#قصير_تعويضي
#طوبى "جنة طوبى"
#جمان_فريد
#الجزء_السابع_والستين"مقاومه الأخير"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الإستغفار
عن شَدَّاد بْن أَوْسٍ رَضِيَ اللَّهُ عَنْهُ عَنْ النَّبِيِّ صَلَّى اللَّهُ عَلَيْهِ وَسَلَّمَ قال : ( سَيِّدُ الِاسْتِغْفَارِ أَنْ تَقُولَ : اللَّهُمَّ أَنْتَ رَبِّي لَا إِلَهَ إِلَّا أَنْتَ خَلَقْتَنِي وَأَنَا عَبْدُكَ وَأَنَا عَلَى عَهْدِكَ وَوَعْدِكَ مَا اسْتَطَعْتُ ، أَعُوذُ بِكَ مِنْ شَرِّ مَا صَنَعْتُ ، أَبُوءُ لَكَ بِنِعْمَتِكَ عَلَيَّ وَأَبُوءُ لَكَ بِذَنْبِي فَاغْفِرْ لِي فَإِنَّهُ لَا يَغْفِرُ الذُّنُوبَ إِلَّا أَنْتَ ) ، قَالَ : ( وَمَنْ قَالَهَا مِنْ النَّهَارِ مُوقِنًا بِهَا فَمَاتَ مِنْ يَوْمِهِ قَبْلَ أَنْ يُمْسِيَ فَهُوَ مِنْ أَهْلِ الْجَنَّةِ ، وَمَنْ قَالَهَا مِنْ اللَّيْلِ وَهُوَ مُوقِنٌ بِهَا فَمَاتَ قَبْلَ أَنْ يُصْبِحَ فَهُوَ مِنْ أَهْلِ الْجَنَّةِ ) رواه البخاري
🌿🌿🌿🌿🌿🌿🌿🌿🌿🌿🌿🌿🌿🌿🌿
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃قال ابن عبد البر المالكي في بهجة المجالس: «الْبنون نعم، والْبنات حسنات، واَللّه -عز وجل- يحاسب على النّعم، ويجازي على الحسنات.»🍃
--------------------------------------------------------------------------
مقعمزة ع سريرها..
تعقد في صوابعها واحد واحد وهي تردد..
"اللهم اغفر لي وتب علي"
لين كملت سبعين استغفار...
بعدين ناضت وهي تقول..ياحي ياقيوم..
ومشت للباب فتحاته وطلعت..
كانت تشجع في روحها وتهيئ في نفسها...
وصلت في باب دار المعيشه..
خدت نفس بعدين وقفت قدامه وقالت..
طوبى؛روح بوي؟
كل من كان في الدار..
عمتها وخواتها وبنات اختها شبحولها..
وردت عليها اختها الكبيره وهي تقول بحزن؛ايه وقاعد في المربوعه الخارجيه..
هزت راسها وبللت شفاهها بعدين قالت؛فردوس غرفه تعالوا معاي..
الزوز شافوا لبعض..
ومطيره عيونها ع طوبى وهي تشوفلها بنظرات متأمله..
طوبى:هيا بالله عليكم..
غرفه:تعالي نوضيني فردوس..
ناضت فردوس ومشت لأختها ساعدتها تنوض توقف..
بعدين مشوا الزوز للباب..
طوبى مشت قبلهم وهما لحقوها..
اريج بقلق؛زعمه شن في تاني؟
وآلاء تشوفلها بنفس القلق..
مطيره:خير بنتي خير..
🍃وهما الثلاثه لما كانوا ماشيات بيطلعوا للمربوعه الخارجيه..
طوبى:من حقنا نتكلموا يابنات كلنا لينا حق في المطحن..
فردوس بتوتر:ياوخيتي مانقدرش ناقش بوي..
غرفه؛عادي شن فيها كان ناقشنا في النهايه لمصلحته هو..
طوبى؛ايوه..لمصلحته هو يافردوس..
وين وصلوا في باب المربوعه..
