ياسمح المحيا جر الهجينية

٣٧

     ،،الـجـزء الـسـابـع والـثـلاثـون،،
سبحان الله والحمدلله ولااله الا الله والله اكبر ولاحول ولاقوة الا بالله،سبحان الله وبحمده سبحان الله العظيم
.
.
سعود هادي وشاك بهالوضع الغريب والمحرج بالنسبة له فكه بهدوء وسط ابتسامة:الله يسلمك ويبقيك
بتال وهو حاط يديه ع كتوف سعود ويطالعه بابتسامة:ولد ولده؟ولا ولد بنته؟؟
سعود عقد حواجبه:ياابن الحلال وش الطاري علمني تراك روعتني؟!
بتال ضحك بخفة:بِسْم الله عليك لكن القلب فز من مكانه ياسعود
سعود باستغراب:وش بغيت من جدي يابتال؟
بتال زفر بفرحة يكتمها بصدره:ولد خال ولا ولد خالة؟
سعود قطب جبينه وهو يستوعب الوضع
بتال ابتسم:ها ياسعود ولد خال ولا خالة؟
سعود احتدت ملامح وجهه وهو يرفع يديه ودف يدين بتال عنه بقوة
بتال اختفت ابتسامته وهو يطالعه باستغراب
سعود بحدة:لا ولد خال ولا ولد خالة
بتال ارتفعت حواجبه وهو يزفر ببوسط ابتسامة جانبية خفيفة
سعود بحدته:اوحني زين ياراعي الجمايل اقطع الطريا ولاتوجسه لاحدن ابد وحقك علي ياراعي الجميلة مااوجسه لاحدن ابد ولااطريه ابدن ابدن كني مااوحيت هالعلم ابد ومن هالليلة لانتواجه حتى ماتضيق الخواطر بالفعول الردية خلك انت وربعك مع بعضكم وانا وأهل الديرة مع بعضنا مالكم بد ولا لنا بد بكم!!،،عطاه ظهره،،
بتال:ليش؟!!!
سعود كشر بوجهه والتفت عن جنب وهو يطالعه عن طرف عينه
بتال:كل هالطيب والخوة اللي سادت بيننا اختفت بلحظة وجا مكانها كره ليش ابي اعرف!!
سعود:خلك مثل ماانت لاتدري عن شين ولاانا اعدم زين الايام بشيّن شين
بتال زفر:الليلة باتركك ترتاح وتتقبل الوضع ومن بكرة ان شاء الله وانا عندك
سعود التفت كله وبحدة:بتااال!!!
بتال:لازم اعرف وش اللي صاير بهالبيت بعد مايصير اعرف شي واترك شي!!
سعود:انا خبرتك يابتال وكانك شاري الجميل وزين الفعول اقطع العلم مرتن وحدة،،دخل وقفل الباب بوجه بتال بقوة،،
بتال رجع للبيت بخطوات سريعة فتح الباب ودخل
،،راشد وجسّار مجهزين العشا اللي هو عبارة عن نواشف،،
جسّار:بسرعة ياأخي مت من الجوع وذبحني الصداع ابي انام
بتال وهو متجه لغرفتهم:ابلع مامسكتك!!،،دخل للغرفة،،
جسّار:وبعدين يعني وبعدين!!
راشد خرج الخبز من الكيس وسمى وبدا يتعشى
جسار بحقد:احسن جعله يجوع اكثر،،سحب الخبز من يد راشد واكل،،
بتال خرج من الغرفة بلبس الدوام
،،جسّار وراشد يطالعونه باستغراب،،
جسّار:هيه يالحبيب ليل ليل ترا مااصبحنا للحين
بتال:ابي اقدم مناوبتي وان شاء الله يوافقون
جسّار بصدمة:وش مناوبته!!مستوصف تراك
بتال طالعه بتكشيرة:لاصحيت على نفسك وقريت رسايلك تعال كلمني،،مشى،،
جسّار سحب جواله اللي قدامه عالارض وفتحه بسرعة اتسعت عيونه وهو يشوف اسمه مناوبته بدت من ساعتين فز واقف وجرى للغرفة:انتظر انتظر جاي معك،،دخل وخرج وبيده لبسه،،
بتال وعينه ع راشد:وانت بتقعد لحالك؟
راشد ارتفعت حواجبه:ووش عليك مني تيسر لدوامك!!
بتال:قم قم خذ أغراضك اللي تحتاجها ويالله معنا
راشد:سلامات بتال!!من جدك
بتال عطاه ظهره وهو يخرج من البيت:انتظرك لاتطول وتأخرنا
..........****..........
    يوم جديد
.........****..........
..بيت عادل..
..جناح غازي،،
غازي صحى سحب جواله وهو يطالع الساعة اتسعت عيونه وهو يشوف الوقت فز من سريره وهو يتحسب خرج من غرفة النوم ووقف بالصالة الصغيرة وهو يطالعها
عذاري ببجامتها جالسة عالكنبة وهي تقلب بالجوال
غازي بغبنة:ليش ماصحيتيني
عذاري بدون لاتطالعه:مافيني حيل ولو معي صغير ارسلته لك يصحيك وبيصحيك بأحلى طريقة
غازي صرخ:عذاري!!
عذاري رفعت عينها وطالعته:نعم!!
غازي:تدرين ان اليوم روحتي لي ماصحيتيني!!
عذاري:والله بدل ماانت واقف تتحلطم علي رح وخلص امورك ترا مابقي معك وقت كثير
غازي عض شفته وهو يكتم غيظه زفر ومشى وخرج
عذاري عضت شفتها وهي تحبس دموعها:ألقها منك ولا من ابوي،،تمددت عالكنبة بزعلها وهي تسحب المخدة وتغطي وجهها،،
.
..غرفة رهايف وأمجاد..
