ياسمح المحيا جر الهجينية

٢٧

      ،،الـجـزء الـسـابـع والـعـشـرون،،
          سبحان الله وبحمده سبحان الله العظيم
              اللهم صل وسلم على نبينا محمد
.
.........****..........
        الـلـيـل
.........****..........
..بيت عادل..
،،الصالة،،
،،ام غازي وابو غازي جالسين جنب بعض وبينهم المسند وقبالهم عذاري وجنبها غازي وبينهم بالوسط القهوة والحلا،،
عذاري تقهوي عمها وعمتها وزوجها
ابو غازي:وشلون امك ياعذاري عساها احسن الحين
عذاري:ماعليها الحمدلله ياعمي طيبة الحمدلله
ابو غازي تنهد:عساه دايم ان شاء الله وابوك وينه ماشفته اليوم؟
عذاري انصدمت من سؤاله خصوصا انه طلع من عندها متجه لهم:والله اللي قاله انه بيتقهوى معكم ماجاكم ياعم؟!
ابو غازي:لاوالله ماشفته،،سكت،،يمكن انه يقضي مشاويره يابنتي،،مد فنجاله لها،،
عذاري هزت راسها وهي تفكر ابوها مايكون ولايحتك الا بعمها واهله سكتت وهي تصب له قهوة،،
ام غازي:عذاري بنتي
عذاري طالعتها:هلا عمة
ام غازي:دام عمك بيطلع يتعشى برا واكيد ابوك معه وش رايك تروحين لبيتكم وتجيبين امك تتعشى معنا تغير جو شوي
عذاري طالعت غازي
غازي:ليش تناظريني!!اكيد بتروحين لها!!
عذاري ابتسمت:كثر خيركم ياعمة
ام غازي:ماله داعي هالكلام قومي افزعي وجيبي عباتك يوديك زوجك
عذاري وقفت وسلمت على راس عمتها:ان شاء الله عمة ان شاء الله،،مشت بخطوات سريعة لغرفتها،،
ام غازي زفرت:الله يشفيها لك يابنتي الله يشفيها،،طالعت غازي،،وانت وينه اخوك؟
غازي يحلي وهو يطالعها:ايهم؟!
ام غازي ارتفعت حواجبها:فيصل!!مين بالله؟!!
غازي رفع فنجاله يتقهوى:محرسّه(يحرس)العمال
ام غازي باستغراب:اَي عمال!!
غازي:خويي له عمارة يشتغلون بها عمال وهو مسافر ووكلني فيها قلت له أبشر وفيصل عندهم الحين
ام غازي:وماشاء الله من عِرف فيصل الحين بالبناء!!
ابو غازي طالع غازي:وأمك الصادقة وراك تدق الصدر وضلوعك رديّة!!
غازي رغم انه زعل من دقة ابوه:خله يتعلم يبه خله يصير رجال
ام غازي:وانت ماحلا بعينك تعلمه ويصير رجال الا وهو تعبانة رجله!!سلامات ياغازي سلامات!!
غازي:يمه تراه جالس عالكرسي ماوراه شي لابيشيل ولا بيحط!!
ام غازي:وبعدين مو حرام تكرفه!!من المدرسة للحين مارجع!!
غازي:هو دق الصدر وقال أبشر خليه يكون قد كلمته
ام غازي:ياويلك ياغازي مابك رحمة لأخوك الضعيف!!
ابو غازي زفر:اتركي الإخوان يعلمون بعضهم ياوسمية
ام غازي:بس
ابو غازي قاطعها وهو يكلم غازي:وانت ياغازي لاتغدي أقشر على اخوك علمه شوي شوي
غازي:ان شاء الله يبه على ماتحب
ابو غازي:ود مرتك لاهلها ثم رح لأخوك ورجعه يمديه ميت من التعب
غازي وهو يطلع جواله من جيبه اللي رن بنغمة الرسايل ويفتحه:ان شاء الله يبه تامر،،انصدم وهو يقرأ الرسالة،،
،،ابو غازي وام غازي انتبهوا له،،
ابو غازي باستغراب:علامك ياولد؟!!
غازي طالع ابوه بربكة:هاه!!
ام غازي بقلق:وش فيك عسى ماشر
غازي:لا بس واحد من اخوياي تصوب
ام غازي فز قلبها بخوف:الله يحفظه لاهله ويكفينا الشر الله يعافيه ويسلمه لامه وابوه
عذاري وقفت عندهم وهي جاهزة:يالله؟!