وقفوا قدامه..
غرفه بدت تتوتر..وفردوس مش قادرة تتشجع..
طوبى شافتهم كيف باين عليهم الخوف..
تنفست بنفاذ صبر..
بعدين قدمت للباب..ودقت عليه..
"خش"
خدت طوبى نفس عميق وطلعاته بعدين خشت..
وخشت وراها غرفه ولحقتهم فردوس..
طوبى وين شافت بوها مقعمز يعدل في الراديو متاعه قالت..
بابا..
رفع عيونه وشافلها..
هي حست بشي من الرهبه..
هالاحساس مايجيهاش وين يشوفلها بوها قبل نهائي..
بس هالمرة لأنها بتخش معاه في شي يشبه المواجهه ولأول مرة..حست بالخوف والرهبه..تعرفه لما يعصب كيف يولي مايقدر حد يناقشه..حتى سدره كانت تنزل عيونها للأرض وتلتزم الصمت...
هو مرر نظره عليهم وقال؛خيركم واقفات هكي!؟ خشوا قعمزوا..
الثلاته هزوا روسهم بآيجاب ومشوا قعمزوا وكانوا في قمة التوتر..
قعدوا يشبحوله وهما ساكتات..
وهو يشوفلهم بإستغراب وقال؛صايرة حاجه؟
التلاته مع بعض قالوا..لالا..
رفع حواجبه شويه بتعجب وهو ساكت..
طوبى بلعت ريقها وتشجعت وقالتله..
بوي..علاش سكرت المطحن من غير ماتاخد راينا؟
هو عقد حواجبه بإستغراب اكثر..
طوبى:بوي المطحن هدا مطحن العيله ولا؟! وحني من العيله مفروض خبرتنا وخديت راينا مرات يكون عندنا حل تاني غير انكم تسكروه..
لطفي حط الراديو ع تركينه وقال:زي شني الحلول اللي عندكم؟
فردوس وغرفه قعدوا يشبحوا لطوبى..
هي سرقتلهم نظره بعدين شبحت لبوها وقالت..
اني عرفت قبل فترة المشاكل اللي صايرة للمطحن وعلاش القهوة متاعنا الاقبال عليها خف او شبه انعدم...
لطفي:ماعندناش امكانيات تخلينا نكملوا في الصنعه هادي
.وزي ماتعرفي وانتي بالذات الأدري قهوة عيلة شنيبه مكتسحه السوق وماخلت لحد حصه..
طوبى استفزها كلامه وقالت..بالله شن كانت قهوتهم من قبل! تنحط مقارنه مع القهوة متاعنا!؟ الصنعه هادي كانت لينا قبلهم
تفاجئ لطفي في طريقة كلامها..
وفردوس نخصتها من غير مابوها يلاحظ..
فنصت وفهمت ع اختها وقالت :المهم توا خلينا في المطحن متاعنا..بابا اني والبنات قعمزنا بينات بعضنا وفكرنا في حل..
رفع حاجبه وقال:اللي هو؟
طوبى:بنساهموا في المطحن..بنشروله مطاحن جدد ونصينوه..
ابتسم تهكما وقال:عال والله..لطفي الواعر يخلي بناويته يفتحوله مطحن جديد؟
غرفه طلعت عن صمتها وقالت؛وين المشكله بوي؟
لطفي؛تبوا الناس يقولوا طاحت بيه لدرجه انه مد يده لبناويته..
فردوس نست خوفها وقالت:شن الكلام هدا بوي معقوله هكي فكرت فيها!؟ بعدين بوي راك تنسى الناس شن كانوا يقولوا ع سدرة لما شدت المطحن مافي حد ماحسدكش عليها..
لطفي:في فرق..سدره ماحطتش قرش واحد في المطحن خدمت فيه لكن ماصرفت عليه شي حتى لما جت بتاخد من ورثها اللي خلاه الفاندي الله يرحمه بش تحطه في المطحن حلفتلها عليهم..
