها وهي تطالع امها:عاد تدرين يمه
الجدة منيرة:والله ورا هالنِظِرة بلا اوجسي وش وراش
حصة:والله يمه لو انا منك كل يوم اصلي ركعتين واتصدق شكر لله
الجدة منيرة قطبت جبينها:الحمد والشكر له دايم على انعامه الواجدة مير وش مدعيش توجسينه هاه؟
حصة بابتسامة:لو انك هينا كان عمي بادي صار طبينتك(ضرة،زوجة ثانية)
عذبة كتمت ضحكتها وشرفت بالقهوة
ابو غازي ابتسم
ابو جواد ضحك
الجدة منيرة بتكشيرة وهي تضربها:اعقبي
حصة وهي تمسح مكان الضربة:يمه استخدمي لسانك مو يدك!!انا أتكلم معك تكلمي معي!!
الجدة منيرة:ماهو البلا والعلة بلسانش ذا كفيه عني وماتعينين من وراي مطخات(ضربات)
حصة:هذا جزاي اللي فرحانة لك يمه!!
الجدة منيرة:مير يغدي مع عمش ازين له وأزين لي
حصة بنص عين:مرررة صدقت يمه
الجدة منيرة:اَي بالله هو يطس عني وانا اسيّر(تزور)عالعجز(عجايز)اونسهن ينكتب لي اجر
رهايف وقفت عندهم وهي تضحك من كلام جدتها:ياعيني ياجدة
ابو غازي بحدة:بنت!!
رهايف رجعت ورا:وش فيه!!!
امجاد خارجة من المطبخ ومعها الشاهي
الجدة منيرة:عويدل كب رهايف على هواها!!اوجست يمك شي!!اوجسته يمي!!
حصة ضحكت من قلبها
ابو غازي:يمه!!
حصة بابتسامة:بس انا مرتاحة الحين وانا اشوف اللي صار لي يصير لكم
الجدة منيرة ضربتها
حصة وهي تاخذ كاسة الشاهي من امجاد:عادي يمه اضربي اهم شي مرتاحة
.
..بيت طلق..
طلق يفطر
شامة:اوحيت نورة مرت شاهد عازّة(حامل)
طلق:ماشاء الله الف من ذكره
شامة:وسالمة مرت زاكي عازّة تبارك الله
طلق:ماشاء الله الله يصلح للمسلمين الله يصلح لهم
شامة مدت له كاسة الحليب:هاك
طلق رفع عينه وهو ياخذها بابتسامة:سلمتي
شامة وهي تطالعه بابتسامة:وانا عازّة ياطلق
طلق انصدم بالخبر اللي ماتوقعه:هاه!!
شامة خجلت وشالت عينها عنه وهي تصب لها كاسة:علامك!!عازّة عازّة مااوحيت!!
طلق ابتسم بفرحة وهو يدخل يمينه بجيبه ويمد يساره لها:هاني يمناش
شامة مدت يدها بابتسامة
طلق خرج محفظته وخرج كل الفلوس اللي فيها وحطها بيدها:عسى الله يفرح قليبي وارعيكم اثنيناتكم سالمين غانمين ياشامة
شامة بفرح اكثر من فرحه:امين امين
طلق اختفت ابتسامته وهو يمر بباله
شامة قطبت جبينه:علامك
طلق ابتسم من جديد وهو ياخذ لقمته:مامن خلاف مامن خلاف مير تحرصي على روحش ياشامة تحرصي
شامة باستغراب:ابشر ابشر ياطلق لاتوصي
.
..بيت بادي..
نشمي يفطر وقباله عباير تفطر معه
عباير:لاتغتاظ من جدي ياخال
نشمي:ماني بمغتاظ منه
عباير:وكاد جدي يريد يتريح وبه احدن بالبيت
نشمي:ماني بمغتاظ يابنت الحلال
عباير:مير اني اعلمك كود خويطرك يتكدر
نشمي:مامن كدر ولا غيظ ان شاء الله
عباير:اغد وتنفه(تمشى)بالديرة
نشمي:شوين ان شاء الله شوين لا أشرقت الشمس
.
..عند خيمة العرس..
الجد نشمي جالس يغسل القدور
الجد بادي جالس جنبه يغسل الصحون
مفلح يساعد الجد نشمي بالقدور
فيصل داخل الخيمة المرفوعة جوانبها يتحلطم من تعبه وهو يلف الزوليات:هو نايم وحنا ننظف وراه
غازي اللي جالس ع طرف الزولية يغسل الكاسات والفناجيل وقف وهو يلتفت له:تراه عريس وبعدين فصيل كلنا مكروفين معك ليش هالشكوى بكل عزيمة تنعاد!!