غازي وقف:توصون شي محتاجين شي
ام غازي:سلامتك سلامتك
امجاد داخلة عندهم
غازي طالعها:تبين شي من برا
امجاد بابتسامة:تسلم ماتقصر
غازي:يالله فمان الله،،خرج،،
امجاد جلست قبال امها وأبوها وهي تسحب الثلاجة لها تتقهوى وتقهويهم مرة وحدة
ابو غازي بتكشيرة:وينها اختك؟
ام غازي:راحت مع شذى
ابو غازي:ووين ان شاء الله؟!!
ام غازي:ام جواد مكلمتني تبيها تروح معهم لعزيمة هي والبنات
ابو غازي بنرفزة:وهي مغير ترمي نفسها عالعزايم!!لها شغل ولا مالها شغل تروح؟!!
ام غازي بغيظ تكتمه:الحرمة تبي تكشخ بمرة ولدها تبين اقول لها لا!!مو هذا اللي تبيه انت!!
ابو غازي زفر:استغفر الله العظيم!!وليش ماقالت لي
ام غازي:رهايف مالها شغل بشي ام جواد كلمتني وانا قلت تم تبيها ترجع اتصل الحين ماله داعي تخنفر علينا!!
امجاد وهي تطالع امها بعيون متسعة من الكذب المرتب من امها
ابو غازي:وش تتصلين بها!!خليها هالمرة والمرة الجاية تكلمني انا لحد ماتدخل بيت زوجها ثم وقتها العلم عنده،،وقف،،انا طالع العشا تبون شي كلموا غازي،،مشى بخطوات سريعة متجه للخارج،،
امجاد طالعت ابوها لحد ماخرج ثم التفتت لامها بابتسامة:واو يمه تعرفين تكذبين!!
ام غازي وهي تتقهوى:ماهو بكذب اسمه ستر
امجاد ميلت فمها بابتسامة:وليش تقولين لبتّال الكذب كذب خل عنك الستر!!
ام غازي طالعتها:وانتي ماعندك شي تسوينه!!قومي جهزي القهوة ام صايل بتجي تتعشى معنا
.
،،الاستراحة،،
<مـلـكـة جـواد و دانــة>
دانة بفستان بينك هادي بقصة سبعة من عالصدر واصلة لفوق السرة بشوي والظهر لتحت أكتافها مفتوح ماسك لحد خصرها وبعدها واقف بموديل ميدي وكله فصوص كريستال ناعمة بشعرها الويفي  القصير رافعته من جهة اليمين ورا أذنها باكسسوار شعر لولو ناعم وحلق طويل كريستال ثقيل وبساعة باللون الفضي بيدها اليمين واسورة ناعمة بيدها اليسار وكعبها فضي بلمعة بمكياج سموكي وروج باللون الوردي الهادي ومسكتها ورد الزنبق الأبيض الطبيعي ملفوف بشريطة فضية بلمعة جالسة عالكنبة البيضا المذهبة بغرفتها وهي مبوزة زعلانة وصادة بوجهها عنه
جواد جالس جنبها بكامل كشخته مسك يدها وباس ظهر كفها وبحب:مبروك ياروحي مبروك
دانة طالعته بزعل:ليش ياجواد ليش
جواد زفر:ياروحي انتي وش اتفقنا عليه
دانة:ولو مايصير!!وافقت لمى قلت لي استراحة ولااعترضت مع اننا مقتدرين ونقدر نعمل شبكتنا بأحلى قاعة لكن محد يحضر من اهلك ليش!!مايصير ياجواد عالاقل ابوك!!كيف منظرنا قدام المعازيم!!
جواد:وعد وعد أعوضك عن ذَا كله بالزواج وبتحطيم كل اللي خاطرك فيه
دانة للحين تطالعه بزعل
جواد ضمها لحضنه وأخذ نفسه بسعادة ملت قلبه:انا مايهمني كل هذا اهم شي صرتي حلالي
دانة ضمته بابتسامة:يخليك لي ياعمري
جواد تركها وباسها ع جبينها ثم طالعها وعينه بعينها وكله حب:ابشري باللي يرضيك ياروح جواد
شذى فتحت الباب بقوة بدون استئذان
،،جواد ودانة التفتوا عالباب بنفس اللحظة،،
جواد وسع عيونه وهو يطالعها بتهديد
دانة تطالعها من فوق لتحت بتكشيرة من لبسها
شذى فستان عادي جدا باللون الأسود طويل فاردة شعرها على طوله وبروج أحمر ابرز بياض بشرتها اكثر تنحنحت وهي تتكتف:اجهزوا الحين زفتكم قبل المعازيم لايجون،،مشت،،
دانة طالعت جواد وبحلطمة:حتى اختك ماتبيني شفت!!