طوبى بنبرة هاديه حنونه:بابا..المطحن هدا صرف علينا كلنا وكبرنا مفروض علينا نحافظوا عليه..
غرفه؛مزبوط بوي..وبعدين مش ضروري الناس يعرفوا ان حني اللي ساهمنا فيه..
لطفي:لكن اني نعرف...
تنهدت طوبى بعدين قالت؛بالله عليك بابا ماتعقدهاش قتلك بكري المطحن لينا كلنا رجاله ونساوين وشن ماحطينا فيه مايقدر حد يقول شي اصلا شن بيقولوا مش عارفه!..
لطفي هز راسه وقال؛باهي من وين؟..
قعدوا يشبحوله وهما ساكتات..
هو عاود سؤاله بصيغه تانيه..
الفلوس اللي بتحطوها ع المطحن من وين.بتجيبوها؟
غرفه؛اني عندي حاجه ذهب بنبيعها..
هو ضحك متهكما وقال..الله اكبر بنبيع بناويتي ذهبهم هادي اللي قعدت..
غرفه:وخيرها طوبى باعت ذهبها ع خاطر علاج سدره وماقلت شي!؟
لطفي:من قالك ماتكلمتش!؟ تكلمت وعاركت..لكن هي في النهايه دارت هكي لأختها مش ليا اني..
طوبى:بابا نعاود نقولك المطحن متاعنا كلنا
شبحلها بتضييقة عيون وقال؛وانتي من وينلك؟
طوبى اربكها السؤال وردت تقول؛من فلوس المدرسه.
لطفي؛من فلوس المدرسه ولا من فلوس الجالي اللي جابهم يومها؟
فردوس:لا الجالي جاب الفلوس لحاجه تانيه بوي طوبى تبي تشري دبش وحاجات وهو عطاها باش تشري..
سكت شويه وهو يشوف لطوبى بنظرة ارتياب..
وهي كانت تحاول.تخفي خوفها وتوترها..
تنهد بعدين قال:نوضوا اطلعوا..
فردوس وغرفه شافوا لبعض بعدين شبحوا لطوبى.
وهي شافتلهم بضيق..
لطفي؛قلت نوضوا اطلعوا..
طوبى:قصدك بتفكر بعدين بترد علينا ولا..
هو بشي من العصبيه قال؛اطلعوا..
ناضوا غرفه وفردوس ومشوا بيطلعوا وهما مضايقات..
وطوبى ناضت بعدهم بالسيف وهي حاسه روحها مخنوقه بدمعتها..
مشت بإتجاه الباب..لكن قبل ماتوصل فيه وقفت والتفتت شبحتله وقالت..
اخر كلمه بنقولهالك وبالله عليك فكر فيها..
ماباش يشبحلها لكن قعد يسمع فيها..
طوبى بحزن..
فكر في سدرة بعد ماتفيق وتروح تشوف المطحن تسكر كيف تكون ردة فعلها..
ماردش عليها حتى بنظره..
هي قعدت تشوفله بنظرات حزن للحظات..
بعدين لفت ومشت طلعت من المربوعه وسكرت الباب..
بعد ماطلعت..
هو مسح بيده ع شعره وخلاها ع راسه من الخلف وع وجهه باديه ملامح الألم والحسرة...
🍃برا..
طلعت طوبى ولقت خواتها واقفات قراب من باب الحوش..
وصلت فيهم..
وقالتلها فردوس؛سكر راسه نعرفه..
طوبى:وحتى حني نسكروا روسنا..
غرفه؛فكك من المشاكل طوبى يحرج منك ويقاطعك بعدين تعرفي بوي..
طوبى:ماتخافيش نعرف شن ندير بش نخليه يرضى..
فردوس:شن في فراسك؟
حطت ايديها في نصها وهي تمرر في نظرها قدامها وتفكر..
بعدين نزلتهم وشبحتلهم وقالت..تعالوا معاي نمشوا لحوش جدي..
غرفه؛اني مانقدرش..
فهمت عليها طوبى وقالت؛مش مشكله خشي ارتاحي تو نمشوا اني وفردوس..