امجاد قبال التسريحة تعدل لبسها وهي تطالعها بالمراية:هيه رهايفوه قومي بيروحون ويتركونك
رهايف عالسرير :ماني مداومة اليوم
امجاد التفتت لها:والله اني قايلته ماانتي بعلى بعضك من امس!!وش صاير معك قولي لي؟
رهايف جلست وهي تتربع عالسرير وطالعتها:ابد اخذت علقة من ام الزوج المستقبلي أمام الزوج المستقبلي
امجاد شهقت:الله يقطعك يارهايف وش مسوية حسبي الله عليك!!
رهايف بنرفزة:هيه هيه وش فيك اكلتيني ماسويت شي!!
امجاد بسخرية:ياحرام ظلمت المسكينة انا!!
رهايف كشرت بوجهها:عساك لاصدقتي ان شاء الله!!
امجاد زفرت:وبعدين
رهايف:والعلة هالجواد كلمني بالليل وقالي خبر يسم
امجاد انفجعت:وش فيه؟!!
رهايف:يقول بيكلم ابوي عالزواج
امجاد ابتسمت:طيب حلو عالاقل عطاك خبر
رهايف بغبنة وهي تقلده:اختاري شهر العسل اوه عفوا اقصد أسبوع العسل داومي مايسمح بهالفترة
امجاد تطالعها بابتسامة وتسمعها بسكوت
رهايف:وجع من زين السفرة معك على أساس ميتة عالسفرة مع ذَا الوجه وع!!ادري انه اذا سافرت ليقفل علي باب الفندق وماغير اطالع الرايح والجاي من الشباك!!
امجاد:وش قلتي له اعرفك ماتسكتين
رهايف بابتسامة:حبيبتي تغديت به قبل يتعشى فيني
امجاد بسخرية:الله ياقوية انتي وش سويتي
رهايف:قلت ماابي اسافر مخلية السفر لك وللجنية اللي معك
امجاد ضحكت
رهايف طالعتها باستغراب:وش فيك
امجاد:وربي انك مسكينة!!
رهايف كشرت بوجهها
امجاد:لعبها عليك صح يالهبلة!!
.
..المستشفى..
جواد يمشي بخطوات سريعة باستقبال المستشفى متجه لطوارئ النساء دخل ودور لها وماحصلها وقف وسأل ممرضة:وين الدكتورة دانة؟
الممرضة:خرجت قبل شوي قبل عشر دقايق ماقابلتها بطريقك دكتور؟
جواد ابتسم:شكرا،،خرج واختفت ابتسامته وهو يغلي ماترد عليه وغيرت مناوبتها حتى ماتقابله جرى بالاستقبال وهو يبي يلحقها
دانة تمشي بخطوات سريعة بالمواقف وصلت للسيارة وهي تتلفت حولها ماشافته ولاشافت سيارته ابتسمت وقفت عند سيارتها وهي تفتح الباب ركبت وقفلته حركت السيارة وهي ترفع صوت الأغاني براحة انتهى الشيفت وهي ماقابلته مسكت فرامل بقوة وهي مفجوعة
جواد واقف بوسط الطريق وتحديدا وقف قبال سيارتها وهو يطالعها بحدة  وسط انفاسه السريعة من الجري
دانة احتدت نظرتها وهي تنزل من السيارة وبتعصيبة:مجنون انت!!
جواد بحدة:ايه مجنون!!مجنون لانك ماتردين علي وتتهربين مني!!
دانة زفرت:طيب تعال اركب ونتفاهم،،رجعت وركبت مكانها
جواد اتجه بخطوات سريعة وجلس بمكان الراكب وقفل الباب بقوة
دانة فزت من قفلته للباب وهي تطالع لقدام ماتجرات تطالعه
،،وبعد فترة من الصمت،،
دانة تسوق ماتدري وين تروح
جواد هدا شوي:ليش ماتردين علي!!
دانة:وشلون ارد عليك وانت كنت ناوي تطلق ياجواد
جواد بحدة:واللي سويتيه وش ردك عليه؟
دانة بقهر:اعتقد اخذت حقك وحقها كامل مكمل يوم مديت يدك علي قدام اللي يسوى واللي مايسوى
جواد قطب جبينه:ومين تقصدين باللي مايسوى ان شاء الله يادانة!!
دانة:فسر على كيفك حبي!!
جواد بحدة:دانة!!
دانة وقفت على جنب والتفت تطالعه بتكشيرة وهي نيتها تجبره يعتذر لها:الظاهر مابيننا نصيب دكتور جواد
جواد بحدة:لاتتحديني دانة وتكبرينها
دانة:والله!!!
جواد:اعتذري من امي قدام اللي اهنتيها كلهم وردي اعتبارها احسن لك
دانة:واللي سوته عمتك بوجودك ولانطقت حرف وش بينقال بوجودك بعدين وبتسكت بعد!!
جواد صرخ وهو يشوفها ترادده:داااانة!!
دانة تكتفت:نعم
جواد:امي بالاول بعدين اشوف عمتي واتفاهم معها!!
دانة زفرت:اسفة بس كرامتي اهم
جواد ارتفع حاجبه:يعني؟!!
دانة طالعت لقدام بعناد:رد اعتباري بالاول وبعدها لكل حادث حديث!!
جواد:هذا اخر كلامك؟
دانة ماردت
جواد:الظاهر فعلا مابيننا نصيب
دانة التفتت تطالعه بصدمة اخر شي توقعته ذَا الكلام
جواد:لكن نصيبنا مابينتهي الى ماترجعين كل شي يادانة كل شي اخذتيه ترجعينه
دانة اتسعت عيونها:جواد!!