جواد طبع بوسة سريعة ع شفتها وابتعد عنها:اهم شي اني أحبك الباقين تقدرين تكسبينهم ياروحي
.
فيصل محبوس بغرفة مايدري وين المكان اللي حطه فيه غازي خصوصا انه اجبره يغطي عيونه لحد ماوصلت لهالمكان ودخله فيه وتركه وكانت جملة غازي الوحيدة له قبل يمشي ويتركه(تجهّز وإلا بتندم)بوجهه شاحب من العطش والجوع اللي يحس به تلفت حوله والمكان صار ظلام بعد ماغابت الشمس اللي كانت منورته وقف وهو ينط على رجل وحدة ويتسند بالجدار لان غازي ماترك له عكازه يلمس بالجدران لحد ماوصل للباب ووقف عنده وهو يضرب عليه بقوة ضعيفة من تعبه وبخوف من الوضع اللي هو فيه وبرجفة صوته:حرام عليك ياغازي حرام وش سويت لك،،صرخ،،غاااازي
غازي فتح الباب وهو يدفه بقوة
فيصل طاح على الارض من دفة غازي للباب وطالعه مو مصدق وبخوف بنفس الوقت:غازي!!
غازي وهو مشغل كشاف جواله وماسك جواله بيده انحنى شبه جالس قباله وبشر:ايه غازي
فيصل وهو انعمى من نور الجوال اللي بوجهه بخوفه:طيب قولي وش فيه ليش تسوي فيني كذا!!
غازي قلب شاشة الجوال لفيصل حتى يقرا الرسالة
فيصل قرأ الرسالة(سلبي)ولافهم:وش ذَا؟!
غازي:احمد ربك تحليلك سلبي
فيصل ولو انه مو فاهم لكن هدا خوفه شوي لمى فهم انه اخذ عينة منه حتى يتأكد من شي بس مو فاهم ليش:الحمدلله بس وش تقصد؟
غازي ابتسم بشر:والحين يافيصل المخدرات وسلمت منها
فيصل انصدم من تفكير غازي
غازي:نجي للاحتمال الثاني،،ارتفع حاجبه الأيسر وبتفكير،،امم بنات؟!!
فيصل انخطف وجهه وزادت نبضات قلبه وبفجعة بصوته العالي:استغفر الله وش تقول انت!!وش فيك وش صاير لك!!وش فيك علي؟؟!!
غازي مسكه من ياقة ثوبه المفتوحة وهو يشد عليه يخنقه ويقربه من وجهه ومن بين اسنانه وهو يكتم عصبيته:ماهو انت مو تارك مجال لي ألقى لك عذر صاحي!!وش اللي تسويه يافيصل من ورانا وانت والخبيث خويك!!
فيصل وهو يجمع الموضوع يحاول يفهمه
غازي:اول شي نيتك على جواد وبسهولة قدرت تسويها ثم سؤالك عن علي ودق صدره خويك جعل صدره يتكسر ولاادري وش سالفتك مع هالعلي والحين تلفون حول هالعمارة ليش يافيصل لييييش!!وش تسوي انت وخويك بهالصبح بمكان مابه احد من فترة!!
فيصل دف يد غازي عنه بقوة:لاتتهم ظلم تراك محاسب ياغازي
غازي ضربه بقبضته على وجهه ومسكه من ياقته:نورني يافيصل نورني!!
فيصل:علي ذَا يبيع خضرة بالسوق ويغيب ويوم سألت يزيد عنه وقال الشباب يتكفلون به نقصد الخضرة نشتريها منه من الليل ونريحه من السوق ولاسبيل
غازي قطب جبينه:والعمارة؟!
فيصل:العمارة عاد جالسين فيها نلف أغراض بالكراتين للجمعيات الخيرية واذا ماانت مصدق رح وشف العمارة
غازي ميل فمه:وعسى الاغراض تتركونها بالحر!!
فيصل:ماهو بحر فيه داخل غرفة مكيفة وهالعمارة مثل المخزن للجمعية اللي نشتغل فيها
غازي:وشاهر اللي تسبب فيكم؟!!
فيصل:شاهر حق مشاكل ووقتها كنت مقهور وكلمت يزيد ودبر المبلغ وراح شاهر ينفذ عالطلب بس
غازي سكت يطالعه
فيصل:رح وتأكد وانا هينا ثم ارجع واذبحني بمكاني اذا كنت اكذب عليك بحرف
غازي وهو يراجع الوضع بينه وبين نفسه ومستحيل فيصل يقول هالكلام الا وهو واثق باللي يقوله زفر:قم قم مشينا للبيت
فيصل ابتسم براحة:يعني خلاص صدقتني!!