غرفه تنهدت وقالت؛ان شاء الله جدي مايسكرش راسه حتى هو..
فردوس بقلق؛ان شاء الله..
طوبى هزت راسها وقالت:هي تعالي فردوس..
ومشوا الزوز..
وغرفه قعدت معاهم بعيونها لين خشوا من الباب الفاصل..
بعدين قالت؛ياربي يسرها يارب..
ولفت ومشت خشت للحوش..
🍃🍃🍃🍃🍃
وفي جنان حوش المهدي..
كان مقعمز مع صديقه التارقي ويحكيله عن حديث الساعه..
قفل مطحن جنة..
المهدي بضيق؛بنتي قالتلي صارت فيهم حاله وقعدوا يبكوا تقول ميتلهم حد..ياراجل دماغي انشل من التفكير كيف كيف الحاج لطفي هان عليه كيف هان عليه تعب سنين وسنين!..
فرك جبهته بعدين زفر وقال..اصلا سؤال زي هدا مفروض مانسألاش وضعهم واضح..وبحسرة كمل يقول..الله ياخد قلة الحيله..لو نعرفه يقبل اني نساعده والله مانوخر لكن مستحيل يرضى ومرات حتى يعتبرني نهين فيه ولامتشمت..
واني من قبل عندهم مش مقبول..
سكت وشبح لعبد القيوم لقاه سرحان..قال..
تارقي..
لارد..
المهدي:عبد القيوم..
استاقظ وشبحله..
المهدي؛تسمع فيا شن كنت نقول؟
هز راسه وقال؛ايه..
المهدي؛باهي خيرك ساكت؟
عبد القيوم؛شن بنقول غير ربي يفرجها عليهم..بس انا في حاجه محيرتني!؟
المهدي؛اللي هي؟!
عبد القيوم؛ولده..حقيته اليوم كيف كان عادي جدا ولاكأنه اللي صار يعنيه!؟وكأنه مشمت..
المهدي؛مانقدر نقول شي في الموضوع هدا..
عبد القيوم؛انا مانبيش ندوي عن امور شخصيه..بس اللي شفته منه اليوم دار في حاجه جوا كدرتني بزياده..والله تسكيرة المطحن اهون ع الحاج لطفي من تبحيته ولده فيه وهو فرحان باللي صاير معاهم اليوم..قريب نحلف ان جيته اليوم بالذات كانت مقصوده..
المهدي وهو يفكر في كلامه؛تبي تقول انه عارف؟
رفع عبد القيوم حواجبه وهويشوف فوق بعدين عقدهم وشاف للمهدي وقال..انت شن رايك؟
سكت المهدي وهو يفكر في كلام عبد القيوم..
🍃🍃🍃🍃🍃
"تي شن تحسابيها صبلي نشرب"
طوبى:واني ماندويش بعبط حسين عارفه روحي شن نقول..
علي:اسكت شويه خليها تكمل كلامها..
سكت حسين وهو يشوف لطوبى بإمتعاض..
وطوبى كملت تقول:جدي اني دارسه الموضوع من كل من جوانبه ومفكره فيه كويس وعارفه المطحن شن يبي بش يتحسن وضعه حني بنتعاونوا كلنا بش نصلحوا الوضع ومانبيش نقول نردوه زي ماكان ع الأقل نخلوه يوقف ع رجليه وربي بعدين ييسرها..
سكت علي وهو يفكر..
وحسين يشوف لطوبى اللي كانت تراجي في رد جدها..
واميمه وفردوس يتبادلوا في نظرات القلق والتوتر..
شويه طوبى شبحت لأميمه وقالت:تكلمي اميمه قولي رايك مانكش برا الموضوع انتي..
شبح علي لأميمه..
اميمه حمحمت بعدين قالت؛ربي يعلم قداش تسكيرة المطحن وجعتني وتمنيت لو نقدر ندير شي..وبصراحه جدي اني فرحانه باللي فكروا فيه البنات..وعندي مبلغ دساته ليوم زي هدا بنحطه معاهم..