جواد:وحياك الله على زواجي وقريبا بعد وانتي اول وحدة بأرسلها الدعوة طبعا تدرين بغلاتك عندي وشلون،،فتح الباب ونزل وقفله بقوة ومشى عالرصيف،،
دانة نزلت وبصدمتها وهي توقف عالرصيف وبصراخ:والحب اللي تقول عنه ياجواد
جواد التفت لها وزفر:ارجعي لسيارتك يادانة وروحي بيتكم الله يستر عليك
دانة بصراخ وبعيون تلمع:رد علي والحب؟
جواد:الحب للي يستاهلونه يادانة
دانة عضت شفتها بقهر
جواد:وش فايدة الحب اذا انتي مااحترمتي اللي احبهم واولهم امي وابوي!!
دانة:بس انت
جواد قاطعها:من البداية وضح وشلون بتكون حياتي معك يادانة
دانة:وليش تحكم واحنا ماعشنا مع بعض للحين!!
جواد زفر:الحب مو كل شي بالحياة يادانة التنازلات لها دور بعد!!
دانة بدموع:وانا ماابي أتنازل عن كرامتي ياجواد لا والف لا!!
جواد تنهد:تيسري يابنت الناس الله يستر عليك مابيننا نصيب
.........****..........
أم جـلاجـل
.
..السيارة..
راشد يسوق سيارته وهو يمدد جسمه ويدعي على بتال اللي اجبره ينام عنده بالمستوصف خرج جواله واتصل على امه وعقد حواجبه وهو يحط الجوال على اذنه وكذب نفسه وابتسم:هلا والله حي هالصوت
عذبة:يسلمك لي ربي ياعيني كيف أصبحت بعد تعب امس؟
راشد:بخير بخير جعلي ماانحرم من هالصوت،،عقد حواجبه وهو يميل فمه بتفكير،،
عذبة:يمه راشد
راشد:سمي يمه
عذبة سكتت شوي وهي مترددة
راشد ابتسم وهو ينتظرها تتكلم:هلا يمه امريني
عذبة:سلامتك يمه انتبه على نفسك
راشد زفر بخيبة:الله يسلمك يمّه الله يسلمك
عذبة:استودعتك الله ياقليب امك استودعتك الله،،قفل،،
راشد رمى الجوال عالمقعدة اللي جنبه وسط تكشيرة اعتلت وجهه واسرع بالسيارة بجنون وطالع اللوحة اللي قدّامه وهو مر من عندها للمرة الخامسة لف عليها بسرعته ونزّل من الخط ووقف جنبها وهو ينزل من سيارته وبصراخ وهو يوقف عند اللوحة ويتلفت حوله:اطلعوا جعل ماتطلع عليكم شمس اطلعوا!!خلصوا الموضوع وفكوني!!
حمدان واقف ع باب المدرسة يطالعه بصدمة:راشد!!
راشد انصدم من وجوده:حمدان!!
حمدان وهو يمشي له بسرعة:عسى ماصابك سو؟
راشد عقد حواجبه من السؤال:وش قصـ،،سكت وهو يشوف سيارته داخلة بجدار المدرسة،،
.
..بيت بادي..
عباير بالحمام وهي ماسكة جنبها اليسار وتبكي بصمت
بخوت تدق عليها الباب:بنت ياعباير علامش ابطيتي؟!!
عباير برجفة صوت واضحة:مابي شي
بخوت اللي ماهي بمرتاحة من شافت وجهها المتغير الصباح وبخوفها:بنت لاتروعيني وتهولين بي علميني وش غادين بش!!
عباير وهي تتوجه ومنحنية بجسمها وقفت قبال المغسلة وهي تتسند عليها وغسلت وجهها قفلت الموية وهي تاخذ نفس وتشد طولها وترسم ملامح الثقة على وجهها فتحت الباب وهي تطالعها وتخرج:خير وش بش!!علامش متروعة!!مابي شي اوجسته،،مشت،،
بخوت مشت وراها ومسكتها من يدها ولفتها عليها:اوجس لش وش ،،سكنت وهي تشوفها تتوجع،،
عباير سحبت يدها وبعصبية:مابي شي!!علامش ماتوحين،،مشت وهي تعرج بخطواتها،،
بخوت مسكتها:كبي عنادش وراعي سعود ماعدا يم الدوام خليه يفزع بش يم المستوصف
عباير بعناد:مابي شي ومااوجست لش ان بي علة!!
بخوت:عاد تدرين
عباير طالعتها وهي تعض شفتها من الالم
بخوت:احسن معليش تستاهلينه خلي قنقش يداويش،،مشت،،
عباير اتجهت للغرفة وهي خانتها دموع ونزلت مسحت دموعها بيدها وهي تخاصم نفسها:تعودي ياعباير محدن بدايم لش!!حتى ابوش غدر بامش،،دخلت لغرفتها وارتمت ع فراشها عالارض،،
بخوت تعاجل بخطواتها لسعود ولحقته عالباب:سعود
سعود التفت لها بسرعة وهو يسمع نبرة الخوف بصوتها:علامش؟
بخوت:عباير ميتة من الوجع وتكابر
سعود مشى بخطواته السريعة لغرفتها وفتح الباب طالعها وهي ممتدة وبحدة:عباير قومي ولمي روحش اغدي بس يم المستشفى
بخوت وحلايا واقفين وراه
عباير بعنادها:ماني بغاديتن مطب مابي شي
سعود دخل للغرفة وهو ينحني ويسحب عبايتها اللي عالارض جنب الدولاب ثم اتجهت لها وجلس جنبها وهو يمسك يدها ويجلسها
عباير تتأفف وهي واضح عليها التعب:كبني مابي شي
سعود مسك يدها يدخل كم عبايتها
عباير سحبت يدها بقوة:مابي شي ماتوحي
سعود عطاها كف
عباير انهمرت دموعها قدّامه
سعود:أطاوعش بكل شي الا عمرش ياعباير،،سحب يدها ودخلها بالعباية،،
عباير سحبت يدها وهي توقف:اوجست لك مابي شي،،مشت وخرجت من الغرفة،،
بخوت مسكتها بيدها:بتذبحني روحش من هالقنق اللي مابه طب
سعود خرج من الغرفة وبحدة:كبيها عنش خلي قنقها ينفعها لاصار الصدق
عباير سحبت يدها من بخوت وهي تطالعه بقهر ومشت وهي تجر خطواتها بشويش وطاحت عالارض قدامهم
بخوت هلت دموعها وهي تجري لها بفجعة عليها وجلست عندها وهي تبكي وتهزها بدون صوت
سعود جرى لها ورفعها من الارض لحضنه وهو يسمي عليها ويمسح جبينها بشماغه:بِسْم الله عليش بِسْم الله،،رمى شماغه على وجهها وشالها وجرى فيها برا البيت وهو يكلم بخوت،،اقفلي الباب عليكم زين وتحرصي
بخوت قفلت الباب وراه وسط دموع خيبتها وهي تلوم نفسها من هالخوف الـلـي ماتدري متى بتتغلب عليه
.........****..........