غازي وقف ومد يده له يساعده
فيصل حط يده بيد غازي وهو يوقف:كان سألتني ليش تتسرع وتبهذلني كذا ياغازي!!
غازي طالعه بتهديد:لكن لو طلعت تكذب والله لادفنك بمكانك ولا علي من احد يافيصل وصل؟
فيصل بلع ريقه وبلعثمة:وصصلل
.
،،الاستراحة،،
،،جواد ودانة عالكوشة تصورهم المصورة،،
،،ام دانة وخالاتها وبنات خالاتها على يسار الكوشة وام جواد وبناتها عاليمين،،
ام جواد بفستان ساتر وباللون التيفاني والابتسامة شاقة وجهها
سهام بفستان اصفر برقبة عاري الاكتاف مخصر ع جسمها وشعرها القصير وبمكياج عادي جدا واقفة جنب امها وشذى وراهم
رهايف جنب شذى بعبايتها ونقابها تطالعهم بابتسامة
دانة مو قادرة تبتسم وهي تشوفها وكل شوي المصورة تطلب منها تبتسم حتى تضبط الصور
ام جواد:يالله يمه لبس عروستك الشبكة
جواد تقدم من الشبكة اللي عالطاولة قدامه وانحنى وهو يخرج دبلتها
المصورة:لحظة اصور
رهايف ووقفت قبال جواد وبينهم الطاولة وهي تفتح جوالها وانحنت وصورت الدبل
،،الكل اتسعت عيونه بصدمة منها،،
رهايف انتبهت لهم:اااه سوري لاتفهموني غلط بس العدل واجب،،صورت الشبكة ثم طالعت جواد،،لااوصيك اكشخ بليلتنا حتى ابوي مايفهم غلط وتصير مشكلة بذيك الليلة
جواد كشر بوجهه
دانة عضت شفتها السفلية بقهر منها
ام جواد طالعت شذى وبهمس:حسابك بالبيت
بنت من بنات خالة دانة:وش هالوقاحة اللي عندك
رهايف تكتفت وهي تطالع جهة اهل دانة:معليش لاتفهومني غلط مابيننا شي وقلة الأدب بلاش منها وبعدين انا بس أتأكد من انه راح يعدل،،التفتت تطالع دانة،،وعشان أكون حقانية راح تدخلين ياعروسة عندي وقت الشبكة لاتشيلين هم حياك الله
دانة غرقت عيونها دموع وطالعت جواد وبرجفة صوتها:وتقول اكسبهم وهم جايبينها معهم قاصدين!!
ام جواد وبناتها انصدموا
جواد اخذها بحضنه قدامهم وطالع امه وخوانه بعتب
ام جواد عضت ع شفتها بقهر من ولدها اللي سكت لها
رهايف انقهرت منه لانه سكت لها وبحدة وهي تكلم دانة:هيه انتي
دانة طالعتها عن طرف وهي بحضن جواد
رهايف بحدتها:انا جيت من نفسي محد عزمني لاتدخلين عمتي والبنات بالموضوع واذا تبين تعرفين كيف!!بسيطة ترا!!كلمت وحدة من صحباتك بمبلغ وقدره ووافقت لاتتهمين زور!!
ام جواد برد قلبها
جواد بحدة:وانتي من طلب حضورك ضفي وجهك برا يالله محد يبيك بهالمكان
رهايف:خف علي ياللي ميتة عليك انت!!انا جت بس عشان أتأكد من حقي لاتلعب علي!!وعموما مبروك عليك هالحية اللي تليق فيك وع عليك انت وهي مالت
دانة بكت
جواد ضمها بحضنه بصراخ:برررااااا بررررااا
رهايف:واااع ياشين التمسكن بس والله حتى مبروك حرام فيك جعلك تنقرص منها وتصحى على نفسك وع عليكم يالاثنين تستاهلون بعض
جواد بحدة:قلت برا!!!