جواد اللي وقف عندهم وهو يشيل من الزوليات ويحطها بغرفة صغيرة مبنية من الحديد لها مخصوص:اتركه ياغازي اتركه يفضفض ولا بيموت
فيصل تنهد:الله يبرد على قلبك ياشيخ
غازي بتكشيرة وهو يطالعه:اوص اوص انت ماصدقت احد يفزع لك اشتغل وانت ساكت
راشد وبتّال قبال الخيمة بمسافة عند وايتين مليانة موية يغسلون الزوليات المعدومة
سعود اللي يشيل الزبايل(تكرمون)ويتجه فيها لمكب الديرة بالسيارة اللي عبارة عن حفرة كبيرة بوسط وادي وقف بالسيارة عندهم وهو ينزل:اعاونكم ولا اغدي يم خيمة الحريم؟
راشد رابط ثوبه على وسطه:لا خيمة الحريم بعد الفطور ان شاء الله
بتال ببنطلون عودي مخطط جوانبه بأبيض وتيشيرت ابيض يغسل بمكنسة اليد وهو متنقع موية ولاطالعه مكمل شغله:ساعد جواد انفك ظهره وهو يشيل بهالزوليات لحاله
سعود:خير على خير،،مشى لجواد،،
راشد طالعه وهو يثني يده على وسطه:خله يساعدنا ماتشوف وش كثر اللي يبي لها غسيل!!
بتال رفع راسه يطالعه:يساعدنا بالزوليات اللي جهة الحريم
راشد:كثير مرررة ابتيل
بتال حذف المكنسة بوسط الموية وتطايرت عليهم
راشد بتكشيرة:عادي متنقع اصلا!!
بتال:وبعدين مع ابتيل ذي اللي ذبحتني فيها!!
راشد:من حبي لك يابتاتيل
بتال وقف وهو يفتح الوايت يصب عالزوليات وبزعل:استغفر الله العظيم بس،،طالع راشد،،اشطف الصابون بس اشطفه
راشد يسحب الصابون بتكشيرة:هذاني اشطف هذاني
بتال ابتسم وهو ينط بوسط الموية اللي تصب عالزوليات
راشد غمض عيونه من الموية وبعصبية:بتاااال!!!
بتال وهو يرجع يساره ورا ظهره يدبك ويغني ويقرب من راشد:واعدتينا وتحت التينا وما جيتينا ..وطلبنا من خدك بوسة وما اعطيتينا،،مسك يد راشد،،
راشد رمى المكنسة الطويلة اللي معه وهو يمسك يده ويدبك ويغني معه:يسعد ابو النسوان ع أبو هواهن..مثل السمك بلماي نسبح وراهن
غازي اللي يطالعهم رمى اللي بيده وجرى لهم وهو يمسكهم ويغني ويدبك يشاركهم:صايع ضايع مايع بايع بالشوارع
بتال غنى وسط صراخ واستعباط غازي وراشد:ندور ع بنت الحلال ياعمييييي
سعود يطالعهم بابتسامة
جواد بابتسامة:وانا اللي انتظر متى يفصلون على بعض
بتال تركهم بزعل:ماش جوكم ماش اشتقت للسامج والله
راشد باستقعاد:والله لاقوله والله
الجد نشمي يطالعهم بابتسامة وهو يغسل يديه بعد ماانتهى من شغلته:زين عادل مو معنا
مفلح جالس عند الفطور يجهزه:حيكم حيكم
الجد نشمي وهو يمشي له وجلس عنده:الله يسلمه ويبقيه مير ارفعه شوين لامن يلفون الشباب وبادي قبلهم
مفلح:لا ذالحين يلفي
الجد بادي على اخر صحن يغسله ابتسم وهو يطالعهم ويجرها:يالله ياربي تعيد بخير..عقب المحل ترجع أريافي..
بتال اتسعت ابتسامته ومشى
راشد مسكه من تشيرته من ورا يرجعه:وين وين!!
بتال بحماس:هجينية جديدة!!
راشد:والله لو يوزع فلوس ماتروح خلص وبعدين نمشي
الجد بادي وهو يغسل يديه ويوقف متجه لمفلح والجد نشمي بابتسامة:قلبي يرفرف رفيف الطير..حرٍ على الصيد مزهافي..،،جلس،،
الجد نشمي وهو يطالع الشباب:تعالوا تعالوا افطروا ملحوقن عالشغل ملحوق
،،بعد الفطور والكل جالس يتقهوى ويسولف،،
بتال طالع جده نشمي بابتسامة:ياجد ليش طردت ابوي وعمي؟
الجد نشمي:بيزعق(يصارخ)عليكم ويهاوش ويغيظكم وتغيظونه مير ازين له وأزين لكم يقعد بالبيت
بتال ضحك
غازي ضربه وهو يطالع جده:جدي!!!