..بيت عادل..
،،بصالة البيت،،
ام جواد:والله ياأم غازي انا جاية ابي رهايف بكلمة راس
ام غازي وهي تنزل فنجالها:عسى ماشر،،اتسعت عيونها،،لاتلومينها ياعواطف وانتي تعرفينها مربوشة
ام جواد ابتسمت:هالمرة انا اللي ابي اتعذر منها
ام غازي:وش هالكلام ياحرمة لاتخوفيني تكفين!!
ام جواد ضحكت:سالفة بين البنت وعمتها وش عليك ياوسمية!!
رهايف دخلت عندهم:السلام عليكم
ام جواد وقفت:هلا والله ياهلا
رهايف سلمت عليها:كيفك الحين ياعمة؟
ام غازي قطبت جبينها وهي تطالعهم
ام جواد ضحكت:واضح ماتاثرتي باللي صار ابد وانا اقول زعلت علي
رهايف ضحكت بخفة:يوه ياعمة يقولك والنائم حتى يصحى وانتي عاد محد بياخذ عليك
ام غازي قرصت رهايف برجلها
ام جواد ميلت فمها:صدقتي صدقني
رهايف:اح يمه
ام جواد:اتركيها عنك ياوسمية اللي حصلته مو شوية
رهايف:والله ياعمة والله مااخذت بخاطري ابد وانتي بعد لاتاخذين بخاطرك شي والقلب من القلب ابيض
ام غازي:والله البنت وبنتك تفاهموا بينكم مالي شغل بعدين سمعتوا
..........****..........
ام جـلاجــل
.
..بيت بادي..
بخوت تضيع قلقها وتفكيرها بتنظيفها للبيت اللي نظيف اصلا خرجت كل الصحون وهي تغسلها وتدعي لأختها انه يكون مجرد تعب بسيط استغربت من هدوء المكان خصوصا حلايا اللي ماتعرف تجلس بدون ماتزعجها غسلت يديها وخرجت من المطبخ:حلايا بنت ياحلايا،،خافت وهي ماتسمع لها صوت وأسرعت بخطواتها وهي تدور لها مرعوبة دخلت للحمام وانصدمت وهي تشوفها متمددة عالارض وجنبها علبة الكلور صرخت،،يمه حلايا!!،،حركت بنتها وحاولت فيها لكن مافيه اي استجابة من بنتها انهارت بشهقات ودموع خرجت من البيت وهي يرن كلام سعود باذنها(ماشاء الله جيراننا كل ابوهم أهل دكترة)خرجت بدون اي شي يغطي جسمها او وجهها وهالوقت ماهو وقت تفكير اذا تلبس عبايتها او لا خرجت وهي تجري باتجاه بيت الشلة
.
..بيت مناور..
غيث جالس يفطر مع امه بالصالة يتقهوى معه وَذَا صار روتينه اليومي بعد الـلـي صار مع امه
ام غيث عقدت حواجبها:أوحيت شي ياغيث؟
غيث:مابه شي يمه تقهوي تقهوي
ام غيث:بلكن غادين شي برا افزع يايمه افزع
غيث تنهد:ابشري يمه ابشري،،وقف وخرج من البيت،،
.
..المستوصف..
بتال خارج برا المستشفى وهو يمدد جسمه من التعب ومرهق لاقصى حدوده يغير جوه شوي ومناوبته للحين ماانتهت وقف وهو يطالع سيارة سعود باستغراب
سعود وقف ع باب المستوصف بسيارته وسط غبار سرعته الـلـي سبقه لداخل المستوصف وهو يستنجد:الفزعة تكفى الفزعة
بتّال جرى للسيارة وهو يفتح الباب الخلفي ويشوفها متمددة ركب عندها وهو يكشف الكشف الروتيني السريع واتسعت عيونه وهو يجلس ورا ويرفعها بحضنه وبحدة:سعود مستشفى المحافظة ياسعود اعجل علينا
.
جسّار راجع من المستشفى وهو يتثاوب ميت من النوم  والتعب كلها وقف عند البيت ونزل من السيارة انصدم وهو يشوفها
بخوت تجري لها بدموعها ووقفت قباله وهي تشاهق وترفع حلايا اللي بين يديه له
جسّار سحبها من يديها بسرعة:وش اخر شي
بخوت قاطعته بصرختها:كلوركس كلوركس،،مسكت يده،،بنتي ماتت الله يخليك لاتموت تكفى تكفى
غيث وقف قبالهم وبصرخة وحدة وسط حدة ملامحه:بخووووووت!!!