رهايف:لاتموت ياعنتر زمانك طالعة اصلا بدون طردة يع يالعنتر انت!!،،لفت ومشت ومرت من عند المصورة ورجعت خطوة لورا وهي توقف عندها،،اعطيني كرتك ابي نفس الصور بليلتي،،التفتت تطالعهم،،العدل وااااااجب!!،،ضحكت بصوت،،
المصورة مدت الكرت بتردد
رهايف اخذته وهي تضحك
شذى وقفت قبال جواد وبحضنه دانة
جواد طالعها باستغراب
شذى فتحت شنطتها اللي شايلتها بيدها وخرجت كيس صغير ورمته بوجه جواد
جواد الكيس بصدره وجزء منه بوجه دانة
ام جواد توسعت عيونها
دانة تألمت:اااه
شذى:تفضل مبروك يااخوي عليك،،طالعت امها،،انا بالبيت يمه من البداية قلت لك ماابي احضر،،لفت ومشت،،
..........****..........
أم جلاجل
.
..بيت بادي..
عباير خارجة من غرفتها بقميص اسود سادة وبطرفه من تحت بجهة اليمين وردة كبيرة باللون الوردي وهي لافة شعرها بطرحة بيج محنيته(حاطة حنا)اتجهت للمطبخ وهي تسمع صوت الصحون ووقفت عالباب وباستغراب:بخوت علامش؟وش بش مدهرة؟!!
بخوت بالمطبخ مشغولة بتجهيز الاغراض ولاانتبهت لها ولاطالعت لها:به ضيفان عند سعود
عباير توسعت عيونها:عندنا!!حنا!!
بخوت التفتت لها:أجـ بِسْم الله!!
عباير كشرت بوجهها:علامش وش أرعيتي!!
بخوت:حافي الله بروحش هولتي بعمرش على هاللفة اللي براسش
عباير دخلت وهي توقف جنبها ترتب بالأغراض تساعدها:عاد راسي مايخف صداعه غير لاأوحى(حست)برودة الحنا
بخوت:الله يعين اللي بياخذش بتروحينه بصنّتش(تقرفه بريحة الحنا)
عباير:الا ياحظه ريحة حنا ريحة الجنة بالأرض كبي حنتي(الحنا)عنش هذا انتي دايم ماتدانينها(تطيقينها)وعلميني من هو اللي غادين يمّنا
بخوت:خلي عنش من هو اوجسي الله يستر عليهم بستره ويفكنا من شرهم
عباير قطبت جبينها:ليش!!وش غادين بهم!!
بخوت:خلصوا المسمار(القرنفل)كل ابوه شكل واحدن منهم به بلا
عباير:الله يبعدهم عنا لايتبلونا
بخوت:امين امين
عباير بابتسامة مصلحة وهي تضرب كتفها بكتف بخوت بشويش:مير انتي ولّمي الباقي وانا غاديتن يم الجوال أجيبه
بخوت توسعت عيونها:عساه بمكانه اللي دايم
عباير قطبت جبينها:اجل وين!!
بخوت:كبيه بمكانه لامن يغدون الضيوف ثم اعمديه(روحي له)
عباير:اللي يوحيش يوجس برا البيت تراه يم الحمام
بخوت:خابرة انه يم الحمام مير انه حمام الضيفان كود يدخل واحدن منهم ويراعيش عز الله ان سعود يكسره بنص جبهتش
عباير بنرفزة:علامش علامش متقصدتني الليلة!!اوجس لش اغدي له واعود هبة ريح لاتهولين السالفة!!
بخوت:بكيفش
عباير لفت ومشت ثم وقفت قبل توصل باب المطبخ وهي تلتفت لبخوت:وينها حلايا ماأوحي لها حس؟!
بخوت:يم التلفزون
عباير:اجل ابغدي قبل يجي احد
بخوت:عجلي لايراعيش سعود تراني مولمة كل شي
عباير مشت متجهة للحمام بخطوات سريعة
.
..بالعشة اللي برا بيت بادي..
،،سعود بعد اللي صار عزمهم وحلف عليهم يتعشون عنده ومالهم عذر ابد والحين مجتمعين عنده شاب لهم النار بالمشب ومجهز الدلة لهم ويتقهون برواق ماعدا جسّار،،
،،جسّار وسعود جنب بعض وقبالهم راشد وبتّال جنب بعض والمشب بينهم،،
راشد يطالع جسّار اللي قباله وهو يكتم ضحكته
سعود التفت لجسّار:هاه بشر عساه وقف؟
جسّار:على وشك
سعود قطب جبينه
جسّار بابتسامة:خف خف الحين يوقف
سعود:مير طيعني خلنا نفزع بك يم المستشفى
جسّار:لا ياابن الحلال بعدين السالفة تصير فيها سين وجيم وترا الجرح بسيط،،بسماجته،،بس زحلطن الطلقة على طرف ساقي بس!!