الجد نشمي:وهذا الصحيح!!
الجد بادي:مير ماابعد عنك عادل ذالحين انت اول!!
بتال ضحك
الجد نشمي كشر
راشد بابتسامة:مايحق لك تلوم بتال على ضحكه ياجد
الجد بادي:وأهه هذا انت اغتظت مثله وتلوم عادل!!
الجد نشمي شهق:بادي!!
جواد كتم ضحكته
الجد بادي وهو يشرب شاهي:الصحيح يغيظ راعي الخطا
الجد نشمي:علامك اليوم علي هاه!!
الجد بادي مطنشه
مفلح عقد حواجبه وهو يطالع المتجهين لهم وباستغراب:تحترون ضيفان؟
الجد بادي باستغراب:مااحتريت احدن ابد ،،طالع الجد نشمي،،
الجد نشمي:لاتراعيني مااحتري احد مثلك!!
بتال اتسعت عيونه بصدمة
يوسف وقف قبالهم:السلام عليكم،،سلم عليهم وسط نظراتهم للملثم اللي معه وواقف يطالعهم،،
الجد نشمي اتسعت عيونه
الجد بادي باستغراب من وجوده:وعليكم السلام والرحمة يوسف حياك الله حياك الله اقعد افطر انت وخويك
يوسف:عساه بالعافية يكثر خيركم افطرت الحمدلله
الجد بادي:يوم انك معيي عن الفطور علامك غادين يمّنا!!ومن هو خويك؟!!
فاهد فك لثامه:صبحت بالخير ياعم بادي
الجد بادي يطالعه بتقطيبة جبينه
الجد نشمي اللي يقابله لأول مرة بعد هالسنين يطالعه مصدوم
راشد يلتفت يطالعهم باستغراب وزاد استغرابه وهو يطالعهم واقفين وهالرجل ماسلم عليهم
فاهد وهو يتقدم لهم بابتسامة وعينه على الجد نشمي:صبحت بالخير ياعم نشمي
الجد نشمي بلع ريقه واتسعت عيونه وهو يسمعه يناديه
سعود وقف بملامحه المحتدة
فاهد وقف وهو يطالع سعود المرتسم على وجهه الشر
الجد بادي وعينه على نشمي:ولد يانشمي
بتال يطالع جده بتوتر
الجد نشمي التفت له بدون لاينطق
الجد بادي وعينه على فاهد:الظاهر اني بديت أضيّع يارجل يتراعى لي ناسن قضوا!!
بتال اتسعت عيونه من اللي يسمعه
الجد بادي:واللي يهول يانشمي انه يصبّح علي!!،،التفت لنشمي،،هو صحيح هنيا ولا انا صحيح ضيعت؟!!
الجد نشمي يطالعه ساكت وسط نظرات اللي حوله
الجد بادي:علامك ماتوجس شين!!،،حك أذنه،،مااوحيك انا ولا بي علة!!
فاهد:مابك علة ياعم
الجد بادي طالعه
فاهد: وهذاني قدامك صحيح فاهد فاهد ماغيره
الجد بادي احتدت نظرته وهو يعض على شفته السفلية من غبنته
فاهد جلس على ركبه قبالهم:لفيت يمك اريدك تحللني وتبيحني ياعم
الجد بادي ضحك:وش!!وش تريد!!!!
فاهد:اريدك
الجد بادي فز واقف وبيده عكازه قبل يكمل فاهد كلامه وهو يرفعه ويسدد ضربة لرأس فاهد بكل قوته
،،الكل انصدم من ردة فعله القوية لهالدرجة وفزوا بينهم ماعدا بتال اللي جالس يطالعهم بهدوء،،
فاهد ارتمى عالارض وسط راسه اللي ينزف بغزارة من الضربة
يوسف جالس عند ابوه بصدمة وهو يطالع دمه:يبه!!
غازي جالس عند فاهد وهو يساعده:لاحول ولاقوة الا بالله
سعود ماسك يد جده
الجد بادي بحدة وهو يطالع فاهد:ابطيت ابطيت علي والحمدلله اللي لفيت قبل يلفي يمي يومي!!
مفلح واقف قباله:اخز ابليس يارجل علامك!!
الجد نشمي ماسك يد بادي:استغفر ربك واخز ابليس!!
الجد بادي سحب يده بقوة وطالعه بحدة:علمني انت هالعلم متى خبرته هاه!!علمني!!