بخوت فزت من الصرخة والتفتت له تطالعه وسط دموع ماوقفت ابد
جسّار تحرك بسرعة بدون اَي اهتمام له وركب سيارته
بخوت جرت لسيارة جسّار وفتحت باب الراكب وركبت عند جسّار
جسّار شغل السيارة وحلايا بحضنه
بخوت مدت يديها لبنتها وأخذتها من حضن جسّار وهي بتموت من كثر البكا وبشهقاتها:تكفى بنتي لاتموت تكفى
غيث انفجر وهو يشوفهم مو مهتمين لوجوده ابد
جسّار حرك بسرعة ولا مدا يتحرك بالسيارة الا شي بسيط ومسك فرامل بقوة
غيث وقف بطريق سيارة جسّار وهو يغلي من قهره
جسّار صرخ وسط ملامحه المحتدة:ابعد خل نلحق عالبنت
غيث اتجه لمكان الراكب وفتح الباب ومد يده ومسك يد بخوت وسحبها ينزلها
بخوت ضامة حلايا لصدرها بيسارها وهي تسحب يمينها من غيث:حلايا ياغيث حلايا
غيث يسحبها وراه بدون لايطالعها
جسّار نزل من السيارة
بخوت وهي تسحب يدها منه:بتموت بنتنا ياغيث تكفى خله يفزع بنا تكفى
غيث ترك يدها والتفت يطالعها بنظرات شر وضربها كف على وجهها بكل قوته
جسّار وقف وهو يشوف المنظر بصدمة والتزم مكانه وهو يفهم انها بنتهم وماله دخل بأمورهم الشخصية رفع صوته:لازم نتحرك البنت بتموت اذا تأخرنا
بخوت طالعت غيث للحظة سريعة وهي تشوف نفس نظراته السقيمة لها ماتغيرت بلعت دموعها وشهقاتها وطالعته بنفس نظراته
غيث كشر بوجهه وهو لأول مرة يشوف هالنظرات منها
بخوت عطته ظهرها وهي تسرع بخطواتها للسيارة
جسّار مشى للسيارة وهو يشوفها جاية
غيث مسك يدها ولفها له بقوة وبصراخه:تعقبين تغدين معه يابخوت
بخوت التفتت له مع سحبته
جسّار انغبن ومشى متجه لغيث وهو ناويه
بخوت رفعت رجلها اليمين وشاتته على ركبته اليمين بكل قوتها وهي تعرف انها مكان عمليته من سنين
غيث انقلب وجهه انحنى وهو يمسك ركبته وسط المه ومايتحمل يظل واقف وجلس
بخوت بحدة وهي ترجف:انت اللي تعقب تامرني بشي ابد مالك ولية علي ياغيث،،اتجهت للسيارة وركبت وقفلت الباب بدون لاتطالعه وعينها ع حلاياا،،
جسّار جرى للسيارة وحرك بسرعة جنونية
غيث صرخ وهو يطالعهم يمرون من جنبه:بخووووووت!!!
بخوت ضمت حلايا لصدرها وهي تحس قلبها بيخرج من مكانه من خوفها عليها
غيث وقف وهو يحس بيموت من غبنته مشى بسرعة متجه لسيارته اللي جنب بيتهم وهو يضغط ع نفسه من الم ركبته وهدت خطواته وهو يطالع قفا اللي يمشي قدامه بشك ابتسم وهو يسرع بخطواته:هلا ياهلا تو مااستنارت الديرة!!
.
..المدرسة..
،،انحل موضوع جدار المدرسة بهدوء وراشد تكفل به بما انه المتسبب الوحيد وقفل المدير على الموضوع ومنع احد يتكلم فيه نهائيا،، راشد جالس على كرسيه ورا مكتبه وشماغه مسدول على طرف منكبه اليمين وهو معطي قفا ظهره للمعلمين مايبي يسمع منهم كلمة يكفيه النظرات متكي بطرف كوعه اليمين ع يد الكرسي ومتكي براسه ع كف يده يفكر بصدمة وهم من اللي يصير معه
ابو ياسر(الطالب اللي أغمى عليه عشان محد يسأل🌚)دخل لغرفة المعلمين:السلام عليكم
المعلمين الموجودين ردوا السلام
راشد بهمومه مو منتبه للي حوله
ابو ياسر وقف عنده:يااستاذ
راشد رفع راْسه بتكشيرة:نعم
ابو ياسر قطب جبينه
راشد حس بنفسه اخذ نفس وهو يجبر نفسه عالابتسامة ووقف وهو يمد يده:حياك الله اَي خدمة؟
ابو ياسر:والله اني غادين يمك ابي اتخبّر العلم منك
راشد عقد حواجبه:اَي علم؟،،دف كرسيه لأبو ياسر وسحب الكرسي اللي جنبه وهو يجلس،،تفضل استريح
ابو ياسر:الولد ماغير يصيّح علينا مايبي المدرسة
راشد وهو ينسف شماغه بسرعة اَي كلام وباحراج:مين الطالب لاهنت؟
ابو ياسر:ياسر ماغيره علامك نسيت ونسيتني معه يوم اني غديت يمكم بذاك الوقت(يقصد وقت تعب الولد)
راشد:ايه ايه الله يشفيه ويعافيه بس ياسر طالب جدا ممتاز غريب وضعه!!وش فيه مايبي الدراسة؟!!شيكت عليه بالمستشفى يمكن مشكلة صحية ومن التعب مايبي يروح للمدرسة
ابو ياسر:غديت به يم المستشفى ماهو المستوصف ومابه خلافن ابد مير انه معيي عجزت عنه
راشد زفر:يمكن من زملائه؟
ابو ياسر:لا لا ماهي بحاصلتن ابد وان به شي درينا من وقتها
راشد:والله مشكلة فعلا
ابو ياسر:الصحيح انا غادين يمك ابيك تغدا معي يم بيتي هو يريدك وماله هرجتن قبل إمرضه غيرك انت بلكنه يعلمك وش اللي مروعّه ويفكنا
راشد:ابشر بعزك ياابو ياسر ماطلبت شي
ابو ياسر:بيض الله وجهك عساك عالقوة
راشد:بس ماهو الحين تشوف وضعي مداوم
ابو ياسر:ماعليه ماعليه ماهو بلزومن الليلة لو انه الاسبوع الجاي
راشد:لا والله  ياابو ياسر ابشر ماني بتارك ياسر كذا تروح عليه دروسه ابشر .
