راعوث :- كعدت الساعه بالخمسه اشوف نسرين يمي فتحت عيوني على وسعهن هاذا كله حلم لا لا راعوث مو حلم مو حلم وين اهلي كعدت واباوعلها ضلمه واشوفها نسرين ضربت وجهي بايدي حيل حتى اصحه ادنيت لوره وكمت ابجي بصوت ناصي وارجع لوره
افراح :- هاا يمه ها راعوث اسم الله على اسمج يمه اني افراح يمج شبيج
راعوث :- حضنتها وابجيي ضميت راسي بصدرها رجعت باوعت على الشفتها نسرين طلعت شمس بقيت بحضن افراح وابجي وهيه تبوس بيه وتسمي عليه وتهدأني
افراح :- جوعانه اسويلج شي تاكلي عطشانه تردين مي تغسلين طلعين بره شويه
راعوث :- مخنوكه طلعي وياي بالحوش
افراح :- كمت لبست قمصله اخذت قمصلتها اريد البسها ماقبلت
راعوث :- محتره عفيه ماريد
افراح :- خاف تبردين وتتمرضين
راعوث :- لا اخذيها وياي اذا بردت البسها
افراح :- طلعت الدنيا فجر هستوها طلعت الشمس وغيوم سوده صوت عصفور يزقزق فوك بيتنه كعدت راعوث على الكرسي لمت رجليها لصدرها وحضنت روحها وصافنه على الكاع كعدت يمها وحايره احجي وياها بموضوع الناس الي اخذوها لو لا أردفت هيه ومدنكه بصوت ذبلان
راعوث :- شصار بالانفجار انتي وين جنتي
افراح :- خاف تعبانه بعدين نحجي بهاي السالفه انسيها يمه
راعوث :- لا احجيلي
افراح :- بس جاوبيني هاي ايدج مين مكسوره
راعوث :- بالانفجار
افراح :- سوده عليه جعلها بيه ولا بيج والله اني الصارلي مستحيل انساه جنت واكفه اكلب بالملابس وماهيس الدنيا انكلبت كلاب صوت الصريخ والعالم مخبوصه وداعت عيونج واني بالي كله يمج عليه واكع طابوك وافكر بيج راعوث وين وينها اريد اكوم ادور عليج بس ماكدر اوكف على حيلي بالانفجار وكع نص الحايط مال المحل الحمدالله اكو الملابس معلكات فوك صارن عليه بس تأذيت بضهري وراسي المهم اني وغايبه عن الوعي احس روحي انطق باسمج وبعدها صار ضلام دامس صحيت لكيت نفسي بالمستشفى واخواتي وابوي حوالي بسرعه كمت من فراشي اصيح راعوث وينها اباوع ابوي يبجي والشرطه بكل مكان بالمستشفى كالي ابوي راعوث مالكيناها واني اتخبلت وداعتج املخ بروحي ودك على راسي واصيح اريدج كلت متي رجف صوتي ماصدكت بعدج عايشه احمد الله سبحانه وتعالى هوه وحده يعلم شصار بيج يابعد روحي ييمه بقيت لا اكل ولا اشرب ولا انام عدل كل وقتي على المصلايه ادعي ربي يرجعج بالسلامه وبابا بالمركز اربع وعشرين ساعه الشرطه خبرت جميع المحافظات لان دورنه عليج بغداد كلها ومالكيناج صار عدهم شك انو واحد خاطفج فـ خبرو كل المراكز والحمدالله رجعتيلي سالمه احمد ربي واشكره الف مره انتي سولفيلي شصارلج
راعوث :- رحت على محل اكسسوارات وصار الانفجار مادري مادري ناسيه شصار بس اتذكر فجعت العالم وصرخة الجهال والنسوان الوجع الي بجسمي صوت الاسعاف بعدها غبت عن الوعي من صحيت شفت خيمه ونسوان عبالي ناس يساعدوني حجن وياي خفت منهن ردت اشرد ضربتني وحده وحجت عليه وكالتلي ماطلعين منا لو تموتين خوفتني بقيت ابجي ونزفت من الدوره اخذتني بنيه اسمها نسرين مادري هسه هيه وينها حبابه اخذتني للحمام يخوف وماينقفل الباب واكلهم مو طيب لبستني فستان كصير ومفضوح واني ابجي ولا يهتمولي وطلعت كعدنه بالخيمه تقرب مني رجال وتلمسني بس ضربته وردت اشرد ماكدرت لزموني وايمان كتلتني لان شردت وتفلت بوجها هيه زادت وهسه دورتي تأذيني وانزف هواي من الضرب على ضهري وبطني نمت بحضن نسرين ولصبح اله نمت واني افكر بيكم وخلتني اركص ونزفت هوااي مادري جم ساعه اركص اخر شي تخربطت ووكعت واخذتني ايمان لغرفة وطب وياي الرجال غزوان يكمش بيه بسرعه ضربته وشوهت خلقته بدفرات يخوف اخاف منه
افراح :- صخام الصخمج يا افراح يمه كل هاذا صاير بيج ومادري ولج من جاي اسمعج كلبي يتكطع شصاير بيج راعوث
راعوث :- مسحت دموعي النزلت ، بعدين اجو الشرطه واخذوني كعد يحجي وياي هاذه الرجال العملاق العصبي وكلتله بابا ناصر ومنطقتنه هوه عرفني مدري شنو ساعدني وجابني الكم
افراح :- والله العظيم مرت علينه فاجعه الله ليشوفها الواحد لو بعد باقيه جم يوم ماترجعيلي لا والله يمكن اني ميته
راعوث :- شصار بـ ماهر
افراح :- صفنت ثواني ، صدك تحجين يا ماهر اني ويني وينه كرهته اول ما طب علينه اجت المشاكل ويا
راعوث :- دنكت راسي واني افكر هاذا كله الصار بسببي تذكرت ابو شوارب اخذت نفس رفعت راسي لسمه احس كلبي مقبوض مستحيل اكدر انسه الصار بسهوله جوعانه بس اكو شي يمنعني اكل جسمي كله يوجعني نزلت دمعه من عيني وشهكت افراح لازمه ايدي وما حاجتني خلتني ابجي براحتي بديت ابرد باوعت على افراح عاقجه حواجبها بقهر من باوعتلها ابتسمت
افراح :- يممه حبيبي شنهاي الخشم الأحمر لو الخديدات اروحلج فدوه اخيتي وبنيتي راعوث
راعوث :- احس داير ما داير شفايفي يحركني كمت وكامت افراح وياي طبيت غسلت وجهي ونمت بحضن افراح بقت تسولف وياي لمن غفيت بحضنها اكيد ما ارتاحيت بالنومه بقيت اسمع صوت بجي وطعم اللفة الاكلتها ويا ابو شوارب جسمي يفزفز وحده اسمع صوت الساعه الانفجار صوت ايمان ضحكتها كل هاذا محفور بذاكرتي مستحيل انساه…
أنت تقرأ
راعوث
Romanceالقصة حقيقية .. فتاة تقع في يد رجل ذو شخصية قوية وشجاعة، حيث أنه لا يهاب شيئًا سوى الله سبحانه وتعالى، فإذا أراد أن يحقق حلمًا يبذل ما بوسعه حتى يحققه، فالإستسلام لا يعرف له معنى .