ابتسمت طوبى وشافت لجدها وهي تقول..
شن قولك جدي؟
مرر نظره عليهم وثبته ع حسين وقال..
قول اللي عندك؟
حسين؛شن بنقول مع الاغلبيه الساحقه..وشاف لطوبى برفعة بحاجب..
هي شبحتله بطرف عينها بعدين شبحت لجدها وقالت برجاء..
هاه شنو جدي!؟..
شد ذقنه بيده وهو يفكر بعدين هز راسه وقال..
يصير خير..
ابتسموا البنات بفرح..وطوبى هدا وين ارتاحت لأنها تعرف مدى تأثير جدها ع بوها...وكان باين عليها من جدها انه فرح وتحمس لكلامهم..
🍃🍃🍃🍃🍃
الساعه 10:00ليلا..
روح محمد ولد محي للحوش..
لقي امه مقعمزه في الصاله وهي تتكلم بالتليفون..
اشرلها انه خاش بيرقد..
هي هزت راسها وقالت؛اها كويس..
هومشي طول لداره..وخلاها لاهيه بمكالمتها..
خديجه؛وطوبى اتصلت بيك وباركت..
"لا وعندها حق"
خديجه بإنزعاج؛نغيروا موضوعها بش ماتصدعليش راسي..المهم..كان يبي الزواج قبل رمضان ابدي وتي روحك من توا..
"ايه هدا علاش كلمتك نبي تطلعي معاي غدوة"
خديجه؛تمام نشوف محي ونرد عليك...
🍃🍃🍃🍃
"بلال"
وبلال وهو يعلق في القامجو متاع الخدمه نهاية الدوام..التفت لولد صاحب الورشه اللي
لقاه خاش عليه بسفرة فيها سندويتش وكوب عصير وهو يقوله:خود ياغالي عشاك..
بلال؛كلفت نفسك..
ضحك وقال:ع شني ع نص كبده وطاسه عصير!.
ابتسم وقال:جزاك الله خير..
هز راسه وقال:ان شاء الله..يللا صحتين حبيبي..تصبح ع خير..
بلال:تصبح ع خير..
ومشي للأستديو اللي ساكن فيه وخشله من الباب الفاصل بينه وبينه الورشه..
وولد صاحبه الورشه تنفس بقوة من التوتر..
بعدين مشي طلع منها ونزل السيرانتي...
🍃🍃🍃🍃🍃
وتعدي ساعات الليل الأول لين يوصل لنصه..
الشارع هادي..مافيه حد...
جت سيارة تمشي بهدوء ودرت قدام الورشه..
نزلوا منها جماعة محمد وهو لحق عليهم..
كانوا حذرين جدا ويراقبوا في الوضع..
ولد صاحب رقى السيرانتي شويه...
وجماعته خشوا وهو تانيين ظهورهم...
وهو قعد برا..
واحد منهم فتح ضي بيلا ومشي للباب الفاصل وهما لحقوه..
وصل في الباب وفتحه بحذر..
بعدين لبسوا الاقنعه وخشوا..
وقعدوا يتحركوا بحذر وهدوء وسط الاستديو..
محمد مشي لدار بلال لقاه راقد في وسطها اشر لواحد منهم وهدا كان شاد حديد يبيه يجي يوقف قدامها..
مشي وقف قدام الدار..
وهما قعدوا يفتشوا في الحوش وبدوا بمهمتهم الدنيئه..
قضوا الشاشه..
وبعدين خشوا للكوجينه وسرقوا منها الاجهزة الكهربائيه اللي كانت هديه من التارقي..
خلاط..وست البيت..وفرامه..وحتى ماكينة التوست..
وكله كان قاعد في الصناديق..
بعد ماخلصوا من الكوجينه..
خشوا للدار.
اللي شاد الحديده وقف بيها عند راس بلال..
والباقي قعدوا يفتشوا في الدار..
لقوا فلوس داسهم بلال في دولابه تحت حوايجه خدوهم..