..مستشفى المحافظة..
سعود جالس ع كراسي الانتظار بثوبه وشماغه مايدري وينه اصلا وهو حاني ظهره ومتكي بأطراف اكواعه على ركبه وضام يديه ببعض ويطالعها بملامح هم وضيق معتلية وجهه
بتال يمشي بالممر متجه له وبيده أوراق وعلى كتفه شماغ سعود زفر وهو يشوف حالته واسرع بخطواته له
سعود رفع عينه وانتبه له وقف
بتال حط يده على كتفه وهو يهمس:اجلس اجلس،،جلس جنبه،،
سعود التفت يطالعه
بتال ابتسم:بسيطة ياابن الحلال بسيطة لحقوا عليها وماهي مطولة لاتشيل هم شوي ويخرجونها ان شاء الله
سعود تنهد براحة
بتال طالعه:وشلون اختك تحملت الالم؟
سعود زفر وهو يسند ظهره عالكراسي ويطالع لقدامه:القنق ماله طب وانا اخوك
بتال سكت مافهم ولايبي يتدخل اكثر
سعود:ولد خالة
بتال التفت له بسرعة
سعود زفر وهو يلتفت له:اذا انت ولد جميلة فانا ولد خالة
بتال ابتسم وبحماس:وكيفها خالتي عساها بخير والله ذابحني الشوق ابي اعرفها ياسعود
سعود:راحت الله يغفر لها
بتال اختفت ابتسامته:السموحة وانا اخوك ماقصدت والله وانت
سعود قاطعه:ماعليك ملامة وانا اخوك ماعليك
بتال:والله ياسعود اني
سعود قاطعه مرة ثانية:اوجست لك ماعليك ملامة تريح مير جدي لايدري بك يابتال
بتال باستغراب:طيب قول لي ليش ياسعود تكفى ليش
سعود طالعه بتردد
بتال:ياابن الحلال تكلم لاتذبحني بسكوتك ذَا!!
سعود:اللي ادري به ان ابوك غربل خالتي جميلة وجدي فزع بها وثمن غدرت به وغدرت بأمي اللي ياكثر جمايلها بها
بتال قطب جبينه:وش هالكلام؟
سعود يطالعه ساكت
بتال زفر:سعود ادري ان ابوي غربل امي على قولتك اللي مااعرفه وش اللي سوته امي حتى يزعل جدي
سعود:امي وقفت بوجه ابوك مع امك يوم انه الكل كبّها وأمك غدرت فيها ولاراعت الجميلة
بتال بنرفزة:طيب وش اللي سوته امي؟قول لي!!
سعود:امك زوجت ابوي وهي تخبر ان امي ألزم ماعليها ما وجهها بين العرب
بتال يطالعه:كيف يعني؟
جسّار مر من عندهم وهو يجري
بتال انتبه له وفز وراه يجري
سعود وقف ولحقهم
بتال مسك جسّار:وش فيك؟!
جسّار سحب يده وجرى:بأبلغ الدكتور الدايخ عن الجرعة لاتأخرني
بتال:اكيد مريض عنده،،رجع للكراسي بيجلس ووراه سعود،،
.
بخوت واقفة قبال غرفة الطوارئ تروح وتجي وهي لابسة اللاب كوت حق جسّار الواسع عليها ورافعته فوق راسها وزامه أطرافه بمحاولة منها تغطي وجهها وباين معه أطراف شعرها من على جبهتها وعيونها الحمرا اللي للحين تهل دموعها طالعت جسّار اللي يجري لجهتها وجرت له وهي توقف قدّامه:محدن لفى يمي ولااحدن اوجس لي هرجة عن بنتي تكفى علمني
جسّار وهو يسرع بخطواته للغرفة:ان شاء الله طيبة،،دخل وتركها،،
بخوت وقفت قبال الباب بالضبط وهي تنتظر احد يخرج ماحست الا بيد تسحبها بقوة ونزل اللاب كوت من راسها لكتوفها وهي تلتفت للي سحبها اتسعت عيونها:جدي
الجد بادي وهو يطالعها بغيظ وبينفجر منه
غيث بابتسامة من وراه:مااوجست لك انها تدوج وسط الرجال وكذبتني!!
بخوت بدموعها وهي تسحب يدها:يوجس اكذاب ياجد الشاهد الله اكذاب
الجد بادي واقف قبالها يطالعها بحدة
بخوت انرعبت من جدها ورجعت خطوة لورا
الجد بادي عض شفته بقهر وهو يشوف خوفها منه
>
>
..بيت بادي،،
،،صوت دق الباب القوي يهز المكان،،
الجد بادي جالس بوسط الحوش وهو يخيط الخريطة(خيشة يحطون فيها تمر):بنت ياعباير افزعي للباب بينقلع من كثر الدق!!
عباير وهي خارجة من المطبخ وتجري للباب:تامر ياجد ابشر،،فتحت الباب واتسعت عيونها،،بخوت
بخوت بطرحتها الطويلة الي لتحت ركبتها ومتلثمة بها بانفاسها السريعة وسط دموعها دخلت وهي حفيانة بخطوات سريعة:ماأعود له مااعود له،،جلست عند حدها وهي تبوس على يده وتترجاه،،تكفى ياجدي تكفى!!