بتال زفر براحة وسط تكشيرة وجه وهو يشوف سماجته وطالع سعود:ماعليك دامه يتسيمج فانه طيب
راشد:وبعدين ماله داعي تروح المستشفى وهو دكتور براسه يعني هو ادرى بعمره
سعود يطالعه:ماشاء الله عليه ماشاء الله مير انه اوكد لعمره يغدي يم المستشفى
جسّار:ياابن الحلال جرح سطحي طفيف مابه خلاف واذا فيه شي رحت بكرة ان شاء الله
بتال:ماعليك ماعليك ياسعود اكيد ومليون بالمية هذا ذنب وربي مجازيه عليه
جسّار وهو يرمش باستفزاز له:كانت متجهة لك ياشامتي انت لكن أفديك بعمري ياصاحب الشامة
بتال سحب فنجاله بسرعة بيحذفه فيه
جسّار سحب سعود قدامه:خلاص خلاص توبة ياصاحب الشامة توبة
بتال وقف واتجه له:مستمر للحين!!،،وقف عنده وهو يضربه بشويش برجله المجروحة،،
جسار يتالم:اه اه اه اسف اسف اسف بوجهك ياسعود بوجهك
سعود طالع بتال:بوجهي يابتال
بتال زفر وهو يلف بيرجع لمكانه
جسّار بوسط المه همس بعناد:صاحب الشامة
بتال لف بسرعة له يبي يضربه
جسّار وهو يتخبى ورا سعود
سعود يضحك
جسّار بسرعة:بوجه سعود بوجهه بوجهه
بتال بتهديد:عيدها وشوف،،وقف مكانه وباحراج وهو يطالع سعود،،وين الحمام لاهنت
سعود:لادخلت البيت على يدك اليمين بعد البترة(جدار مبني كحاجز يعني نفس عمل الستارة)
بتال ولو انه مافهم:مشكور،،دخل للبيت،،
راشد باحراج:استر ماواجهت وانا اخوك من هالمخفة اللي معي
جسّار طالعه بتكشيرة:مسوي طالع منها انت يعني!!!
راشد غمز لسعود:استر استر وانا اخوك
سعود زم شفايفه وهو يكتم ضحكته وبنفسه:الله يخلف عليكم كل أبوكم
بتال دخل للبيت وطالع يمينه اخذ نفس وهو يردد ماعليه 
.
.........****.........
..بيت عادل..
رهايف متجه للبيت تبي تدخل من الباب الخلفي وهي تنزل نقابها وتدخله بشنطتها ونزلت طرحتها ع أكتافها وتفتح أزارير عبايتها الكتف وتركتها مفتوحة وبان معها مقدمة فستانها الاحمر المخصر ع جسمها وماسك ع رقبتها دخلت وهي تمر من الصالة متجهة للمطبخ دخلت للمطبخ وهي متجهة للثلاجة وبابتسامة:السلام عليكم
امجاد تغسل الصحون وبدون لاتطالعها وبشغلها:وعليكم السلام والرحمة بدري تو الناس!!
رهايف اخذت علبة موية من الثلاجة وشربت وبنفس مسموع وضح بكلامها وسط ابتسامتها:من عمرك والله بس رحمتك وجيت
امجاد:يمه يالعطوفة انتي!!غريبة جاية بدري!!شكل الجو ماعجبك!!
رهايف وقفت ع مسافة بسيطة وهي تطالعها:هو ماعجبني لحالي!حتى شذى رجعت معي
امجاد قطبت جبينها:ليش!!
رهايف رفعت نفسها وهي تجلس ع طرف المطبخ:ابد سمعت المعاريس كم كلمة وطلعت
امجاد اتسعت عيونها:وش سويتي يالخايبة!!امه فيه نسيتي!!
رهايف:الا بتحب راسي عاللي سويته
امجاد:الله يقطع ابليسك يارهوف!!بتجيبين لنا المصايب
رهايف بزعل:خلي عني بس حتى انتي لو شفتي اللي صار ماتسكتين
امجاد تركت اللي بيدها والتفتت عليها وهي تزفر:الله يستر عليك يالمهبولة
رهايف غمزت لها:لاتخافين مابيقدرون علي
امجاد:عاد بذي صادقة والله وين تروحين عن ابوك واخوانك!!
رهايف نزلت وهي تسرع بخطواتها للغاز الي قبالها وتفتح القدور اللي عليه وتشوف الاكل:وش تعشيتوا
امجاد وهي تكمل شغل:امك مسوية تقاريص(مرقوق)
رهايف:الله فاتت المهابيل،،اكلت بملعقة الغرف،،اهم شي انا وبطني
امجاد:لاتحوسين الاكل وخذي القدر الصغير وديه لبيت جدي حطيه بالثلاجة واذا رجعتي حطي شوية لك انتي وشذى واتعشوا مع بعض
رهايف:مابترد اذا اتصلت
امجاد التفت عليها باستغراب:ليش!!