الجد نشمي زفر:بادي
الجد بادي بصراخ:اعقب لاتوجس اكذاب!!وكاد انك تخبر انه حي(ن)يسرح ويمرح وكابه على هواه ايه ايه ماهو انت اللي انكويت منه ماهو بانت!!
فاهد قباله واقف يطالعه بحدة:عمي نشمي مايخبر شي والـيـوم اول مرة يرعيني مثلك من سنين!!
الجد بادي:اقطع واخص لااوحي لك حس انت تحمد ربك ماذبحتك لذالحين يالخسيس!!
فاهد بصراخ:بتوحيني بتوحي علمي كل ابوه وثمن اوحيك انا!!
الجد بادي:معصي اوحي لك وجسن يمي!!وثمن مابوجهك حيا!!،،ضحك،،اَي بالله مابوجهك حيا من الاولة!!وشلون لفيت يمي عقب فعولك يالخسيس كان ظليت طاس بديار بقعا ولالفيتني ياعل تلفيك الصرايم
فاهد بحدة:لفيت اريد اعود يم اهلي ودياري لفيت وانا تايبن عن فعولي وبلكن ربي يغفرها ان شاء الله مير قلوب الخلقية عيّت تغفر وتلين يمي!!
الجد بادي:ولاني بلاين(ن)يمك عقب سواد فعولك وكود بك خيرن وتايبن على ماتوجس عود من الدرب اللي لفيت منه قبل لااقبرك ويقبروني وراك!!
فاهد:ماني معودن غير يمكم انتم!!اعجبكوا العلم ولا مااعجبكم هذا انتم اوحيتوه مني
الجد بادي بغبنة:وشو!!
فاهد بحدة:اللي اوحيته!!ولد يايوسف غدينا
يوسف طالع بتال اللي ماتحرك ابد ولافزع لابوه يتطمن على إصابته ولاابدى رأيه باللي يصير عض شفته بغبنة وهو يطالع هدوءه تحرك ووقف قبال الجد بادي يبي يغيظه من قهره:تراني وغده وربيبن(تربى)لوغدك نشمي
الجد بادي اتسعت عيونه بصدمة
يوسف بابتسامة:ودامني ربيب نشمي فاني وغدن لكم  ووغدن له بعد
الجد بادي بحدة:تعقب ماانت بوغدن لنشمي تعقب طسّ وراه الله لايردك ولايرد ابوك معك!!
يوسف:دام هذا وجسك،،طالع بتال،،اطرده مع ابوه!!
بتال يطالع جده ينتظر الجواب
فاهد:يوسف!!
الجد بادي:اعقب اطرده!!فرق السما والأرض بينك وبينه!!هو وغيدن لجميلة وانت وغدن لهالخسيس
يوسف ابتسم:حتى هو وغدن للخسيس!!
الجد بادي احتدت ملامحه
يوسف:والله لو توجس وغد جميلة الى قبا يظل مرده وغدن لفاهد طال الزمن ولا قصّر وغده
سعود دف يوسف من كتفه:احشم روحك وطسّ ورا ابوك لاتعين شين مايسرك
يوسف:مااوجست يمك شين ابدن وجسي يم شايبك توكل
سعود شد يوسف من ياقته
الجد بادي بحدة:علمه ياسعود من هم عيال بادي علمه!!
يوسف بصراخ وتحدي:وانا بأعلمكم من هو ولد فاهد اللي كلن يهينه على هواه!!
الشباب يفكونهم من بعض
فاهد رجع بخطوات سريعة وهو يمسك يوسف ويسحبه
بتال زفر وهو يطالعهم وقف ومشى
فيصل اللي واقف يطالعهم انتبه له:بتال!!
فاهد سحب يوسف بقوة وأبعده وبحدة وهو يطالعه:بس!!!
الجد نشمي دف سعود بقوة وبحدة:علامك ماتوحي لنا وجس!!
غازي وراشد ومفلح والجد بادي وحتى سعود وفاهد ويوسف يطالعونه
بتال وقف وهو ينحني لجيك(جك،ابريق،جركل)الموية الصغير حق الغسيل اللي على جنب واخذه واتجه للنار اللي شايفينها عندهم وقف وهو معطيهم ظهره ودخل يده اليسار بجيب بنطلونه ورفع الجك بيمينه لفوق وهو يصب الموية فوق النار يطالعه بهدوء
غازي تنهد بضيقة وهو يطالعه
بتال فرّغ كل الموية عالنار اللي طفت هز الجك اكثر يبي يفرغه تماما طالع داخل الجك وتأكد من فضاوته رماه بكل قوته عالنار دخل يمينه بجيبه وكمل طريقه لقدام بدون لايلتفت لهم يطالعهم
غازي تركهم ومشى وراه
.
.
<اللهم صل وسلم على نبينا محمد>
.
.