الجد بادي ترك اللي بيده وهو يزفر ويطالعها:اوجست لش اصبري اصبري
بخوت فكت اللثمة عن وجهها المضروب:راع ياجدي راع عطيتني اياه وهو ماخاف ربه من اول راع وش يعمل بس كل يوم ياجدي راع
الجد بادي وهو يتقطع قلبه عليها:اوجست لش سنة وهاذي هي غدت مابقى غير الشهر
بخوت بدموعها:بيذبحني وهالسنة ماقضت ياجد
عباير مرت من عندهم بملامح محتدة وهي لابسة عبايتها وبيدها سكينتها الصغيرة اللي مخفيتها بكم عبايتها
الجد بادي صرخ بحدة:عباير!!
عباير طالعت جدها:صبرت ياجد وانكعمت وانا أراعيها كل يوم تغدي يمنًا تصايح وثمن يلفي ويتلها(يسحبها)وانت تموت من الغبينة وانت تراعيه وعقبها تمرض
الجد بادي بحدة:انا قلعت سعود هالسنة عنّا لاني خابرن هالغيث الردي مير إنش ابلشتيني مكانه
عباير بغبنة:كود انك احرزت على سعود ماانت بمحرزن علي ابد،،مشت،،
الجد بادي وقف وبحدة:عليم الله ياعباير اخرها مابيني وبينش ان خطيتي هالباب
عباير وقفت وطالعته وبصراخ:جدي!!!
الجد بادي بحدة:انكعمي وبلا!!
غيث دخل وهو يلهث:وينها بخوت؟
بخوت تجمد الدم بعروقها من الخوف
عباير عضت شفتها بغبنة وسط دموعها اللي نزلت
غيث شافها واتجه لها وانحنى لها ومسكها من يدها
بخوت تسحب يدها منه ولاهي قادرة
غيث يسحبها عالارض وهي جالسة ولاكلف عمره ينتظرها توقف
بخوت بدموعها:ياجد ماابي اعود معه ياجد تكفى ياجد
الجد بادي مسك يده وفكها عن بخوت وهو يطالعه بحقد
بخوت فزت واقفة وتخبت ورا جدها
غيث ابتسم بوناسة:ها حيّرت(هونت)؟
الجد بادي وهو يطالعه:مرد هالسنة تخلص ثم يعلم الله ان ارعيتني باول الدرب تهج لدربن مااخبره
غيث كشّر بوجهه ومد يده ومسك يدها وسحبها
بخوت متعلقة بثوب جدها وهي تبكي:لا ياجد لا لاتردني يمّه طلبتك ياجد
الجد بادي فكها منه ودفها لغيث
بخوت ضربت بصدر غيث ودفته برعب منه وهي ترجع لجدها وتمسك يده وبترجي:لاتكبني معه ياجد لاتكبني
الجد بادي ضربها كف
بخوت وهي تطالعه بخيبة وسط دموعها وهمست وبغصتها:جد
الجد بادي بحدة:اوجست لش شهر يابخوت!!
غيث ابتسم وهو يمد يده ويمسك يدها ويسحبها
بخوت وهي تضرب يده اللي ماسكتها وتصرخ:كبني الله اكبر عليك كبني!!
الجد بادي زفر وهو يحس قلبه يتقطع
غيث وقف وهو يرفع يده الثانية بيضربها
عباير جرت له وغرزت السكينة فوق ركبته بكم سانتي بسيطة وهي تطالعه بقهر
الجد بادي ابتسم برضا
غيث جلس عالارض وهو يمدد رجله ويعض شفته يكتم المه
عباير بقهر:انهد انهد ربي يهدك!!
غيث بقهر وهو يطالع بادي:وراك منكعم عنها!!
الجد بادي بابتسامة:مرة ماعليها ملامة!!
غيث صرخ وهو يضغط ع جرحه:بااااادي!!
الجد بادي مد مركوعه ليد غيث اللي فوق جرحه وضغط عليها
غيث ماتحمل المه اكثر صرخ
الجد بادي:عّم عم جعلك للعمى
عباير طالعت بخوت:اغدي مع رجلش ربي بيشغله هالشهر بروحه وانا خيتش!!
غيث مد يده لبخوت:عاونيني
بخوت ماابدت اي رد فعل
غيث صرخ:بخوت
بخوت طنشته وطالعت جدها بدموع:شهر ياجد
الجد بادي:شهر وامزع رموش عيونه كان رفع عينه لزولش
>
>
غيث واقف وراهم:عن قولت ظليمتها ماهو بانا لحالي اللي راعيتش راعي اللي بهالمستشفى كل ابوهم راعوش وانتي غاديتن معه واللهِ العالم وش اللي حاصلن ولاندري به
بخوت صرخت:انكعم!!،،بدموع،،بنتي لو يحصل لها شي مااخبر غيرك ياغيث!!
غيث تكتف وباستخفاف وبدون اي اهتمام لبنته:اللي غديتي معه خليه ينفعش الحين!!
الجد بادي التفت له بسرعة بملامحه المحتدة وهو يرفع مركوعه وضربه ع راسه بقوة:اوجست لك انكعم!!
غيث مسك راسه بألم وهو يطالعه بحقد
بخوت وهي تحس قلبها برد شوي
الجد بادي التفت لبخوت وهو ينزل شماغه من على راسه ويحطه على راسها
بخوت نزلت رقبتها شوي لااراديا من خوفها
الجد بادي لف الشماغ بهدوء عليها وبهدوءه:الزين مايراعيه غير زينٍ يستاهله وانا جدش
غيث بحدة:وانت مطاوعها؟!!كابّها(تاركها)على هواها!!
الجد بادي التفت له وسدد له بمركوعه بكل قوته ع جنبه
غيث انهار من الالم ووضح على وجهه
الجد بادي بحدة وشر:وشو له غادين يم بنتي!!
غيث بعصبية:حميتي اللي غدت بي!!
الجد بادي:اقطع هالخياب اللي توجسه وانت مالك شين عندنا
غيث:ام بنتي!!اللي يطالها يطال بنتي!!