رهايف وهي تاكل:عاد اقولك
امجاد:اجل روحي لها وجيبيها معك او حطي لها بكيفك
رهايف اخذت القدر ومشت لعند باب المطبخ وهي تاخذ مفتاح بيت جدها:بروح أجيبها الله يعيني
امجاد:هيه هيه لفي الطرحة وقفلي عبايتك
رهايف:ليش!!
امجاد:رهايف سلاماااات!!
رهايف وهي تطالعها:انتي اللي سلامات راشد وذالف مع المهابيل والعلة جواد تعرفين والسواقين وبابهم برا ليش اتغطى؟!!
امجاد:بكيفك اذا شافوك لاتجيني
رهايف وهي تمشي:لاتقفلين ذَا الباب راجعة منه
.
..بيت مسفر..
،،الصالة،،
أم جواد بالصالة ممددة رجولها عالطاولة وهي تنزل اكسسواراتها وساكتة ولاتطالعه ابد
جواد بنرفزة:يمه طلبتك مايصير ارجعي معي للاستراحة كيف تتركين المكان وانتي معزبته؟!!
ام جواد بهدوء:اختك هناك تكفي وتوفي
جواد:بتكفي بس انا ابيك انتي بالواجهة وش بيقولون الناس عني لاامه ولا ابوه!!
ام جواد بحدة:خلاص جواد روح قلت لك السواق يوديني البيت وانت رفضت الحين ارجع لضيوفك وش فيك تاركهم
جواد بقهر:الله والضيوف عاد!!كلهم اَهلها مافيه احد معي!!محد فرحان لي!!اهم شي انفسكم وبس بس،،مشى وخرج من بيتهم وقف عالدرج البسيط اللي قدام باب بيتهم بملامح محتدة وهو يشوفها،،
رهايف اتجهت لبيت عمها بعد ماخلصت الشغلة اللي ببيت جدها رفعت راسها وهي تطلع الدرج توسعت عيونها وهي تشوفه واقف قدامها ويطالعها بهالنظرات كشرت بوجهها وهي ترفع طرحتها وتلفها بسرعة على راسها وتلثمت اي كلام وهي تسحب طرف عبايتهااليمين وتضمه مع اليسار تغطي نفسها وباستفزاز وسط ابتسامتها:ادري اني لك خلاص لكن مايصير تناظرني واحنا للحين ماانكتب كتابنا عند الشيخ!!اصبر مابعد صرت حلالك!!شوي ونصير زوج وزوجة ع سنة الله ورسوله
جواد نزل الدرج اللي بينهم وهو يطالعها بغبنته:ايه بتصيرين زوجتي لكن هين هين ان تهنيتي معي والله والله لاذوقك المر والله يارهايف
رهايف ضحكت:ومن قال لك اني ادور السعادة من وراك انا من ارتبط اسمي باسمك علقت الهنا والراحة برا باب غرفتي حتى أتأقلم عالقرادة اللي تنتظرني معك ياروح امك انت!!اوووه اقصد ياروح دانة مو انت مااحترمت امك قدام زوجتك واهلها وش ارتجي من وراك!!
جواد سحبها من يدها بقوة وهو يضغط عليها
رهايف انفجعت منه وكتمت صرختها وهي تطالعه برعب
جواد بتهديد من بين اسنانه:صبر بس خليه ينقفل علينا باب اعلمك الرجا الصح من وراي يارهايف
ابو جواد واقف بحدة:جواد!!!
جواد التفت للصوت بصدمة من وجودهم وتركها
رهايف طالعت الارض وهي تخفي لمعة عيونها
ابو غازي طلع الدرجات بسرعة ووقف عندهم وهو يسحب رهايف وراه ويطالع جواد بتكشيرة يخفي وراها غيظه
جواد بتوتر مخفيه:عمي انا
ابو غازي مسك جواد من يده ولفها ورا ظهره وهو يلفه
جواد بفجعة:ياعم
ابو غازي رفع رجله وضرب رجل جواد من ورا وهو يجبره يجلس على ركبه
جواد ضربت ركبه بالأرض بقوة خصوصا انه ماتوقع هالحركة من عمه تغير وجهه رغم المه اللي يخفيه
ابو غازي وهو يزيد بضغطه على يد جواد ومن بين اسنانه:هاليد  ماتنمد على بنتي وهي ببيتك فما بالك تمدها عليها وهي ببيتي ياجواد!!