خدوا مكواة جديد كان قاعد في صندوقه..وحتى تليفونه اللي كان اصداره قديم ماسلمش..
وهدا كله وبلال كان غارق في النوم..
☘بعد ماخدوا كل ماخف وزنه وغلا ثمنه..
طلعوا الحاجات بحذر بالغ...
وبعد ماكملوا..
طلع بيهم ولد صاحب الورشه من الشارع..
ومحمد ولى لحوشهم..وماحد حس بيه لما طلع ولما روح...
🍀🍀🍀🍀
وبعد مرور اخر ساعات الليل..
وآذن الفجر...
بدي الشارع يتعبا بالحركه والاصوات..
كعادة اغلب الرجاله يصلوا الفجر جماعة في الجامع...
الغريب..
ان بلال اللي تعودوا بيه يكون في اول الصف ماكانش موجود..
صلوا..وكملوا صلاتهم وبلال ماجاش..
الوضع كان مقلق للجميع بدون استثناء..
وع راسهم عبد القيوم ولطفي وبوه اللي مشوله طول للإستديو اللي قاعد فيه..
دقوا ع الباب الخارجي..مافيش رد..
وقلقهم زاد لدرجة انهم اتصلوا بصاحب الورشه..
بعد ساعه..كان عندهم هو وولده...
فتح الورشه وخش..ومنها خشوا للأستديو...
صاحب الورشه؛بلال..
نادي بعده لطفي..بلال...
وانجبروا يمشوا يخشوا عليه الدار لقوه قاعد في فراشه..
قدموله صاحب الورشه ولطفي..
وعبد القيوم قعد في الباب وهو يشوفلهم بخوف..
صاحب الورشه قعد ينوض فيه وهو يقول؛بلال..بلال..
وهزه وهو يقول بلال..
تحرك بلال وبدي يفيق..ولما وعالهم وشافهم كويس..
ناض قعمز وهو يحاول يصحصح وقال..
شنو في!؟
؛خيرك راقد لتوا مريض؟
هو بإستغراب؛كم الساعه؟
لطفي:سبعه ونص..
انصدم بلال وقال؛نعم!..
وعبد القيوم غير نظره عنه وشاف لوسط الحوش..
ركز ع مكان الشاشه اللي كان فاضي..استغرب وقال..
بلال وين الشاشه؟
بلال وهو ينزل من السرير قال؛في مكانها..
وجي بياخد نقاله مالقاش كان مكانه..
استغرب بشده وقال..
حطيته في هدا المكان قبل نرقد!
لطفي بتساؤل؛شن هو؟
بلال؛هاتفي!؟
عبد القيوم:لاالشاشه قاعده ولاالهاتف!
وسرعان ماعرفوا ان الاستديو انسرق..
وبعد مادوروا فيه كله تأكدوا اكثر..
كانت صدمه كبيرة لبلال..
واللي حواليه تأسفوا جدا للي صارله..
🍃🍃🍃🍃
وسرعان ماانتشر الخبر..
ورجعت انفتحت سيرة سرقة حوش الجعفري..
🍃في الورشه..
المهدي؛لاباب الورشه قفله مكسورة ولاباب الاستديوا الخارجي مكسور..يعني اللي خش لحوشك يابلال حد تعرفه كويس..
بلال وهو مستوعب:من يدير هكي؟!
المهدي:انت اللي تعرف..
صاحب الورشه؛زيد فكر من يخش عليك ويطلع؟
بلال؛اصدقاء لايمكن الشك بهم..
ولد صاحب الورشه قال؛معليشي بلال وسامحني فيها الافارقه اللي مصاحبهم سمعتهم مش مزبوطه..
بلال؛لاغير ممكن..هما كويسين جدا..مايديروهاش..
:لاسامحني فيها اني سامع عليهم دوة وبعدين راهم مش مسلمين يديروا كل شي..
بلال؛غير مسلمين ولكن عندهم اخلاق مايدروهاش..
