الجميلة والوحش

الجميلة والوحش 30

#الجميلة_والوحش
الحلقة 30

قيس: ليلى أنا أسف لو وجعتك في شكلي لمالياش ذنب فيه هذا قدر أني نعيش بالشكل هذا للأسف الشديد مافيش حد يختار شكله أو جنسه أو أهله كله مقدر من الله وربي ابتلاني بهذا الاختبار أني نعيش بشكل وحش زي مايقولوا عليه الناس والكل يشمئز من شكلي حتى وأني مش بيدي الشي هذا نبيك تهتمي بولدي هو ماليشي ذنب ببوه وربي يحفظك ويسعدك مع السلامة

ليلى: تشوف للرسالة لقرتها ممكن فوق من عشر مرات يعني خلاص قيس سيبها بعد ماكانت ناوية ترجع وتعود من الشيطان وتقبل بيه زي ماهو قبل بيها وبعماها لكن شن ينفع الندم خلاص تمت قعدت تبكي على أيامها وعلى قيس وعلى ولدها كأنها سمعت بخبره مات
شجن: جتها تجري خيرك ياليلى شن فيه عالصبح
ليلى: قيس سيبني ياشجن
شجن: شبحتلها بالك تبيه يقعد يجري في جرتك زي المراهق ويبوس ايديك ورجليك عشان ترجعيله
ليلى: اسكتي ياشجن ماتزيديهاش عليه
شجن: هذا كلام الحق ياليلى ليك قاعدة هنا شهر وحاطة اللوم عليه وعادي شن تبي مازال أنتي الغالطة
ليلى: بس أنا وجعتني منه ومن نعيمة ومن الكل وقاعدة ناري مابردتش بس عفست على روحي وقبلت نرجع وقت هو سيبنا ومشي ومافكرش في يوم جي شاف حتى ولده معقولة حقد علينا للدرجة هذي
شجن: حاجة ماشفتيهاش بعينك ماتقدري تتكلمي عليها ياليلى وأنتي ماتعلميش بحاله روفي عليه شوية
ليلى: وأنا من بيحس بحاله وشن نحس ومن بيروف عليه فوق ماهو غالط طلعتوا الغلط مني باهي نقول مافي حد قالي وهو عابي إنه قالولي باهي عام كامل مافيش يوم جاب طرف دوة عالموضوع ماحكالي شي لا على أهله لا حرقة الحوش لين سمعتها من خالتي فاطمة
شجن: أنا قاعدة نقولك ماتعرفيش شن صاير معاه ياليلى مرات مايبيش يدكر مايبيش يرد الوجع

ليلى: ناضت وخدت ولدها ومشت لدارها وقعمزت فيها ماعاد طلعت
لكان في المدرسة روح وجي الليل وجي الصبح وجي الليل واشرقت الشمس وغابت الشمس وهي تطلع للضرورة بس وتخش وماتطلم في حد

قيس: مقعمز في شقة مطلة على شوارع نيويورك ويقرا في كتاب ودافن روحه في كتبه رفيقات دربه
رن الجرس ومشي فتح الباب
سراج: ياراجل معقولة تجي وماتقوليش
قيس: خش وسيبه يفتفت بروحه
سراج: خش وراه وين عيالك
قيس: ولا كلمة رجع لمكانه في البلكونة
سراج: خير شن فيه ياقيس احكيلي وين زوجتك وولدك
قيس: يتكلم وهو خانقاته العبرة وحزين سيبتني ياسراج من يوم رجعنا لليبيا
سراج: لا هكي هلبا معقولة عشان شكلك سيباتك
قيس: من حقها ونستاهل أكثر من هكي أنا نستاهل مالي ومال الزواج وفتح حيشان يبي أهله الزواج مش زيي أنا المعلول
سراج: أنت شن ناقصك حتى ماتتزوج ياقيس ساد الكلام الفارغ لتدوي بيه ياما منهم تزوجوا وحالتهم أحرف من حالتك بعدين أنت جوهرة ياقيس تساعد الأشخاص حتى لو ماتعرفهمش أنا نحييك على إنسانيتك خلي مميزاتك تغلب على عيوبك وخليك متفائل