جواد:ماقص
ابو غازي دفه بقوة لقدام وهو يتركه
جواد انحنى لقدام شبه ساجد ثم اعتدل بجسمه وهو على ركبه والتفت يطالع عمه
ابو غازي بحدته:اوووص كلمة لااسمع هالمرة بأسوي نفسي ماشفت شي وان شاء الله مابه مرتن ثانية،،التفت لأبو جواد،،وقتها عظم الله اجرك يامسفر،،مد يده ومسك يد رهايف وهو يسحبها وراها بخطواته السريعة يبتعد عنهم،،
جواد تربع عالارض وهو يهمز(يمسّج)يده اللي توجعه بيده الثانية
ابو جواد طلع الدرج ومر من جنبه بسكوت ولانطق اَي حرف ولاطالعه
جواد ضحك بخفة بلحظة مامر ابوه
ابو جواد التفت عليه وهو يناظره بحدة
جواد بغبنة داخله رغم الابتسامة اللي على وجهه:لهالدرجة تخاف منه يبه!!لهالدرجة يتحكم فيك اخوك!!الحمدلله ماعندي اخو اكبر مني!!لا لا الحمدلله ماعندي اخوان!!كان اكسرهم كسر ولي العذر لأني الكبير!!
ابو جواد بحدته:وش اللي يرضيك ياجواد هاه؟!
جواد وقف:وش يرضيني وانت رضيت لي الذل وساكت له!!خلاص ماعاد لي قيمة ولاحشيمة!!،،لف بيمشي،،
ابو جواد:تدري عاد
جواد التفت على ابوه بملامح الزعل على وجهه
ابو جواد:لازم احضر ملكتك وابارك لعروستك عاد مايصير مانبارك للدكتورة دانة!!
جواد نسى كل اللي صار اول ماسمع كلام ابوه وارتسمت ابتسامة عريضة:من جدك يبه
ابو جواد:انتظرني خمس دقايق وراجع لك
.
..بيت عادل..
ابو غازي دخل بخطوات سريعة للبيت وهو يكتم غيظه
رهايف دخلت وراه وهي منزلة راسها ساكتة
امجاد من سمعت صوت الباب نقصت ع صوت التلفزيون:وش فيك تاخرتي شذى جات معك؟!!احط لكم العشا؟ولا بت،،التفتت سكتت وهي تشوف ابوها،،
ابو غازي التفت على رهايف
رهايف وقفت وهي تحس قلبها بيخرج من مكانه مافي احد هالمرة مافي احد يساعدها منه غازي وبيبات ببيت عمه وفيصل مامنه مساعدة وهو بهالحالة غمضت عيونها وهي تدري هالمرة مابيرحمها شافها معه مو مجرد كلام غمضت بقوة وهي تنتظر الكف وسط دمعة غلبتها ونزلت
ابو غازي طالعها وهي مغمضة عيونها طالعها وهو يسترجع كلام امجاد لها وتصرف جواد معها تعوذ من ابليس بينه وبين نفسه ثم نطق بهدوء:وراك سكتي له!!علامك ماشتيه بين رجوله!!ياخسارة العلم فيك!!
رهايف فتحت عيونها وهي تطالعه بربكة مو فاهمة اللي يصير
ابو غازي:المرة الجاية اللي تلمحين بعينه بريق شي ماهو بطيب افصخي نعالك وبوسط جبهته ثم لاتوجع
رهايف بهمس وهي تطالعه بعدم تصديق:اسدد له ضربة بين رجليه
ابو غازي:وش الفايدة الحين تقولينه عندي وعنده تتراعدين(ترجفين)..التفت لأمجاد،،بنت ياامجاد
امجاد:هلا يبه
ابو غازي خرج محفظته من جيبه ومد لأمجاد فلوس:اطلبوا لكم عشا ونادي الشذيا(يقصد شذى)اخبرها علة تبلشني اذا درت بكم وأنتم ماشاء الله عليكم تكتمون السر،،لف عنهم ومشى،،
رهايف جلست عالارض من صدمتها واخذت نفس وسط رجفتها وهي تحضن نفسها:يمه يمه انا حية!!باقي حية للحين يمه يايمه ربي رحمني يمه ياقلبي يمه
امجاد تطالع اللي يصير مو فاهمة:وش فيه؟!!
رهايف برجفتها:موية ياامجاد موية تكفين
.
.
<اللهم صل وسلم على نبينا محمد>
.
.