المهدي؛باهي فسرلي اللي خنبوك كيف خشولك؟
ماعرفش بلال بشن يرد ع المهدي..
ولد صاحب الورشه:المده الاخيره سمعنا بعصابة الافارقه اللي مشطت كذا حوش.
بوه قال؛ايه حوش نسيبي خنبوه..
المهدي؛حتى جيران الجالي خوي صار معاهم نفس الشي..شوف بلال حني بنبلغوا الجهات الامنيه ونخلوهم يشوفوا شغلهم وبتقوللهم كل شي..من يخش عليك ويطلع..
بلال هز راسه بالموافقه وهو مضايق لأبعد حد..
~~~~~~~~~
محمد وهو قدام واحد المقاهي بعد ماهرب من المدرسه كالعاده..كان يكلم في جماعته بالتليفون..
هاه شن صار معاكم..
"الامور تمام"
هز راسه وهو مبتسم براحه...
🍃🍃🍃🍃
وتدخل الجهات الأمنيه..
وبعد ماخدوا اقوال بلال وولد صاحب الورشه اللي قال شكوكه بخصوصه صحاب بلال..
ومشوا داهموا الهنقر...
وبعد مافتشوه..
لقوه فيه حاجات مسروقه..
نظارات شمسيه...احذيه جديده في صناديقها والمكواة اللي كانت عند بلال بس..
وباقي الحاجات مالقوا منهم شي..
وقعدوا يستنوا فيهم لين روحوا..
واعتقلوهم ع طول...
🍃🍃🍃🍃🍃
بلال كان يشوف للمكواة المحطوط قدامه وهو مصدوم ويسمع في المهدي شن يقوله..
باقي الحاجات مالقوهاش..
صاحب الورشه:اكيد تصرفوا فيهم..
بلال شبح للمهدي وقال..
اعترفوا انهم داروها..
المهدي؛بعد اللي تشوف فيه قدامك ومازال مش مصدق!؟
نزل بلال عيونه للمكواة وكان باين عليه انه متحطم..
كل شي تفركس..الزواج مش حيصير منه قبل رمضان واصدقائه اللي كانوا مهونين عليه الغربه هما اول من طعنه وخربوا عليه فرحته ع حسب ماكان ظاهرله وقتها...
🍃🍃🍃🍃🍃
"مسكين وجعني قال لطفي كان ديما يهدرز ع حويشه شن دار فيه وع عرسه شن بيدير فيه.."
طوبى بحزن:قلبي وجعني عليه هلبه..
فردوس:هو صح يوجع بس اني استريحت بعد ماشدوا المخانب..
مطيره:مازال مافي شي واضح..
غرفه بقلق؛اني قاعده نخمم ع حوشي مافيه حد قداش ليه..
مطيره:ايه والله صح راح عن بالي بكل..تو بعدين نمشي اني وبوك ولاحسين نشوفوه..
غرفه هزت راسها وهي ساكته..
سكتوا شويه بعدين طوبى قالت..
بابا وين مشي؟
مطيره:جدك نادى عليه..
شبحوا البنات لبعض..
ومطيره تمرر عليهم في نظرها وهي مبتسمه...
🍃🍃🍃🍃
"تبيني ناخد من بناويتي يابوي"
علي:اللي يسمع يقول بتاخد بفلوسهم مراة تانيه..هما قالوا يبوا يكونوا مساهمات..
لطفي بضيق؛باهي وساهموا وحطوا اللي عندهم كان ماصارش منه يطلعوا بخسارة اللي حطوه كله يريح عليهم!؟لالا يابوي صعب صعب هلبه..
لطفي:لامش صعب مش صعب بكل تعرف قداش لينا في الصنعه مانخسروش بعون الله..
لطفي:باهي مافكرتش في نساباتي شن يقولوا عليا بعد يعرفوا ان نساوينهم حطوا فلوسهم في المطحن..
علي:مش فلوسهم ياودي قتلك مش فلوسهم فلوس بناويتك..