بخوت بغبنة وهي تطالعه:يعقب وبنته تموت بين يديني مااشغلته مااشغله غير الغريب اللي فزع بي!!،،طالعت جدها،،ياابو نشمي مد يده على محارمك
الجد بادي طارت عيونه وهو يرفع مركوعه ويضرب غيث ورا بعض بدون لايعطيه فرص يقاومه وبحدة:اخو نشمي!!
غيث بعد كم ضربة أكلها سحب مركوع الجد بادي بقوة ورماه
الجد بادي تقدم كم خطوة من سحبة غيث وثبت نفسه وهو يطالعه بحدة
غيث بحدة:والله سواد الوجه والعلوم الشينة ذي ان ماأكماها(أخبيها)غير اهل الديرة كل ابوهم يدرون بها ويعملون الواجب والحق بكم!!
الجد بادي رجع يديه ورا ظهره وهو يطالعه بحدة
بخوت دارت الدنيا فيها وهي اول ماجا ببالها بيجتمعون ويرجعونها لذمته بالقوة مدت يديها وهي ترجف ومسكت يدين جدها
الجد بادي:وينه العلم الشين ها؟!!
جسّار خرج من الغرفة وبابتسامة:الحمدلله عدت على خير بس ننتظر تصحى
بخوت ماسمعت شي عن بنتها نهائيا كل اللي يدور ببالها الحين ان معاناتها بتنعاد مع هالغيث
الجد بادي ميل جسمه على جنب وهو يطالع جسّار عن طرف
غيث ابتسم وهو يطالع جسّار:هذا هو الشين بعينه
جسّار كشر بوجهه مو مرتاح لهالادمي ابدا
الجد بادي:تعقب ماهو بعلمن شين هذا رجلها
جسّار اتسعت عيونه بصدمة من اللي يسمعه
غيث بصراخ:يعقب ياخذها بخوت لي لي انا!!محدن يلمس لو هو ظلها
بخوت تخبت كلها عنه ورا جدها وهي تسمع صراخه وتشاهق بصمت وتفكيرها انه بيأخذها معه الحين
الجد بادي شد ع يديها اللي ورا ظهره يصبرها:انت اللي تخسي تاصل لو هو طرف ظلها ياغيث!!
غيث بصراخ مثل المجنون:بخوت لي لي
جسّار كشر بوجهه وهو يطالع تصرفاته باستحقار
بخوت تركت جدها وهي تذكر يوم تخلى عنها وتركها له مشت وهي تجر خطواتها اللي ثقيلة عليها تبي تبعد عن غيث قد ماتقدر
غيث بغبنة:بنتي مالكم بها
الجد بادي بحدته:مالك بنت عندنا!!وانت تنازلت عنها قدام اهل الديرة وادبرت(رحت وتركتها)
غيث وهو بينفجر من الغيظ:بخوت لي لي
الحد بادي بتقطيبة جبينه:معصي مالك شين عندنا طسّ طست عليك اباليس ربي وتهولت بك
غيث طالع بخوت وهي تترنح بخطواتها مشى وراها بسرعة وبصراخه:بخووووت
بخوت ماشالتها رجولها وجلست وهي تغطي اذانيها ماتبي تسمع له صوت وسط دموعها
غيث انحنى لها ومسك يدها وهو يسحبها بقوة
بخوت صرخت بصوت هز المستشفى:سعووووووددد!!!
.
سعود بنهاية الممر جالس ينتظر يخرجون عباير اللي انتهت عمليتها وينتظرونها تصحى من البنج فز واقف والتفت لبتّال وبصدمته:سمعت الصوت؟!
بتال مسك يد سعود يجلسه وهو يشوف فجعته:ياابن الحلال اكيد ناس الله يهون مصابهم
سعود وقلبه ياكله بشك من هالصوت مو مرتاح:لا لا يابتال،،مشى واسرع بخطواته وهو يتلفت حوله مايدري وين يروح لكن هالصرخة ماترتاح لها ابد،،
بتال مشى وراه بخطوات تشابه خطواته بنفس السرعة
.
بخوت تشاهق برعب من غيث
جسّار وقف عند بخوت وهو ماسك يد غيث وضغطها بقوة وهو يطالعه بحدة ثم التفت لرجل الأمن اللي جا عندهم على صرخة بخوت وبنبرة عالية:اتصل بالشرطة الحين
غيث سحب يده من جسّار بقوة:تعقب لاانت ولا الشرطة تأخذونها مني!!
الجد بادي بتهديد وهو يوقف بينه وبين بخوت:طسّ ياغيث ولا ورب الكعبة اني لااخلي ابوك يدس وجهه عن الرجال من شين فعولك!!
سعود اللي واقف على مسافة منهم وشاف غيث وعرف صاحبة الصوت وعرف ذاك الزول المكروه لقلبه وجرى له بكل سرعته وهجم على غيث بجنون وهو يبي يطير من حقده المتراكم سنين لو شوي
الجد بادي اتجه بمركوعه وأخذه من عالارض واكتفى يطالع اللي يصير بهدوء
بتال وجسّار مسكوا سعود بعد معاناة وابعدوه عن غيث
غيث وهو يمسح أنفه وفمه الدامي بطرف كمه
الجد بادي وقف قباله:طسّ ولا يعمل بك اقرد طسّ
غيث وقف وبصراخ:والله ان عطيتوها لاحدن بعدي ذبحتها وذبحته معها،،مشى بخطوات سريعة مبتعدة،،
جسّار وبتّال تركوا سعود
الجد بادي التفت على سعود بملامح محتدة
سعود نزل عينه للأرض بعد ماطالع نظرات جده
الجد بادي اسرع بخطواته لسعود ووقف قباله
سعود مارفع عينه:ياجد
الجد بادي ضربه ع كتفه بالمركوع بقوة وبغبنة:انكعم ياسعود انكعم!!
.
.
<اللهم صل وسلم على نبينا محمد>
.
.