لطفي بقهر:بدال مانعطيهم ناخد منهم..
علي:انت ياما عطيت يالطفي وتوا جي دورك تاخد..وبعدين انت مفروض تفرح بيهم وترفع راسك..
في اللي يجيب راجل وفي اللي يجيب بنت بألف راجل وانت ربك خدي من واحد وعوضك بأربعه..اربعه الاف راجل يالطفي جيش وراك ساندك..
ابتسم لطفي بألم ونزل راسه..
علي:افرح ببناويتك افرح..صبرك والتضحيات اللي درتها ع خاطرهم ماكانتش بلاش..
رفع لطفي راسه لبوه وقال؛بوي انت ماكنتش راضي من الأول..علاش ماقلتش؟!
علي؛المطحن هدا ليكم انتم وانت اكثر من تعب فيه وشن ماتبي دير فيه اني معاك حتى لو ماكنتش راضي..
نزل لطفي راسه وقعد يفكر في كلام بوه وصدره ضايق لأبعد حد...
🍃🍃🍃🍃🍃
الساعه5:30بعد العصر...
عبد القيوم وبلال كانوا مروحين من الجامع وواحد فيهم يواسي في التاني..
عبد القيوم:ماتكدرش روحك خليها ع ربك وان شاء الله يفرجها
بلال بضيق؛متحشم منك والله خسرت بسببي..
عبد القيوم بضحكه؛غير شن تقول بس..فداك ياراجل..
وصلوا للورشه وعبد القيوم يقول..
اخدم خدمتك ومعاش تفكر واجد..
بلال هز راسه وقال؛احاول..
طبطب عبد القيوم ع كتفه وقال؛ربي يعاونك..السلام عليكم..
بلال:وعليك السلام..
ومشي عبد القيوم بطريقه للقهوة..
جو عيونه ع حسين وهو طالع من الحوش ناداه..
اوي..حسين...
شافله حسين ومشاله..
وقف عليه وتصافحوا وبعد السلام..
عبد القيوم:ماحكيتش عن قصة تسكيرة المطحن قبل.
حسين بضيق:والله ماكنت نبي ندوي لحد الموضوع يكدر ياراجل..
عبد القيوم هز راسه وقال؛معاك حق..باهي على شن ناويين ؟
حسين؛بتفتحوا محل مواد غذائيه في الشارع اللي ورانا متشاركين فيه حني وراجل يعرفه عمي..
عبد القيوم؛ربي يفتحها عليكم ان شاء الله..هي مانعطلكش عن مشوارك..
حسين:تو نجيك اليوم الجايات..
عبد القيوم؛تفضل في أي وقت..السلام عليكم..ومشي بإتجاه القهوة..
وحسين رد السلام..ولف ومشي لسيارته ركبها بعدين شغلها وطلع بيها من الشارع...
🍃وبعيد عن شارع القهوة...
في مكان زي ساحة الملاعب..
كان محمد ولد خديجه مع جماعته وهو يحتفوا بإنجازهم القذ.ر
:باهي ياولاد توا الشارع بنخطوا فيه..
كبيرهم قال:ايه خلاص شارع القهوة طلعوا من حساباتكم..
جبد نفس من الدخان وقال..
في بالي ضربة قويه هلبه كاملة الدسم..
واحد منهم قال:وين تبيها هادي!؟
:في محل..
:محل شني؟
ابتسم بشر وقال..
محل ذهب..
:لالا فكنا فوت خلينا في الحاجات الساهله..
:لامش صعبه بكل محمد زي ماسهل علينا اللي قبلها بيسهل علينا هادي..
كلهم شبحوله وهو استغرب وقاله؛اني؟
؛ايه انت ياعقلنا المدبر المحل اللي ناويه انت تعرفه كويس..
محمد محي بآستغراب؛محل شني!؟
وهو مبتسم قاله..محل ذهب..
محمد:ذهب!؟
رد عليه يقول..
"ايه ايه..ذهب...محل خالك ياراس"
#مقاومه
#طوبى
....يتبع...
